Yesus nomposambaya korona mboto
17
Naopu Yesus notesa iwetu nantingoamo Iꞌa ri langi pade nosambaya iweꞌi: “Umaku, naratamo tempona. Popokitamo kuasa bo kagaya nu Anamu ala Anamu woꞌu mamala mompopokita kuasa bo kagayamu.
2 Komi nombawai ka Aku kuasa moparenta pura-pura manusia ala Aku mamala mombawai katuwua mabelo sampe ri kasae-saena ka tau-tau to niwaimu ka Aku.
3 Iweꞌimo sampe manusia matuwu mabelo sampe ri kasae-saena: Ira mosinjani ante Komi, Alatala to nakonona to sambaꞌa lau, pade ira mosinjani woꞌu ante Yesus Kristus to nipakaumu etu.
4 Aku nompopokita kuasa bo kagayamu riara dunia eꞌi ante nompakaopu panggawia to niparasayamu ka Aku.
5 Weꞌi-weꞌi, Uma, Aku merapi wai ka Akumo kuasa bo kagayaku ri ngayomu nasimbayu ewa kuasa bo kagaya to naria ri jaꞌiku mpasanggani-nggani ante Komi tempo dunia daꞌapa nipajadi.”
Yesus nomposambaya anaguruna
6 “Uma, nipopanjanikumo Komi ka tau-tau to niwaimu ka Aku nggariara dunia eꞌi. Ira etu bagiamu mamimo. Pade ira woꞌu niwaimu ka Aku, pade nituki iramo tesamu.
7 Weꞌi-weꞌi ninjani iramo nuapa pura to niwaimu ka Aku mpuꞌu-mpuꞌu nopuꞌu nggari jaꞌimu, Uma.
8 Sabana pura-pura tesa to niulimu ka Aku nipasimbayuku ka ira, pade tesa-tesa etu nitarima iramo. Nanotomo ka ira Aku narata nggari jaꞌimu, pade niparasaya ira woꞌumo Komi to nompakau Aku.
9 Aku mosambaya ka ira anaguruku eꞌi. Daꞌa pura-pura manusia to niposambayaku tapi aga ira to niwaimu ka Aku, sabana ira etu mpuꞌu-mpuꞌu bagiamu.
10 Pura-pura tau to najadi bagiaku, ira woꞌu najadi bagiamu. Pade pura-pura tau to najadi bagiamu woꞌu najadi bagiaku. Pade kuasa bo kagayaku nanoto nikita riara nggatuwu ira.
11 Mana masaeka Aku metoꞌo ri dunia eꞌi. Aku kana malau mpaka ri jaꞌimu tapi ira danetoꞌo ri dunia eꞌi. O, Umaku to nagasa. Jagaimo ira ante kuasamu mboto, kuasa to niwaimu ka Aku. Jagaimo ira ala ira mosaongu rara nasimbayu ewa Komi bo Aku woꞌu nosaongu rara.
12 Tempo Aku danosanggani-nggani ante ira Akumo to nombajagai ira ante kuasamu, etumo kuasa to niwaimu ka Aku. Nijagaiku ira sampe daꞌa ria ntanina to natontona, aga iꞌa to masipato matonto sampe ri kasae-saena. Etu najadi ala madupa nuapa to nitulisi riara Buku Nagasa. a
13 Weꞌi-weꞌi Aku malau mpaka ri jaꞌimu, Uma. Pura-pura eꞌi nitesaku ka anaguruku tempo Aku danaria riara dunia eꞌi ala ira mpuꞌu-mpuꞌu madamba ante kadamba nu rara nggari jaꞌiku mboto.
14 Uma, nipasimbayuku ka iramo tesamu. Pade tau-tau riara dunia eꞌi nompokarau ira, sabana anaguruku etu daꞌa nosaongu pekiri ante ira nasimbayu ewa Aku woꞌu daꞌa nosaongu pekiri ante tau-tau etu.
15 Aku daꞌa nerapi ala Komi mangala ira nggari dunia eꞌi. Tapi kuperapi ala Komi mombajagai ira nggari Magau nu Seta.
16 Ira daꞌa nosaongu pekiri ante tau-tau daꞌa nomparasaya nasimbayu ewa Aku woꞌu daꞌa nosaongu pekiri ante tau-tau etu.
17 Pajadimo ira bagiamu to nagasana, Uma, ante mompatuduki ka ira pepatuduki to nakonona. Tesamu, Uma, etumo pepatuduki to nakonona.
18 Nasimbayu ewa Komi nompakau Aku nomai riara dunia eꞌi, iwetu woꞌu Aku nompakau ira malau mpaka ri jaꞌi tau ntanina riara dunia eꞌi.
19 Uma, Aku mombawai koroku mboto manjaliku ira ala ira woꞌu mamala majadi bagiamu to nagasana ante mangginjani pepatuduki to nakonona.”
Yesus nosambaya ka pura-pura topomparasaya Iꞌa
20 “Daꞌa aga anaguruku eꞌi kuposambaya, tapi Aku woꞌu mosambaya ka pura-pura tau to momparasaya Aku banepia ante mangepe tesa-tesa to rapatolele anaguru-anaguruku eꞌi.
21 Uma, kuperapi ala ira pura-pura mosaongu rara. Nasimbayu ewa Aku nosaongu rara ante Komi bo Komi nosaongu rara ante Aku, kuperapi ala ira woꞌu mosaongu rara ante Kita ala pura-pura tau momparasaya Komimo to nompakau Aku eꞌi.
22 Niwaiku ka iramo kuasa to niwaimu ka Aku ala ira mosaongu rara nasimbayu ewa Kita woꞌu nosaongu rara.
23 Aku nosaongu rara ante ira pade Komi nosaongu rara ante Aku ala ira mpuꞌu-mpuꞌu mosaongu rara. Ane iwetu kana manoto ka pura-pura manusia Komimo to nompakau Aku pade Komi to nompotowe ira nasimbayu ewa Komi nompotowe Aku.
24 Uma, to nipodotaku ala tau-tau to niwaimu ka Aku etu mamala mosanggani-nggani ante Aku ala rakita ira kuasa bo kagayaku; etumo kuasa bo kagaya to niwaimu ka Aku sabana Komi nompotowe Aku nggari lamba pamulana daꞌapa dunia nipajadi.
25 O, Umaku to nanoana. Manusia riara dunia eꞌi daꞌa nosinjani ante Komi, tapi Aku nosinjani ante Komi. Pade anaguruku eꞌi nangginjani Komimo to nompakau Aku.
26 Nipopanjaniku ka iramo Komi, Uma. Pade Aku bate-batena mompopanjani Komi ka ira ala towemu to naria ri jaꞌiku bate-batena maria woꞌu ri jaꞌi ira, pade ala Aku mboto mamala mosaongu rara ante ira.”