YESUS NAMATE NIPAKU RI KAYU PARIKA PADE NATUWU BALI RI EO KATOLUEONA (Pasal 18-21)
Yesus nisoko
18
Naopu Yesus nosambaya nalaimo Iꞌa ante anaguru-anaguruna mpaka ri sambote salu ue to nosanga ka Ue Kidron. Ri setu naria saongu pampa. Yesus ante anaguruna nalau nesua riara pampa etu.
2 Yudas, to nompobalu Yesus etu, nangginjani pampa etu sabana Yesus bo anaguruna naoso nasiromu ri setu.
3 Jadi naratamo iꞌa ri setu nanggeni salunu tantara Roma bo topojaga Sapo Mpepue to nipakau balengga-balengga topanggeni agama bo tau-tau to Parisi. Ira narata nanggeni poindo, sulo bo parewa mposipatesi.
4 Ninjani Yesus puramo nuapa to majadi ri korona. Jadi nalaumo Iꞌa nompakamosu tau dea etu pade nekutana ka ira, “Isema to nielo komi?”
5 Nesonomo ira, “Yesus to Nazaret.”
Nesonomo Yesus, “Aku eꞌimo Iꞌa.” Yudas topobalu Yesus etu woꞌu nenggore ri tatongo ntau dea etu.
6 Tempo Yesus nanguli ka ira, “Aku eꞌimo Iꞌa,” nokanggaura ntalikumo tau dea etu pade nadungga sangganimo ira.
7 Pade Yesus nompekutana ira sangganipa, “Isema to nielo komi?”
Nesonomo ira, “Yesus to Nazaret.”
8 Pade nangulimo Yesus, “Niulikumo ka komi paniꞌa, Aku eꞌimo Iꞌa. Jadi ane Akumo to nielo komi, palambamo roaku eꞌi malai.”
9 Ante pantesana etu nadupamo tesa to niuli Yesus paniꞌa, “Uma, nggari pura-pura topantuki to niwaimu ka Aku daꞌa ria sambaꞌa to natontona.” a
10 Nanggita kajadia etu i Simon Petrus nombabitu gumana pade nitimbena sambaꞌa batua nu Balengga Topanggeni Agama to nosanga ka i Malkhus sampe napudumo talinga ngganana.
11 Tapi nangulimo Yesus ka i Simon Petrus, “Boli mpanjilimo gumamu riara walombona! Iwenumo? Niulimu kupoara kasusa eꞌi to niwai Umaku ka Aku?”
Yesus nikeni ri ngayo Balengga Topanggeni Agama
12 Naopu etu tantara-tantara Roma ante tadulakona bo topojaga Sapo Mpepue nombasoko Yesus pade nombasoꞌo Iꞌa.
13 Pade Yesus pamulana nikeni ira mpaka ri jaꞌi Hanas, matuꞌa langgai i Kayafas. Kayafas etumo to najadi Balengga Topanggeni Agama mpae etu.
14 Iꞌamo to nanguli ka topanggeniaka nto Yahudi bopia, “Nabelopa sambaꞌa tau mamate manjaliku todea.”
Petrus nombasapu Yesus
15 Simon Petrus bo sambaꞌa anaguru Yesus ntanina nantuki Yesus. Anaguru Yesus to sambaꞌana etu nosinjani ante Balengga Topanggeni Agama. Jadi iꞌa namala nesua mpasanggani-nggani ante Yesus ri lalowo sapo nu Balengga Topanggeni Agama etu.
16 Tapi i Petrus nopea ri sawalikuna namosu pewobo wala. Jadi anaguru Yesus ntanina to niposinjani Balengga Topanggeni Agama etu nesuwu mpaka ri sawalikuna. Pade notesamo iꞌa ka besi to nanggatono pewobo ala i Petrus rapaloga mesua riara wala etu. Pade nikenina i Petrus nesua riarana.
17 Nanggita i Petrus nangulimo besi topanggatono pewobo etu ka iꞌa, “Iwenu? Daꞌa iko woꞌu sambaꞌa anaguru ntau yaꞌa?”
Nesonomo i Petrus, “Daꞌa!”
18 Nggawengina etu naleni mpuꞌu. Jadi bara sakuya mbaꞌa batua bo topojaga Sapo Mpepue nompakawaa apu nggari wuri niponeru ira ri lalowo etu. Pade i Petrus woꞌu nenggore mpasanggani-nggani ante ira noneru ri apu etu.
Balengga Topanggeni Agama nomparesa Yesus
19 Tempo etu nompamulamo Balengga Topanggeni Agama nompekutana Yesus, “Isema pura anagurumu, pade nuapa pura nipatudukimu ka ira?”
20 Nesonomo Yesus, “Aku nabiasa nompatuduki ante nanoto ri ngayo ntau dea. Aku batena nompatuduki riara sapo mpodade bo riara Sapo Mpepue, petoꞌo tau to Yahudi nasiromu. Daꞌa ria sanggani Aku notesa nggalino.
21 Jadi nuapa sabana komi nompekutana Aku? Agina komi mompekutana tau dea to nangepe Aku nuapa to nitesaku ka ira. Iramo to nangginjani nuapa to nitesaku etu.”
22 Tempo Yesus notesa iwetu naria sambaꞌa topojaga Sapo Mpepue to nekanggore namosu ante Yesus nombasapa lenje Yesus, pade niulina, “Daꞌa nabelo Iko nombasono balengga topanggeni agama iwetu!”
23 Nesonomo Yesus, “Ane nasala tesaku, tesa mpakanotomo nuapa to nasalana. Tapi ane nakono tesaku etu, nuapa sabana komi nombasapa Aku?”
24 Naopu etu i Hanas nompakau tau manggeni Yesus ante palena nisoꞌo malau mpaka ri jaꞌi Kayafas to najadi Balengga Topanggeni Agama mpae etu.
Petrus nombasapu Yesus woꞌumo
25 Tempo etu i Simon Petrus danoneru mpekanggore ri setu. Pade naria woꞌumo tau nanguli ka iꞌa, “Iwenu? Daꞌa iko woꞌu sambaꞌa anaguru ntau yaꞌa?”
Tapi nesapumo i Petrus, “Daꞌa!”
26 Naria woꞌumo sambaꞌa batua Balengga Topanggeni Agama ri setu to nawela raposampesuwu tau to nitimbe i Petrus talingana sampe napudu pangane. Nangulimo tau etu ka i Petrus, “Daꞌa iko to nikitaku ri pampa nosanggani-nggani ante Yesus pangane?”
27 Tapi nesapu woꞌumo i Petrus, “Daꞌa!” Iwetu i Petrus notesa kaliu-liu noraꞌomo manu.
Yesus ri ngayo Gubernur Pilatus
28 Dabobayana mpuꞌu Yesus nikeni iramo nggari sapo i Kayafas nalau mpaka ri sapo Gubernur. Topanggeniaka-topanggeniaka nto Yahudi daꞌa nesua riara sapo Gubernur etu, sabana ira daꞌa madota majadi matantoru nantuki Atura-atura agama ira. Nipowia ira iwetu ala ira mamala manggoni panggoni Posusa Paska ngina. b
29 Sabana etu i Pilatus nesuwu mpaka ri sawalikuna nosirata ka ira, pade nipekutanana ka ira, “Nuapa sala ntau eꞌi nipangadu komi?”
30 Nesonomo ira, “Ane Iꞌa daꞌa tau najaꞌa natantu kami daꞌa madota manggeni Iꞌa ri jaꞌi komi, Uma.”
31 Nanguli i Pilatus ka ira, “Ala komimo Iꞌa, pade ratangara komi mbotomo salana nantuki Atura-atura agama komi!”
Tapi nesonomo tau-tau to Yahudi etu, “Kami daꞌa nipaloga mombasuku tau sampe mamate.”
32 Etu najadi ala madupa tesa to niuli Yesus bopia nombaboto jala nggamatena. c
33 Nangepe etu nesua woꞌumo i Pilatus mpaka riara njapona pade nipakauna tau manggeni Yesus ri jaꞌina. Pade nipekutanana ka Yesus, “Komimo Magau nto Yahudi?”
34 Nesonomo Yesus, “Pekutana etu nggari jaꞌi komi mboto, atau naria tau nanguli ka komi ewa Aku?”
35 Nanguli i Pilatus, “Aku eꞌi daꞌa tau to Yahudi! Tau-tau to Yahudi bo balengga-balengga topanggeni agama mbotomo to nanggeni Komi ri jaꞌiku. Sala nuapa ntoto nikawiamu?”
36 Nesonomo Yesus, “Poparentaku daꞌa nggari dunia eꞌi. Ane rapana Aku magau nggari dunia eꞌi natantumo topantuki-topantuki Aku kana meewa ala Aku neꞌe rasoko bo rakeni ri jaꞌi topanggeniaka-topanggeniaka nto Yahudi. Tapi poparentaku daꞌa nggari dunia eꞌi.”
37 Pade nekutana woꞌumo i Pilatus ka Iꞌa, “Ane iwetu tanu, magau mpuꞌu Komi?”
Nesonomo Yesus, “Ewa niuli komi etu nakono, Aku eꞌi sambaꞌa magau. Aku nipoanaka pade nomai riara dunia ante patuju mompatolele pepatuduki to nakonona. Isema-sema to natundu riara pepatuduki to nakonona, ira etumo to nompetalinga Aku.”
38 Nekutanamo i Pilatus, “Nuapa ntoto pepatuduki to nakonona?”
Yesus nitangara kana mamate
Naopu etu nesuwu woꞌumo i Pilatus nggariara njapona mpaka ri sawalikuna, pade niulina ka tau-tau to Yahudi, “Daꞌa ntoto naria sangaya sala ntau etu nirataku.
39 Tapi nantuki kabiasa komi, ane Eo Bete Paska aku kana manggabasaka ka komi sambaꞌa tau nitarunggu. Madota komi kukabasaka ka komi Magau nto Yahudi etu?”
40 Tapi nongaremo ira ante suara namangga, “Neꞌe! Neꞌe Iꞌa rakabasaka! Agina i Barabas rakabasaka ka kami!” Barabas etu sambaꞌa parampo.