Yudas nompatesi korona mboto
27
Kampadondo njiina balengga-balengga topanggeni agama bo totuꞌa-totuꞌa nto Yahudi nasiromu nolibu nompakatantu Yesus kana rapatesi.
2 Ira nombasoꞌo Iꞌa pade nanggeni Iꞌa mpaka ri jaꞌi Gubernur Pilatus. Narata ri setu Yesus niwai ira ka i Pilatus.
3 Tempo Yudas to nompobalu Yesus nanggita Yesus nipakatantu kana rapatesi, nanjoso raramo iꞌa. Nalaumo iꞌa mpaka ri jaꞌi balengga-balengga topanggeni agama pade nipopanjilina ka ira tolumpulu mpeka doi salaka.
4 Niulina ka ira, “Nasilakamo aku eꞌi! Aku nompobalu sambaꞌa tau daꞌa ria salana sampe Iꞌa kana rapatesi!”
Nesonomo ira, “Etu daꞌa urusa kami! Urusamu mboto!”
5 Nangepe etu Yudas nantajiaka doi salaka etu riara Sapo Mpepue pade nalaimo iꞌa neloe.
6 Balengga-balengga topanggeni agama nantirunaka doi salaka etu pade niuli ira, “Doi eꞌi doi oli nu lei. Daꞌa namala rapasanggani ante doi nipasiromu ri Sapo Mpepue.”
7 Jadi nipakatantu ira doi etu rapake mangoli salimpu tana to niuli “Tana Ntopowia Kura” majadi tana rapombatana tau-tau daꞌa to Yahudi to mamate ri ngata Yerusalem.
8 Etu sampe tana etu niuli “Tana Nikabubu Nu Lei” sampe weꞌi-weꞌi.
9-10 Ante powia etu nadupamo tesa nabi Yeremia nggaolu to nanguli iweꞌi: “Olina to nipakatantu to Israel tolumpulu mpeka doi salaka. Pade doi etu nipake ira nangoli tana ntopowia kura. Etu najadi nantuki to niparenta i Pue ka aku.” a
Yesus ri ngayo Gubernur Pilatus
11 Tempo Yesus nantingayo Gubernur Pilatus nekutanamo Gubernur ka Iꞌa, “Komimo Magau nto Yahudi?”
Nesonomo Yesus, “Ewa to niuli komi etu, Uma, nakono.”
12 Tapi tempo balengga-balengga topanggeni agama bo totuꞌa-totuꞌa nto Yahudi nompangadu Iꞌa, daꞌa ria Iꞌa nenjui.
13 Etu sampe Gubernur Pilatus nekutana ka Iꞌa, “Daꞌa niepemu pura-pura tesa ira nompangadu Komi?”
14 Tapi Yesus daꞌa ntoto nesono kamba sambela sampe nasumara mpuꞌu rara Gubernur.
Yesus nitangara kana rapatesi
15 Butu-butu mpae tempo Eo Bete Paska Gubernur nabiasa nombakabasaka sambaꞌa tau to nitarunggu nantuki dota ntau dea.
16 Mpae etu naria sambaꞌa tau nitarunggu to ninjani ntau dea, sangana Yesus Barabas.
17 Jadi tempo i Pilatus nombatangara Yesus tau dea nasiromu. Pade nekutanamo i Pilatus ka ira, “Isema rapodota komi kukabasaka ka komi? Yesus Barabas atau Yesus to niuli Kristus?”
18 Niuli i Pilatus iwetu apa ninjaninamo topanggeniaka nto Yahudi nombawai Yesus ka iꞌa sabana nasiriati rara ira.
19 Tempo i Pilatus nekatoko ri petoꞌo mpotangara etu, naratamo sambaꞌa tau nanggeni tesa nggari jaꞌi rongo i Pilatus to nanguli iweꞌi: “Neꞌe mombagalo urusa tau to nanoana etu! Sabana nggari Iꞌa aku nombarata pangipi to nompakasusa raraku iwengi.”
20 Tapi balengga-balengga topanggeni agama bo totuꞌa-totuꞌa nto Yahudi nompakapane rara ntau dea ala ira merapi i Pilatus mombakabasaka ka ira i Barabas pade mombasuku Yesus kana mamate.
21 Nekutanamo i Pilatus ka tau dea, “Nggari ira rombaꞌa isema rapodota komi kukabasaka ka komi?”
Nesonomo ira, “Barabas!”
22 Pade nekutana woꞌumo i Pilatus, “Ane iwetu, nuapa kupowia ante Yesus to niuli Kristus?”
Nesonomo ira, “Paku Iꞌa ri kayu parika!”
23 Pade nekutana woꞌumo i Pilatus, “Nokuya? Kajaꞌana nuapa ntoto to nipowiana?”
Tapi ira aga nantambai nongare ante suara to neliu nggamangga, “Paku Iꞌa ri kayu parika!”
24 Kaopuna nanotomo ka i Pilatus daꞌa ria gunana mompapola motesa ka ira, sabana ira aga nantambai nongare-ngare, sakedika majadi kakanano. Jadi nialana ue niramana palena ri ngayo ntau dea ewa tandaina daꞌa iꞌa to nasala ane Yesus rapatesi. Pade niulina ka ira, “Aku daꞌa mombatanggu kamate ntau eꞌi. Etu kana ratanggu komi!”
25 Nesonomo tau dea, “Waꞌa mamimo! Damo kami bo muli-muli kami mombatanggu kamatena!”
26 Naopu etu i Pilatus nombakabasaka ka ira i Barabas. Pade nipakauna tantarana mombaporo Yesus pade mombapaku Iꞌa ri kayu parika.
Yesus nipongei-ngei tantara
27 Naopu etu tantara nu Gubernur nanggeni Yesus riara sapo Gubernur pade nipokio ira pura-pura roa ira nasiromu nantalili Iꞌa.
28 Niwonju iramo pakea Yesus pade nipopasua ka Iꞌa baju nalei ewa to nipake magau.
29 Nipowia ira songgo nggari karui pade nipoposonggo ka Iꞌa. Niwai ira ka Iꞌa sampeka lembau ri pale ngganana ewa lembau nisoko sambaꞌa magau. Pade nekadedemo ira ri ngayona nompongei-ngei Iꞌa ante nanguli, “Ratoiyata Magau nto Yahudi!”
30 Ira nantailu Iꞌa pade lembau ri palena niala ira nipombaboba balenggana.
31 Sangga naopupa ira nompongei-ngei Iꞌa iwetu, niwonju iramo baju nalei etu pade nipopasua bali ka Iꞌa pakeana mboto. Naopu etu Iꞌa nikeni ira mpaka ri sawaliku ngata ala rapaku ri kayu parika.
Yesus nipaku ri kayu parika
32 Ri tatongo jala ira nosintomu ka sambaꞌa tau nggari ngata Kirene to nosanga ka i Simon. Iꞌa nisoko ira pade nipasuꞌu ira nanjumbuaka kayu pomparika Yesus.
33 Napolamo ira sampe narata ri petoꞌo nosanga ka Golgota, batuana “Petoꞌo Wuku Balengga.”
34 Narata ri setu Yesus nipopoinu ka anggur nigalo ante pakuli to napaꞌi. Tapi iwetu nipetamina sakedi mana nadota Iꞌa nanginu.
35 Ri setumo ira nombapaku Yesus ri kayu parika. Naopu etu ira nombabagi pakeana ante nompenoa nowia nomoro. Isema nawela nomoro iꞌa nombarata pakea etu.
36 Naopu etu nekatokomo ira ri setu nombajagai Iꞌa.
37 Ri ntoto balenggana ri kayu parika etu nipataka ira dopi to nitulisi tesa pebata to nipawela ka Iꞌa iweꞌi: EꞌIMO YESUS, MAGAU NTO YAHUDI.
38 Ri setu naria woꞌu rombaꞌa parampo nipaku ri kayu parika ntanina mpasanggani-nggani ante Yesus, sambaꞌa ri sabingga ngganana, pade sambaꞌapa ri sabingga njidina.
39 Tau-tau to noliu ri setu nanguli sinjaꞌi Iꞌa pade nombawiri mata ka Iꞌa.
40 Ira nanguli, “Niulimu Iko mamala mombagero Sapo Mpepue pade mombabanguna mpanjili riara tolu eo! Ane Iko mpuꞌu-mpuꞌu Ana nu Alatala, pakasalama koromu mboto! Panaꞌumo nggari kayu parika etu!”
41 Iwetu woꞌu balengga-balengga topanggeni agama bo guru-guru agama ante totuꞌa-totuꞌa nto Yahudi nompongei-ngei Iꞌa. Niuli ira,
42 “Tau ntanina namala nipakasalamana. Tapi kita weꞌi! Korona mboto daꞌa namala nipakasalamana! Ane Iꞌa mpuꞌu-mpuꞌu Magau nto Israel, agina Iꞌa manaꞌu nggari kayu parika pade kami momparasaya Iꞌa!
43 Iꞌa nanjarumaka Alatala pade niulina Iꞌa Ana nu Alatala! Jadi kamaimo kita manggita ane Alatala madota mompakasalama Iꞌa weꞌi-weꞌi!”
44 Pade parampo-parampo to nipaku ri kayu parika mpasanggani ante Yesus woꞌu nanguli sinjaꞌi Iꞌa iwetu.
Kamate Yesus
45 Nompamula nggari katongo nu eo narumaumo eo ri njumaongu tana etu sampe ri tinti toluongu ngguwiana.
46 Kira-kira tinti toluongu ngguwiana etu, nongaremo Yesus ante suara namangga, “Eli, Eli, lama sabakhtani?” Batuana, “Alatalaku, Alatalaku, nokuya Komi nompalasi Aku?”
47 Sangga nangepe etu nangulimo bara sakuya mbaꞌa tau ri setu, “Iꞌa nompokio nabi Elia!”
48 Pade nangowamo sambaꞌa nggari tatongo ira nasalisa nangala sangele wunga to nasimbayu ante lumu nibanggana riara anggur napoi. Naopu etu niumpuna ante wolo nipopoinuna ka Yesus.
49 Tapi naria tau ntanina nanguli, “Neꞌepa ruru! Rakitata ane nabi Elia marata mompakasalama Iꞌa!”
50 Naopu etu nongare woꞌumo Yesus ante suara namangga, pade nalaimo nosana.
51 Ri tempo etu woꞌu naseri ntongomo kae powombo ri Sapo Mpepue nggari baꞌana narata ri wayona. Pade naria woꞌu lingu bete bo watu-watu bete natebingga.
52 Dayo-dayo natebuka pade nadea topomparasaya to namatena natuwu bali
53 pade nesuwu nggariara dayo-dayo etu. Pade naopu Yesus natuwu bali nesuamo ira riara ngata Yerusalem, ngata to nagasana, pade nadea tau ntanina nanggita ira.
54 Tempo balengga tantara bo tantara-tantarana to nombajagai Yesus ri setu nangepe lingu bete etu pade nanggita nuapa-nuapa to najadi ri setu, naeka mpuꞌumo rara ira. Niuli ira, “Mpuꞌu-mpuꞌu tau eꞌi Ana nu Alatala!”
55 Ri setu naria woꞌu nadea besi to nenggore neantoaka nggawao. Iramo besi-besi to nantuki Yesus pade nantulungi Iꞌa nompamula nggari bagona ri Bagia Galilea.
56 Ri tatongo ira naria i Maria Magdalena pade i Maria indo Yakobus bo Yusuf, pade indo ana-ana i Zebedeus.
Yesus nitana
57 Tempo ntora nasolomo eo naratamo sambaꞌa tau nasugi nggari ngata Arimatea to nosanga ka Yusuf. Yusuf eꞌi woꞌu sambaꞌa topomparasaya Yesus.
58 Nalaumo iꞌa mpaka ri jaꞌi Pilatus nerapi watabaku Yesus. Nangepe pomperapi etu i Pilatus nompakau tantarana nombawai watabaku Yesus ka Yusuf.
59 Pade Yusuf nangala watabaku Yesus etu, nisompuna ante kae gandisi to nalusuna
60 pade nibolina riara dayona mboto to lako nipaꞌa ri saongu bulu watu. Naopu etu niluliakana woꞌu saongu watu bete nipombapiku pewobo dayo etu, pade nalaimo iꞌa.
61 Tempo etu i Maria Magdalena ante i Maria ntanina nekatoko ri ngayo dayo etu.
Dayo Yesus nikatono tantara-tantara
62 Naeompadondona ri Eo Mpenonto nalaumo balengga-balengga topanggeni agama bo tau-tau to Parisi mpaka ri jaꞌi Pilatus.
63 Narata ri setu nangulimo ira, “Uma, nitora kami tesa topebagiu etu tempo Iꞌa danatuwu. Niulina, ‘Ri eo katolueona Aku kana matuwu bali.’
64 Jadi etu sampe kami merapi ala komi mompakau tantara-tantara malau manggatono dayona ria sampe eo katolueona ala neꞌe-neꞌe anaguruna malau mangala watabakuna pade manguli ka tau dea, ‘Natuwu balimo Iꞌa!’ Ane etu majadi bagiu kaopuna meliu nggajaꞌa nggari bagiuna pamulana.”