19
Naopu etu i Pilatus nompakau tantara-tantarana mombaporo Yesus.
2 Naopu nombaporo Iꞌa, tantara-tantara etu nompowia saongu songgo nggari karui pade nipoposonggo ira ka Yesus. Naopu etu nipasua ira ka Iꞌa santonga baju nakamumu ewa baju magau.
3 Pade ira tunggai nompakamosu Yesus nompongei-ngei Iꞌa ante nanguli, “Ratoiyata Magau nto Yahudi!” Pade nisapa-sapa iramo lenje Yesus.
4 Naopu etu nesuwu woꞌumo i Pilatus mpaka ri sawalikuna nanguli ka tau-tau to Yahudi, “Kita komimo! Iꞌa kukeni mesuwu mpaka ri jaꞌi komi ala ranjani komi daꞌa ntoto naria salana nirataku.”
5 Pade Yesus nikeni nesuwu ri sawalikuna nosonggo karui bo nobaju magau nakamumu. Pade nangulimo i Pilatus ka tau dea etu, “Kitamo! Eꞌimo Iꞌa!”
6 Sangga nanggita Yesus nongare-ngaremo balengga-balengga topanggeni agama bo topojaga-topojaga Sapo Mpepue, “Pakumo Iꞌa ri kayu parika! Pakumo Iꞌa ri kayu parika!”
Nangulimo i Pilatus ka ira, “Ala komi mbotomo Iꞌa, pade paku Iꞌa ri kayu parika, sabana tau etu daꞌa ntoto naria salana nirataku.”
7 Nesonomo tau-tau to Yahudi ka iꞌa, “Nantuki Atura-atura kami tau eꞌi masipato rapatesi sabana Iꞌa nompangaku korona Ana nu Alatala!”
8 Sangga nangepe pantesa tau-tau to Yahudi etu nantambai kaeka rara i Pilatus.
9 Jadi nesua balimo iꞌa riara njapona pade Yesus woꞌu nikeni nesua ri setu. Pade nekutanamo i Pilatus ka Yesus, “Tau nggari umba kakonona Komi eꞌi?” Tapi Yesus daꞌa nesono.
10 Jadi nanguli woꞌumo i Pilatus ka Iꞌa, “Iwenumo? Daꞌa madota Komi motesa ante aku? Daꞌa ninjanimu aku eꞌi nakuasa mombakabasaka Komi, pade nakuasa woꞌu mombapaku Komi ri kayu parika?”
11 Nesonomo Yesus, “Daꞌa ntoto ria kuasamu ri jaꞌiku ane daꞌa niwai Alatala ka komi. Jadi tau-tau to nanggeni Aku ri jaꞌimu neliu mpuꞌu kabete silaka ira.”
12 Sangga i Pilatus nangepe pantesa Yesus etu, nielonamo jala ala Yesus mamala rakabasaka. Tapi nongare woꞌumo tau-tau to Yahudi, “Ane komi mombakabasaka tau etu komi daꞌa nowega ante Magau Kaisar! Isema-sema nompangaku korona sambaꞌa magau, iꞌamo bali Magau Kaisar!”
13 Nangepe tesa tau-tau to Yahudi etu, nikeni i Pilatusmo Yesus mpaka ri sawalikuna pade nekatokomo iꞌa ri kadera mpotangara to nosanga ka “Jaula Watu.” Ane riara Basa Ibrani sangana “Gabata.”
14 Tempo etu nawela eo mpompakasadia tempo Posusa Paska, kira-kira ntongo eo. Nangulimo i Pilatus ka tau-tau to Yahudi, “Eꞌimo magau komi!”
15 Tapi nongare-ngaremo ira, “Patesimo Iꞌa! Patesimo Iꞌa! Pakumo Iꞌa ri kayu parika!”
Nanguli i Pilatus ka ira, “Iwenu? Masipato aku mombapaku magau komi ri kayu parika?”
Nesonomo balengga-balengga topanggeni agama, “Aga Magau Kaisar magau kami!”
16 Kaopuna i Pilatus nombawai Yesus ka tau-tau to Yahudi ala Iꞌa rapaku ri kayu parika sampe mamate.
Yesus nipaku ri kayu parika
Pade Yesus nikeni tantara-tantara nggari setu.
17 Nalaimo Iꞌa nggari ngata etu ante nanjumbuaka mboto kayu rapomparika Iꞌa mpaka ri petoꞌo to nosanga ka Petoꞌo Wuku Balengga. Ane riara Basa Ibrani sangana “Golgota.”
18 Ri setumo Yesus nipaku ira ri kayu parika. Nosanggani-nggani ante Iꞌa naria woꞌu rombaꞌa tau ntanina to nipaku ri kayu parika, sambaꞌa ri sabingga ngganana, sambaꞌa ri sabingga njidina pade Yesus ri tatongona.
19 Naria dopi nitulisi nipakasadia i Pilatus to nipataka ri kayu pomparika Yesus to nanguli iweꞌi: YESUS TO NAZARET, MAGAU NTO YAHUDI.
20 Dopi nitulisi etu nibasa nadea tau to Yahudi sabana petoꞌo Yesus nipaku ri kayu parika etu namosu ngata Yerusalem, pade tesa etu nitulisi riara tolungaya basa, etumo Basa Ibrani, Basa Latin, a pade Basa Yunani.
21 Nanggita etu nangulimo balengga-balengga topanggeni agama ka i Pilatus, “Neꞌe ratulisi komi ‘Magau nto Yahudi.’ Agina ratulisi komi ‘Tau eꞌi nompangaku korona Magau nto Yahudi.’”
22 Tapi nesonomo i Pilatus, “Nuapa to nitulisiku etu, batena etumo!”
23 Naopu tantara-tantara nombapaku Yesus ri kayu parika ira nangala pakeana pade nibagi-bagi ira patabagia, simbau sabagia. Baju nggumbana woꞌu niala ira, tapi baju etu daꞌa naria pojauna, aga nitanu waꞌamo santonga lau.
24 Etu sampe tantara-tantara etu nanguli, “Neꞌe raserita baju nggumba eꞌi. Agina kita mompenoa mowia nomoro. Isema mawela nomoro iꞌa mombarata baju eꞌi.” Etu pura-pura najadi ala madupa tesa to nitulisi riara Buku Nagasa to nanguli iweꞌi:
“Ira nosibagi-bagi ka pakeaku,
pade bajuku nipompenoa ira.” (Mzm. 22:19)
Jadi nuapa to nipowia tantara-tantara etu nasimbayu ntoto ewa to nitulisi nggaolu.
25 Namosu ri puꞌu kayu pomparika Yesus etu indona nenggore mpasanggani-nggani ante sampesuwu besi nu indona. Naria woꞌu i Maria rongo i Klopas pade i Maria Magdalena.
26 Sangga Yesus nanggita indona nenggore ri setu ri sinjori anaguruna to nipotowena, niulinamo ka indona, “Nindo, etumo anamu.”
27 Pade niulina woꞌumo ka anaguruna etu, “Etumo indomu.” Jadi nompamula nggari eo etu, anaguru etu nantarima indo Yesus netoꞌo riara njapona.
Kamate Yesus
28 Ninjani Yesus naopumo mpengele-ngele bagona. Jadi notesamo Iꞌa ala madupamo tesa to nitulisi riara Buku Nagasa. Niulina, “Nabai tamboloku.” b
29 Ri setu naria saongu tubu niisi ante ue anggur to napoi. Jadi naria tau nangala sangele wunga to nasimbayu ewa lumu nitome ira riara ue anggur etu. Naopu etu nitosupaka ira wunga etu ri wuntu sanggoto kayu pade nipopoinu ira ka Yesus.
30 Naopu Yesus nanjasipi anggur etu niulina, “Naopu puramo bagoku.” Naopu etu notunggoumo balenggana pade nalaimo nosana.
Usu Yesus nitosu ante tawala
31 Eo etu eo mpompakasadia ka Eo Mpenonto, pade Eo Mpenonto etu nawela Posusa Paska nto Yahudi. Topanggeniaka-topanggeniaka nto Yahudi daꞌa madota watabaku ntau nipaku ri kayu parika etu rapakela makambero ri setu tempo Eo Mpenonto. Jadi etu sampe ira nerapi ka i Pilatus ala kada tau-tau nipaku ri kayu parika etu raboba mpakakoto ala tau-tau etu masalisa mamate pade watabaku ira masalisa rataꞌuraka nggari kayu parika.
32 Jadi nalaumo tantara-tantara nombaboba mpakakoto kada-kada tau rombaꞌa to nipaku ri kayu parika mpasanggani-nggani ante Yesus.
33 Tapi tempo ira narata ri jaꞌi Yesus nikita ira namatemo Iꞌa. Jadi daꞌa najadi ira nombaboba mpakakoto kada Yesus.
34 Aga naria sambaꞌa nggari tatongo tantara etu nombatosu usu Yesus ante tawalana. Pade kaliu-liu nesuwumo lei ante ue nggari usu Yesus.
35 Tau to nanggita kajadia etu ante matana mboto, iꞌamo to nompatolele kajadia etu ka komi ala komi woꞌu momparasaya. Nakonomo tesana etu pade ninjanina mbotomo tesana etu nakono.
36 Pura-pura etu najadi ala madupa nuapa to nitulisi riara Buku Nagasa to nanguli iweꞌi: “Daꞌa ria sampeka wukuna to rapakakoto.” c
37 Pade naria woꞌu tesa ntanina riara Buku Nagasa to nanguli, “Ira kana mantingoa tau to nitosu ira tawala.” d
Yesus nitana
38 Naopu etu naria sambaꞌa tau nosanga ka Yusuf nggari ngata Arimatea nalau nomperapi watabaku Yesus ka i Pilatus. Yusuf etu sambaꞌa topantuki Yesus, aga daꞌa ninjani ntau sabana iꞌa naeka ka topanggeniaka nto Yahudi. Pomperapi Yusuf etu nipoiyo i Pilatus. Jadi nalaumo Yusuf nantaꞌuraka watabaku Yesus nggari kayu parika.
39 Nosanggani-nggani ante Yusuf naria woꞌu i Nikodemus, tau to narata nanggita Yesus tempo nggawengina bopia. Iꞌa nanggeni galo rampa-rampa nawongi nosanga ka mur bo gaharu, kira-kira tolumpulu kilo katomona.
40 Pade niala ira rombaꞌa watabaku Yesus nisompu ira ante kae gandisi to nalusuna nosanggani ante rampa-rampa to nawongi etu nantuki ada nto Yahudi.