Yesus natuwu bali
20
Ri eo Aka kampadondo njiina nalaumo i Maria Magdalena mpaka ri dayo Yesus. Sangga naratapa iꞌa ri dayo nikitanamo watu nipompiku dayo etu nikaliakamo nggari pewobo dayo etu.
2 Jadi nangowamo iꞌa mpaka ri jaꞌi Simon Petrus bo anaguru to nipotowe Yesus etu, pade niulina ka ira, “Niala ntaumo watabaku Yesus nggariara dayo, pade daꞌa ninjani kami bara ri umba nipomboli ira!”
3 Nangepe etu nalaimo i Petrus bo anaguru ntanina etu mpaka ri dayo.
4 Nangowamo ira rombaꞌa mpaka gusaꞌa tapi anaguru ntanina etu neliu nggagasipa pade i Petrus. Jadi iꞌa nokolu narata ri dayo.
5 Sangga naratapa iꞌa ri dayo notunggoumo iꞌa nompeside riara dayo. Nikitana kae gandisi niposompu Yesus ri setu. Tapi iꞌa daꞌa nesua riara dayo etu.
6 Pade naratamo i Simon Petrus nggapurina. Iꞌa kaliu-liu nesua riara dayo etu. Nikitana kae gandisi niposompu Yesus ri setu.
7 Pade nikitana woꞌu kae nipompoꞌu balengga Yesus. Tapi kae etu daꞌa nipasanggani ante kae gandisi etu, aga nilulu mpakabelo-belo niboli ri petoꞌo ntanina ri sinjorina.
8 Pade nesua woꞌumo anaguru ntanina to nokoluna narata ri dayo etu. Nikitana kae etu pade niparasayanamo.
9 Tempo etu daꞌapa ninjani ira patuju tesa to nitulisi riara Buku Nagasa nggaolu to nanguli Yesus kana matuwu bali nggari kamatena.
Yesus nompopokita korona ka Maria Magdalena
10 Naopu etu nanjilimo ira rombaꞌa mpaka ri sapo.
11 Tapi i Maria Magdalena danekanggore ri sawaliku dayo etu nageo-geo. Tempo iꞌa nageo ri setu notunggoumo iꞌa nompeside riara dayo.
12 Ri setu nikitana rombaꞌa malaeka nobaju nabula nekatoko ri walea pomboli watabaku Yesus, sambaꞌa ri balenggana pade sambaꞌa ri kadana.
13 Pade nekutanamo malaeka-malaeka etu ka i Maria, “Nokuya komi nageo-geo?”
Nesonomo i Maria, “Pueku niala ntaumo nggari seꞌi pade daꞌa ninjaniku ri umba nipomboli ira.”
14 Naopu etu iꞌa nompeili ri talikuna nikitana Yesus nenggore ri setu, aga daꞌapa ninjanina Iꞌamo Yesus.
15 Nekutanamo Yesus ka iꞌa, “Nindo, nokuya komi nageo-geo? Isema nielomu?”
Niuli Maria bara topokarajaa ri pampa etu. Jadi nesonomo iꞌa ri jaꞌina, “Uma, ane komimo to nangala watabakuna nggari seꞌi ulimo ka aku bara ri umba nipomboli komi ala aku mamala malau mangala Iꞌa.”
16 Nangulimo Yesus ka iꞌa, “Maria.”
Nangepe etu negoli ntaliku i Maria pade nangulimo iꞌa ante Basa Ibrani, “Rabuni!” Batuana “Guru.”
17 Pade nangulimo Yesus ka iꞌa, “Neꞌepa ruru Aku musoko, sabana Aku daꞌapa neore mpaka ri jaꞌi Umaku. Tapi kalaumo mpaka ri jaꞌi sampesuwu-sampesuwuku pade ulimo ka ira iweꞌi: ‘Aku malaumo mpaka ri jaꞌi Umaku bo Umamu, etumo Alatalaku bo Alatalamu.’”
18 Jadi nalaumo i Maria Magdalena mpaka ri jaꞌi anaguru-anaguru Yesus pade niulina, “Nikitakumo i Pue!” Pade nitesana woꞌu ka ira pura-pura nuapa to nitesa Yesus ka iꞌa.
Yesus nompopokita korona ka anaguru-anaguruna
19 Ri eo Aka etu woꞌu tempo nggawengina anaguru-anaguru Yesus nasiromu ri saongu sapo. Pewobo sapo etu nikunci sabana ira naeka ka topanggeniaka-topanggeniaka nto Yahudi. Sampegoli naratamo Yesus nekanggore ri tatongo ira, pade niulina ka ira, “Pue mombagane komi.”
20 Naopu Yesus nombatabe ira iwetu nipopokitanamo ka ira palena bo usuna. Sangga nanggita Yesus nadamba mpuꞌumo rara ira.
21 Pade nanguli woꞌumo Yesus ka ira, “Pue mombagane komi. Nasimbayu ewa Umaku nompakau Aku iwetu woꞌu Aku mompakau komi.”
22 Naopu etu nitawuinamo ira ante nosana pade nanguli, “Tarima komimo Nosa Nagasa nu Alatala.
23 Ane komi mombaampungi silaka ntau, silaka ira kana raampungi Alatala, pade ane komi daꞌa mombaampungi silaka ntau, silaka ira daꞌa woꞌu raampungi Alatala.”
Yesus nompopokita korona ka Tomas
24 Tomas, sambaꞌa nggari sampulu rombaꞌa anaguru Yesus, to niuli woꞌu Ngana Norapi, daꞌa naria nosanggani-nggani ante roa-roana tempo Yesus narata nompopokita korona ka ira.
25 Jadi nangulimo anaguru-anaguruna ntanina ka i Tomas, “Nikita kamimo i Pue!”
Tapi nangulimo i Tomas, “Ane aku daꞌapa manggita walea paku ri palena pade mombadika koyampaleku ri walea etu bo mombadika paleku ri walea tawala ri usuna, daꞌapa ntoto kuparasaya.”
26 Walumbengi kaliuna nasiromu woꞌumo anaguru-anaguru Yesus riara njapo etu, pade i Tomas woꞌu naria nosanggani-nggani ante roana ri setu. Pewobo nikunci puramo tapi naupa iwetu naratamo Yesus nenggore ri tatongo ira, pade niulina ka ira, “Pue mombagane komi.”
27 Naopu etu niulina ka i Tomas, “Dikamo koyampalemu ri seꞌi. Kitamo paleku eꞌi. Pade dikamo palemu ri walea tawala ri usuku eꞌi. Neꞌe mana mabata-bata raramu, tapi parasayamo.”
28 Pade nangulimo i Tomas ka Yesus, “Pueku! Alatalaku!”
29 Nangulimo Yesus ka i Tomas, “Iko nomparasaya sabana iko nanggita Aku. Tapi neliu nggabelopa tau to nomparasaya nau daꞌa nanggita Aku.”
Patuju nu buku eꞌi
30 Danadeapa tandai-tandai to nipogumaa ntanina to nikawia Yesus tempo Iꞌa danaria nosanggani-nggani ante anaguru-anaguruna anu daꞌa nitulisi riara buku eꞌi.
31 Tapi nuapa to nitulisi riara buku eꞌi, patujuna ala manggeni komi momparasaya Yesus etumo mpuꞌu-mpuꞌu Magau to Mompakasalama, Ana nu Alatala. Pade patujuna woꞌu ala komi mamala mombarata katuwua mabelo sampe ri kasae-saena ante momparasaya Iꞌa.