Yesus nompopokita korona ka pitumbaꞌa anaguruna
21
Naopu etu Yesus nompopokita korona sangganipa ka anaguruna ri wiwi Rano Tiberias. a Iweꞌimo tesana.
2 Bara sakuya mbaꞌa anaguru Yesus nasiromu ri setu, etumo i Simon Petrus, i Tomas to nidae Ngana Norapi, i Natanael nggari ngata Kana ri Bagia Galilea, bo rombaꞌa ana i Zebedeus, pade rombaꞌa anaguruna ntanina.
3 Nangulimo i Simon Petrus ka roa-roana, “Aku eꞌi malau mompemala bau ri rano.”
Nesonomo roa-roana, “Momai woꞌu kami.” Jadi nalaumo ira mpasanggani-nggani nesawi sakaya. Nojala baumo ira njambengi ntua tapi daꞌa ntoto ria bau namala ka ira.
4 Kampadondona etu Yesus nekanggore ri wiwi rano, tapi daꞌa ninjani anaguruna Iꞌa etu Yesus.
5 Nangulimo Yesus ka anaguruna riara sakaya, “Iwenumo, ana-anaku? Naria bau nirata komi?”
Nesonomo ira, “Daꞌa ntoto naria.”
6 Nanguli Yesus ka ira, “Tendeakamo jala komi ri sabingga nggana sakaya etu pade komi kana mombarata bau.” Jadi nitendeaka ira mpuꞌumo jala ri sabingga nggana sakaya etu. Sangga ira nombataja jala etu daꞌa mana nipakule ira sabana nadea mpuꞌu bau riarana.
7 Nanggita kajadia etu nangulimo anaguru to nipotowe Yesus ka i Petrus, “Etumo i Pue!” Sangga i Petrus nangepe tesa etu nialanamo bajuna nipasuana bali, sabana iꞌa nojala bau daꞌa nobaju. Pade nekawantumo iꞌa mpaka riara rano norabu mpaka ri kabatana.
8 Aga anaguru-anaguru Yesus ntanina etu nesawi sakaya mpaka ri kabatana ante nombataja jala naponu ante bau etu, sabana ira daꞌa nakawao nggari kabatana, kira-kira satu metere kakawaona.
9 Tempo ira nanaꞌu nggariara sakaya nikita ira naria ruti nu apu to nipowia nggari wuri danarega ri setu, pade ri bunggu ruti nu apu etu naria bau ante roti.
10 Nangulimo Yesus ka ira, “Keni ri seꞌimo sanu bara sakuya mbaꞌa bau to nipemala komi etu.”
11 Jadi i Simon Petrus nesawi riara sakaya pade nitajana jala etu sampe ri kabatana. Jala etu naponu ante bau to nabetena, kadeana pura-pura satu limampulu bo tolumbaꞌa. Tapi naupa iwetu kadeana, nau aga sambalaa lui jala etu daꞌa ria nadapa.
12 Pade niuli Yesus woꞌumo ka anaguruna, “Kamaimo kita molalawo.” Daꞌa ntoto naria to nabia nekutana ka Yesus, “Isema Komi?” Sabana ninjani ira puramo Iꞌa etu i Pue.
13 Nalaumo Yesus nangala roti etu pade nitibo-tibona ka ira. Pade iwetu woꞌu nipowiana ante bau.
14 Etumo katolungganina Yesus nompopokita korona ka anaguru-anaguruna naopu Iꞌa natuwu bali nggari kamatena.
Yesus notesa ka Petrus
15 Naopu ira nanggoni nangulimo Yesus ka i Simon Petrus, “Simon, ana Yohanes, neliupa towemu ka Aku pade towe nu roa-roamu etu?”
Nesonomo i Petrus, “Iyo, ninjanimu mboto, Pue, aku nompotowe Komi.”
Nanguli Yesus ka iꞌa, “Ane iwetu, piaramo ana-ana bimbaku.”
16 Pade nekutanamo Yesus ka i Petrus karongganina, “Simon, ana Yohanes, iko nompotowe Aku?”
Nesonomo i Petrus, “Iyo, ninjanimu mboto, Pue, aku nompotowe Komi.”
Nanguli Yesus, “Ane iwetu, poewumo bimba-bimbaku.”
17 Pade nekutanamo Yesus ka i Petrus katolungganina, “Simon, ana Yohanes, iko nompotowe Aku?”
Nangepe etu nasusa mpuꞌumo rara i Petrus, sabana tolungganimo Yesus nompekutana iꞌa, “Iko nompotowe Aku?” Jadi nesonomo i Petrus ka Iꞌa, “Pue, ninjanimu mpengele-ngele. Ninjanimu aku nompotowe Komi.”
Nanguli Yesus, “Ane iwetu, piaramo bimba-bimbaku.
18 Aku mpuꞌu-mpuꞌu notesa ka iko, tempo iko danamuda iko mboto nosoꞌo kopemu pade nalau mpaka ri umba nipodotamu. Tapi ane iko matuꞌamo, iko kana mombawai palemu rasoꞌo tau ntanina, pade iko kana rakeni ntau malau mpaka ri petoꞌo anu daꞌa nipokonomu.”
19 Ante jalili etu Yesus nompakanoto jala nggamate i Petrus banepiana ala Pue Alatala rabila bo ratoiya. Naopu etu nanguli woꞌumo Yesus ka i Petrus, “Neꞌe menonto mantuki Aku!”
Yesus ante anaguru to nipotowena
20 Naopu etu neilimo i Petrus pade nikitana anaguru to nipotowe Yesus nantuki purina. Anaguru etumo to nekatoko ri sinjori Yesus tempo ira nanggoni nggawengina pade nekutana, “Isema to mompobalu Komi, Pue?”
21 Sangga nikita i Petrus anaguru etu, nipekutanana ka Yesus, “Pue, nuapa majadi ante roaku yaꞌa?”
22 Nesonomo Yesus, “Ane Aku madota iꞌa matuwu sampe Aku manjili bali ri dunia eꞌi, etu daꞌa miki munjani. Tapi iko, neꞌe menonto mantuki Aku!”
23 Nggari setu natolelemo kareba ri tatongo topomparasaya Yesus to nanguli anaguru to nipotowena etu daꞌa mamate. Tapi kakonona Yesus daꞌa nanguli anaguruna etu daꞌa mamate. To niulina, “Ane Aku madota iꞌa matuwu sampe Aku manjili bali ri dunia eꞌi, etu daꞌa miki munjani.”
24 Aku eꞌimo anaguruna etu. Akumo to nantesa pura-pura kajadia etu. Pade aku eꞌi woꞌumo to nantulisi etu pura-pura riara buku eꞌi. Pade ninjanita nuapa to nitesaku etu mpuꞌu-mpuꞌu nakono.
Tesa kaopuna
25 Danadeapa ntani-ntanina to nipowia Yesus. Ane rapana ratulisi pura-pura kajadia etu, kupekiri dunia eꞌi daꞌa masuka rapomboli pura-pura buku to ratulisi etu.