Yesus natuwu bali
24
Ri eo Aka kampadondona mpuꞌu nalaumo besi-besi etu mpaka ri dayo Yesus nanggeni rampa-rampa to nipakasadia ira.
2 Tempo ira narata ri dayo etu nikita ira nakalulimo watu to nipompiku dayo.
3 Nesuamo ira riara dayo etu, tapi daꞌa nirata ira watabaku Yesus ri setu.
4 Tempona ira danenggore ri setu naingu nompekiri kajadia etu, sampenjani naria rombaꞌa malaeka to nopakea nenggila nekanggore namosu ira.
5 Naeka mpuꞌu rara besi-besi etu sampe ira nekadede sampe ri tana. Pade nangulimo rombaꞌa malaeka etu ka ira, “Nokuya komi nangelo tau to natuwuna ri petoꞌo tau namate?
6 Iꞌa mana ria ri seꞌi. Natuwu balimo Iꞌa! Toramo nuapa to nitesana ka komi tempo Iꞌa danaria ri Bagia Galilea. Niulina,
7 ‘Aku, Ana nu Manusia kana rawai ka tau-tau nasilaka, pade rapaku ri kayu parika sampe mamate, pade matuwu bali ri eo katolueona.’”
8 Nangepe etu natitoramo rara besi-besi etu ewa tesa Yesus bopia.
9 Naopu etu natinggulimo ira nggari dayo etu, pade nitesa ira ka sampulu sambaꞌa anaguru Yesus ante pura-pura topantuki Iꞌa ntanina nuapa pura to najadi paneꞌa.
10 Besi-besi to notesa pura-pura etu ka topantuki-topantuki Yesus etumo: i Maria Magdalena, Yohana, i Maria indo Yakobus, ante besi-besi ntanina to nosanggani-nggani ante ira.
11 Tapi anaguru-anaguru Yesus daꞌa nomparasaya tesa nu besi-besi etu. Ira nompekiri besi-besi etu aga notesa anu daꞌa nakono.
12 Tapi i Petrus nekanggore nangowa mpaka ri dayo etu. Tempona iꞌa nekadede nanggita riarana nikitana damo kae niposompu Yesus ri setu. Nanggita etu nasumaramo i Petrus, pade natinggulimo iꞌa ante nadea pompekutana riara ntaꞌina ewa nuapa to najadi ri setu.
Yesus nompopokita korona ri jala mpaka ri ngata Emaus
13 Tempo eo etu woꞌu nalaumo rombaꞌa topantuki Yesus mpaka ri saongu ngata nosanga ka ngata Emaus, kira-kira sampulu saongu kilo kakawaona nggari ngata Yerusalem.
14 Ira notesa nggalalau ewa nuapa pura to najadi ri jaꞌi Yesus etu.
15 Tempona ira danotesa-tesa bo nosinjula pekiri, naratamo Yesus mboto ri jaꞌi ira, pade nolumako mpasanggani-nggani ante ira.
16 Ira nanggita Yesus tapi naria sangele nompakaingu ira sampe daꞌa ninjani ira Iꞌa etu Yesus.
17 Nangulimo Yesus ka ira, “Nuapa nitesa komi tempo komi nolumako paneꞌa?”
Nenontomo ira rombaꞌa etu ante lenje nasusa.
18 Pade nangulimo sambaꞌa nggari ira to nosanga ka i Kleopas, “Nggari pura-pura tau ri ngata Yerusalem bara aga njambaꞌa Komi to daꞌa nangginjani nuapa to najadi bara sakuya mbengi to naliuna!”
19 Nekutanamo Yesus, “Nuapa to najadina?”
Nesonomo ira, “To najadi ri jaꞌi Yesus tau nggari Nazaret. Iꞌa sambaꞌa nabi, tesa-tesana bo powiana nakuasa mpuꞌu nabeloka riara mpanggita Alatala, nabeloka riara mpanggita pura-pura tau.
20 Tapi topanggeni-topanggeni agama bo balengga-balengga ngata kami nombawai Iꞌa ka pomarenta ala ratangara kana mamate. Pade Iꞌa nipaku ira ri kayu parika.
21 Kakonona nisarumaka kami Iꞌamo to narata manggabasaka to Israel nggari kuasa nto Roma. Pade weꞌi-weꞌi katolumbenginamo kamatena etu.
22 Ntanina nggari etu bara sakuya mbaꞌa besi nggari mbira kami nompakatikaja kami, sabana pangane bobaya ira nalau mpaka ri dayo Yesus,
23 tapi daꞌa nirata ira watabakuna ri setu. Ira nanjili nanguli ka kami ira nanggita malaeka-malaeka to notesa ka ira Yesus namate natuwu bali.
24 Naopu etu bara sakuya mbaꞌa tau nggari tatongo kami nalau mpaka ri dayo etu pade nirata ira nuapa to nitesa besi-besi etu nakono, tapi daꞌa nikita ira Yesus.”
25 Nangepe etu nangulimo Yesus ka ira, “Nabodo mpuꞌu komi! Nabungu mpuꞌu pekiri komi momparasaya nuapa to nitesa nabi-nabi!
26 Etumo Magau to Mompakasalama to nijanji Alatala kana mombarasai kasusa bo kapari ntani ruru, pade maopu etu Iꞌa mombarata pebila.”
27 Pade Yesus notarangga ka ira nuapa to nitesa ewa korona riara pura-pura Buku Nagasa, nompamula nggari buku-buku to nitulisi i Musa sampe ri buku pura-pura nabi.
28 Tempo ira narata ri ngata to nikalau ira, Yesus tumoni-moni madota molumako mpapola.
29 Tapi ira nantaꞌamaka Iꞌa mapola. Niuli ira, “Kana mosanggani ante kami. Weꞌi-weꞌi ntora mawengimo.” Jadi nesuamo Yesus nosanggani ante ira riara njapo.
30 Tempo Iꞌa nekatoko nanggoni mpasanggani-nggani ante ira nialana roti pade niulina tarima kasi ka Alatala. Naopu etu nibingga-binggana roti etu pade niwaina ka ira.
31 Kaliu-liu nanotomo rara ira. Ninjani ira Yesusmo eꞌi. Pade nalipomo Yesus nggari tatongo ira.
32 Nanggita etu natitoramo rara ira pade niuli ira sambaꞌa bo sambaꞌa, “Natantu etumo sabana nadamba rarata tempo Iꞌa notesa ka kita ri tatongo jala pangane bo notesa nompakanoto nuapa to nitulisi riara Buku Nagasa ka kita!”
33 Tempo etu woꞌu nekanggoremo ira nanjili mpaka ri ngata Yerusalem. Narata ri setu nirata ira anaguru Yesus to sampulu sambaꞌa etu nasiromu ante tau ntanina.
34 Ira to naria ri setu notesa ka ira rombaꞌa, “Pue mpuꞌu-mpuꞌu natuwu bali! Iꞌa nompopokita korona ka i Simon Petrus!”
35 Nangepe etu notesamo rombaꞌa topantuki Yesus to dako narata etu nuapa najadi ri jaꞌi ira mboto ri tatongo jala mpaka ri ngata Emaus, pade iwenu ira nangginjani Yesus tempona Iꞌa nombabingga roti.
Yesus nompopokita korona ka anaguru-anaguruna
36 Tempo ira danotesa-tesa, sampenjani naratamo Yesus nekanggore ri tatongo ira ri setu. Pade nangulimo Iꞌa, “Pue mombagane komi.”
37 Tapi ira pura-pura natikaja pade naeka mpuꞌu rara. Nipekiri ira bara mboa etu.
38 Etu sampe Yesus nanguli ka ira, “Nokuya komi naeka bo norompenga pompekiri?
39 Kitamo paleku bo kita woꞌu kadaku. Aku mboto eꞌi! Lememo bo pariaramo. Mboa daꞌa ria isi bo wukuna ewa to nikita komi weꞌi-weꞌi.”
40 Yesus notesa iwetu ante nompopokita ka ira palena bo kadana.
41 Tempona etu ewa daꞌapa niparasaya ira Iꞌa etu Yesus sabana nadamba mpuꞌu rara ira bo nasumara. Jadi nangulimo Yesus ka ira, “Bara naria panggoni komi ri seꞌi?”
42 Pade ira nombawai ka Iꞌa sanggoto bau nitunu.
43 Yesus nangala bau etu pade nikonina ri ngayo ira.
44 Naopu etu nangulimo Yesus ka ira, “Iweꞌimo to niuliku ka komi bopia tempo Aku danaria nosanggani-nggani ante komi: Pura-pura tesa to nitulisi riara buku i Musa, pade to nitulisi riara buku-buku nabi ntanina, pade to nitulisi riara Buku Mazmur ewa Aku, etu pura-pura kana rapakadupa.”
45 Pade nipakanotona pekiri ira ala ira mamala mangginjani nuapa to nitulisi riara Buku Nagasa etu.
46 Niulina ka ira, “Riara Buku Nagasa naria tesa to nanguli iweꞌi: Magau to Mompakasalama kana rapatesi pade ri eo katolueona Iꞌa kana matuwu bali nggari kamatena.
47 Pade riara sangana kana rapatolele Kareba Belo to nanguli iweꞌi: pura-pura tau kana majea nggari silaka-silaka ira ala Alatala mombaampungi ira. Kareba etu kana rapatolele mompamula nggari ngata Yerusalem eꞌi sampe ri njumaongu dunia.
48 Komimo to nanggita pura-pura kajadia etu.
49 Toramo! Aku kana mompopanaꞌu ka komi Nosa Nagasa to nijanji Umaku. Tapi komi kana mompopea ntani ruru ri ngata Yerusalem eꞌi sampe kuasa nggari jaꞌi Alatala etu manaꞌu mombabungu komi pura-pura.”
Yesus neore mpaka ri suruga
Mrk. 16:19-20; Suro 1:9-11
50 Naopu etu Yesus nanggeni anaguru-anaguruna etu nesuwu nggari ngata Yerusalem nalau sampe namosu ri ngata Betania. Ri setu Iꞌa nangonggotaka palena pade nombagane ira pura-pura.
51 Tempona Iꞌa danombagane ira, nogaꞌamo Iꞌa nggari jaꞌi ira, pade neore mpaka ri suruga.
52 Pade notimbakotumo anaguru-anaguruna nombasomba Iꞌa. Naopu etu natinggulimo ira mpaka ri ngata Yerusalem ante nadamba mpuꞌu rara.
53 Ira bate-batena naria riara Sapo Mpepue nombatoiya bo nombabila sanga Alatala.