Yesus nikeni ri ngayo Pilatus
23
Pade nekanggoremo pura-pura Topolibu Bete Agama etu nalau nanggeni Yesus mpaka ri jaꞌi Gubernur Pilatus.
2 Ri setu nompamulamo ira nompangadu Iꞌa. Nitesa ira ka i Pilatus, “Kami nombarata tau eꞌi nanggeni todea nangewa pomarenta Roma. Iꞌa nombatagi tau mombabayari balasitee ri jaꞌi Magau Kaisar, pade niulina woꞌu Iꞌa mboto Magau to Mompakasalama to nijanji Alatala.”
3 Nangepe etu nekutanamo i Pilatus ka Yesus, “Komimo Magau nto Yahudi?”
Nesonomo Yesus, “Ewa to niuli komi etu, Uma, nakono.”
4 Naopu etu nangulimo i Pilatus ka balengga-balengga topanggeni agama ante tau dea etu, “Iwenumo, tau eꞌi niparesaku daꞌa ria salana!”
5 Tapi ira nantambai nompangadu ante nanguli, “Ante pepatudukina Iꞌa nanggeni todea ri jala to nasalana ri pura-pura ngata ri Bagia Yudea eꞌi. Iꞌa nompamula nggari Bagia Galilea, sampe narata ri seꞌi.”
6 Nangepe etu nekutanamo i Pilatus, “Tau eꞌi tau nggari Bagia Galilea?”
Nesonomo tau, “Iyo, Iꞌa etu tau nggari Galilea.”
7 Tempona ninjanina Yesus tau nggari Bagia Galilea, etumo bagia to niparenta Magau Herodes, i Pilatus nompakau tau nanggeni Yesus ri jaꞌi Magau Herodes etu. Tempona etu Magau Herodes woꞌu naria ri ngata Yerusalem.
Yesus ri ngayo Magau Herodes
8 Tempona Magau Herodes nanggita Yesus nadamba mpuꞌu rarana, sabana niepenamo tesa ewa Yesus pade nasaemo iꞌa madota manggita Iꞌa. Nisarumakana bara mamala iꞌa manggita Yesus mowia kabaraka.
9 Sabana etu nipekutana-tanana ri jaꞌi Yesus, tapi Yesus daꞌa ria nesono.
10 Naopu etu balengga-balengga topanggeni agama ante guru-guru agama to naria ri setu narau mpuꞌu rara ira nompangadu Yesus.
11 Naopu etu Magau Herodes ante tantara-tantarana nanguli sinjaꞌi bo nompongei-ngei Iꞌa. Pade Yesus nipopasua ka baju magau pade nipopanjilina mpaka ri jaꞌi Pilatus.
12 Eona etu woꞌu Magau Herodes ante i Pilatus nosimporoamo, naupa bopia ira aga nosipobali.
Yesus nitangara kana rapatesi
13 Pilatus nompakau mompasiromu balengga-balengga topanggeni agama, totuꞌa-totuꞌa ngata ante todea etu,
14 pade niulina ka ira pura-pura, “Komi nanggeni tau eꞌi ri jaꞌiku ante nanguli Iꞌa nanggeni tau nangewa pomarenta. Tapi weꞌi-weꞌi Iꞌa niparesakumo ri ngayo komi daꞌa ria nirataku salana to niuli komi ri jaꞌina.
15 Waꞌa woꞌu pombarata Magau Herodes sabana iꞌa woꞌu nompopanjili Yesus eꞌi ri jaꞌita ri seꞌi. Daꞌa ria powiana to najaꞌana to masipato rapatesi ka Iꞌa.
16 Sabana etu aku aga mompakau tantaraku mombaboba Iꞌa pade manggabasaka Iꞌa.”
17 Niuli i Pilatus iwetu sabana butu mpae tempona Posusa Paska iꞌa kana manggabasaka ka tau dea sambaꞌa tau to nitarunggu.
18 Tapi nongare-ngare puramo tau to naria ri setu, “Patesimo Iꞌa! Kabasaka ka kamimo i Barabas!”
19 Barabas etu sambaꞌa tau to nitarunggu sabana iꞌa nangewa pomarenta ri ngata Yerusalem pade iꞌa woꞌu topepatesi.
20 Tapi i Pilatus madota manggabasaka Yesus. Jadi sangganipa iꞌa notesa ka tau dea etu.
21 Tapi nongare-ngare woꞌumo ira, “Pakumo Iꞌa ri kayu parika! Pakumo Iꞌa ri kayu parika!”
22 Pade notesamo i Pilatus katolungganina ka ira, “Nokuya? Kajaꞌa nuapa ntoto to nipowiana? Daꞌa ria nirataku salana to nipowiana to masipato rasuku mate ka Iꞌa. Aku aga mompakau tantaraku mombaboba Iꞌa pade manggabasaka Iꞌa.”
23 Tapi ira nantambai nongare-ngare ante suara to neliu nggamangga, “Yesus kana rapaku ri kayu parika!” Kaopuna padagimo ira, sabana ira nongare-ngare mpuꞌu.
24-25 Jadi i Pilatus nompakau tantarana manggeni Yesus ri sawaliku ngata ala rapatesi mantuki dota ntau dea etu. Pade nikabasakana ka ira tau to niperapi ira, etumo i Barabas, tau to nitarunggu sabana iꞌa nangewa pomarenta bo nepatesi.
Yesus nipaku ri kayu parika
26 Naopu etu Yesus nikeni nggari setu. Iꞌa nipasuꞌu nanjumbuaka kayu pomparika rapombapaku Iꞌa. Ri tatongo jala ira nosintomu ka sambaꞌa tau nosanga ka i Simon. Iꞌa sambaꞌa tau nggari ngata Kirene pade tempona etu iꞌa mesua mpaka riara ngata. Iꞌa nisoko ira pade nipasuꞌu nanjumbuaka kayu pomparika Yesus pade nolumako nantuki purina.
27 Tempo Yesus nikeni ri sawaliku ngata etu nadea mpuꞌu tau nantuki Iꞌa. Ri tatongo ira naria bara sakuya mbaꞌa besi to notumangi pade nantete Iꞌa.
28 Neilimo Yesus ri jaꞌi ira pade nanguli, “Besi-besi to Yerusalem, neꞌe mana motumangi mantangi Aku. Tangimo koro komi mboto bo ana-ana komi,
29 sabana kana marata ntoana besi-besi motesa, ‘Nandasa mpuꞌumo kami! Aginamo kami nagampa, daꞌapa sanggani noana, bo daꞌapa sanggani nompatomi ngana!’
30 Tempona etumo tau kana motesa ka bulu-buluna, ‘Kalabumo mombarumpi kami,’ pade ira motesa ka bunggu-bunggu nggedi, ‘Iwumo kami!’
31 Kana mandasa mpuꞌu komi, sabana ane ira mowia iweꞌi ri jaꞌiku to nanoa rara, iwenu ante komi to nadenggo raramu? Natantumo komi kana meliu nggandasa rapowia ira banepia!”
32 Tempona etu naria woꞌu rombaꞌa tau najaꞌa to nikeni rapatesi mpasanggani-nggani ante Yesus.
33 Ira pura-pura nalau sampe narata ri saongu petoꞌo to nosanga ka Petoꞌo Wuku Balengga. a Ri setu tantara-tantara Roma nombapaku Yesus ri kayu parika etu. Tau-tau najaꞌa rombaꞌa etu woꞌu nipaku ri kayu parika ntanina, sambaꞌa ri sabingga nggana Yesus sambaꞌa ri sabingga njidina.
34 Naopu etu nosambayamo Yesus ka Pue Alatala, “Uma, ampungimo ira. Daꞌa ninjani ira nuapa to nipowia ira.”
Ri setu woꞌu tantara-tantara nombabagi-bagi pakea Yesus ante nompenoa nowia nomoro. Isema nawela nomoro iꞌa nombarata pakea etu.
35 Tau dea nekanggore ri setu nantara pura-pura nuapa to najadi etu. Pade topanggeniaka nto Yahudi to naria ri setu nombawiri mata ka Yesus. Niuli ira, “Kita weꞌi! Tau ntanina nipakasalamana. Ane Iꞌa mpuꞌu-mpuꞌu Magau to Mompakasalama to nipelisi Alatala, agina Iꞌa mompakasalama korona mboto weꞌi-weꞌi!”
36 Tantara-tantara etu woꞌu nompongei Iꞌa. Ira nompakamosu Yesus pade nombawai ka Iꞌa ue anggur to napoi.
37 Pade niuli ira, “Ane Iko mpuꞌu-mpuꞌu Magau nto Yahudi pakasalamamo koromu!”
38 Ri ntoto balenggana ri kayu parika etu naria nitulisi, EꞌIMO MAGAU NTO YAHUDI.
39 Sambaꞌa nggari tau najaꞌa to nipaku ri kayu parika nanjalai Yesus. Niulina, “Ane mpuꞌu-mpuꞌu Iko Magau to Mompakasalama to nijanji Alatala, pakasalamamo koromu ante kami woꞌu!”
40 Tapi tau najaꞌa ntanina etu nangontiaka roana etu. Niulina, “Nokuya iko daꞌa naeka ri jaꞌi Alatala? Kita pura-pura nitangara kana mamate.
41 Ane kita rombaꞌa eꞌi nitangara masipato ante pokaingguta. Tapi tau eꞌi daꞌa ntoto nowia to nasalana!”
42 Pade niulina ka Yesus, “Yesus, toramo aku tempo Komi marata ante kuasa ewa magau.”
43 Nangulimo Yesus ka iꞌa, “Aku mojanji ka iko, eo eꞌi woꞌu iko kana mosanggani-nggani ante Aku ri suruga.” b
Kamate Yesus
44 Kira-kira tinti sampulu rongu narumaumo eo ri njumaongu tana etu sampe tinti toluongu ngguwiana.
45 Pade naseri ntongomo kae powombo ri Sapo Mpepue.
46 Naopu etu nongaremo Yesus ante suara namangga, “Umaku, kuwaimo nosaku riara mpalemu!” Naopu notesa iwetu nalaimo nosana.
47 Tempona balengga tantara ri setu nanggita nuapa to najadi iꞌa nombatoiya Alatala. Niulina, “Natantumo tau eꞌi tau to nanoana.”
48 Tau dea to narata nantara pura-pura kajadia etu nanggita Yesus namatemo. Jadi nanjilimo ira ante nanjapa-njapa bombara sabana nasusa rara.
49 Pura-pura roa Yesus ante besi-besi woꞌu to nantuki Iꞌa nggari Bagia Galilea etu, nenggore nggawao nanggita pura-pura to najadi etu.
Yesus nitana
50-51 Naria sambaꞌa tau nggari ngata Arimatea ri Bagia Yudea to nosanga ka Yusuf. Iꞌa sambaꞌa tau to nabelo pokaingguna bo nanoa rarana to mantongoraka tempo Alatala mompamula moparenta ri dunia. Naupa iꞌa sambaꞌa nggari Polibu Bete Agama nto Yahudi iꞌa daꞌa ria nasituju ante potangara bo powia ira mompatesi Yesus.
52 Yusuf etu nalau nerapi ka i Pilatus ala watabaku Yesus rawai ka iꞌa.
53 Naopu etu nitaꞌurakana watabaku Yesus nggari kayu parika, pade nisompuna ante kae gandisi to nalusuna. Naopu etu nibolina watabaku Yesus etu riara dayo to nipaꞌa ri bulu watu. Dayo etu daꞌapa sanggani nipake.
54 Eo etu eo Jumaa, etumo eo mpopakasadia ka Eo Mpenonto. Mana masaeka marata Eo Mpenonto etu.
55 Besi-besi to narata nosanggani-nggani ante Yesus nggari Bagia Galilea nantuki Yusuf nalau nanggita dayo etu. Nikita ira woꞌu iwenu watabaku Yesus niboli riara dayo etu.
56 Naopu etu natinggulimo ira mpaka ri ngata, pade nipakasadia iramo rampa-rampa ante minya wongi ka watabaku Yesus. Pade ri Eo Mpenonto, nenontomo ira nokarajaa nantuki Atura-atura agama nto Yahudi.