Yesus nikeni ri ngayo Gubernur Pilatus
15
Dakampadondo njiina balengga-balengga topanggeni agama, totuꞌa-totuꞌa nto Yahudi bo guru-guru agama nosanggani-nggani ante pura-pura Topolibu Bete Agama ntanina nosaongu patujumo. Ira nombasoꞌo Yesus pade nanggeni Iꞌa mpaka ri ngayo Gubernur Pilatus. Ri setu Yesus niwai ira ka i Pilatus.
2 Pade nekutanamo i ilatus ka Yesus, “Komimo Magau nto Yahudi?”
Nesonomo Yesus, “Ewa to niuli komi etu, Uma, nakono.”
3 Naopu etu nadea mpuꞌu tesa-tesa pebata to nitesa balengga-balengga topanggeni agama ka Yesus.
4 Nangepe etu nekutana woꞌumo i Pilatus ka Yesus, “Iwenumo? Naria pesonomu ewa tesa-tesa pebata eꞌi? Epemo, nadea mpuꞌu tesa pebata ira ri jaꞌimu.”
5 Tapi Yesus daꞌa ntoto nesono nau aga sambela sampe nasumara mpuꞌu i Pilatus.
Yesus nitangara kana rapatesi
6 Najadi kabiasanamo butu-butu mpae tempo Eo Bete Paska Gubernur nombakabasaka sambaꞌa tau to nitarunggu nantuki pomperapi ntau dea.
7 Tempona etu naria sambaꞌa tau to nitarunggu nosanga ka i Barabas. Iꞌa nitarunggu mpasanggani-nggani ante bara sakuya mbaꞌa tau to nepatesi tempo nangewa pomarenta.
8 Jadi naratamo tau dea ri jaꞌi Pilatus nerapi ala iꞌa manggabasaka ka ira sambaꞌa tau nitarunggu ewa to nipowiana butu-butu mpae.
9 Nangepe pomperapi ira nekutanamo i Pilatus ka ira, “Rapokono komi ane aku manggabasaka ka komi Magau nto Yahudi?”
10 Niulina iwetu sabana ninjaninamo balengga-balengga topanggeni agama nanggeni Yesus ri jaꞌina sabana najuꞌa rara ira.
11 Tapi balengga-balengga topanggeni agama nompakapane rara ntau dea ala merapi i Barabasmo to rakabasaka ka ira.
12 Pade nekutana woꞌumo i Pilatus ka ira, “Ane iwetu, nuapa to masipato kupowia ri jaꞌi ntau to niuli komi Magau nto Yahudi eꞌi?”
13 Nongare woꞌumo ira, “Pakumo Iꞌa ri kayu parika!”
14 Pade nekutana woꞌumo i Pilatus ka ira, “Nokuya? Kajaꞌana nuapa ntoto to nipowiana?”
Tapi ira aga nantambai nongare ante suara to neliu nggamangga, “Pakumo Iꞌa ri kayu parika!”
15 Dota i Pilatus mompakadamba rara ntau dea. Sabana etu iꞌa nanggabasaka i Barabas ka ira. Pade nipakauna tantarana nombaporo Yesus pade mombapaku Iꞌa ri kayu parika.
Yesus nipongei-ngei tantara-tantara
16 Pade Yesus nikeni tantara-tantara mpaka riara sapo Gubernur, etumo ri tombi mpotangara. Pade nipokio ira pura-pura roa ira nasiromu.
17 Ri setu ira nompopasua ka Yesus baju nakamumu ewa to nipake magau, pade nipowia ira woꞌu songgo nggari karui nipoposonggo ka Yesus.
18 Pade nompamulamo ira nompongei-ngei Iꞌa ante nanguli, “Ratoiyata Magau nto Yahudi!”
19 Naopu etu ira tunggai nombaboba balenggana ante sampeka wolo pade ira tunggai nantailu Iꞌa. Naopu etu nekadedemo ira ri ngayona ante nongei-ngei mombasomba Iꞌa.
20 Naopupa ira nompongei-ngei Iꞌa iwetu, niwonju iramo baju nakamumu etu pade nipopasua bali ka Iꞌa pakeana mboto. Pade Iꞌa nikeni ira mpaka ri sawaliku ngata ala rapaku ri kayu parika.
Yesus nipaku ri kayu parika
21 Tempona etu noliumo sambaꞌa tau nosanga ka i Simon tau nggari ngata Kirene, uma Aleksander bo i Rufus, to dako narata nggari sawaliku ngata. Iꞌa etu nipasuꞌu tantara-tantara manjumbuaka kayu pomparika Yesus.
22 Pade napolamo ira sampe narata ri petoꞌo to nosanga ka Golgota, batuana “Petoꞌo Wuku Balengga.”
23 Pade ira nombawai ka Yesus ue anggur nigalo ante pakuli to niuli mur, tapi ue anggur etu nipoarana.
24 Pade ri setumo ira nombapaku Iꞌa ri kayu parika. Naopu etu nibagi-bagi iramo pakeana ante nompenoa nowia nomoro ala mompakatantu bagia ira sambaꞌa bo sambaꞌa.
25 Tempo Yesus nipaku ira ri kayu parika, kira-kira tinti sasio mpadondona.
26 Ri kayu parikana naria nitulisi tesa pombabata Iꞌa iweꞌi: EꞌIMO MAGAU NTO YAHUDI.
27 Naria woꞌu rombaꞌa parampo nipaku ri kayu parika ntanina mpasanggani-nggani ante Yesus, sambaꞌa ri pangganana pade sambaꞌa ri panggeina. [
28 Ante iwetu nadupamo tesa to nitulisi riara Buku Nagasa to nanguli, “Iꞌa nireke sambaꞌa nggari tatongo tau-tau najaꞌa.”] a
29 Tau-tau to noliu ri setu nanguli sinjaꞌi Iꞌa pade nombawiri mata ka Iꞌa. Niuli ira, “E, niulimu Iko mamala mombagero Sapo Mpepue pade mombabanguna mpanjili riara tolu eo.
30 Ane iwetu, pakasalama koromu mboto! Panaꞌumo nggari kayu parika etu!”
31 Iwetu woꞌu balengga-balengga topanggeni agama bo guru-guru agama nompongei-ngei Iꞌa. Nangulimo ira sambaꞌa ka roana, “Tau ntanina nipakasalamana. Tapi kita weꞌi! Korona mboto daꞌa namala nipakasalamana!
32 Ane Iꞌa mpuꞌu-mpuꞌu Magau nto Israel, etumo Magau to Mompakasalama, agina Iꞌa manaꞌu nggari kayu parika ala kita manggita pade momparasaya Iꞌa!”
Pade tau to rombaꞌana to nipaku ri kayu parika ri sinjori Yesus etu woꞌu nanguli sinjaꞌi Iꞌa.
Kamate Yesus
33 Nompamula nggari katongo nu eo narumaumo eo ri njumaongu tana etu sampe ri tinti toluongu ngguwiana.
34 Pade ri tinti toluongu ngguwiana etu, nongaremo Yesus ante suara namangga, “Eloi, Eloi, lama sabakhtani?” Batuana, “Alatalaku, Alatalaku, nokuya Komi nompalasi Aku?”
35 Sangga nangepe etu nangulimo bara sakuya mbaꞌa tau ri setu, “Epemo! Iꞌa nompokio nabi Elia!”
36 Pade nangowamo sambaꞌa nggari tatongo ira nanggeni sangele wunga to nasimbayu ewa lumu, pade nibanggana riara anggur to napoina. Naopu etu niumpuna ante wolo pade nipopoinuna ka Yesus. Niulina, “Rapopeata sampalai ala manggita ane nabi Elia marata mombataꞌuraka Iꞌa nggari kayu parika!”
37 Naopu etu nongare woꞌumo Yesus ante suara namangga, pade nalaimo nosana.
38 Tempona etu woꞌu naseri ntongomo kae powombo ri Sapo Mpepue nggari baꞌana narata ri wayona.
39 Tempo balengga tantara to nenggore nosintingayo ka Iꞌa nanggita kamate Yesus iwetu, nangulimo iꞌa, “Mpuꞌu-mpuꞌu tau eꞌi Ana nu Alatala!”
40 Ri setu naria woꞌu bara sakuya mbaꞌa besi nenggore neantoaka nggawao. Ri tatongo ira naria i Maria Magdalena, i Salome, pade i Maria indo Yakobus muda bo Yoses.
41 Iramo besi-besi to nantuki pade nantulungi Yesus tempo Iꞌa ri Bagia Galilea. Pade naria woꞌu ri setu nadea besi ntanina to narata ri ngata Yerusalem nosanggani-nggani ante Iꞌa.
Yesus nitana
42 Eo etu eo mpompakasadia ka Eo Mpenonto, damo sambengipa mawela Eo Mpenonto. Tempo ntora nasolomo eo
43 naratamo sambaꞌa tau nosanga ka Yusuf, tau nggari ngata Arimatea. Iꞌa sambaꞌa nggari Polibu Bete Agama nto Yahudi to nibila ntau dea, pade iꞌa woꞌu nompopea tempo Alatala mompamula moparenta ri dunia. Iꞌa netibia nalau nantingayo i Pilatus nerapi watabaku Yesus.
44 Pilatus nakandodo nangepe Yesus namatemo. Jadi nipokiona balengga tantara pade nipekutanana, “Iwenumo? Nakono mpuꞌu Yesus namatemo?”
45 Sangga niepenapa pantesa nggari jaꞌi balengga tantara to nanguli Yesus namatemo, nipaloganamo Yusuf lau mangala watabaku Yesus.
46 Jadi Yusuf nangoli kae gandisi nalusu raposompu, pade nitaꞌurakana watabaku Yesus nggari kayu parika pade nisompuna ante kae to niolina etu. Pade nibolina watabaku Yesus etu riara dayo to nipaꞌa ri saongu bulu watu. Naopu etu niluliakana woꞌu saongu watu bete nipombapiku pewobo dayo etu.
47 Tempo etu i Maria Magdalena bo i Maria indo Yoses nanggita petoꞌo nipombaboli watabaku Yesus etu.