Topanggeni agama Yahudi nonia mompatesi Yesus
14
Tempo etu damo rombengipa mawela Eo Bete Paska bo Posusa Roti Daꞌa Nidika Ragi. a Balengga-balengga topanggeni agama Yahudi bo guru-guru agama danangelo jala manjoko Yesus nggalino pade mompatesi Iꞌa.
2 Nangulimo ira, “Neꞌe kita manjoko Iꞌa tempo eo posusa etu, ala neꞌe magado tau dea.”
Sambaꞌa besi nantoli minya wongi ri balengga Yesus
3 Naria sanggani Yesus ri ngata Betania ri sapo i Simon to najuꞌa bete bopia. Tempo Iꞌa nekatoko nanggoni naratamo sambaꞌa besi nanggeni saongu botolo to nipowia nggari watu naisi minya wongi to nasuli mpuꞌu olina to nipowia nggari kale to nawongi. Narata ri setu niposona tambolo botolo etu pade nitolina minya wongi etu ri balengga Yesus.
4 Naria bara sakuya mbaꞌa tau ri setu to narau rara nanggita powia nu besi etu. Notesamo ira sambaꞌa bo sambaꞌa, “Nokuya minya wongi etu nipakarugi sinjaꞌi?
5 Kakonona minya etu mamala rapobalu ante olina toluatu mpeka doi salaka b pade doi etu mamala rawai ka tau-tau nakasiasi.” Pade ira nanggarau besi etu.
6 Tapi nangulimo Yesus ka ira, “Pakambamo iꞌa! Nokuya komi nompakasusa iꞌa? Iꞌa nanggawia sangele to nabelona ri jaꞌiku.
7 Tau to nakasiasi bate-batena maria ri tatongo komi pade ira mamala ratulungi komi ri butu-butu tempo to nipodota komi. Tapi Aku eꞌi daꞌa batena mosanggani ante komi.
8 Besi eꞌi nompowia nuapa to namala nikawiana. Iꞌa nombatoli minya wongi ri jaꞌiku ala mompakasadia koroku ratana banepia.
9 Aku mpuꞌu-mpuꞌu notesa ka komi, ri umba-umba ri dunia Kareba Belo rapatolele, powia nu besi eꞌi kana ratesa woꞌu ala mombatora iꞌa.”
Yudas nompobalu Yesus ka balina
10 Naopu etu nalaumo Yudas Iskariot, sambaꞌa nggari sampulu rombaꞌa anaguru Yesus, mpaka ri jaꞌi balengga-balengga topanggeni agama ante patujuna mompobalu Yesus ka ira.
11 Tempo ira nangepe tesa Yudas, nadamba mpuꞌumo rara ira, pade ira nojanji mombawai doi ka iꞌa. Naopu etu nompamulamo Yudas nangelo loga to nabelona mombawai Yesus ka balina etu.
Yesus nanggoni panggoni Posusa Paska ante anaguruna
12 Naratamo eo pamulana Posusa Roti Daꞌa Nidika Ragi, etumo tempo tau-tau to Yahudi nanjambale ana bimba rakoni ri Posusa Paska. Tempo etu naratamo anaguru Yesus nompekutana Iꞌa, “Pue, ri umba petoꞌo mupokono rakalau kami mompakasadia panggoni Posusa Paska ka Komi?”
13 Nangepe etu Iꞌa nompakau rombaꞌa anaguruna ante tewai iweꞌi: “Kalaumo komi mpaka ri ngata Yerusalem. Ri setu sambaꞌa langgai manggeni gumba nu ue kana mosintomu ka komi. Tukimo iꞌa
14 mpaka ri sapo to rakalauna, pade ulimo ka pue njapo ri setu, ‘Iweꞌimo tewai Guru ka kami: Ri umba tombi to nipakasadia ka Aku manggoni panggoni Posusa Paska ante anaguruku?’
15 Pade pue njapo etu kana mompopokita ka komi saongu tombi bete ri kalangana nagana ante parewana. Ri setumo rapompakasadia panggoni Posusa Paska ka kita.”
16 Pade nalaumo rombaꞌa anaguruna etu nesua rara ngata. Pade to nirata ira ri setu nasimbayu pura ewa nuapa to niuli Yesus ka ira. Pade nipakasadia iramo panggoni Posusa Paska etu.
17 Sangga nawengipa naratamo Yesus ante sampulu rombaꞌa anaguruna etu.
18 Tempona ira nekatoko nanggoni, nangulimo Yesus ka ira, “Aku mpuꞌu-mpuꞌu notesa ka komi, sambaꞌa nggari tatongo komi to nanggoni mpasanggani-nggani ante Aku kana mompobalu Aku ka baliku.”
19 Nangepe etu nasusa mpuꞌumo rara ira, pade nekutanamo ira ka Yesus sambaꞌa bo sambaꞌa, “Pue, daꞌa aku eꞌi to nipatuju Komi?”
20 Nangulimo Iꞌa ka ira, “Iꞌamo sambaꞌa nggari komi sampulu rombaꞌa eꞌi to mombatome roti riara tubu mpasanggani-nggani ante Aku.
21 Aku, Ana nu Manusia kana mamate ewa to nitulisi riara Buku Nagasa. Tapi mandasa mpuꞌu tau to mompobalu Aku etu! Nabelopa ane tau etu daꞌa niote ri dunia.”
Yesus nompakatantu ada mombatora Iꞌa
Mat. 26:26-29; Luk. 22:15-20; 1Kor. 11:23-25
22 Tempona ira nanggoni Yesus nangala saongu roti pade nanguli tarima kasi ka Alatala. Naopu etu nibingga-binggana roti etu pade niwaina ka ira ante nanguli, “Alamo roti eꞌi. Eꞌimo koro bataku.”
23 Naopupa etu nialana woꞌumo saongu sanggiri panginu pade niulina tarima kasi ka Pue Alatala. Naopu etu niwaina ka ira pade ira pura-pura nanginu nggari sanggiri panginu etu.
24 Pade niulina woꞌumo ka ira, “Eꞌimo leiku to rapatiti ka tau dea ngina ala mompakaasa pojanji Alatala ante manusia.
25 Aku mpuꞌu-mpuꞌu notesa ka komi, nompamula weꞌi-weꞌi Aku mana manginu anggur sampe marata tempona banepia Aku manginu anggur to nabouna riara Poparenta nu Alatala.”
Yesus nombaboto Petrus kana mombasapu Iꞌa
26 Pade naopupa ira nodade nombatoiya Alatala nalaimo ira mpaka ri Bulu Zaitun.
27 Nangulimo Yesus ka ira, “Komi pura-pura kana mokanggaura momparasaya Aku, sabana naria Tesa nu Alatala to nitulisi riara Buku Nagasa iweꞌi:
‘Aku kana mompatesi topoewu
sampe bimba-bimbana mosimpotatare.’ (Za. 13:7)
28 Tapi tempo Aku matuwu bali Aku mokolu ka komi mpaka ri Bagia Galilea.”
29 Nangepe etu nangulimo i Petrus, “Naupa ira pura-pura mokanggaura momparasaya aku eꞌi daꞌa!”
30 Tapi nangulimo Yesus ka iꞌa, “Aku mpuꞌu-mpuꞌu notesa ka iko, wengina eꞌi woꞌu daꞌapa magana ronggani manu moraꞌo tolungganimo iko mombasapu Aku.”
31 Tapi i Petrus nantambai kabiana nanguli, “Nau aku mamate mpasanggani ante Komi aku daꞌa ntoto mombasapu Komi!” Pade iwetu woꞌu to niuli pura-pura anaguruna ntanina.
Yesus nosambaya ri Bulu Zaitun
32 Pade naratamo ira ri saongu petoꞌo nosanga ka Getsemani. Narata ri setu nangulimo Yesus ka anaguruna, “Pekatokomo ri seꞌi tempo Aku malau mosambaya.”
33 Pade nikenina i Petrus, Yakobus bo Yohanes napola sakedi mpasanggani-nggani. Pade nompamulamo Yesus nasusa bo nawiora mpuꞌu rarana.
34 Niulina ka ira tolumbaꞌa, “Nasusa mpuꞌumo raraku, ewa mamate nirasaiku! Popeamo Aku ri seꞌi pade mainga-inga.”
35 Pade napolamo Yesus sakedi. Notimbakotumo Iꞌa nekadede sampe ri tana pade nosambaya ka Umana Alatala ala ane mamala Iꞌa makabasaka nggari kasusa bo kapari to marata ri jaꞌina etu.
36 Niulina, “Uma, O, Umaku! Daꞌa ria to daꞌa namala mupowia. Ane mamala pakakawaomo nggari jaꞌiku kasusa bo kapari eꞌi! Tapi neꞌe dotaku majadi, aga dotamu mboto.”
37 Naopu etu nanjilimo Yesus ri jaꞌi anaguruna tolumbaꞌa etu. Niratana ira pura-pura napisi. Pade niulina ka i Simon Petrus, “Simon, iwenumo? Napisimo iko? Daꞌa nipakulemu mosanggani ka Aku nau aga sajaa?
38 Komi kana mainga bo mosambaya ala neꞌe komi mawela pesoba! Riara ntaꞌimu naria dota mompowia to nabelona, tapi koromu daꞌa nompakule.”
39 Pade nalau woꞌumo Yesus nosambaya ewa posambayana paniꞌa.
40 Naopu etu narata woꞌumo Iꞌa ri jaꞌi anaguruna. Niratana ira aga napisi woꞌumo sabana naluru mpuꞌu mata ira. Mana ninjani ira nuapa to rauli ira ka Iꞌa.
41 Tempo Yesus natingguli ri jaꞌi ira katolungganina, niulina ka ira, “Iwenumo? Danapisi bo nangosaraka komi? Naganamo! Naratamo tempona Aku, Ana nu Manusia rawai riara mpale tau-tau nasilaka.
42 Pembangumo! Kitamo! Naratamo tau to nompobalu Aku! Kamaimo kita mantomunaka iꞌa!”
Yesus nisoko
43 Tempona Yesus danotesa, naratamo Yudas sambaꞌa nggari sampulu rombaꞌa anaguruna etu nituki ntau dea to nanggeni guma bo pato. Ira nipakau balengga-balengga topanggeni agama, guru-guru agama bo totuꞌa-totuꞌa nto Yahudi.
44 Daꞌapa ira nomai Yudas nompakatantu ka ira tandaina ala ranjani ira ri umbana Yesus. Niulina, “Isema ngina kueki, etumo Iꞌa. Soko komimo Iꞌa pade keni Iꞌa nggari setu ante rajagai mpakabelo-belo.”
45 Sangga naratapa Yudas ri setu iꞌa kaliu-liu nompakamosu Yesus pade nanguli, “Tabe, Guru!” Pade niekina Yesus.
46 Naopu etu ira to nikeni Yudas nompakamosu Yesus pade nanjoko Iꞌa.
47 Nanggita etu sambaꞌa nggari anaguru Yesus to nenggore ri setu nangosu gumana nantimbe batua nu Balengga Topanggeni Agama sampe napudu talingana.
48 Nangulimo Yesus ka tau dea etu, “Iwenumo? Niuli komi Aku eꞌi sambaꞌa parampo sampe komi kana marata ante guma bo pato manjoko Aku?
49 Kakonona eo-eo Aku naria ri tatongo komi nopaguru ri Sapo Mpepue. Nokuya komi daꞌa nanjoko Aku ri setu? Tapi etu kana majadi ala madupa tesa to nitulisi riara Buku Nagasa.”
50 Naopu etu pura-pura anaguruna nangowa nompalasi Yesus.
51 Naria sambaꞌa kabilasa aga sabala lau buya ri korona nantuki puri Yesus. Iꞌa nisoko ntau ri setu,
52 tapi iꞌa nombawonju buyana pade nalai ante nelaya.
Yesus nikeni ri ngayo Polibu Bete Agama nto Yahudi
53 Pade Yesus nikeni ira mpaka ri ngayo Balengga Topanggeni Agama. Ri setu pura-pura balengga topanggeni agama, totuꞌa-totuꞌa nto Yahudi bo guru-guru agama nasiromu nolibu.
54 Petrus nantuki Yesus nggawao sampe narata ri lalowo sapo nu Balengga Topanggeni Agama. Narata ri setu nekatokomo iꞌa noneru mpasanggani-nggani ante topojaga-topojaga.
55 Tempo etu balengga-balengga topanggeni agama ante pura-pura Topolibu Bete Agama nto Yahudi etu nompasimbuku mangelo tau mompakanoto kasala Yesus ala Iꞌa mamala rasuku mamate. Tapi daꞌa ntoto nirata ira kasalana.
56 Nadea tau nodawa ala mombanawusaka Iꞌa, tapi tesa ira daꞌa nosirata sambaꞌa bo sambaꞌa.
57 Pade nekanggoremo bara sakuya mbaꞌa tau ntanina nombabata Iꞌa ante tesa-tesa dawa iweꞌi:
58 “Niepe kami tau eꞌi nanguli, ‘Aku mombagero Sapo Mpepue eꞌi to nipowia pale manusia, pade riara tempo tolumbengi kubangu sapo ntanina anu daꞌa nikawia pale manusia.’”
59 Tapi tesa-tesa tau etu woꞌu daꞌa nosirata sambaꞌa bo sambaꞌa.
60 Pade nekanggoremo Balengga Topanggeni Agama ri ngayo ira pura-pura nompekutana Yesus iweꞌi: “Iwenumo? Naria pesonomu ewa tesa-tesa nu sabi eꞌi to nanguli Iko atau daꞌa?”
61 Tapi naupa daꞌa ria salana, Yesus aga nekalino. Daꞌa ria nuapa-nuapa nisonona.
Jadi sangganipa Balengga Topanggeni Agama nompekutana Iꞌa, “Ulimo ka kami, Ikomo Magau to Mompakasalama, Ana nu Alatala to Nibila?”
62 Nesonomo Yesus, “Akumo Iꞌa. Pade komi pura-pura kana manggita Aku, Ana nu Manusia mekatoko ri sabingga nggana nu Alatala to Neliu Nggakuasa. Pade komi kana manggita Aku manaꞌu riara kulimu nggari langi.”
63 Nangepe etu Balengga Topanggeni Agama nombaseri pakeana tandaina narau mpuꞌu rarana, pade niulina ka Topolibu Bete, “Rapokuya kita mangelo sabi-sabi ntanina?
64 Niepe komi mbotomo tesana nompakakedi Alatala! Iwenu pombarata komi?”
Nesonomo ira pura-pura, “Iꞌa kana rasuku mamate!”
65 Pade nompamulamo bara sakuya mbaꞌa tau nantailu Iꞌa. Pade ira nombatondo lenje Yesus pade nombajaguru Iꞌa ante nanguli, “E, Nabi, ulimo isema nombajaguru Iko!” Pade topojaga-topojaga woꞌu nombaboba Iꞌa.
Petrus nombasapu Yesus
66 Tempona etu i Petrus danaria ri lalowo sapo etu. Naratamo sambaꞌa besi batua Balengga Topanggeni Agama.
67 Tempo iꞌa nanggita i Petrus nekatoko noneru ri setu iꞌa nombalele mata lenje i Petrus pade niulina ka iꞌa, “Komi woꞌu sambaꞌa tau nosanggani-nggani ante Yesus to Nazaret etu!”
68 Tapi i Petrus nesapu. Niulina, “Daꞌa! Daꞌa ninjaniku patuju tesamu!” Pade nesuwumo iꞌa mpaka ri tambale ri ngayo nu sapo etu. [Pade noraꞌomo manu.]
69 Tempo i Petrus ri setu iꞌa nikita besi batua etu woꞌumo. Pade niuli besi etu ka tau-tau ntanina ri setu, “Tau eꞌi woꞌu sambaꞌa roana.”
70 Tapi sangganipa i Petrus nesapu.
Daꞌa nasae nggari setu nanguli woꞌumo tau-tau to nenggore ri setu ka i Petrus, “Natantumo komi eꞌi sambaꞌa roana, sabana komi woꞌu sambaꞌa to Galilea!”
71 Tapi nompamulamo i Petrus netunda bo nojanji. Niulina, “Mpuꞌu-mpuꞌu daꞌa ntoto ninjaniku tau to niuli komi etu!”
72 Iwetu i Petrus notesa noraꞌomo manu karongganina. Pade natetoramo rara i Petrus tesa Yesus ka iꞌa pangane to nanguli, “Daꞌapa magana ronggani manu moraꞌo, tolungganimo iko mombasapu Aku.” Pade nageomo iꞌa nakanjodu-njodu.