PEPATUDUKI YESUS RI BULU ZAITUN TO NANTESA KAJADIA-KAJADIA BANEPIA (Pasal 13)
Yesus nombaboto kagero nu Sapo Mpepue banepia
13
Tempo Yesus nesuwu nggariara Sapo Mpepue, naria sambaꞌa anaguruna nanguli ka Iꞌa, “Guru, kitamo kagaya nu sapo-sapo eꞌi! Kitamo karoso nu watu-watuna!”
2 Nangulimo Yesus ka iꞌa, “Nikitamu sapo-sapo to nagaya eꞌi. Tapi kana marata tempona banepia pura-pura to nikitamu eꞌi kana ragero sanggani sampe daꞌa mana maria watu eꞌi rapakamba mosisunju, nau kamba saongu. Pura-pura kana ragero.”
Yesus nombaboto kasusa bo kapari to marata tempo namosumo kaopu nu dunia
3 Pade nalaumo Yesus nekatoko ri Bulu Zaitun ri petoꞌo to nantingayo Sapo Mpepue. Ri setu i Petrus, Yakobus, Yohanes bo Andreas nompekutana Iꞌa nggalino,
4 “Guru, tulungi uli ka kami nepia etu pura-pura majadi? Nuapa tandaina to mompakatantu namosumo kajadia to nitesa Komi paniꞌa?”
5 Nesonomo Yesus ka ira, “Pakabelo-belo ala neꞌe komi rabagiu!
6 Sabana madea tau kana marata mompobalu sangaku. Ira manguli, ‘Akumo Magau to Mompakasalama!’ Madea tau kana mamala rabagiu ira iwetu.
7 Ane komi mangepe wamba ntau mosipatesi bara mangepe lele ntau mosipatesi, neꞌe komi maeka! Etu pura-pura kana majadi ntani ruru, tapi etu daꞌapa tandaina kaopu nu dunia.
8 Tempo etu tau-tau nggari sangatana kana mosibali ka tau-tau to sangatana, pade magau simbau magau woꞌu kana mosiewa. Pade ri umba-umba ri dunia eꞌi kana maria lingu pade kana maria woꞌu kamateoro. Tapi etu pura-pura aga kasusa pamulana, ewa juꞌa besi ntora moana.
9 Tapi komi eꞌi, pakabelo-belo, sabana komi kana rasoko pade rakeni rapangadu ri ngayo ntopotangara agama. Komi kana raboba riara sapo mpodade pade komi kana rakeni ri ngayo ntopoparenta-topoparenta bo magau-magau sabana komi nomparasaya Aku. Tempo etu komi kana mompakanoto ka ira isema Aku.
10 Pade Kareba Belo kana rapatolele ka pura-pura manusia ri dunia eꞌi ntani ruru.
11 Ane komi rasoko rakeni ratangara neꞌe masusa pekirimu mompekiri nuapa pesono komi. Ane maratamo tempo etu tesamo nuapa to rawai ka komi, sabana daꞌa komi mboto to motesa tapi Nosa Nagasa nu Alatala.
12 Pade ri tempona etu woꞌu kana maria tau mombawai sampesuwuna mboto rapatesi, pade maria totuꞌa mombawai anana mboto rapatesi. Ngana-ngana kana mangewa indo umana pade mombawai ira rapatesi.
13 Pade komi kana raporau rara ntau pura-pura sabana komi nomparasaya Aku. Tapi isema-sema to maroo momparasaya sampe ri kaopuna kana rapakasalama.”
Kasusa bo kapari to majadi daꞌapa Yesus marata bali ri dunia
14 “Komi kana manggita to niuli ‘Kajaꞌana to Mompakatantoru’ a mekanggore ri petoꞌo to daꞌa masipatona. (Isema-sema mombabasa tesa eꞌi pekiri mbotomo batuana.) Tempo etu majadi tau-tau to naria ri Bagia Yudea kana mangowa malai mpaka ri buluna.
15 Ane tau-tau to nompamaya ka poiri ri bunggu nu sapona neꞌe mana mesua mangala mbara-mbarana nggariara njapona.
16 Ane tau-tau ri tinaluna, neꞌe mana ira manjili ri ngata mangala pakeana. Palaimo masasinta!
17 Ri eo etu mandasa mpuꞌumo besi-besi to matiana bo ira to danompatomi.
18 Pekakaimo ka Alatala ala etu daꞌa majadi tempo leni.
19 Sabana ri eo etu majaꞌa mpuꞌu kasusa bo kapari to mawela manusia. Daꞌapa sanggani najadi kasusa bo kapari ewa etu nompamula nggari lamba pamulana dunia nipajadi Alatala sampe weꞌi-weꞌi. Pade daꞌa mana ria kasusa bo kapari ewa etu ri tempo marata.
20 Ane Pue daꞌa masalisa mompakaopu kasusa bo kapari etu, natantumo daꞌa kamba sambaꞌa mamala matuwu. Tapi nggari towe Alatala ka todea topomparasaya to nipelisina, tempona etu kana masalisa rapakaopuna.
21 Ri tempona etu ane maria tau manguli ka komi, ‘Kitamo! Ri seꞌimo Magau to Mompakasalama,’ bara manguli ka komi, ‘Ri setumo Iꞌa,’ neꞌe raparasaya komi tesana.
22 Sabana kana meumba tau topodawa to mompangaku iramo Magau to Mompakasalama. Pade meumba woꞌu nabi-nabi topodawa. Ira pura-pura kana mompowia tandai-tandai to nipogumaa bo kabaraka-kabaraka ante patuju ane mamala mombabagiu tau-tau to nipelisi Alatala.
23 Tapi komi kana mainga sabana daꞌapa etu majadi nitesaku ka komi mamimo.”
Karata Ana nu Manusia bali ri dunia
24 “Ri tempo etu ane maopumo kasusa bo kapari etu mata eo kana majadi marumau pade wula mana mewanta.
25 Betuꞌe-betuꞌe kana manawu nggari langi pade kuasa-kuasa ri langi kana ragagoya pura.
26 Pade ri tempo etumo pura-pura manusia ri dunia kana manggita Aku, Ana nu Manusia manaꞌu riara kulimu ante kuasa bo karemeku to nipogumaa.
27 Pade Aku kana mompakau malaeka-malaekaku malau mompasiromu pura-pura tau to nipelisiku nggari patanjulapa dunia, nggari tampa nu langi marata ri tampa nu dunia.”
Pepatuduki nggari kayu ara
28 “Pariaramo pepatuduki nggari kayu ara. Ane komi manggita rangga-ranggana nompamula nangura pade nompamula noroya, natantu ninjani komi namosumo tempo eo mapane.
29 Iwetu woꞌu ane komi manggita kajadia-kajadia to nitesaku paniꞌa, kana ranjani komi namosumo tempo karataku. Damo mompopea tempona.
30 Aku mpuꞌu-mpuꞌu notesa ka komi, kajadia-kajadia etu kana majadi daꞌapa pura-pura tau to natuwu weꞌi-weꞌi mamate.
31 Langi bo dunia kana malipo tapi tesaku kana maroo sampe ri kasae-saena.
32 Tapi eo bo tempo karataku etu daꞌa ria sambaꞌa nangginjani, nabeloka malaeka-malaeka ri suruga, nabeloka Ana nu Alatala mboto. Aga Umaku mboto to nangginjanina.”
Kita kana mainga mompopea karata Yesus
33 “Jadi pakabelo-belo. Komi kana mainga sabana daꞌa ninjani komi nepia tempo karataku.
34 Karataku nasimbayu ewa porapa eꞌi: Naria sambaꞌa tau to nalau mpaka ri ngata nakawao. Daꞌapa iꞌa nalau niwaina kuasa ka batua-batuana mombaurusi sapona. Butu mbaꞌa niwaina bagona sambaꞌa bo sambaꞌa. Pade topanggatono pewobo nitewaina mainga mompopea karatana.
35 Jadi iwetu woꞌu komi kana mainga mompopea karataku sabana daꞌa ninjani komi nepia Aku manjili, bara ulungguwiana bara ri tongo wengi bara kabobayana bara ri pebulu nu eo.
36 Komi kana mainga ala ane Aku marata neꞌe-neꞌe komi aga kurata maturu.
37 Nuapa to nitesaku ka komi, kutesa woꞌu ka pura-pura tau. Komi kana mainga!”