PEPATUDUKI YESUS RI BULU ZAITUN TO NANTESA KAJADIA-KAJADIA BANEPIA (Pasal 24-25)
Yesus nombaboto kagero nu Sapo Mpepue
24
Naopu etu nalaumo Yesus nompalasi Sapo Mpepue. Tempo etu naratamo anaguruna nompopokita ka Iꞌa kagaya nu pura-pura Sapo Mpepue.
2 Tapi nangulimo Yesus ka ira, “Nikita komi sapo-sapo eꞌi? Aku mpuꞌu-mpuꞌu notesa ka komi, kana marata tempona banepia pura-pura to nikita komi eꞌi kana ragero sanggani sampe daꞌa mana maria watu eꞌi rapakamba mosisunju, nau kamba saongu. Pura-pura kana ragero.”
Tandaina namosumo karata Yesus bali ri dunia
3 Naopu etu nalaumo Yesus mpaka ri Bulu Zaitun. Tempo Iꞌa nekatoko ri setu naratamo anaguru-anaguruna ri jaꞌina ala mompekutana Iꞌa nggalino. Niuli ira, “Tulungi ulimo ka kami, nepia pura-pura to nitesa Komi paneꞌa majadi, pade nuapa tandaina karatamu bo kaopu nu dunia eꞌi?”
4 Nesonomo Yesus ka ira, “Pakabelo-belo ala neꞌe komi rabagiu!
5 Sabana madea tau kana marata mompobalu sangaku. Ira manguli, ‘Akumo Magau to Mompakasalama!’ Pade madea tau rabagiu ira.
6 Komi kana mangepe wamba ntau mosipatesi pade raepe komi woꞌu lele ntau mosipatesi. Tapi neꞌe komi maeka, sabana etu pura-pura kana majadi ntani ruru. Tapi etu daꞌapa tandaina kaopu nu dunia.
7 Tempo etu tau-tau nggari sangata kana mosibali ka tau-tau to sangatana, pade magau simbau magau woꞌu kana mosiewa. Pade ri umba-umba ri dunia kana maria kamateoro bo lingu.
8 Tapi kajadia etu pura-pura aga kasusa pamulana, ewa juꞌa besi ntora moana.
9 Tempo etu komi kana rasoko pade rawai ka tau to mompandasa komi pade mompatesi komi. Komi kana raporau rara ntau nggari umba-umba ri dunia sabana komi nomparasaya Aku.
10 Pade tempo etu madea tau kana mokanggaura momparasaya Aku. Maria to mombawai roa ira topomparasaya ka bali ira. Pade madea tau mosiporau rara sambaꞌa bo sambaꞌa.
11 Pade madea nabi topodawa kana meumba pade mombabagiu tau dea.
12 Ri tempo etu kajaꞌana kana mantambai kadeana sampe madea tau mana mosimpotowe.
13 Tapi isema-sema to maroo momparasaya sampe ri kaopuna kana rapakasalama.
14 Pade Kareba Belo ewa Poparenta nu Alatala kana rapatolele ri njumaongu dunia ala pura-pura manusia mamala mangepe. Maopu etu pade marata kaopu nu dunia.”
Yesus nantesa kasusa bo kapari to marata banepia
15 “Pade komi kana manggita to niuli ‘Kajaꞌana to Mompakatantoru’ mekanggore ri Sapo Mpepue, ewa to niboto nabi i Daniel nggaolu. a (Isema-sema mombabasa tesa eꞌi pekiri mbotomo batuana.)
16 Tempo komi manggita etu, tau-tau to naria ri Bagia Yudea kana mangowa malai mpaka ri buluna.
17 Ane tau-tau to nompamaya ka poiri ri bunggu nu sapona, neꞌe mana ira mesua rara njapo mangala bara nuapa-nuapa.
18 Ane tau-tau ri tinaluna, neꞌe mana ira manjili ri ngata mangala pakeana. Palaimo masasinta!
19 Ri eo etu mandasa mpuꞌumo besi-besi to matiana bo ira to danompatomi.
20 Pekakaimo ka Alatala ala tempo komi mangowa malai etu daꞌa mawela tempo leni bara Eo Mpenonto.
21 Sabana ri eo etu majaꞌa mpuꞌu kasusa bo kapari to mawela manusia. Nggari lamba pamulana sampe weꞌi-weꞌi daꞌapa sanggani najadi kasusa bo kapari to najaꞌa ewa etu, pade daꞌa mana maria ri tempo marata.
22 Ane tempo kasusa etu daꞌa masasinta rapakaopu i Pue, natantumo daꞌa kamba sambaꞌa mamala matuwu. Tapi nggari towe Alatala ka todea topomparasaya, tempona etu kana masasinta rapakaopuna.
23 Ri tempo etu ane maria tau manguli ka komi, ‘Kitamo! Ri seꞌimo Magau to Mompakasalama,’ bara manguli, ‘Ri setumo Iꞌa,’ neꞌe raparasaya komi tesana.
24 Sabana kana meumba tau topodawa to mompangaku iramo Magau to Mompakasalama, pade meumba woꞌu nabi-nabi topodawa to mompowia tandai-tandai to nipogumaa bo kabaraka-kabaraka ala mombabagiu tau. Ane mamala nau tau-tau to nipelisi Alatala rabagiu ira woꞌu!
25 Toramo! Daꞌapa etu pura-pura najadi nibotoku mamimo ka komi!
26 Jadi ane maria tau manguli ka komi, ‘Kitamo! Magau to Mompakasalama naria ri karawa baina,’ neꞌe komi malau! Ane ira manguli, ‘Kitamo! Ri setumo Iꞌa rara njapo,’ neꞌe raparasaya komi tesa ira!
27 Sabana tempo Aku, Ana nu Manusia marata bali ri dunia eꞌi, karataku kana matekita ri umba-umba ri dunia, nasimbayu ewa kila neumba ri kamataeona pade norea sampe ri kasolona.
28 Ane rakita komi tonji kolaa masiromu manggoni, natantumo nanoto ri setu naria binata namate. Iwetu woꞌu ante karataku. Natantumo etu manoto ka pura-pura tau.”
Karata Ana nu Manusia bali ri dunia
29 “Ane maopumo tempo kasusa bo kapari etu, kaliu-liu mata eo kana majadi marumau pade wula mana mewanta. Betuꞌe-betuꞌe kana manawu nggari langi pade kuasa-kuasa to naria ri langi kana ragagoya pura.
30 Ri tempo etu kana meumba tandaina ri langi to mompakanoto karataku, Ana nu Manusia. Pade pura-pura manusia ri dunia kana mageo mpajea. Ira kana manggita Aku, Ana nu Manusia manaꞌu riara kulimu ante kuasa bo karemeku to nipogumaa.
31 Kololio to nabetena kana rapopomoni pade malaeka-malaekaku kana kupakau malau mompasiromu pura-pura tau to nipelisiku nggari umba-umba ri dunia.”
Pepatuduki nggari kayu ara
32 “Pariaramo pepatuduki nggari kayu ara. Ane komi manggita rangga-ranggana nompamula nangura bo tawana nompamula noroya, natantu ninjani komi namosumo tempo eo mapane.
33 Iwetu woꞌu ane komi manggita kajadia-kajadia to nitesaku paniꞌa, kana ranjani komi namosumo tempo karataku. Damo mompopea tempona.
34 Aku mpuꞌu-mpuꞌu notesa ka komi, kajadia-kajadia etu kana majadi daꞌapa pura-pura tau to natuwu weꞌi-weꞌi mamate.
35 Langi bo dunia kana malipo tapi tesaku kana maroo sampe ri kasae-saena.”
Kita kana mainga mompopea karata Yesus bali ri dunia
36 “Tapi eo bo tempo karataku etu daꞌa ria sambaꞌa nangginjani, nabeloka malaeka-malaeka ri suruga, nabeloka Ana nu Alatala mboto. Aga Umaku mboto to nangginjanina.
37 Tempo Aku, Ana nu Manusia marata banepia pokainggu manusia kana masimbayu ante pokainggu manusia tempo nabi Nuh nggaolu.
38 Tempo etu daꞌapa njumaongu dunia nipakalodo ue bete manusia nakanjalia. Ira aga nanggoni bo nanginu pade norongo bo nosiporongo ewa biasa sampe nabi Nuh nesua riara sakaya betena.
39 Daꞌa ninjani ntau dea nuapa rapawela ka ira sampe pura-pura ue ri dunia nanggabuntu sanggani bo ira nalome puramo. Iwetu woꞌu tempo Aku, Ana nu Manusia marata. Manusia bate-batena makanjalia iwetu.
40 Ri tempo etu kana maria rombaꞌa langgai manggawia mpasanggani ri tinalu. Sambaꞌa kana kuala, pade sambaꞌa kana kuboli setu.
41 Pade ane maria besi rombaꞌa mogili mpasanggani-nggani, sambaꞌa kana kuala pade sambaꞌa woꞌu kana kuboli ri setu.
42 Etu sampe kuuli, komi kana mainga, sabana daꞌa ninjani komi nepia karata Pue komi.”
PATANGELE PORAPA TO NOMPAKANOTO KITA KANA MAINGA MOMPOPEA KARATA PUE YESUS (24:43-25:30)
Sambaꞌa pue njapo to mainga
43 “Toramo tesa eꞌi! Ane rapana sambaꞌa pue njapo nangginjani tinti sakuya nggawengina topangangga marata, natantumo iꞌa kana mainga-inga. Iꞌa daꞌa mompalamba topangangga mesua rara njapona.
44 Iwetu woꞌu komi kana mainga mompopea karataku, sabana Aku, Ana nu Manusia kana marata ante daꞌa ranjani-njani komi.”
Sambaꞌa batua to natutu nantuki dota madikana
45 “Rapana maria sambaꞌa batua to nanoto to natutu nantuki dota madikana. Natantu iꞌamo to raonggotaka madikana majadi topombaurusi pura-pura batua rara njapo. Iꞌamo to mombaurusi panggoni ka batua-batua ntanina ri tempona.
46 Mabelo mpuꞌumo batua etu ane madikana manjili pade manggita iꞌa mompowia panggawia to niparasaya ka iꞌa.
47 Aku mpuꞌu-mpuꞌu notesa ka komi, batua etu kana raonggotaka madikana majadi topombaurusi pura-pura mbara-mbarana.
48 Tapi mandasa mpuꞌu ane rapana batua etu majaꞌa pokaingguna pade iꞌa mompekiri riara ntaꞌina iweꞌi: ‘Damasaepa madikaku manjili.’
49 Pade iꞌa mompamula mombaboba batua-batua ntanina pade iꞌa aga manggoni manginu mpasanggani-nggani ante tau nakalangu.
50 Tapi tempo batua etu makanjalia iwetu, madikana kana manjili ri eo bo tempo to daꞌa ninjanina.
51 Pade batua etu kana rapatesi. Iꞌa kana ratajiaka riara naraka mpasanggani-nggani ante tau-tau aga nabelo ri lenje. Ri setu ira mageo-geo bo mosinggiki baga ante masusa mpuꞌu rara.”