Tesa kamate Lazarus
11
1-2 Naria sambaꞌa langgai nosanga ka i Lazarus to netoꞌo ri ngata Betania nosanggani-nggani ante sampesuwuna besi to nosanga ka i Maria bo i Marta. Maria etumo besi to nombatoli minya wongi ri kada Yesus pade nipeꞌena ante woꞌona. Naria sanggani i Lazarus najuꞌa ntomo.
3 Jadi rombaꞌa sampesuwu i Lazarus etu nompakau tau malau manguli ka Yesus iweꞌi: “Pue, wegamu to nipotowemu najuꞌa.”
4 Sangga nangepe kareba etu nangulimo Yesus, “Juꞌana etu daꞌapa rapomatena. Etu najadi ala Alatala rabila bo ratoiya ntau, sabana nggari juꞌa etu Aku, Ana nu Alatala kana rabila bo ratoiya.”
5 Yesus nompotowe i Marta, i Maria bo i Lazarus.
6 Jadi tempo Yesus nangepe kareba to nanguli i Lazarus najuꞌa nitunggaina netoꞌo rombengipa kasaena ri petoꞌo nikalauna etu.
7 Naliu rombengi etu niulina ka anaguru-anaguruna, “Mai manjilimo kita mpaka ri Bagia Yudea.” a
8 Nesonomo anaguruna, “Guru, daꞌapa nasae tau-tau to Yahudi ri setu nadota mombarempe Komi ante watu sampe mamate. Nuapa sabana weꞌi-weꞌi Guru madota malau mpaka ri setu?”
9 Nangulimo Yesus ka ira, “Saeo saena sampulu rojaa. Tau to nolumako ri eona daꞌa matipasunu ri watu apa nikitana reme to nompakarawa jalana.
10 Tapi tau to nolumako tempo nggawengina kana matipasunu ri watu sabana daꞌa ria reme ri jaꞌina mompakarawa jalana.”
11 Iwetumo panguli Yesus ka anaguruna. Naopu etu nipapolana pantesana etu ka ira. Niulina, “Wegata i Lazarus napisimo. Tapi Aku malau mombalike iꞌa.”
12 Pade nangulimo anaguru-anaguru Yesus, “Ane i Lazarus napisimo, iꞌa kana mabelo bali nggari juꞌana etu.”
13 Tapi kakonona patuju tesa Yesus nanguli i Lazarus namatemo.
14 Sabana etu, Yesus nanguli ntodomo ka anaguru-anaguruna, “Lazarus namatemo.
15 Nadamba raraku Aku daꞌa naria ri setu tempo iꞌa namate, sabana to najadina etu manggeni belo ka komi ala komi momparasaya Aku. Kamaimo, kita malau manggita i Lazarus.”
16 Pade nangulimo i Tomas to nidae “Ngana Norapi” ka roa-roana anaguru Yesus, “Kamaimo, kita mantuki Iꞌa ala kita woꞌu mamate mpasanggani-nggani ante Iꞌa.”
Yesus nompakawoe rara Marta bo Maria
17 Tempo Yesus narata ri ngata Betania patambengimo kasaena i Lazarus niboli riara dayona.
18 Ngata Betania etu namosu ante ngata Yerusalem, kira-kira toluongu kilo kakawaona.
19 Jadi nadeamo tau to Yahudi narata ri jaꞌi Marta bo i Maria mompakawoe rara ira rombaꞌa sabana sampesuwu ira i Lazarus namatemo.
20 Sangga i Marta nangepe lelena namosumo Yesus, nalaumo iꞌa nantomunaka Iꞌa. Aga i Maria nopea ri sapona.
21 Sangga nikitana Yesus nangulimo i Marta ka Iꞌa, “Pue, ane Komi naria ri seꞌi tempo etu, sampesuwuku i Lazarus daꞌa namate.
22 Tapi naupa iwetu ninjaniku nuapa-nuapa raperapi Komi weꞌi-weꞌi kana rawai Alatala ka Komi.”
23 Nangulimo Yesus ka i Marta, “Sampesuwumu etu kana matuwu bali.”
24 Nanguli i Marta, “Iyo. Ninjanikumo iꞌa kana matuwu bali tempo pura-pura tau namate matuwu bali ri kaopu nu dunia.”
25 Nanguli Yesus ka i Marta, “Aku eꞌimo to mompakatuwu bali tau namate pade to mombawai katuwua. Isema-sema momparasaya Aku naupa iꞌa namatemo iꞌa kana matuwu bali.
26 Pade isema-sema to natuwu bo nomparasaya Aku, ira mana mamate sampe ri kasae-saena. Niparasayamu to niuliku eꞌi?”
27 Nanguli i Marta, “Iyo, Pue. Niparasayakumo Komi etu Ana nu Alatala, Magau to Mompakasalama to nijanji Alatala kana marata ri dunia.”
28 Naopu i Marta notesa ka Yesus iwetu, nalaumo iꞌa nompokio i Maria pade nosiwawayo ka iꞌa, “Naratamo Guru. Iꞌa madota mosirata ka iko.”
29 Nangepe pantesa i Marta etu, nekanggoremo i Maria nalau nasalisa nomposirata Yesus.
30 Tempo etu Yesus daꞌapa nesua riara ngata Betania. Iꞌa da ri sawalikuna ri petoꞌo niposiratana ante i Marta.
31 Tau-tau to Yahudi to nompakawoe rara i Maria rara njapona nanggita iꞌa nompari-mpari nalau. Jadi ira woꞌu nalau nantuki iꞌa. Niuli ira, “Iꞌa nalau nageo ri dayo ria.”
32 Sangga naratapa i Maria ri jaꞌi Yesus nekadedemo iꞌa ri ngayona ante nanguli, “Pue, ane Komi naria ri seꞌi bopia natantumo sampesuwuku daꞌa namate.”
33 Tempo Yesus nanggita i Maria bo roa-roana to nantuki iꞌa nageo-geo, nasusa mpuꞌumo rarana.
34 Pade nekutanamo Iꞌa ka ira, “Ri umba tanu dayona?”
Nesonomo ira, “Pue, kamaimo lau rakitata.”
35 Pade nageomo Yesus.
36 Nanggita etu nangulimo tau-tau to Yahudi to nantuki i Maria etu, “Kitamo. Nipotowe Yesus mpuꞌu i Lazarus.”
37 Tapi naria woꞌu sanu ira nanguli sambaꞌa ka roana, “Tau naburo namala nipakabelona. Iwenu sampe Iꞌa daꞌa namala nompakabelo juꞌa i Lazarus ala iꞌa daꞌa namate?”
Yesus nompakatuwu bali Lazarus
38 Ante nasusa woꞌumo rarana Yesus nompakamosu dayo i Lazarus. Dayo etu saongu bololia ri kente nu bulu, bolona nitondo ante watu bete.
39 Nangulimo Yesus, “Kaliakamo watu etu!”
Tapi nangulimo i Marta sampesuwu ntomate etu, “Pue, natantu nawaumo iꞌa, sabana patambengimo iꞌa riara dayo etu.”
40 Nangulimo Yesus ka i Marta, “Iwenu? Daꞌa niuliku ka komi paniꞌa ane komi momparasaya Aku komi kana manggita kabete nu kuasa Alatala?”
41 Naopu etu nikaliaka iramo watu bete nipombatondo dayo etu. Pade nantingoamo Yesus ante nanguli, “Umaku, Aku nosukuru sabana posambayaku eꞌi niepemumo.
42 Ninjaniku Komi bate-batena nangepe posambayaku, tapi niuliku iwetu ala raepe tau-tau ri seꞌi ala ira mamala momparasaya Komimo to nompakau Aku momai ri dunia eꞌi.”
43 Naopu notesa iwetu nongaremo Yesus ante suara namangga, “Lazarus! Kamaimo!”
44 Pade nesuwumo tomate etu nggariara dayona. Kadana bo palena daniwewe pompoꞌu sompu pade balenggana danipoꞌu pasapu. Pade nangulimo Yesus ka ira ri setu, “Wolemo pompoꞌuna etu ala iꞌa mamala molumako mabelo.”
Topanggeniaka nto Yahudi nasintuwu mompatesi Yesus
45 Nanggita kajadia etu nadeamo tau to Yahudi to narata mompakawoe rara i Maria nomparasaya Yesus.
46 Tapi naria sanu tau nggari tatongo ira to nalau mpaka ri jaꞌi tau-tau to Parisi nombatesa ka ira nuapa to nipowia Yesus etu.
47 Jadi balengga-balengga topanggeni agama bo tau-tau to Parisi nompasiromu Polibu Bete Agama Yahudi. Niuli ira ka topolibu to nasiromu etu, “Nuapa masipato rapowiata? Nadea mpuꞌu kabaraka to nipowia ntau etu.
48 Ane kita batena mompalamba Iꞌa iwetu, natantumo pura-pura tau kana momparasaya Iꞌa! Pade kaopuna tantara Roma kana marata mombagero Sapo Mpepueta bo njumaongu ngatata!”
49 Naria sambaꞌa nggari tatongo ira to nosanga ka i Kayafas, to najadi Balengga Topanggeni Agama mpae etu. Iꞌa nanguli ka ira, “Daꞌa ninjani komi nuapa-nuapa!
50 Daꞌa ntoto ninjani komi nuapa to nanggeni belo ka todea! Nabelopa ane sambaꞌa tau mamate manjaliku todea ala pura-pura todea neꞌe rapakaropu!”
51 Kakonona tesa i Kayafas etu daꞌa nitesana nggari pekirina mboto. Tapi ewa Balengga Topanggeni Agama Yahudi mpae etu, iꞌa nombaboto kamate Yesus manjaliku todea to Yahudi.
52 Pade daꞌa aga to Yahudi, tapi ala pura-pura ana nu Alatala to netoꞌo ri umba-umba ri dunia mamala rapasiromu majadi nosaongu.
53 Jadi nompamula nggari eo etu nasintuwumo topanggeniaka-topanggeniaka nto Yahudi mompatesi Yesus.
54 Sabana etu Yesus mana nosanggani-nggani ante todea to Yahudi. Tapi nalaumo Iꞌa nggari Bagia Yudea etu mpaka ri bagia to namosu karawa baina, etumo ri ngata Efraim. Pade naroomo Iꞌa ri setu mpasanggani-nggani ante anaguruna.
55 Tempo etu namosumo ntoana Posusa Paska. Jadi nadeamo tau nggari ngata-ngata bo boya-boya nto Yahudi nantende mpaka ri ngata Yerusalem ala mantuki ada pompegasa koro ira daꞌapa pamula nu Posusa Paska etu.
56 Narata ri setu ira nangelo-ngelo Yesus. Pade tempo ira nasiromu ri Sapo Mpepue nosimpekutana ira sambaꞌa bo sambaꞌa, “Iwenu pombarata komi? Bara daꞌa mabia Iꞌa marata ri posusa eꞌi.”
57 Iwetu panguli ira sabana nariamo parenta nggari balengga-balengga topanggeni agama bo tau-tau to Parisi to nanguli iweꞌi: “Isema-sema nangginjani petoꞌo Yesus, kana raulina ka kami ala Iꞌa mamala rasoko kami!”