Yesus nirapaka ewa pewobo mesua riara gimpu bimba
10
“Aku mpuꞌu-mpuꞌu notesa ka komi, tau to nesua riara gimpu aga nompone wala daꞌa nesua nggari pewobo, tau etu topangangga pade topeago.
2 Tapi tau to nesua nggari pewobo gimpu, iꞌamo topoewu bimba-bimba etu.
3 Topanggatono gimpu kana mombabea pewobo ka iꞌa, pade bimba-bimba etu kana mompetalinga suarana tempo iꞌa mompokio sanga ira saongu-saongu. Pade iꞌa kana manggeni ira mpaka ri sawalikuna.
4 Ane bimba-bimba nesuwu puramo ri sawalikuna, topoewu etu molumako mokolu ka bimbana. Pade bimba-bimba mantuki ri purina, sabana bimba-bimba etu nangginjani suara ntopoewu etu.
5 Bimba-bimba etu daꞌa madota mantuki tau ntanina. Ira aga mongowa malai pura nggari jaꞌina, sabana daꞌa ninjani ira suara ntau etu.”
6 Yesus nombatesa porapa etu ka tau-tau to Parisi, tapi patuju nu porapa etu daꞌa ninjani ira.
7 Sabana etu nanguli woꞌumo Yesus ka ira, “Aku mpuꞌu-mpuꞌu notesa ka komi, Aku eꞌimo pewobo mesua riara gimpu bimba.
8 Pura-pura tau to narata nokolu ka Aku ira etumo topangangga pade topeago. Tapi bimba-bimba daꞌa nompetalinga suara ira.
9 Aku eꞌimo pewobo etu. Isema-sema mesua mojala ri jaꞌiku ira kana rapakasalama. Ira mamala mesua pade mesuwu mombarata panggoni.
10 Ane topangangga, ira aga momai mangangga pade mepatesi bo mompakaropu. Tapi Aku eꞌi narata ala manusia mombarata katuwua to neliu mpuꞌu kabelona.”
Yesus Topoewu to nabelona
11 “Aku eꞌimo topoewu to nabelona. Aku mombawai katuwuku mboto ala bimbaku mamala matuwu.
12 Ane tau aga nigaji, iꞌa daꞌa topoewu bimba pade iꞌa daꞌa woꞌu pue bimba etu. Etu sampe ane iꞌa manggita asulako momai mombaraga bimba-bimbana iꞌa aga mangowa malai mompalasi bimba-bimba etu. Pade bimba etu kana rasoko nu asulako, pade bimba ntanina raraga raposimpotatarena.
13 Tau nigaji etu aga mangowa malai iwetu sabana iꞌa aga nigaji. Iꞌa daꞌa nompotowe bimba-bimba etu.
14-15 Aku eꞌimo topoewu to nabelona. Nasimbayu ewa Umaku nangginjani Aku pade Aku woꞌu nangginjani Iꞌa, iwetu woꞌu Aku nangginjani pura-pura bimbaku pade bimba-bimbaku nangginjani Aku. Pade Aku mombawai katuwuku mboto ala bimba-bimbaku mamala matuwu.
16 Danariapa bimba-bimbaku ntanina anu daꞌapa nesua riara gimpu eꞌi. Ira woꞌu kana kukeni ri seꞌi. Ira kana mompetalinga suaraku pade pura-pura bimbaku kana majadi salunu. Pade ira rapoewu sambaꞌa lau topoewu.
17 Umaku nompotowe Aku sabana Aku nombawai katuwuku ala Aku mamala matuwu bali.
18 Daꞌa ria sambaꞌa tau mamala mompatesi Aku. Tapi Aku mombawai katuwuku nantuki dotaku mboto. Aku nakuasa mombawai katuwuku rapatesi iwetu pade Aku nakuasa woꞌu matuwu bali, sabana etumo parenta to nitarimaku nggari jaꞌi Umaku.”
19 Nangepe pantesa Yesus etu nosisala paha woꞌumo sangganipa tau-tau to Yahudi.
20 Naria nadea ira to nanguli, “Iꞌa nipesua seta! Nagilamo Iꞌa! Nokuya komi madota mangepe pantesana?”
21 Tapi naria woꞌu sanu tau nanguli, “Daꞌa! Ane tau nipesua seta daꞌa iwetu tesana! Natantumo seta daꞌa namala mompakabelo tau naburo!”
Tau-tau to Yahudi daꞌa madota momparasaya Yesus Ana nu Alatala
22 Tempo etu naratamo ntoana Posusa Mombatora Pompareki Sapo Mpepue ri ngata Yerusalem. a Posusa etu nawela tempo leni.
23 Yesus nolumako ri tambale Sapo Mpepue to nosanga ka Tambale Salomo.
24 Pade naratamo tau-tau to Yahudi nantatiku Iꞌa ri setu. Nekutanamo ira ka Iꞌa, “Sakuya kasaena Komi mompalamba kami naingu? Ane Komi mpuꞌu-mpuꞌu Magau to Mompakasalama to nijanji Alatala, uli pakanotomo ka kami!”
25 Nesonomo Yesus, “Naopumo niuliku ka komi aga daꞌa niparasaya komi. Kabaraka-kabaraka to nikawiaku ante kuasa nggari jaꞌi Umaku nompakanoto ka komi isema Aku eꞌi.
26 Tapi daꞌa ntoto niparasaya komi sabana komi daꞌa bimba-bimbaku.
27 Bimba-bimbaku nompetalinga pantesaku pade Aku nangginjani ira pade ira nantuki Aku.
28 Aku nombawai ka ira katuwua mabelo sampe ri kasae-saena pade natantumo ira daꞌa rasuku sampe ri kasae-saena. Daꞌa ntoto maria sambaꞌa tau mamala manggeni bimbaku malai nggari jaꞌiku.
29 Umaku to neliu nggakuasa, pade Iꞌamo to nombawai bimba-bimba etu ka Aku. Daꞌa ntoto ria sambaꞌa tau mamala manggeni ira malai nggari jaꞌina.
30 Aku bo Umaku daꞌa ria posisalana, aga sambaꞌa lau.”
31 Nangepe tesana etu tau-tau to Yahudi nangala watumo sangganipa madota mombarempe Yesus.
32 Tapi nangulimo Yesus ka ira, “Nadeamo panggawia to nabelo nggari jaꞌi Umaku to nipopokitaku ka komi. Nggari panggawia umbana sampe komi madota mombarempe Aku ante watu?”
33 Nesonomo tau-tau to Yahudi, “Daꞌa nggari panggawiamu to nabelona etu sampe kami madota mombarempe Komi ante watu, tapi sabana Komi nompakakedi Alatala. Komi etu aga manusia biasa, tapi Komi nompakasimbayu koromu ante Alatala!”
34 Nesonomo Yesus, “Riara Atura-atura agama komi naria nitulisi tesa Alatala to niuli ka topanggeniaka nto Israel nggaolu iweꞌi: ‘Niuliku komi pura-pura ewa Alatala.’ b
35 Nuapa to nitulisi riara Buku Nagasa etu daꞌa ria nabali-bali tapi bate-batena nalaku sampe ri kasae-saena. Tau-tau to nantarima Tesa nu Alatala nggaolu etu nikasangaina ‘ewa Alatala.’
36 Aku eꞌimo to nipelisi Alatala bo nipakauna mpaka riara dunia. Jadi nokuya komi nanguli Aku nompakakedi Alatala ante notesa, ‘Aku eꞌimo Ana nu Alatala?’
37 Ane Aku daꞌa mompowia bago to niparasaya Umaku ka Aku, neꞌe raparasaya komi Aku.
38 Tapi ane Aku mompowia bago etu, naupa komi daꞌa madota momparasaya Aku, masipato komi momparasaya nuapa to nipowiaku etu. Ante iwetu kana ranjani komi bo manoto ka komi Aku eꞌi nosaongu ante Umaku pade Umaku woꞌu nosaongu ante Aku.”
39 Nangepe etu sangganipa woꞌu tau-tau to Yahudi nompasimbuku manjoko Yesus, tapi Iꞌa notinggalipo nggari tatongo ira.
40 Naopu etu nalau woꞌumo Yesus mpaka ri sambote Binangga Yordan ri petoꞌo Yohanes Topediu pamulana nombadiu tau bopia. Pade naroomo Yesus ri setu.
41 Tempo Iꞌa ri setu nadeamo tau narata ri jaꞌina. Pade nangulimo ira sambaꞌa ka roana, “Yohanes daꞌa ntoto nompowia kabaraka. Tapi pura-pura nuapa to nitesana ewa Yesus nakono mpuꞌu!”
42 Pade nadeamo tau ri setu nomparasaya Yesus.