Yesus nompakabelo mata ntoburo ri Eo Mpenonto
9
Tempo Yesus riara mpolumakona Iꞌa nanggita sambaꞌa tau to naburo mami nggari pesuwuna.
2 Nekutanamo anaguru-anaguru Yesus ka Iꞌa, “Guru, isema to nasilakana sampe tau eꞌi naburo mami nggari pesuwuna? Totuꞌana atau iꞌa mboto?”
3 Nesonomo Yesus, “Daꞌa iꞌa nasilaka, daꞌa woꞌu totuꞌana. Tapi etu najadi ala kabaraka nu Alatala mamala rakita riara nggatuwuna.
4 Ane eona danarawa kita kana manggawia panggawia nu Alatala to nompakau Aku. Sabana ane nggawengina daꞌa mana naria sambaꞌa to mamala manggawia.
5 Sakuya kasaena Aku riara dunia eꞌi Akumo najadi reme to mompakareme rara manusia.”
6 Naopu Iꞌa notesa iwetu Yesus nantailu tana pade nialana nipiji-pijina ante koyampalena sampe najadi depu, pade nigesena depu etu ri mata ntoburo etu.
7 Pade niulina ka tau etu, “Kalau doꞌumo matamu ri ue kola Siloam.” (Sanga Siloam etu batuana “Nipakau.”) Jadi nalau mpuꞌumo toburo etu. Narata ri kola Siloam nidoꞌunamo matana pade natinggulimo iꞌa ante matana to nanaa.
8 Tau-tau saboya ante iꞌa pade tau-tau to nanggita iꞌa nerapi-rapi ri wiwi jala bopia, ira nosipekutana sambaꞌa bo sambaꞌa, “Daꞌa iꞌa etumo tau to nekatoko ri wiwi jala nerapi-rapi bopia?”
9 Naria to nanguli, “Nakono! Iꞌa mamimo!”
Tapi naria woꞌu sanu tau nanguli, “Daꞌa iꞌa, aga lenjena nasimbayu.”
Tapi iꞌa mboto nanguli, “Akumo eꞌi!”
10 Jadi nekutanamo ira ka iꞌa, “Iwenu sampe matamu nipakanaamo?”
11 Nesonomo iꞌa, “Tau to nosanga ka Yesus nompowia depu, pade depu etu nigesena ri mataku. Pade nipakauna aku malau mombadoꞌu mataku ri kola Siloam. Jadi nalau mpuꞌumo aku nombadoꞌu mataku ri ue kola Siloam etu. Naopu aku nendoꞌu namalamo aku nekita.”
12 Nekutana woꞌumo ira ka iꞌa, “Ri umbamo tau etu?”
Nesonomo toburo etu, “Daꞌa ninjaniku.”
To Parisi nomparesa toburo to nipakanaa matana
13-14 Tempo Yesus nombagalo tana ante iluna pade nompakanaa mata ntoburo etu nawela Eo Mpenonto. Jadi etu sampe toburo to nabelomo matana etu nikeni ntau mpaka ri jaꞌi tau-tau to Parisi.
15 Pade tau-tau to Parisi woꞌu nompekutana toburo etu, “Iwenu sampe matamu nipakanaa?”
Nesonomo iꞌa, “Iꞌa nombagese depu ri mataku. Pade naopu aku nendoꞌu namalamo aku nekita.”
16 Pade nangulimo bara sakuya mbaꞌa to Parisi, “Ane iwetu nanotomo tau etu daꞌa nggari jaꞌi Alatala, sabana Iꞌa daꞌa natundu riara atura-atura Eo Mpenonto.”
Tapi naria woꞌu santongo nanguli, “Umbamo tau nasilaka mamala manggawia kabaraka ewa etu?” Jadi nosisala paha mbotomo ira.
17 Jadi nekutana woꞌumo to Parisi ka toburo etu, “Iwenu pombaratamu ewa tau etu, sabana matamu to nipakanaana?”
Nesonomo toburo etu, “Iꞌa sambaꞌa nabi.”
18 Tapi topanggeniaka-topanggeniaka nto Yahudi etu daꞌa madota momparasaya tau etu mpuꞌu-mpuꞌu naburo pade lako nipakanaa matana. Jadi ira nompokio indo bo uma ntoburo to nipakabelo matana etu
19 pade nipekutana ira, “Nakono mpuꞌu eꞌimo ana komi to niuli komi naburo mami nggari pesuwuna? Iwenu sampe weꞌi-weꞌi nabelomo matana?”
20 Nesonomo indo bo uma ntoburo etu, “To ninjani kami iꞌa etu mpuꞌu-mpuꞌu ana kami, pade iꞌa mpuꞌu-mpuꞌu naburo mami nggari pesuwuna.
21 Tapi bara iwenu sampe iꞌa namala nekita weꞌi-weꞌi daꞌa ninjani kami. Pade daꞌa woꞌu ninjani kami bara isemana to nompakabelo matana etu. Agina komi mompekutana iꞌa mboto. Nabetemo iꞌa. Namalamo iꞌa mboto motesa mombasono pompekutana komi etu.”
22 Indo bo umana nanguli iwetu sabana naekamo ira ka topanggeniaka-topanggeniaka nto Yahudi. Sabana nasintuwumo topanggeniaka-topanggeniaka bara isema-sema mompangaku Yesus Magau to Mompakasalama to nijanji Alatala ira mana rapaloga mesua riara sapo mpodade.
23 Etu sampe indo bo umana nanguli, “Nabetemo iꞌa. Agina komi mompekutana iꞌa mboto.”
24 Naopu etu ira nompokio toburo etu sangganipa pade niuli ira ka iꞌa, “Ulimo to nakonona ri ngayo Alatala! Ninjani kamimo tau nompakanaa matamu etu tau nasilaka!”
25 Pade nesonomo toburo etu, “Daꞌa ninjaniku ane Iꞌa nasilaka bara daꞌa. Tapi to ninjaniku, pangane aku naburo, tapi weꞌi-weꞌi namalamo aku nekita.”
26 Pade nanguli woꞌumo to Parisi ka iꞌa, “Nuapa nikawiana ka iko? Iwenu Iꞌa nompakanaa matamu?”
27 Nesonomo toburo etu, “Naopumo nitesaku ka komi paniꞌa tapi komi daꞌa madota mangepe. Nokuya komi madota mangepe pesonoku woꞌumo? Bara komi woꞌu madota majadi topantuki Iꞌa?”
28 Nangepe etu ira nanguli sinjaꞌi iꞌa pade nanguli, “Iko etumo topantuki Iꞌa, kami eꞌi daꞌa! Kami eꞌi topantuki i Musa!
29 Ninjani kami Alatala notesa ante i Musa nggaolu. Tapi ane tau etu, daꞌa ninjani kami nggari umba karatana.”
30 Pade nesono woꞌumo toburo etu, “Etu sangele mpuꞌu-mpuꞌu nipogumaa! Daꞌa ninjani komi nggari umba karatana, tapi Iꞌa nompakanaa mataku to naburo!
31 Ninjanitamo Alatala daꞌa nangepe posambaya ntau nasilaka, tapi Iꞌa nangepe posambaya ntau to nepue ka Iꞌa pade tunggai nantuki dotana.
32 Nggari lamba pamulana daꞌapa sanggani niepeta naria tau namala nompakanaa mata ntau naburo mami nggari pesuwuna.
33 Ane tau etu daꞌa nggari jaꞌi Alatala, natantumo Iꞌa daꞌa ntoto mamala mompowia nuapa-nuapa.”
34 Nesonomo ira, “Iwenu? Iko etu tau nasilaka mami nggari pesuwumu! Daꞌa ntoto masipato iko mompatuduki kami eꞌi!” Jadi nompamula nggari eo etu to Parisi mana mompaloga tau etu mesua riara sapo mpodade.
Toburo nomparasaya Yesus Magau to Mompakasalama tapi to Parisi ewa netiburo mboto
35 Sangga niepe Yesus tau etu mana nipaloga mesua riara sapo mpodade nto Yahudi nalaumo Iꞌa nosirata ka iꞌa. Pade niuli Yesus ka iꞌa, “Iwenumo? Niparasayamu Ana nu Manusia?”
36 Nesonomo tau etu, “Isema tau to niuli Komi etu, Uma? Uli ka aku ala aku mamala momparasaya Iꞌa.”
37 Nangulimo Yesus ka iꞌa, “Nikitamu Iꞌa. Iꞌamo to notesa ka iko.”
38 Pade nangulimo tau etu, “Pue, niparasayakumo!” Pade nekadedemo iꞌa nombasomba Yesus.
39 Nanguli Yesus ka iꞌa, “Patuju karataku ri dunia eꞌi ala mompakanoto sala ntau ala tau-tau naburo mamala mekita, pade tau-tau to nanaa matana majadi maburo.”
40 Tesa-tesa Yesus etu niepe bara sakuya mbaꞌa tau to Parisi ri setu. Jadi ira nompekutana Iꞌa, “Iwenumo? Niuli Komi kami eꞌi woꞌu naburo?”
41 Nesonomo Yesus, “Ane rapana komi naburo, natantumo daꞌa nasilaka komi. Tapi komi nanguli, ‘Kami namala nekita.’ Etu sampe komi bate-batena nasilaka.”