8
Tapi Yesus lau nantende mpaka ri bunggu nu Bulu Zaitun.
2 To nailena kampadondo njiina nalau woꞌumo Iꞌa nesua riara Sapo Mpepue, pade pura-pura tau dea narata ri jaꞌina. Pade nekatokomo Iꞌa nompatuduki ira.
3 Tempo etu naratamo guru-guru agama bo tau-tau to Parisi nanggeni sambaꞌa besi to nirata ira nebualo. Besi etu nipopekanggore ira ri tatongo ntau dea.
4 Pade niuli ira ka Yesus, “Guru, besi eꞌi nirata kami nebualo.
5 Riara Atura-atura agama naria parenta i Musa ka kita to nanguli besi-besi noinggu iwetu kana rarempe ante watu sampe mamate. Iwenu pombaratamu ewa powia besi eꞌi?”
6 Patuju nu pompekutana ira etu ala mangelo sala Yesus sampe ira mamala mompakasala Iꞌa.
Tapi Yesus daꞌa notingo. Iꞌa aga notunggou nantulisi ri tana ante koyampalena.
7 Tapi daꞌa nenonto ira nompekutana-tana Iꞌa. Jadi kaopuna nekanggoremo Yesus nanguli ka ira, “Isema-sema nggari tatongo komi etu to daꞌa nasilaka, iꞌamo mokolu mombarempe besi eꞌi ante watu.”
8 Naopu Yesus notesa iwetu notunggou woꞌumo Iꞌa nantulisi ri tana ante koyampalena.
9 Sangga nangepe pantesa Yesus etu nalaimo ira nggari setu sambaꞌa bo sambaꞌa nompamula nggari totuꞌa sampe naboli damo Yesus ante besi etu ri ngayona.
10 Pade nekanggoremo Yesus nanguli ka besi etu, “Ri umba puramo tau paniꞌa? Mana ria to madota mompakasala iko?”
11 Nesonomo besi etu, “Daꞌa mana ria, Pue.”
Nangulimo Yesus, “Aku woꞌu daꞌa mompakasala iko. Panjilimo iko, pade neꞌe mana mowia silaka.”]
Yesus reme nu dunia
12 Nanguli woꞌumo Yesus ka tau dea, “Aku eꞌimo reme nu dunia. Isema-sema majadi topantuki Aku daꞌa molumako riara karumauna, tapi ira kana mombarata reme to mombawai katuwua mabelo.”
13 Nesonomo tau-tau to Parisi ka Iꞌa, “Komi etu nantesa koromu mboto! Pantesamu etu daꞌa nakono!”
14 Nangulimo Yesus, “Nau Aku nantesa koroku mboto, pantesaku eꞌi nakono sabana ninjaniku nggari umba karataku pade mpaka ri umba woꞌu kukalau. Tapi daꞌa ninjani komi nggari umba karataku pade mpaka ri umba kukalau.
15 Komi etu nompakatantu sala ntau nantuki pompekiri manusia. Tapi Aku eꞌi daꞌa nompakatantu sala ntau.
16 Tapi ane rapana Aku mowia etu natantumo pombabutusiku kana manoa, sabana Aku daꞌa aga njambaꞌaku. Umaku to nompakau Aku nomporoa Aku.
17 Riara Atura-atura agama komi naria nitulisi iweꞌi: ‘Ane maria rombaꞌa sabi mantakono sangele riara mpotangara, tesa ira namala raparasaya.’
18 Naria rombaꞌa to nompakanoto isema Aku eꞌi. Sambaꞌa Aku mboto, pade karombaꞌana Umaku to nompakau Aku.”
19 Pade nekutanamo ira ka Iꞌa, “Ri umbamo Umamu?”
Nesonomo Yesus, “Komi daꞌa ntoto nangginjani isema kakonona Aku eꞌi. Pade daꞌa woꞌu ninjani komi Umaku. Ane ninjani komi Aku, natantu ranjani komi woꞌu Umaku.”
20 Pantesa Yesus etu nitesana tempo Iꞌa nompatuduki tau namosu ante peti mpesomba riara Sapo Mpepue. Daꞌa ria sambaꞌa tau namala manjoko Iꞌa sabana daꞌapa narata tempona.
Tau to Yahudi naingu nangepe tesa Yesus
21 Pade nanguli woꞌumo Yesus ka ira, “Aku kana malai nggari seꞌi pade komi kana mangelo Aku, tapi komi aga mamate riara silakamu. Komi daꞌa mamala malau ri petoꞌo kukalau.”
22 Nangepe etu notesamo topanggeniaka-topanggeniaka nto Yahudi sambaꞌa bo sambaꞌa, “Bara Iꞌa mopatuju mompatesi korona mboto, sabana niulina, ‘Komi daꞌa mamala malau ri petoꞌo kukalau.’” a
23 Tapi nangulimo Yesus ka ira, “Komi eꞌi nopuꞌu nggari kaedena, tapi Aku eꞌi nopuꞌu nggari kalangana. Komi nggari dunia eꞌi, tapi Aku daꞌa nggari dunia eꞌi.
24 Etu sampe niuliku ka komi, komi kana mamate riara silakamu. Sabana ane komi daꞌa momparasaya Aku eꞌimo Iꞌa, natantumo komi kana mamate riara silakamu.”
25 Pade nekutana woꞌumo ira, “Isema tano kakono-konona komi etu?”
Nesonomo Yesus, “Mana ria gunana kutesa ka komi! b
26 Danadeapa mamala kutesa mompakasala komi. Iꞌa to nompakau Aku etu nanoa. Pade nuapa to niepeku nggari jaꞌina etu woꞌu kutesa ka manusia ri dunia eꞌi.”
27 To nitesa Yesus etu nantesa Umana, tapi daꞌa ninjani ira patujuna etu.
28 Etu sampe Iꞌa nanguli ka ira, “Ane komi mangonggotaka Aku, Ana nu Manusia mpakalanga-langa banepia, c tempo etumo kana ranjani komi Aku eꞌimo Iꞌa to nipakau Alatala. Pade kana ranjani komi woꞌu daꞌa ria sangaya to nipowiaku nantuki dotaku mboto. Tapi Aku bate-batena notesa nantuki nuapa to nipatuduki Umaku ka Aku.
29 Pade to nompakau Aku etu woꞌu nomporoa Aku. Daꞌa nipalambana Aku njambaꞌaku, sabana Aku bate-batena nompowia to nompakadamba rarana.”
30 Tempo Yesus notesa iwetu nadeamo tau nomparasaya Iꞌa.
Ante mangginjani pepatuduki to nakonona kita mana rapobatua nuapa-nuapa
31 Naopu etu nangulimo Yesus ka tau-tau to Yahudi to nomparasaya Iꞌa, “Ane komi maroo mantuki tesaku komi mpuꞌu-mpuꞌu majadi topantuki Aku.
32 Pade ante iwetu komi kana mangginjani pepatuduki to nakonona sampe komi mana rapobatua.”
33 Nesonomo tau-tau to Yahudi etu, “Kami eꞌi muli Abraham. Daꞌapa naria sanggani kami nipobatua ntau. Nokuya Komi nanguli ka kami, ‘Komi mana rapobatua?’”
34 Nesonomo Yesus ka ira, “Aku mpuꞌu-mpuꞌu notesa ka komi, isema-sema nompowia silaka iꞌa nipobatua silaka.
35 Ane sambaꞌa batua, daꞌa natantu iꞌa maroo raranjapo madikana. Tapi ane ana madika mboto, natantumo iꞌa maroo raranjapo umana.
36 Jadi ane Ana nu Alatala mbotomo to manggabasaka komi nggari silaka, komi mpuꞌu-mpuꞌu matekabasaka!
37 Ninjaniku komi etu pura-pura muli Abraham. Tapi nau damo waꞌa danaria komi to madota mompatesi Aku, sabana komi daꞌa ntoto madota mantarima pepatudukiku.
38 Nuapa to nikitaku ri jaꞌi Umaku etumo to nitesaku ka komi. Tapi komi etu aga nompowia nuapa to nipatuduki umamu ka komi.”
39 Nesonomo ira ka Yesus, “Uma kami Abraham.”
Nangulimo Yesus, “Ane mpuꞌu-mpuꞌu komi etu muli Abraham, natantumo pokainggu komi kana mabelo ewa pokainggu Abraham.
40 Aku nompasimbayu ka komi pepatuduki to nakono to niepeku nggari jaꞌi Alatala mboto tapi komi aga madota mompatesi Aku. Daꞌa iwetu pokainggu Abraham!
41 Pokainggu komi eꞌi ewa pokainggu uma komi mboto!”
Nesono woꞌumo ira, “Kami eꞌi daꞌa ana wone! Uma kami aga sambaꞌa lau, etumo Alatala!”
42 Nangulimo Yesus ka ira, “Ane Alatala etu Uma komi, komi kana mompotowe Aku, sabana Aku narata nggari jaꞌina. Aku daꞌa narata nantuki dotaku mboto, tapi nantuki dotana to nompakau Aku.
43 Nuapa sabana sampe daꞌa ntoto ninjani komi batuana pantesaku? Sabana komi daꞌa madota mantarima pepatudukiku.
44 Magau nu Setamo uma komi! Pade komi batena madota mantuki dota nu uma komi etu. Nggari pamulanamo iꞌa bate-batena topepatesi, pade daꞌa ntoto naria to nanoana ri jaꞌina, nau aga sakedi. Ane iꞌa nodawa etu masipato mpuꞌu sabana iwetu mamimo ingguna. Iꞌa topodawa pade uma nu pura-pura topodawa.
45 Jadi etumo sabana ane Aku nombatesa ka komi tesa to nakonona komi daꞌa madota momparasaya tesa etu.
46 Isema nggari jaꞌi komi etu mamala mompakanoto Aku eꞌi nowia silaka? Ane Aku notesa ka komi tesa to nakonona, nokuya komi daꞌa nomparasaya Aku?
47 Tau-tau to najadi bagia nu Alatala madota mantarima Tesa nu Alatala. Tapi komi daꞌa madota mantarima tesa etu sabana komi daꞌa bagia nu Alatala.”
Daꞌapa Abraham nesuwu Yesus naria mamimo
48 Nangepe tesa etu tau-tau to Yahudi nanguli sinjaꞌi Yesus iweꞌi: “Nakono mpuꞌu tesa kami! Komi eꞌimo tau to Samaria to nipesua seta!”
49 Nesonomo Yesus, “Aku eꞌi daꞌa nipesua seta. Aku nombabila Umaku, tapi komi etu nanguli sinjaꞌi Aku.
50 Aku daꞌa miki rabila ntau. Naria mamimo sambaꞌa to nombabila Aku pade Iꞌamo to nompakatantu Aku nanoa.
51 Aku mpuꞌu-mpuꞌu notesa ka komi, isema-sema mantuki tesaku ira daꞌa ntoto mamate sampe ri kasae-saena.”
52 Nangepe etu nangulimo tau-tau to Yahudi ka Yesus, “Weꞌi-weꞌi ninjani kami mpuꞌumo Komi etu nipesua seta! Abraham pade nabi-nabi nggaolu namate puramo. Tapi Komi nanguli isema-sema mantuki tesamu daꞌa ntoto mamate sampe ri kasae-saena!
53 Iwenumo? Komipa neliu nggabete nggari pueta Abraham? Iꞌa pade nabi-nabi nggaolu namate puramo! Ulimo! Isema ntoto Komi sampe Komi nabia nanguli iwetu?”
54 Nesonomo Yesus, “Ane Aku miki rabila ntau daꞌa ntoto ria batuana. Tapi Umaku to nipangaku komi Alatalamu, Iꞌamo to nombabila Aku.
55 Komi daꞌa nosinjani ante Iꞌa. Tapi Aku nosinjani belo ante Iꞌa. Ane Aku manguli Aku daꞌa nosinjani ante Iꞌa Aku eꞌi majadi topodawa nasimbayu ewa komi. Tapi Aku mpuꞌu-mpuꞌu nosinjani ante Iꞌa pade Aku natutu nantuki tesana.
56 Totuꞌa komi nggaolu Abraham nadamba mpuꞌu rarana sabana ninjanina iꞌa kana manggita karataku ri dunia. Nikitanamo pade nadamba mpuꞌumo rarana.”
57 Nanguli woꞌumo tau to Yahudi etu ka Yesus, “Komi etu daꞌapa nagana limampulu mpae umurumu! Iwenu sampe Komi nanguli nikita Komimo totuꞌa kami nggaolu Abraham?”
58 Nesonomo Yesus, “Aku mpuꞌu-mpuꞌu notesa ka komi, daꞌapa Abraham nesuwu, Aku eꞌi njau nariamo!” d
59 Nangepe pantesa Yesus etu tau-tau to Yahudi nangala watumo madota mombarempe Iꞌa sampe mamate. Tapi notinggalipomo Iꞌa nggari tatongo ira pade nalai nompalasi Sapo Mpepue etu.