Sampesuwu-sampesuwu Yesus daꞌa nomparasaya Iꞌa
7
Naopu etu nalaumo Yesus nompebutu ngata ri Bagia Galilea. Iꞌa daꞌa mana madota malau ri Bagia Yudea sabana topanggeniaka-topanggeniaka nto Yahudi ri setu danangelo jala mompatesi Iꞌa.
2 Tempo etu namosumo eo bete nto Yahudi to niuli Eo Bete Mowia Pakumpa. a
3 Jadi nangulimo sampesuwu-sampesuwu Yesus ka Iꞌa, “Agina Komi mompalasi ngata eꞌi pade malau mpaka ri Bagia Yudea ala pura-pura topantuki Komi mamala manggita kabaraka-kabaraka to nipowiamu.
4 Daꞌa ria sambaꞌa tau aga mantabuniaka panggawiana ri petoꞌo nakalinoa ane iꞌa madota ranjani ntau pura-pura. Ane Komi mpuꞌu-mpuꞌu mompowia tandai to nipogumaa, pakanotomo etu ka todea.”
5 Niuli ira iwetu sabana ira mboto woꞌu daꞌa nomparasaya Iꞌa.
6 Nesonomo Yesus, “Daꞌapa narata tempoku malau. Tapi komi mamala malau tempo nuapa-nuapa,
7 sabana daꞌa ria tau ri dunia eꞌi nomporau rara komi. Tapi Aku niporau rara ira, sabana Aku nompakanoto pokainggu ira najaꞌa.
8 Kalaumo komi mpaka ri posusa eo bete etu. Aku daꞌapa malau, sabana daꞌapa narata tempoku malau.”
9 Iwetumo pantesa Yesus ka sampesuwu-sampesuwuna. Pade naopu etu Iꞌa mboto naroo ri Bagia Galilea.
Yesus nalau mpaka ri posusa Eo Bete Mowia Pakumpa
10 Sangga nalaimo sampesuwu Yesus mpaka ri ngata Yerusalem, Iꞌa woꞌu nalau mpaka ri posusa etu nggalino ala neꞌe ranjani ntau dea.
11 Ri posusa etu topanggeniaka-topanggeniaka nto Yahudi tunggai nangelo Iꞌa. Ira nekutana-tana, “Ri umba tanu Iꞌa?”
12 Ri tatongo ntau dea nadeamo tau nosiwawayo sambaꞌa bo sambaꞌa ewa Yesus. Naria to nanguli, “Iꞌa tau nabelo.” Tapi naria woꞌu sanu tau nanguli, “Daꞌa! Iꞌa nombabagiu todea!”
13 Tapi daꞌa ria sambaꞌa tau nabia nanguli ntodo, sabana ira naeka ka topanggeniaka-topanggeniaka nto Yahudi.
14 Karantongo posusa etu nesuamo Yesus mpaka riara Sapo Mpepue pade nompamulamo Iꞌa nompatuduki tau.
15 Nangepe pepatuduki Yesus natekajamo rara topanggeniaka-topanggeniaka nto Yahudi. Ira nanguli, “Hai! Iwenumo sampe tau eꞌi nataꞌu iwetu? Kakonona Iꞌa daꞌa nosikola ri posikolata!”
16 Nesonomo Yesus ka ira, “Pepatudukiku daꞌa nantuki pangginjaniku mboto, tapi etu nggari jaꞌi Alatala to nompakau Aku.
17 Isema-sema madota manggawia dota Alatala natantumo nangginjani ane pepatuduki to nitesaku eꞌi nggari jaꞌi Alatala bara aga nggari jaꞌiku mboto.
18 Tau to nompatuduki nantuki pangginjanina mboto aga miki rabila manusia. Tapi tau to nompasimbuku ala tau to nompakau iꞌa rabila, tau etumo nanoa, daꞌa ria bagiuna.
19 Nabi i Musa nombawai ka komi Atura-atura agama tapi daꞌa ria sambaꞌa nggari tatongo komi natutu nantuki Atura-atura etu. Jadi nokuya komi nompasimbuku mompatesi Aku?”
20 Nesonomo tau dea etu, “Nagilamo Komi! Isema nompasimbuku mompatesi Komi?”
21 Nesonomo Yesus ka ira, “Aga sangaya kabaraka to nipowiaku ri Eo Mpenonto bopia b pade komi pura-pura natekaja.
22 Nabi i Musa nombawai ka komi ada mposuna. Kakonona ada etu daꞌa nopuꞌu nggari jaꞌi Musa tapi nggari jaꞌi totuꞌa komi nggaolu. Pade komi mboto nompowia ada mposuna etu ri Eo Mpenonto. c
23 Jadi ane komi nowia ada mposuna ri Eo Mpenonto ala neꞌe mombaliunaka Atura-atura to nipapola i Musa, nokuya komi nomporau Aku sabana Aku nompakabelo njumaongu koro sambaꞌa tau najuꞌa ri Eo Mpenonto bopia?
24 Neꞌe mana mompakatantu sala ntau nantuki to nikita matamu, tapi pakatantumo sala ntau ante nanoa!”
Daꞌa nanoto ka todea Yesus Magau to Mompakasalama to nijanji Alatala
25 Naopu etu naria bara sakuya mbaꞌa pue ngata Yerusalem nanguli, “Daꞌa Iꞌa eꞌimo tau to nielo topanggeniaka-topanggeniaka ala rapatesi ira?
26 Tapi kitamo! Iꞌa notesa ri ngayo ntodea pade daꞌa ria sambaꞌa tau nombabali tesana. Neꞌe-neꞌe topanggeniaka-topanggeniaka nangginjani Iꞌa etumo Magau to Mompakasalama to nijanji Alatala!
27 Tapi ane Magau to Mompakasalama marata daꞌa ranjanita nggari umba karatana. Tapi tau eꞌi ninjanita nggari umba karatana.”
28 Etu sampe tempo Yesus nompatuduki riara Sapo Mpepue Iꞌa notesa ante suarana namangga, “Niuli komi ninjani komi mamimo isema Aku eꞌi pade nggari umba karataku. Tapi Aku daꞌa narata nantuki dotaku mboto. Aku narata nantuki dota Alatala to nompakau Aku. Iꞌamo to mamala raparasaya, tapi komi daꞌa ntoto nosinjani ante Iꞌa.
29 Tapi Aku nosinjani ante Iꞌa, sabana Aku narata nggari jaꞌina. Iꞌamo to nompakau Aku momai.”
30 Tempo etu naria to nompasimbuku manjoko Iꞌa. Tapi daꞌa ria sambaꞌa namala manjoko Iꞌa sabana daꞌapa narata tempona to nipakatantu Alatala.
31 Tapi nggari tatongo ntau dea etu nadeamo tau nomparasaya Iꞌa. Ira nanguli, “Natantumo Iꞌa etu Magau to Mompakasalama to nijanji Alatala, sabana kitamo kadea nu tandai-tandai to nipogumaa to nipowiana!”
Topojaga Sapo Mpepue nompasimbuku manjoko Yesus
32 Tau-tau to Parisi nangepe lele to nanguli tau dea nosiwawayo iwetu ewa Yesus. Jadi balengga-balengga topanggeni agama Yahudi bo tau-tau to Parisi nompakau bara sakuya mbaꞌa topojaga Sapo Mpepue malau manjoko Yesus.
33 Jadi nangulimo Yesus ka ira, “Aku damo sampalai mosanggani-nggani ante komi pura-pura pade Aku kana manjili mpaka ri jaꞌi to nompakau Aku.
34 Komi kana mangelo Aku tapi daꞌa rarata komi Aku. Pade daꞌa mamala komi malau mpaka ri petoꞌo kukalau.”
35 Sangga nangepe tesa Yesus etu notesamo tau-tau to Yahudi sambaꞌa bo sambaꞌa, “Petoꞌo ri umba rakalauna sampe daꞌa raratata Iꞌa? Bara Iꞌa malau mpaka ri jaꞌi tau-tau to Yahudi to netoꞌo nosimpotatare ri tatongo tau-tau daꞌa to Yahudi pade mompatuduki tau-tau daꞌa to Yahudi?
36 Nuapa woꞌu batuana pantesana nanguli ‘Komi kana mangelo Aku tapi daꞌa rarata komi Aku, pade daꞌa mamala komi malau mpaka ri petoꞌo kukalau?’”
Nosa Nagasa nu Alatala nirapaka ewa ue to mombawai katuwua
37 Ri eo kaopuna posusa etu, etumo eo to neliu nggapokona, nekanggoremo Yesus riara Sapo Mpepue notesa ante suara namangga, “Isema-sema to nabai tambolona, kamaimo manginu ri jaꞌiku. d
38 Ewa to nitulisi riara Buku Nagasa, isema-sema nomparasaya Aku kana maria ue moili nggariara ntaꞌina to mombawai katuwua.” e
39 To nipatuju Yesus etumo Nosa Nagasa nu Alatala to mesua ri jaꞌi tau-tau to nomparasaya Iꞌa. Tempo etu Nosa Nagasa daꞌapa nipopanaꞌu ka topomparasaya sabana Yesus daꞌapa niore bo nibila ri suruga.
40 Nadea tau nangepe pantesa Yesus etu pade naria ira santongo nanguli, “Natantumo Iꞌa nabi to nijanji Alatala nggaolu!” f
41 Tapi naria woꞌu santongo ira nanguli, “Iꞌa eꞌimo Magau to Mompakasalama to nijanji Alatala!”
Tapi naria woꞌu sanu tau nanguli, “Daꞌa! Magau to Mompakasalama daꞌa marata nggari Bagia Galilea!
42 Sabana riara Buku Nagasa naria nitulisi Magau to Mompakasalama kana meumba nggari muli Magau Daud, Iꞌa kana marata nggari ngata Betlehem ngata pesuwu Magau Daud.” g
43 Jadipa tau dea etu nosisala paha mbotomo ewa Yesus.
44 Naria ira to madota manjoko Iꞌa, tapi daꞌa ria sambaꞌa namala mombasoko Iꞌa.
Topanggeniaka nto Yahudi daꞌa madota momparasaya
45 Naopu etu topojaga Sapo Mpepue to nipakau lau manjoko Yesus nanjili mpaka ri jaꞌi tau-tau to Parisi bo balengga-balengga topanggeni agama. Narata ri setu nangulimo tau-tau to Parisi bo balengga-balengga topanggeni agama ka ira, “Nokuya komi daꞌa nanggeni tau etu wemai?”
46 Nesonomo topojaga Sapo Mpepue etu, “Daꞌapa ria sanggani kami nangepe tesa manusia ewa tesa ntau etu!”
47 Nesonomo tau-tau to Parisi, “Iwenumo? Komi woꞌu nibagiu ntau etu?
48 Kitamo! Daꞌa ntoto ria topanggeniaka bara tau to Parisi to nomparasaya Iꞌa!
49 Aga tau dea biasa etu nomparasaya, ira to daꞌa nangginjani Atura-atura agama. Nasurukawumo ira!”
50 Ri tatongo nto Parisi ri setu naria sambaꞌa tau nosanga ka i Nikodemus. Nariamo sanggani bopia Iꞌa nalau ri jaꞌi Yesus. Nangulimo iꞌa ka roa-roana to Parisi,
51 “Iwenumo? Nantuki Atura-atura agamata mamala sambaꞌa tau rapakasala ane daꞌapa niepeta tesana bara daꞌapa ninjanita pokaingguna?”
52 Tapi roa-roana to Parisi nanggarau iꞌa. Niuli ira, “Komi woꞌu tau nggari Galilea? Paresamo Buku Nagasa mpakabelo-belo! Kana rakita komi daꞌa ntoto ria sambaꞌa nabi meumba nggari Bagia Galilea!”
Sambaꞌa besi nebualo