Yesus nompakoni limanjobu mbaꞌa tau
6
Naliu etu nalaumo Yesus mpaka ri sambote Rano Galilea to niuli woꞌu Rano Tiberias.
2 Nadea mpuꞌu tau nantuki Iꞌa sabana nikita iramo tandai-tandai to nipogumaa to nipowiana ri jaꞌi tau-tau najuꞌa.
3 Narata ri sambote rano nantendemo Yesus ri saongu buluna pade ri setu Iꞌa nekatoko ante anaguru-anaguruna.
4 Tempo etu namosumo Eo Bete Paska nto Yahudi.
5 Tempo Yesus nantonguaka ri ntalilina nikitana tau dea narata mpaka ri jaꞌina. Pade niulina ka i Filipus, “Ri umba rakalauta mangoli panggoni rawai ka tau dea eꞌi?”
6 Ninjani Yesus mamimo nuapa rapowiana ngina tapi niulina iwetu ala mombauji i Filipus.
7 Nesonomo i Filipus, “Roti olina roatu mpeka doi salaka a daꞌa magana rakoni ntau dea eꞌi, nau damo rabagi ka ira aga mbau sakedi.”
8 Pade nangulimo sambaꞌa anaguruna ntanina to nosanga ka Andreas sampesuwu i Simon Petrus,
9 “Ri seꞌi naria sambaꞌa ngana langgai nobaku limaongu roti pade rombaꞌa bau. Tapi nuapa batuana etu ka tau-tau iwetu kadeana?”
10 Nangulimo Yesus, “Pakaumo ira pura-pura mekatoko.” Ri petoꞌo etu nadea kawoko. Jadi tau dea etu nekatoko puramo ri bunggu nggawoko etu. Kadea nu langgai ri setu kira-kira limanjobu mbaꞌa.
11 Naopu etu Yesus nangala roti pade niulina tarima kasi ka Alatala. Pade nitibo-tibona roti etu ka tau dea to nekatoko ri setu. Iwetu woꞌu nipowiana ante bau. Pade tau dea etu nanggoni sampe nabasa.
12 Sangga nabasapa ira nangulimo Yesus ka anaguru-anaguruna, “Pasiromu komi puramo labi-labi nu roti ante bau etu. Neꞌe sampe maria to ratajiaka.”
13 Jadi nggari limaongu roti to nikoni ntau dea etu, nipasiromu ira labina naponupa sampulu rotonda.
14 Sangga nikita ntau dea tandai to nipogumaa to nipowia Yesus etu notesamo ira, “Mpuꞌu-mpuꞌu Iꞌa etumo nabi to nisarumakata marata ri dunia eꞌi!”
15 Ninjani Yesus ira nopatuju marata mompasuꞌu Iꞌa majadi Magau ira. Jadi nalaimo Iꞌa njambaꞌana nggari jaꞌi ira nantende mpaka ri buluna.
Yesus nolumako ri bunggu ue
16 Tempo ntora nawengi notuamo anaguru-anaguru Yesus nggari buluna nalau mpaka ri wiwi rano.
17 Pade nesawi sakayamo ira ala mewote mpaka ri ngata Kapernaum. Tempo nawengimo Yesus daꞌapa narata ri jaꞌi ira.
18 Pade naratamo poiri naramboso sampe nabetemo balumba rara rano.
19 Tempo ira nosakaya kira-kira lima atau ono kilo ira nanggita Yesus nolumako ri bunggu nu ue etu nantotoaka sakaya ira. Nanggita etu naekamo rara ira.
20 Tapi nangulimo Yesus ka ira, “Neꞌe maeka! Aku Yesusmo eꞌi!”
21 Nangepe etu ira nantarima Iꞌa riara sakaya ante nadamba rara. Pade kaliu-liu nasampomo sakaya ira ri petoꞌo to nitunggai ira.
Tau dea nangelo Yesus
22 Naeo mpadondona tau dea to danaria ri sambote rano etu nantora aga saongu sakaya ri setu yowi. Pade nitora ira Yesus daꞌa nesawi sakaya mpasanggani-nggani ante anaguru-anaguruna, aga ira to nesawi sakaya mpaka ri sambotena.
23 Tempo etu naratamo sakaya-sakaya ntanina nggari ngata Tiberias nasampo namosu petoꞌo ira pura-pura nanggoni roti to niposambaya i Pue.
24 Sangga ninjani ntau dea Yesus ante anaguru-anaguruna daꞌa mana naria ri setu, ira woꞌu nesawi sakaya nalau mpaka ri ngata Kapernaum mangelo Iꞌa.
Yesus roti to mombawai katuwua
25 Tempo tau dea nosintomu ka Yesus ri sambote rano etu ira nompekutana Iꞌa, “Guru, ipiamo Komi narata ri seꞌi?”
26 Nesonomo Yesus, “Aku mpuꞌu-mpuꞌu notesa ka komi, komi nangelo Aku sabana komi nanggoni roti sampe nabosu, daꞌa sabana komi nangginjani patuju tandai to nipogumaa to nipowiaku etu.
27 Neꞌe komi aga mokarajaa mangelo panggoni to masalisa maopu bo mawau. Agina komi mokarajaa mangelo panggoni to daꞌa mawau to mamala mombawai katuwua mabelo sampe ri kasae-saena. Aku, Ana nu Manusiamo to mombawai panggoni etu ka komi, sabana Akumo to nionggotaka Alatala mowia etu.”
28 Pade nekutanamo ira ka Iꞌa, “Nuapa masipato rapowia kami ala kami mowia to nikonoa Alatala?”
29 Nesonomo Yesus, “Iweꞌimo powia to nikonoa Alatala: Parasayamo Aku to nipakauna.”
30 Pade nanguli woꞌumo ira ka Yesus, “Ane iwetu tandai nuapa rapowia Komi ala kami mamala manggita pade momparasaya Komi? Powia nuapa rapowia Komi?
31 Tempo totuꞌa kami nggaolu naria ri karawa baina ira nanggoni roti to niuli ‘manna.’ Ewa to nitulisi riara Buku Nagasa iweꞌi: ‘Iꞌa nombawai roti nggari suruga rakoni ira.’” b
32 Nanguli Yesus ka ira, “Aku mpuꞌu-mpuꞌu notesa ka komi, daꞌa i Musa nggaolu to nombawai ka komi roti nggari suruga, tapi Umaku to nombawai ka komi roti to mpuꞌu-mpuꞌu nggari suruga weꞌi-weꞌi.
33 Sabana roti to nopuꞌu nggari jaꞌi Alatala etumo to nanaꞌu nggari suruga pade nombawai katuwua ka manusia riara dunia.”
34 Nanguli woꞌumo tau dea etu, “Ane iwetu, Guru, wai ka kamimo roti etu eo-eo.”
35 Nangulimo Yesus ka ira, “Aku eꞌimo roti to mombawai katuwua etu. Isema-sema marata ri jaꞌiku daꞌa mana maoro, pade isema-sema momparasaya Aku daꞌa mana mabai tambolona sampe ri kasae-saena.
36 Tapi ewa to niuliku ka komi paniꞌa, naupa komi nanggita Aku komi daꞌapa nomparasaya Aku.
37 Pura-pura tau to niwai Umaku ka Aku kana marata ri jaꞌiku, pade isema-sema marata ri jaꞌiku kana kutarima, daꞌa ntoto kupoara.
38 Sabana patujuku manaꞌu nggari suruga daꞌa ala mompowia dotaku mboto tapi ala mompowia nuapa to nipodota Alatala to nompakau Aku.
39 Pade iweꞌimo dota Alatala to nompakau Aku, ala nggari pura-pura tau to niwaina ka Aku daꞌa maria sambaꞌa to malipo. Ira pura-pura kana kupakatuwu bali ri kaopu nu dunia.
40 Iweꞌimo dota Umaku, ala pura-pura tau to manggita Aku Anana pade momparasaya Aku kana mombarata katuwua mabelo sampe ri kasae-saena. Pade ira kana kupakatuwu bali ri kaopu nu dunia.”
41 Nangepe tesa etu nokagagutu-gutumo tau-tau to Yahudi ri setu, sabana Yesus nanguli, “Aku eꞌimo roti to nanaꞌu nggari suruga.”
42 Nangulimo ira sambaꞌa bo sambaꞌa, “Iwenu, daꞌa Iꞌa eꞌi Yesus ana Yusuf? Ninjanita pura indo bo umana. Iwenu sampe Iꞌa nanguli Iꞌa nanaꞌu nggari suruga?”
43 Nangepe etu nangulimo Yesus ka ira, “Neꞌe komi mokagagutu-gutu sambaꞌa bo sambaꞌa.
44 Daꞌa ria sambaꞌa mamala marata ri jaꞌiku ane Umaku to nompakau Aku daꞌa manggeni ira mpaka ri jaꞌiku. Pade isema-sema to marata ri jaꞌiku kana kupakatuwu bali ri kaopu nu dunia.
45 Riara buku nabi-nabi naria nitulisi iweꞌi: ‘Tau pura-pura kana rapatuduki Alatala.’ c Jadi isema-sema to mangepe pepatuduki Umaku pade meguru nggari jaꞌina kana marata ri jaꞌiku.
46 Etu daꞌa batuana nariamo tau to nanggita Umaku. Sabana aga Aku to narata nggari jaꞌina to nanggita Iꞌa.
47 Aku mpuꞌu-mpuꞌu notesa ka komi, isema-sema to nomparasaya Aku kana mombarata katuwua mabelo sampe ri kasae-saena.
48 Aku eꞌimo roti to mombawai katuwua.
49 Totuꞌa komi nggaolu nanggoni roti to niuli ‘manna’ ri karawa baina, pade ira pura-pura namate.
50 Tapi daꞌa iwetu ante roti to nanaꞌu nggari suruga. Isema-sema to manggoni roti etu daꞌa mana mamate.
51 Aku eꞌimo roti to nanaꞌu nggari suruga to mombawai katuwua etu. Isema-sema manggoni roti etu kana matuwu mabelo sampe ri kasae-saena. Roti to mombawai katuwua etumo isi koroku to kuwai ala manusia riara dunia mamala matuwu mabelo sampe ri kasae-saena.”
52 Nangepe pantesa Yesus etu nosinggarau mbotomo tau-tau to Yahudi. Nosipekutanamo ira sambaꞌa bo sambaꞌa, “Iwenu Iꞌa mamala mombawai isi korona ala rakonita?”
53 Pade nangulimo Yesus ka ira, “Aku mpuꞌu-mpuꞌu notesa ka komi, ane komi daꞌa manggoni isi koroku, pade daꞌa manginu leiku komi daꞌa ntoto matuwu mabelo.
54 Tapi isema-sema to manggoni isi koroku pade manginu leiku ira kana mombarata katuwua mabelo sampe ri kasae-saena, pade Aku kana mompakatuwu bali ira ri kaopu nu dunia.
55 Sabana isi koroku etumo panggoni to nakonona pade leiku etumo panginu to nakonona.
56 Isema-sema to manggoni isi koroku pade manginu leiku maroo mosanggani-nggani ante Aku, pade Aku maroo mosanggani-nggani ante ira.
57 Umaku to Natuwuna nompakau Aku, pade Aku natuwu nggari kuasana. Iwetu woꞌu tau to manggoni isi koroku kana matuwu nggari kuasaku.
58 Aku eꞌimo roti to nanaꞌu nggari suruga. Roti eꞌi daꞌa ewa roti ‘manna’ to nikoni totuꞌa komi nggaolu. Naupa ira nanggoni roti ‘manna’ etu namatemo ira. Tapi isema-sema manggoni roti eꞌi kana matuwu mabelo sampe ri kasae-saena.”
59 Pura-pura tesa etu nitesa Yesus tempo Iꞌa nompatuduki tau riara sapo mpodade ri ngata Kapernaum.
Nadea topantuki Yesus nokanggaura nomparasaya Iꞌa
60 Naopu nangepe pantesa Yesus etu nadeamo topantuki Iꞌa nanguli, “A, nakaja gaga pepatuduki eꞌi! Daꞌa ria sambaꞌa mamala mantuki tesa etu!”
61 Ninjani Yesus topantuki Iꞌa nokagagutu-gutu iwetu. Jadi niulina ka ira, “Najuꞌamo rara komi mangepe pepatudukiku etu?
62 Iwenumo ane komi manggita Aku, Ana nu Manusia meore mpanjili mpaka ri petoꞌoku pamulana?
63 Nosa Nagasa nu Alatalamo to mombawai katuwua. Kuasa manusia daꞌa ria gunana. Tesa-tesa to niuliku ka komi etumo tesa nggari jaꞌi Nosa Nagasa nu Alatala. Pade tesa-tesa etu to mombawai katuwua mabelo.
64 Tapi naupa iwetu danaria sanu nggari tatongo komi to daꞌa nomparasaya.” Yesus nanguli iwetu sabana ninjanina mamimo nggari pamulana isema-sema to daꞌa momparasaya pade isema woꞌu to mompobalu Iꞌa ka balina.
65 Pade niuli Yesus woꞌumo, “Etu sampe nitesaku ka komi paniꞌa, daꞌa ria sambaꞌa mamala marata ri jaꞌiku ane daꞌa nipaloga Umaku.”
66 Nompamula nggari eo etu nadeamo topantuki Yesus nompalasi Iꞌa. Ira mana madota mantuki Iꞌa.
67 Nanggita etu nangulimo Yesus ka anaguruna sampulu rombaꞌa etu, “Iwenumo? Komi woꞌu madota mompalasi Aku?”
68 Nesonomo i Simon Petrus, “Pue, ri jaꞌi sema rakalau kami? Aga Komi to nombatesa tesa to mombawai katuwua mabelo sampe ri kasae-saena.
69 Pade niparasaya kamimo ante mpuꞌu-mpuꞌu Komimo To Nagasana to narata nggari jaꞌi Alatala.”
70 Nesonomo Yesus, “Aku mbotomo to nompelisi komi sampulu rombaꞌa etu. Tapi naupa iwetu naria sambaꞌa nggari tatongo komi etu majadi ewa Magau nu Seta.”
71 To nipatuju Yesus iꞌamo Yudas ana i Simon Iskariot. Sabana naupa Yudas etu sambaꞌa nggari tatongo ira sampulu rombaꞌa, iꞌa etumo to mompobalu Yesus ka balina banepia.