Tesa kamate Yohanes Topediu
14
Tempo etu topoparenta ri Bagia Galilea Magau Herodes. a Iꞌa nangepe kareba to nantesa powia Yesus
2 pade niulina ka pangga-pangga bete to nomporoa iꞌa, “Natantumo Iꞌa etu Yohanes Topediu! Natuwu balimo iꞌa nggari kamatena! Etu sampe Iꞌa nakuasa nompowia kabaraka-kabaraka!”
3 Iwetumo pompekiri Magau Herodes sabana bopia iꞌa nompakau tau nanjoko Yohanes bo nombasoꞌo iꞌa pade nombasuaraka iꞌa riara tarunggu. Herodes nowia iwetu sabana kajadia ante i Herodias, rongo i Filipus, sampesuwu i Herodes mboto to niala niporongo i Herodes.
4 Tapi Yohanes nangontiaka i Herodes. Niulina, “Nantuki Atura-atura agamata daꞌa masipato komi nomporongo i Herodias!”
5 Tempo etu i Herodes madota mompatesi Yohanes, tapi iꞌa naeka ka tau dea, sabana Yohanes nireke ira sambaꞌa nabi.
6 Tempo posusa eo jadi i Herodes, ana randoo i Herodias nojoge ri ngayo pura-pura toposusa etu. Nadamba mpuꞌu rara i Herodes nanggita iꞌa nojoge
7 sampe iꞌa nojanji ante netunda ka randoo etu nuapa-nuapa raperapina kana rawaina ka iꞌa.
8 Nangepe tesa i Herodes randoo etu nerapi ka iꞌa nantuki pompakau indona iweꞌi: “Wai ka aku ri seꞌi balengga Yohanes Topediu raboli riara santonga dula.”
9 Nangepe pomperapi etu nasusamo rara i Herodes. Tapi naupa iwetu nipakauna tau nompowia nuapa to niperapi randoo etu, sabana iꞌa nojanji ri ngayo toposusa to nanggoni mpasanggani-nggani ante iꞌa.
10 Nipakaunamo tantarana malau ri tarunggu mombatompo tambolo Yohanes.
11 Pade balenggana niboli ira riara santonga dula nikeni niwai ka ngana randoo etu. Naopu etu randoo etu nanggeni balengga etu niwaina ka indona.
12 Sangga nangepepa nuapa to najadi, naratamo topantuki Yohanes nangala watabakuna, pade nitana iramo ri dayo. Naopu etu nalaumo ira notesa ka Yesus nuapa to najadi.
POKARAJAA YESUS RI SAWALIKU BAGIA GALILEA (14:13-17:21)
Yesus nompakoni limanjobu mbaꞌa tau
13 Tempo Yesus nangepe kareba kamate Yohanes nesawi sakayamo Iꞌa njambaꞌana nompalasi petoꞌo etu nalau mpaka ri petoꞌo nakalinoa. Tapi tempo tau dea nangepe Yesus nalaimo, ira woꞌu nompalasi ngata-ngata ira nalau nantuki Iꞌa. Aga ira nolumako ri kabatana.
14 Tempo Yesus nanaꞌu nggariara sakaya nikitana nadea mpuꞌu tau nompopea Iꞌa. Naasi mpuꞌumo matana nanggita ira, pade Iꞌa nompakabelo ira to najuꞌa.
15 Sangga nangguwiamo daꞌa mana masaeka mawengi, naratamo anaguru-anaguru Yesus ri jaꞌina pade nangulimo ira ka Iꞌa, “Guru, petoꞌo eꞌi nakalinoa, pade mana masaeka mawengi. Agina tau dea etu rapakau matingguli ala ira mamala malau mpaka ri ngata-ngata namosu nggari seꞌi mangoli panggoni.”
16 Tapi nangulimo Yesus ka anaguruna, “Daꞌa paraluu ira malau. Komimo mombawai ka ira panggoni.”
17 Nesonomo anaguru-anaguruna, “To naria ri jaꞌi kami eꞌi aga limaongu roti pade rombaꞌa bau.”
18 Nangulimo Yesus, “Keni ri seꞌimo roti bo bau etu.”
19 Naopu etu nipakauna tau dea nekatoko ri bunggu nggawoko. Pade nialanamo limaongu roti bo rombaꞌa bau etu pade nantingoa langi nosambaya nanguli tarima kasi ka Alatala. Naopu etu nitubi-tubina roti etu pade niwaina ka anaguru-anaguruna ala ratibo-tibo ira ka tau dea.
20 Ira pura-pura nanggoni sampe nabosu. Naopu etu anaguruna nompasiromu bali labi panggoni to naboli, naponupa sampulu rotonda.
21 Kadea ira to nanggoni ri setu kira-kira limanjobu mbaꞌa langgai, daꞌa nibila besi-besi ante ngana-ngana.
Yesus nolumako ri bunggu ue rano
22 Naopu etu Yesus nompakau anaguru-anaguruna mesawi sakaya mokolu ka Iꞌa mpaka ri sambote rano, pade nipakauna tau dea manjili mpaka ri ngata ira mboto.
23 Naopu Iꞌa nompakau tau dea manjili, nantendemo Iꞌa njambaꞌana mpaka ri saongu bulu ala mosambaya. Tempo nawengimo Iꞌa danaria ri setu njambaꞌana.
24 Tapi tempo etu sakaya to nipesawi anaguru-anaguruna nakawaomo nggari kabatana ri tatongo rano. Sakaya etu nakalenga-lenga nikeni balumba bete sabana nantomu poiri bete.
25 Kira-kira tinti toluongu nggawengina naratamo Yesus nompakamosu ira nolumako ri bunggu ue rano.
26 Tempo anaguru-anaguruna nanggita Iꞌa nolumako ri bunggu nu ue naeka mpuꞌumo rara ira. Nangulimo ira, “Etumo mboa!” Pade nongare-ngaremo ira ante naeka rara.
27 Tapi kaliu-liu Yesus nanguli ka ira, “Pakaroo rara komi! Aku Yesusmo eꞌi! Neꞌe maeka!”
28 Pade nangulimo i Petrus, “Pue, ane mpuꞌu-mpuꞌu Komi, pokiomo aku mpaka ri jaꞌimu molumako ri bunggu ue.”
29 Nesonomo Yesus, “Kamaimo!”
Jadi nanaꞌumo i Petrus nggariara sakaya, pade nolumakomo iꞌa ri bunggu ue mompakamosu Yesus.
30 Tapi tempo iꞌa nanggita karoso nu poiri bete naekamo rarana. Nompamulamo iꞌa natala riara ue rano etu. Pade nongaremo iꞌa, “Pue, tulungimo aku!”
31 Jadi kaliu-liu Yesus nangojo palena nanjoko i Petrus. Pade niulina ka i Petrus, “Nakura mpuꞌu pomparasayamu! Nokuya komi nolengga-lengga rara?”
32 Tempo ira rombaꞌa nesawimo riara sakaya kaliu-liu nenontomo poiri bete etu.
33 Pade naratamo anaguru-anaguruna riara sakaya etu nekadede mombasomba Iꞌa. Nanguli ira, “Mpuꞌu-mpuꞌu Komimo Ana nu Alatala!”
Yesus nompakabelo tau-tau najuꞌa ri Bagia Genesaret
34 Sangga naratapa ira ri sambote rano nanaꞌumo ira ri Bagia Genesaret.
35 Tempo pue ngata ri setu nangginjani tau to narata etu Yesus, kareba etu nipatolele ira mpaka ri umba-umba ngata ri bagia etu sampe pura-pura tau najuꞌa ri setu nikeni mpaka ri jaꞌi Yesus.
36 Ira nerapi ka Yesus ala ira rapaloga aga manggabe tampa nu bajuna. Pade isema-sema to nanggabe tampa nu bajuna nabelo pura nggari juꞌa ira.