Yesus nangontiaka to Parisi sabana ira nanjapuaka parenta Alatala ante nantuki ada-ada ntotuꞌa
15
Naopu etu naratamo bara sakuya mbaꞌa tau to Parisi bo guru-guru agama Yahudi nggari ngata Yerusalem mpaka ri jaꞌi Yesus, pade nekutanamo ira,
2 “Nokuya anagurumu nombaliunaka ada-ada ntotuꞌata nggaolu? Tempo nanggoni ira daꞌa norama pale ntani nantuki ada-adata!”
3 Nesonomo Yesus ka ira, “Nokuya woꞌu komi nombaliunaka parenta-parenta nu Alatala ante nantuki ada-ada ntotuꞌa komi nggaolu?
4 Sabana Alatala nanguli, ‘Bilamo indo umamu,’ pade niulina woꞌu, ‘Isema-sema manguli sinjaꞌi umana bara indona iꞌa kana rapatesi.’
5 Tapi komi nompatuduki iweꞌi: Ane tau manguli ka indo umana, ‘Pura-pura nuapa to masipato kuwai ka komi naopumo nipesombaku ka Alatala,’
6 tau etu daꞌa mana paraluu mombabila indo umana. Jadi ante nantuki ada-ada ntotuꞌa komi nggaolu iwetu komi nombasapuaka Tesa nu Alatala!
7 Komi tanu tau-tau aga nabelo ri lenje! Nakono mpuꞌu Tesa nu Alatala to nipasimbayu nabi Yesaya nggaolu iweꞌi:
8 ‘Tau-tau eꞌi aga nombabila Aku ri sumba,
tapi daꞌa ante mpuꞌu-mpuꞌu rara ira.
9 Daꞌa ntoto ria gunana ira mepue ka Aku,
sabana pepatuduki to nipatuduki ira aga ada-ada nu manusia.’” (Yes. 29:13)
Nuapa to mompakatantoru manusia riara mpanggita Alatala
10 Naopu etu Yesus nompokio tau dea pade niulina ka ira, “Epemo mpakabelo-belo ala ranjani komi tesaku eꞌi.
11 Nuapa-nuapa to nesua ri ngangata daꞌa mompakatantoru manusia riara mpanggita Alatala. Tapi nuapa-nuapa to nesuwu nggari sumbata, etumo to mompakatantoru manusia riara mpanggita Alatala.”
12 Naopu etu naratamo anaguru-anaguruna nompakamosu Yesus pade nanguli, “Guru, ninjani Komi tau-tau to Parisi nakedi rara nangepe tesa Komi paneꞌa?”
13-14 Nesonomo Yesus, “Palambamo tau-tau to Parisi etu. Sabana pura-pura anu daꞌa nituja Umaku ri suruga kana rarebuna. Tau-tau to Parisi etu ewa topanggeniaka naburo. Ane tau naburo nombanini roana toburo, natantumo ira rombaꞌa kana manawu sanggani ralowu.”
15 Pade nangulimo i Petrus ka Yesus, “Guru, tulungi pakanoto ka kami batuana porapa paneꞌa.”
16 Nesonomo Yesus, “Iwenumo? Daꞌapa ninjani komi woꞌu?
17 Daꞌapa ninjani komi panggoni to nesua ri ngangata napola mpaka ri taꞌita pade nggari setu aga niote waꞌamo?
18 Tapi tesa-tesa to najaꞌa to neumba nggariara ntaꞌita pade to nesuwu nggari sumbata, etumo to nompakatantoru kita riara mpanggita Alatala.
19 Sabana nggariara ntaꞌi neumba mpengele-ngele pompekiri to najaꞌana, sampe naria tau nompatesi roana, nebualo, nogau sala ante tau daꞌa rongona mboto, nangangga, nodawa ri ngayo ntopotangara, pade nanguli sinjaꞌi.
20 Pokainggu etumo to nompakatantoru manusia riara mpanggita Alatala. Tapi nanggoni ante daꞌa norama pale, etu daꞌa nompakatantoru tau riara mpanggita Alatala.”
Sambaꞌa besi daꞌa to Yahudi nekitulungi ka Yesus
21 Naliu etu nalaimo Yesus nompalasi petoꞌo etu pade nalaumo Iꞌa mpaka ri bagia namosu ngata Tirus bo ngata Sidon.
22 Ri setu naria sambaꞌa besi to Kanaan tau daꞌa to Yahudi. Iꞌa narata mpaka ri jaꞌi Yesus ante nongare-ngare iweꞌi: “Pue, Muli i Daud! Potowemo aku eꞌi! Anaku besi nipesua seta sampe nandasa mpuꞌumo iꞌa nabaya!”
23 Tapi Yesus daꞌa notingo nombasono besi etu. Pade anaguru-anaguruna nompakamosu Iꞌa ante nerapi ka Iꞌa, “Guru, agina pakaumo besi etu malai. Iꞌa aga nongare-ngare nantuki purita.”
24 Nesonomo Yesus, “Aku eꞌi nipakau mantulungi aga muli Israel to natonto nasimbayu ewa bimba-bimba.”
25 Tapi naratamo besi etu nekadede ri ngayo Yesus pade niulina, “Pue, tulungimo aku!”
26 Nesonomo Yesus, “Daꞌa nabelo mangala panggoni ngana-ngana ratajiaka ka asu.” a
27 Nanguli besi etu, “Nakono to niuli Komi, Pue. Tapi asu woꞌu nabiasa nanggoni rombo-rombo mpanggoni to nanawu nggari bunggu meja puena.”
28 Naopu etu nangulimo Yesus, “Indo, naroso mpuꞌu pomparasayamu! Sabana etu nuapa to niperapimu etu kana majadi.” Pade tempo etu woꞌu nabelo balimo ana nu besi etu.
Nadea tau najuꞌa nipakabelo Yesus
29 Naopu etu nalai woꞌumo Yesus nompalasi petoꞌo etu nolumako nosale wiwi Rano Galilea. Pade nantendemo Iꞌa ri saongu bulu pade nekatoko.
30 Naopu etu nadea mpuꞌu tau narata mpaka ri jaꞌina nanggeni roa ira to napungguna, tau to nakejo kadana, tau naburo, tau nabobo pade nadea tau ntanina to najuꞌana. Ira nikeni ri ngayo Yesus pade Iꞌa nompakabelo ira pura-pura.
31 Nanggita etu nogumaa mpuꞌumo tau dea sabana tau-tau nabobo namala notesa, tau-tau nakejo kadana nipakabelo, tau-tau napunggu namala nolumako pade tau-tau naburo namala nekita. Etu sampe tau dea nombabila bo nantoiya Alatala to nipesomba nto Israel.
Yesus nompakoni patanjobu mbaꞌa tau
32 Naopu etu Yesus nompokio anaguru-anaguruna pade niulina ka ira, “Naasi mpuꞌumo mataku nanggita tau dea etu, sabana tolumbengimo kasaena ira nosanggani-nggani ante Aku pade weꞌi-weꞌi mana ria panggoni ira. Aku daꞌa madota mompakau ira manjili ante maoro taꞌi. Neꞌe-neꞌe ira maleto pade madungga ri jala.”
33 Nesonomo anaguruna, “Nggari umba raratata panggoni rawai ka tau iwetu kadeana? Petoꞌo eꞌi nakalinoa.”
34 Pade nekutanamo Yesus ka ira, “Sakuya ongu roti to naria ri jaꞌi komi?”
Nesonomo ira, “Pituongu, pade naria woꞌu bara sakuya mbaꞌa bau nggedi.”
35 Nangepe etu Yesus nompakau tau dea nekatoko puramo ri tana.
36 Pade nialana roti pituongu bo bau-bau nggedi etu pade niulina tarima kasi ka Pue Alatala. Naopu etu nitubi-tubina roti bo bau etu pade niwaina ka anaguruna. Pade ira nombatibo-tibo panggoni etu ka tau dea.
37 Ira pura-pura nanggoni sampe nabosu. Naopu etu anaguru Yesus nompasiromu labi-labi mpanggoni ntau dea etu, naponupa pitu karanji.
38 Tau nanggoni tempo etu patanjobu mbaꞌa langgai, daꞌa nibila besi-besi bo ngana-ngana.
39 Naopu etu Yesus nompakau tau dea manjili. Pade Iꞌa mboto nesawi sakaya nggari setu nalau mpaka ri Bagia Magadan.