Tau-tau nerapi ala Yesus mowia tandai to nipogumaa
16
Naria bara sakuya mbaꞌa tau to Parisi pade tau to Saduki narata ri jaꞌi Yesus ala mompesoba Iꞌa. Ira nerapi ka Yesus ala Iꞌa mowia tandai to nipogumaa ala mompakanoto Iꞌa nggari jaꞌi Alatala.
2 Nesonomo Yesus ka ira, “Ane nasolomo eo pade naleimo langi komi nanguli, ‘Kana marawa lombona.’
3 Pade ane kabobayana komi nanguli, ‘Maujamo ngina sabana naleimo langi pade naguntoumo lombona.’ Komi nataꞌu nombaboto lombona ante nanggita langi tapi daꞌa ninjani komi tandai-tandai to nipowia Alatala ri dunia weꞌi-weꞌi.
4 Najaꞌa mpuꞌu tau-tau weꞌi-weꞌi. Komi daꞌa natutu nomparasaya Alatala. Komi nerapi ala Aku mompowia tandai to rapogumaa ntau. Tapi etu daꞌa kupowia ka komi! Tandai to rapopokita ka komi aga tandai ewa to najadi ri jaꞌi nabi Yunus nggaolu.” a Naopu etu nalaimo Yesus nompalasi ira.
Pepatuduki to Parisi bo to Saduki nirapaka ewa ragi
5 Tempo anaguru-anaguru Yesus nalau mpaka ri sambote rano nikalinga ira manggeni baku.
6 Tempo etu nangulimo Yesus ka ira, “Pakabelo-belo. Komi kana mainga ala neꞌe mawela ragi tau-tau to Parisi bo tau-tau to Saduki.”
7 Nangepe etu notesamo anaguruna sambaꞌa bo sambaꞌa, “Iꞌa nanguli iwetu sabana kita daꞌa nobaku roti.”
8 Tapi ninjani Yesus nuapa to nitesa ira. Etu sampe Iꞌa nanguli ka ira, “Nokuya komi batena nanguli komi daꞌa nobaku roti? Komi tau-tau nakura mpuꞌu pomparasaya!
9 Iwenumo? Daꞌapa ninjani komi? Daꞌa mana nitora komi limanjobu mbaꞌa tau to nanggoni limaongu roti? Daꞌa nitora komi sakuya tonda labina to nipasiromu komi?
10 Pade daꞌa woꞌu nitora komi patanjobu mbaꞌa to nanggoni pituongu roti? Daꞌa nitora komi sakuya karanji labina to nipasiromu komi?
11 Iwenu sampe daꞌapa ninjani komi daꞌa roti to nipatujuku paneꞌa? Komi kana mainga ala neꞌe sampe mawela ragi tau-tau to Parisi bo tau-tau to Saduki!”
12 Nggari setu nanotomo ka ira daꞌa ragi roti to nipatuju Yesus. Tapi patuju tesana ira kana mainga ri jaꞌi pepatuduki tau-tau to Parisi bo tau-tau to Saduki.
Petrus nompangaku Yesus Ana nu Alatala
13 Tempo Yesus narata ri bagia namosu ngata Kaisarea Filipi, nekutanamo Iꞌa ka anaguru-anaguruna, “Nantuki pombarata todea, isema kakonona Aku, Ana nu Manusia eꞌi?”
14 Nesonomo ira, “Naria tau nanguli Komi Yohanes Topediu to natuwu bali. Naria woꞌu sanu nanguli Komi nabi Elia to neumba bali, pade naria woꞌu tau nanguli Komi nabi Yeremia bara sambaꞌa nabi nggaolu ntanina to natuwu bali.”
15 Pade nekutana woꞌumo Yesus ka ira, “Tapi nantuki pombarata komi, isema Aku eꞌi?”
16 Nesonomo i Simon Petrus, “Komi Magau to Mompakasalama, Ana nu Alatala to Natuwuna.”
17 Nangulimo Yesus, “Nasana mpuꞌumo iko, Simon ana Yunus, sabana daꞌa manusia to nompopanjani etu ka iko, tapi Umaku mboto ri suruga.
18 Pade kuuli ka iko, ikomo to niuli i Petrus, batuana ‘watu’. Pade ri bunggu watu eꞌi Aku mompopenggore todea topomparasaya Aku. Pade njumaongu kuasa nggari naraka daꞌa mompakule mombadagi topomparasaya etu. b
19 Aku mombawai ka iko kunci pewobo Poparenta nu Alatala. Nuapa to mutagi ri dunia, etu woꞌu ratagi Alatala ri suruga. Pade nuapa to mupaloga ri dunia, etu woꞌu rapaloga Alatala ri suruga.”
20 Naopu etu nangulimo Iꞌa ka ira, “Neꞌe ratesa ka isema-sema Aku eꞌi Magau to Mompakasalama.”
Yesus nombaboto kamatena banepia
21 Nompamula nggari tempo etu Yesus nompakanoto ka anaguru-anaguruna Iꞌa kana malau mpaka ri ngata Yerusalem, pade ri setu Iꞌa kana mpuꞌu-mpuꞌu rapandasa totuꞌa-totuꞌa nto Yahudi, balengga-balengga topanggeni agama, bo guru-guru agama Yahudi. Pade Iꞌa kana rapatesi, pade ri eo katolueona Iꞌa kana rapakatuwu bali nggari kamatena.
22 Nangepe tesa etu i Petrus nanggeni Yesus ri sawalikuna pade nompamula iꞌa nangontiaka Yesus. Niulina, “Pue, neꞌe sampe etu majadi ri jaꞌi Komi! Perapi Pue Alatala mompakakawao etu nggari jaꞌimu!”
23 Tapi Yesus nompeili nanguli ka iꞌa, “Palaimo iko nggari seꞌi, Magau nu Seta! Iko nombalawa dota Alatala majadi ri jaꞌiku! Pompekirimu etu pompekiri manusia, daꞌa pompekiri nggari jaꞌi Alatala!”
Nuapa masipato rapowiata ala majadi topantuki Yesus
24 Naopu etu nanguli Yesus ka anaguru-anaguruna, “Isema-sema madota majadi topantuki Aku, iꞌa kana mombakabasaka dotana mboto pade iꞌa kana masadia mantuki Aku nau sampe mamate rapaku ri kayu parika.
25 Isema-sema daꞌa masadia mantuki Aku nau sampe mamate iꞌa daꞌa mombarata katuwua mabelo sampe ri kasae-saena. Tapi isema-sema mombakabasaka pura-pura dotana mboto pade mantuki Aku nau sampe rapatesi, iꞌa kana mombarata katuwua mabelo sampe ri kasae-saena.
26 Natantumo daꞌa ria gunana ane sambaꞌa tau mombarata pura-pura nuapa to naria ri dunia tapi daꞌa masalama, aga rasuku sampe ri kasae-saena ri naraka. Sabana daꞌa ria nuapa-nuapa to namala rasulata ante katuwua mabelo etu.
27 Mana masaeka Aku, Ana nu Manusia kana marata bali nggari suruga ante kuasa bo reme nggari jaꞌi Umaku, mosanggani-nggani ante malaeka-malaekaku. Pade ri tempo etu Aku kana mombabalasi butu mbaꞌa tau nantuki pokaingguna.
28 Aku mpuꞌu-mpuꞌu notesa ka komi, naria bara sakuya mbaꞌa tau ri tatongo komi ri seꞌi daꞌapa mamate ane daꞌapa rakita ira Aku, Ana nu Manusia marata ri dunia eꞌi ewa sambaꞌa magau.”