Yesus nompakoni patanjobu mbaꞌa tau
8
Tempo etu naria woꞌumo tau dea nasiromu ri jaꞌi Yesus pade mana ria panggoni ira. Jadi Yesus nompokio anaguru-anaguruna ri jaꞌina pade niulina ka ira,
2 “Naasi mpuꞌumo mataku nanggita tau dea eꞌi, sabana tolumbengimo ira nosanggani-nggani ante Aku ri seꞌi sampe mana ria panggoni ira.
3 Pade ane ira kupakau manjili ante maoro, natantumo ira kana maleto pade madungga ri jala, sabana naria ira to narata nggari petoꞌo to nakawaona.”
4 Nesonomo anaguru-anaguruna, “Iwenumo? Kita eꞌi ri petoꞌo nakalinoa. Nggari umbamo rapangalata panggoni rapakoni ka tau dea eꞌi ala mabosu?”
5 Jadi nekutanamo Yesus ka ira, “Sakuya ongu roti to naria ri jaꞌi komi?”
Nesono ira, “Pituongu.”
6 Nangepe etu Yesus nompakau tau dea etu nekatoko ri tana. Naopu etu nialana roti pituongu etu pade niulina tarima kasi ka Pue Alatala. Pade nibingga-binggana roti etu pade niwaina ka anaguru-anaguruna ala rapalele ka tau dea. Pade anaguru-anaguruna nompalele roti etu ka ira.
7 Naria woꞌu bara sakuya mbaꞌa bau ri jaꞌi ira. Sangga niganenapa nipakaunamo anaguruna nompalele bau etu ka tau dea.
8 Pura-pura tau nanggoni sampe nabosu. Naopu etu nipasiromu iramo labi-labi mpanggoni etu naponupa pitu karanji.
9 Kadea ira to nanggoni ri setu kira-kira patanjobu mbaꞌana. Naopupa ira nanggoni Yesus nompakau ira manjili.
10 Sangga nalaipa tau dea etu Yesus ante anaguruna nesawi sakaya nalau mpaka ri Bagia Dalmanuta.
To Parisi nerapi ala Yesus mowia tandai to nipogumaa
11 Pade naratamo bara sakuya mbaꞌa tau to Parisi mpaka ri jaꞌi Yesus. Nompamulamo ira nosisono ante Iꞌa sabana ira madota mompesoba Iꞌa. Nangulimo ira ka Iꞌa, “Kawiamo sangaya tandai to nipogumaa ala mompopokita ka kami Komi mpuꞌu-mpuꞌu nipakau Alatala.”
12 Nonguamo Yesus riara ntaꞌina pade niulina ka ira, “Nokuya komi to natuwu weꞌi-weꞌi batena merapi tandai to nipogumaa? Aku mpuꞌu-mpuꞌu notesa ka komi, komi eꞌi daꞌa ntoto rapopokita ka tandai to nipogumaa iwetu!”
13 Naopu etu Yesus nompalasi ira pade nalau nesawi sakaya mpaka ri sambote rano.
Neꞌe mantuki pokainggu nto Parisi
Mat 16:5-12
14 Tempo nesawi sakaya daꞌa nitora anaguru Yesus nanggeni baku. To nikeni ira riara sakaya aga saongu lau roti.
15 Nangulimo Yesus ka ira, “Pakabelo-belo! Komi kana mainga ala neꞌe mawela ragi tau-tau to Parisi bo ragi Magau Herodes.”
16 Nangepe etu notesamo ira sambaꞌa bo sambaꞌa, “Masipato Iꞌa nanguli iwetu sabana daꞌa ria roti ri jaꞌita seꞌi.”
17 Ninjani Yesus nuapa to nitesa ira etu. Jadi niulina ka ira, “Nokuya komi nanguli, ‘Daꞌa ria roti ri jaꞌita?’ Iwenumo? Daꞌapa nanoto rara komi? Daꞌapa ninjani komi batua nu tesaku paniꞌa? Bara nabungu pekiri komi!
18 Komi nomata tapi nokuya komi daꞌa namala nekita? Komi notalinga tapi nokuya komi daꞌa namala neepe? Daꞌa nitora komi to najadi bopia?
19 Tempo Aku nombabingga-bingga limaongu roti nipakoni ka limanjobu mbaꞌa tau, sakuya tonda labina to nipasiromu komi?”
Nesonomo ira, “Sampulu rotonda.”
20 Pade nanguli Iꞌa, “Tempo pituongu roti nibinggaku nipakoni ka patanjobu mbaꞌa tau, sakuya karanji labina to nipasiromu komi?”
Nesonomo ira, “Pitu karanji.”
21 Pade nanguli Yesus, “Ane iwetu nokuya komi daꞌapa nangginjani batua nu tesaku paniꞌa?”
Yesus nompakabelo mata sambaꞌa toburo ri ngata Betsaida
22 Naopu etu naratamo ira ri ngata Betsaida. Ri setu naria tau nanggeni sambaꞌa toburo mpaka ri jaꞌi Yesus pade ira nerapi ala Yesus mombadika palena ri mata ntau etu.
23 Jadi Yesus nanjoko pale ntoburo etu pade nikenina mpaka ri sawaliku ngata. Ri setu Yesus nantailu mata ntau etu pade nidikana palena ri matana. Naopu etu nekutanamo Iꞌa ka toburo, “Namalamo komi nanggita nuapa-nuapa?”
24 Tau etu nanggita mpaka ri koluna pade niulina, “Iyo! Aku nanggita tau nolumako. Tapi nikitaku ira aga ewa puꞌu-puꞌu nggayu!”
25 Nangepe etu sangganipa Yesus nombadika palena ri mata ntoburo etu. Naopu etu toburo mpuꞌu-mpuꞌu nompasimbuku nanggita. Pade nabelomo matana sampe iꞌa namala nanggita nuapa-nuapa ante nanoto.
26 Naopu etu Yesus nompakau iꞌa manjili. Niulina, “Panjilimo, neꞌe mana mesua bali rara ngata etu.”
Petrus nompangaku Yesus Magau to Mompakasalama to nijanji Alatala
27 Naopu etu nalaumo Yesus ante anaguru-anaguruna mpaka ri ngata-ngata to namosu ngata Kaisarea Filipi. Ri tatongo jala nekutanamo Yesus ka ira, “Nantuki tesa ntau dea, isema kakonona Aku eꞌi?”
28 Nesonomo ira, “Naria to nanguli Komi Yohanes Topediu to natuwu bali, pade naria woꞌu sanu nanguli Komi nabi Elia to neumba bali. Pade naria woꞌu to nanguli Komi sambaꞌa nggari nabi-nabi nggaolu to natuwu bali.”
29 Pade nekutanamo Yesus ka ira, “Tapi nantuki pombarata komi, isema Aku eꞌi?”
Nesonomo i Petrus, “Komimo Magau to Mompakasalama to nijanji Alatala!”
30 Nangepe etu nangulimo Yesus ka ira, “Neꞌepa ratesa ka tau-tau ntanina isema Aku eꞌi.”
Yesus nombaboto kamatena banepia
31 Naliu etu nompamulamo Yesus nompatuduki anaguru-anaguruna. Niulina, “Aku, Ana nu Manusia kana mombarasai mpengele-ngele kasusa. Aku kana rapoara totuꞌa-totuꞌa nto Yahudi bo balengga-balengga topanggeni agama bo guru-guru agama. Pade Aku kana rapatesi ira. Tapi ri eo katolueona Aku kana matuwu bali.”
32 Etu pura-pura nitesa Yesus ka ira ante nanoto.
Nangepe etu i Petrus nanggeni Yesus mpaka ri sabinggana pade nangontiaka Iꞌa. Niulina, “Guru, neꞌe motesa-tesa iwetu!”
33 Tapi Yesus nakampeili nanggita anaguru-anaguruna, pade niontiakana i Petrus, “Palaimo iko nggari seꞌi, Magau nu Seta! Pompekirimu etu pompekiri manusia, daꞌa pompekiri nggari jaꞌi Alatala!”
34 Naopu etu Yesus nompokio tau dea ri setu mpaka ri jaꞌina nosanggani-nggani ante anaguruna pade niulina ka ira, “Isema-sema madota majadi topantuki Aku, iꞌa kana mombakabasaka dota rarana mboto pade masadia mantuki Aku nau sampe mamate rapaku ri kayu parika.
35 Sabana isema-sema daꞌa masadia mantuki Aku nau sampe mamate iꞌa daꞌa mombarata katuwua mabelo sampe ri kasae-saena. Tapi isema-sema to mombakabasaka pura-pura dotana mboto pade mantuki Aku bo manggeni Kareba Belo nau sampe rapatesi, iꞌa kana mombarata katuwua mabelo sampe ri kasae-saena.
36 Natantumo daꞌa ntoto ria gunana ane sambaꞌa tau mombarata pura-pura nuapa to naria riara dunia eꞌi tapi daꞌa masalama, aga rasuku sampe ri kasae-saena ri naraka.
37 Daꞌa ria nuapa-nuapa to namala rasulata ante katuwua mabelo etu.
38 Isema-sema maeya mompangaku Aku bo tesa-tesaku ri tatongo tau-tau to nasilaka bo tau dea to daꞌa natutu nantuki Alatala, Aku, Ana nu Manusia woꞌu maeya mompangaku iꞌa tempo Aku marata bali ri dunia eꞌi. Tempo etu Aku kana marata ante reme bo kuasa nu Umaku, nosanggani-nggani ante malaeka-malaeka to nagasana!”