Yesus nangontiaka to Parisi sabana ira nomparibaꞌa ada-ada ntotuꞌa bo nanjapuaka parenta nu Alatala
7
Naria sanggani tau-tau to Parisi bo bara sakuya mbaꞌa guru agama nggari ngata Yerusalem narata ri jaꞌi Yesus.
2 Ira nanggita bara sakuya mbaꞌa anaguru Yesus nanggoni ante daꞌa norama pale ntani ruru nantuki ada-ada nto Parisi.
3 Ane tau-tau to Parisi bo pura-pura tau to Yahudi ntanina daꞌapa mamala manggoni ane ira daꞌapa morama pale nantuki ada-ada ntotuꞌa ira nggaolu.
4 Waꞌa woꞌu ane ira manjili nggari potomu. Daꞌapa ira manggoni ira kana morama pale ntani nantuki ada-ada ntotuꞌa. Pade nadea woꞌu ada-ada ntanina to nipasumuli nggari totuꞌa ira nggaolu to nituki ira. Jonjona, ira kana norama sanggiri, jolo bo parewa-parewa ntanina to nipowia nggari tambaga.
5 Jadi etumo sabana tau-tau to Parisi bo guru-guru agama etu nekutana ka Yesus, “Nokuya anaguru-anagurumu daꞌa nantuki ada-ada ntotuꞌata nggaolu? Nokuya ira aga nanggoni ante pale daꞌa nirama?”
6 Nesonomo Yesus ka ira, “Komi tau-tau aga nabelo ri lenje! Nakono mpuꞌu Tesa nu Alatala to nipasimbayu nabi Yesaya nggaolu ewa komi. Nitulisina iweꞌi:
‘Tau-tau eꞌi aga nombabila Aku ri sumba,
tapi daꞌa ante mpuꞌu-mpuꞌu rara ira.
7 Daꞌa ntoto ria gunana ira mepue ka Aku,
sabana ira nompatuduki ada-ada nu manusia ante nanguli etu parenta-parenta nu Alatala.’ (Yes. 29:13)
8 Jadi parenta-parenta Alatala daꞌa niparibaꞌa komi tapi ada-ada nu manusia nisoko komi ante naroso.”
9 Pade nanguli woꞌumo Yesus ka ira, “Nataꞌu mpuꞌumo komi nanjapuaka parenta Alatala ala matundu riara ada-ada komi mboto.
10 Jonjona, nabi i Musa nanguli iweꞌi: ‘Bilamo indo umamu,’ a pade niulina woꞌu, ‘Isema-sema manguli sinjaꞌi umana bara indona iꞌa kana rapatesi.’ b
11 Tapi komi nompatuduki iweꞌi: ‘Daꞌa mokuya ane sambaꞌa tau manguli ka indo bo umana nuapa to masipato rapakena mantulungi ira nirekena pesomba ka Alatala.’
12 Pade ane iꞌa mowia iwetu komi mana mompaloga iꞌa mantulungi indo bo umana.
13 Jadi ante iwetu komi nanjapuaka Tesa nu Alatala ante nomparibaꞌa ada-ada ntotuꞌa to nipasumuli ka komi. Pade nadeapa ntani-ntanina to nipowia komi nasimbayu ante etu.”
Nuapa to nompakatantoru manusia riara mpanggita Alatala
14 Pade sangganipa Yesus nompokio tau dea marata ri jaꞌina, pade nitesana ka ira porapa eꞌi: “Umba komi pura-pura, epemo tesaku eꞌi pade pekirimo batuana.
15 Daꞌa ria sangele nggari sawalikuna to nesua riara manusia mamala mompakatantoru ira riara mpanggita Alatala. Tapi pokainggu to najaꞌa to nopuꞌu nggariara ntaꞌi manusia, etumo to nompakatantoru ira riara mpanggita Alatala.
16 Isema-sema naria talingana, epemo mpakabelo-belo tesaku eꞌi.”
17 Naopu etu Yesus nompalasi tau dea pade nesua raranjapo. Tempo etu nekutanamo anaguruna ka Iꞌa ewa batuana porapa to lako nitesana paniꞌa.
18 Nangulimo Yesus ka ira, “Iwenumo? Komi woꞌu naingu nasimbayu ewa tau dea paniꞌa? Daꞌapa nanoto ka komi batuana porapa etu? Daꞌa ria panggoni to nikoni manusia mamala mompakatantoru iꞌa riara mpanggita Alatala.
19 Sabana panggoni etu daꞌa nesua riara pekirina tapi aga nesua riara ntaꞌi likona, pade nggari setu aga niotena mpanjili.” Ante nanguli iwetu, Yesus nompakatantu mpengele-ngele panggoni namala rakoni, daꞌa ria to nipopali.
20 Pade nanguli woꞌumo Yesus, “Nuapa to nesuwu nggari pekiri manusia etumo to nompakatantoru ira riara mpanggita Alatala.
21 Sabana nggariarana, etumo nggariara ntaꞌina neumba pompekiri-pompekiri to najaꞌa to nanggeni tau nogau sala ante tau daꞌa rongona mboto, nangangga, nepatesi,
22 nebualo, daꞌa nabasa-basa naino ka mbara-mbara ntau, nowia kajaꞌana, nebagiu, daꞌa nabasa-basa nantuki dota rara to najaꞌana, nasiriati, nanguli sinjaꞌi, nasombo, pade noinggu nadoyo.
23 Pokainggu to najaꞌa etumo to neumba nggariara manusia pade nompakatantoru ira riara mpanggita Alatala.”
Pomparasaya sambaꞌa besi daꞌa to Yahudi
24 Naopu etu nalaumo Yesus mpaka ri bagia namosu ngata Tirus. Narata ri setu nesuamo Iꞌa raranjapo. Patujuna ala neꞌe rakita ntau dea. Tapi karatana ri bagia etu daꞌa namala nitabuniaka.
25-26 Ri setu naria sambaꞌa besi daꞌa to Yahudi nggari Bagia Siro-Fenisia. Ana besi nggari besi etu nipesua seta. Jadi iwetu iꞌa nangepe lele Yesus naria ri ngata etu, naratamo iꞌa nekadede ri ngayona nerapi ante mpuꞌu-mpuꞌu rara, “Tulungimo aku, popalaimo seta nggari jaꞌi anaku!”
27 Tapi nangulimo Yesus ka iꞌa, “Pakambamo ngana-ngana manggoni ntani ruru sampe mabosu. Sabana daꞌa masipato mangala panggoni ngana-ngana ratajiaka ka asu.”
28 Nangulimo besi etu, “Nakono to niuli Komi, Pue. Tapi asu ri wayo meja woꞌu nanggoni rombo-rombo mpanggoni to nanawu nggari jaꞌi ngana-ngana.” c
29 Pade nanguli Yesus ka iꞌa, “Nakonomo tesamu. Sabana etu panjilimo weꞌi-weꞌi. Nalaimo seta etu nggari jaꞌi anamu.”
30 Pade nanjilimo besi etu. Sangga narata ri sapona nikitanamo anana besi naturu ri ompa paturuna pade seta etu nalaimo nggari jaꞌina.
Yesus nompakabelo sambaꞌa tau to nabongo bo nabobo
31 Naopu etu Yesus nompalasi Bagia Tirus pade napolamo Iꞌa noliu ri ngata Sidon mpaka ri Rano Galilea. Riara mpolumakona Iꞌa nantuki jala ri Bagia Sampulu Ngata.
32 Narata ri setu naria tau nanggeni roana to nabongo bo nabobo mpaka ri jaꞌina. Pade ira nerapi ka Yesus ante mpuꞌu-mpuꞌu rara ala Iꞌa mombadika palena ri koro ntau etu ala mompakabelo iꞌa.
33 Yesus nanggeni tau etu nggari jaꞌi ntau dea, pade nisuarakana koyampalena riara talinga ntau etu. Naopu etu nitailuna palena pade nituina ka jila ntau etu.
34 Naopu etu Yesus nantingoa langi ante nangore nosana, pade niulina ka tau etu riara Basa Ibrani, “Efata!” Batuana, katebeamo!
35 Pade natebeamo talinga ntau etu, pade nalulu balimo jilana sampe iꞌa namala notesa ante nabelo.
36 Pade Yesus nompakau ira pura-pura ala neꞌe mombatesa kajadia etu ka tau-tau ntanina. Tapi nantambai nitagi nantambai ira nompatolele kajadia etu.
37 Sangga nangepe kajadia etu nogumaa mpuꞌumo tau dea. Ira nanguli, “Pura-pura to nipowiana nabelo! Tau nabongo nipakabelona talingana sampe namala neepe, pade tau nabobo woꞌu nipakabelona sampe namala notesa ante nabelo!”