Yesus daꞌa nitarima pue ngata Nazaret
6
Pade nalaimo Yesus nggari setu nanjili mpaka ri ngatana mboto mpasanggani-nggani ante anaguru-anaguruna.
2 Ri tempo Eo Mpenonto nompamulamo Iꞌa nopaguru ri sapo mpodade ri setu. Tau dea to naria ri setu natekaja mpuꞌu nangepe Iꞌa. Ira nanguli, “Nggari umba tanu nipombaratana pangginjanina etu? Nggari umba tanu noto nipakena mompatuduki iwetu? Iwenu sampe Iꞌa namala mompowia kabaraka-kabaraka?
3 Iꞌa eꞌi aga topowia parewa nggari kayu, ana i Maria bo tuaka Yakobus, Yoses, Yudas bo i Simon! Pade tuaꞌina besi woꞌu naria ri tatongota ri seꞌi!” Etu sampe ira daꞌa madota momparasaya Iꞌa.
4 Tapi nangulimo Yesus ka ira, “Sambaꞌa nabi nibila ntau ri umba-umba ngata ntanina. Tapi ri ngatana mboto ri tatongo sampesuwuna bo ira saongu njapo iꞌa daꞌa ria nibila.”
5 Pade daꞌa namala Yesus nompowia nadea kabaraka ri setu. Iꞌa aga namala nompakabelo bara sakuya mbaꞌa tau najuꞌa ante nombadika palena ri koro ira.
6 Natekaja mpuꞌumo Iꞌa sabana tau ri setu daꞌa nomparasaya Iꞌa.
Yesus nompakau sampulu rombaꞌa anaguruna manggeni Kareba Belo
Naopu etu nalaumo Yesus nompebutu ngata ri bagia etu bo nompaguru tau dea.
7 Iꞌa nompokio sampulu rombaꞌa anaguruna mpaka ri jaꞌina pade nipakauna ira malau rombaꞌa-rombaꞌa sanjala. Niwaina ka ira kuasa ala ira mamala mompopalai seta-seta,
8 pade nitewaina ka ira iweꞌi: “Neꞌe komi manggeni bara nuapa-nuapa riara mpolumakomu. Neꞌe manggeni baku bara batutu rapomboli panggoni bara doi ri karepe. Tapi to mamala rakeni aga lembau.
9 Komi mamala mompake sapatu, tapi neꞌe manggeni baju rontonga.”
10 Pade niulina woꞌu ka ira, “Ane komi marata ri saongu ngata pade maria pue njapo mompopesai komi, petoꞌomo komi ri sapo etu sampe komi malai mompalasi ngata etu.
11 Tapi ane maria pue ngata daꞌa madota mantarima komi ri ngata ira bara mangepe pepatudukimu, palasimo ngata etu. Pade sapunaimo sowu nggari kadamu ala majadi popatora ka tau ri setu ira kana rasuku Alatala.”
12 Naopu etu nalaumo ira sampulu rombaꞌa nompatolele ka tau dea ira kana majea nggari silaka-silaka ira.
13 Pade ira nompopalai nadea seta nggari jaꞌi ntau nipesua seta, pade nadea tau to najuꞌa nigese ira lana pade nompakabelo juꞌa-juꞌa ira.
Tesa kamate Yohanes Topediu
14 Kareba Yesus niepe Magau Herodes woꞌumo, sabana natolelemo sanga Yesus mpaka ri umba-umba. Naria tau to nanguli, “Iꞌa etu Yohanes Topediu to natuwu bali. Etu sampe naria kuasa ri jaꞌina mowia kabaraka-kabaraka.”
15 Tapi naria tau ntanina nanguli, “Iꞌa etumo nabi Elia.” Pade naria woꞌu to nanguli, “Iꞌa etu sambaꞌa nabi nasimbayu ewa nabi-nabi nggaolu.”
16 Tapi tempo Magau Herodes nangepe tesa-tesa etu nangulimo iꞌa, “Natantumo Iꞌa etu Yohanes Topediu! Bopia nipakauku tau nombatompo balenggana. Tapi weꞌi-weꞌi natuwu balimo iꞌa!”
17-18 Iweꞌimo sabana Magau Herodes nompekiri iwetu. Bopia iꞌa nomporongo i Herodias, rongo nu sampesuwuna mboto to nosanga ka i Filipus. Naopu etu nadea ngganimo Yohanes Topediu nangontiaka Magau Herodes sabana pokaingguna etu. Niulina ka i Herodes iweꞌi: “Nantuki Atura-atura agamata daꞌa ntoto masipato komi mangala rongo nu sampesuwumu mboto!” Etu sampe Magau Herodes nompakau tantarana nanjoko Yohanes pade nombasuaraka iꞌa riara tarunggu.
19 Tempo etu nabilisi mpuꞌumo rara i Herodias ri jaꞌi Yohanes. Iꞌa madota mompatesi Yohanes tapi daꞌa namala,
20 sabana Magau Herodes naeka rarana ri jaꞌi Yohanes. Ninjanina Yohanes sambaꞌa tau nanoa bo nagasa rarana. Jadi Yohanes nikalendu Magau Herodes mpakabelo-belo riara tarunggu. Tempo i Herodes nangepe tesa-tesa Yohanes, naingu rarana. Tapi naupa iwetu nipokonona woꞌu nangepe tesana etu.
21 Kaopuna i Herodias nombarata loga to nabelo ala Yohanes namala rapatesi. Ri eo jadina mboto Magau Herodes nompowia posusa, pade iꞌa nombagaga pura-pura pangga bete bo balengga-balengga tantara bo totuꞌa-totuꞌa nggari njumaongu Bagia Galilea.
22 Tempo posusa etu nesuamo ana randoo i Herodias nojoge ri ngayo ira pura-pura. Randoo etu mpuꞌu-mpuꞌu nompakadamba rara Magau Herodes bo torata-toratana etu. Jadi nangulimo i Herodes ka iꞌa, “Tesamo nuapa-nuapa mupodota, etu kana kuwai ka iko.”
23 Pade iꞌa nojanji ka randoo etu ante netunda, “Nuapa-nuapa muperapi kana kuwai ka iko, nau sampe santongo nggari poparentaku!”
24 Nangepe etu nesuwumo randoo etu nalau nekutana ka indona, “Nindo, nuapa masipato kuperapi nggari jaꞌi Magau Herodes?”
Nesonomo indona, “Perapimo balengga Yohanes Topediu!”
25 Jadi natinggulimo randoo etu nasasinta mpaka ri jaꞌi Magau Herodes pade niulina, “Magau, to kuperapi ala balengga Yohanes Topediu rawai ka aku weꞌi-weꞌi raboli riara santonga dula!”
26 Nangepe pomperapi randoo etu nasusa mpuꞌumo rara Magau Herodes. Tapi daꞌa nabia iꞌa nompoara pomperapi etu sabana iꞌa nojanji ante netunda ri ngayo torata-toratana.
27 Jadi tempo etu woꞌu nipakauna sambaꞌa tantarana malau manggeni balengga Yohanes mpaka ri jaꞌina. Pade nalaumo tantara etu mpaka riara tarunggu nombatompo tambolo Yohanes.
28 Pade nikeninamo balengga Yohanes etu niboli riara santonga dula pade niwaina ka randoo etu. Naopu etu randoo etu nombawai balengga etu ka indona.
29 Sangga nangepe kareba etu, naratamo anaguru-anaguru Yohanes mangala watabakuna nggariara ntarunggu pade nitana ira ri dayo.
Yesus nompakoni limanjobu mbaꞌa tau
30 Anaguru-anaguru to nipakau Yesus nanggeni Kareba Belo nanjili bali pade nasiromu mpasanggani-nggani ante Yesus. Pade ira nombatesa ka Iꞌa pura-pura nuapa to nipowia ira bo to nipatuduki ira.
31 Naopu etu nangulimo Yesus ka ira, “Kamaimo kita mompatani ri petoꞌo to nakalinoana ala mamala mangosaraka sampalai.” Niulina iwetu sabana aga nosinjambei tau narata ri jaꞌina sampe ira nau aga nanggoni daꞌa nakapo.
32 Jadi nalaumo ira nesawi sakaya mpaka ri petoꞌo to nakalinoana.
33 Tapi tau dea nanggita ira nosakaya nalau, pade ninjani ira patuju Yesus bo anaguruna. Jadi nalaumo tau dea nggari pura-pura ngata nantuki jala kabatana mokolu ka Yesus bo anaguruna mpaka ri petoꞌo to nikalau ira.
34 Tempo Yesus nanaꞌu nggariara sakaya nikitana nadea mpuꞌu tau nasiromu ri setu. Nanggita etu naasi mpuꞌumo matana sabana ira nasimbayu ewa bimba-bimba daꞌa ria topoewuna. Jadi nompamulamo Iꞌa nompaguru ka ira mpengele-ngele pepatuduki.
35 Sangga nangguwiapa daꞌa mana masaeka mawengi, naratamo anaguru-anaguru Yesus nanguli ka Iꞌa, “Guru, petoꞌo eꞌi nakalinoa pade mana masaeka mawengi.
36 Agina tau dea etu rapakau matingguli ala ira mamala mangoli panggoni ri ngata-ngata bo boya-boya to namosuna.”
37 Tapi nangulimo Yesus ka ira, “Komimo mompakoni ira.”
Nanguli ira ka Yesus, “Hai! Iwenu kami mowia etu? Ane kami malau mangoli roti ka ira pura-pura olina roatu mpeka doi salaka mami!” a
38 Nekutanamo Yesus ka ira, “Sakuya ongu roti to naria ri jaꞌimu? Kau paresamo!”
Naopu ira nomparesa nangulimo ira ka Yesus, “To naria limaongu roti bo rombaꞌa bau.”
39 Pade Yesus nompakau tau dea etu mekatoko mobagi-bagi ri bunggu nggawoko naramata ri setu.
40 Nangepe etu nekatokomo tau dea nobagi-bagi, naria satu mbaꞌa sabagi, naria limampulu mbaꞌa sabagi.
41 Pade Yesus nangala limaongu roti bo rombaꞌa bau etu pade nantingoa langi nosambaya nanguli tarima kasi ka Alatala. Naopu etu nibingga-binggana roti etu pade niwaina ka anaguru-anaguruna ala rapalele ka tau dea etu. Pade rombaꞌa bau etu woꞌu nipalelena ka ira pura-pura.
42 Pade tau pura-pura nanggoni sampe nabosumo.
43 Naopu etu anaguru-anaguru Yesus nompasiromu labi roti bo bau to nabolina, naponupa sampulu rotonda.
44 Kadea langgai to nanggoni ri setu kira-kira limanjobu mbaꞌa.
Yesus nolumako ri bunggu ue rano
45 Naopu etu kaliu-liu Yesus nompakau anaguru-anaguruna mesawi sakaya mokolu ka Iꞌa mpaka ri ngata Betsaida ri sambote rano. Tapi Iꞌa mboto nompakau tau dea etu manjili ri sapo ira.
46 Sangga nogaꞌapa Iꞌa ante tau dea etu nantendemo Iꞌa mpaka ri saongu bulu ala mosambaya.
47 Tempo nawengimo sakaya to nipesawi anaguruna ri tatongo ranomo, pade Yesus njambaꞌana da ri kabatana.
48 Nikita Yesus nandasamo ira nowose sakaya sabana poiri bete nantomunaka sakaya ira etu. Kira-kira tinti toluongu nggawengina naratamo Iꞌa mpaka ri jaꞌi ira nolumako ri bunggu ue rano ewa madota mombaliunaka ira.
49 Tempo ira nanggita Iꞌa nolumako ri bunggu nu ue nipekiri ira Iꞌa etu mboa. Jadi nawaranggaamo ira
50 sabana ira pura-pura nawiora nanggita Iꞌa.
Tapi nasalisa Iꞌa notesa ka ira, “Neꞌe maeka! Pakaroo raramu! Aku Yesusmo eꞌi!”
51 Pade nesawimo Iꞌa riara sakaya mpasanggani-nggani ante ira. Pade nenontomo poiri bete etu. Nanggita etu nasumara mpuꞌumo rara ira,
52 sabana naupa ira nanggita kajadia ante roti pangane, daꞌapa nanoto ka ira isema kakonona Yesus. Danakumba pekiri ira.
Yesus nompakabelo juꞌa-juꞌa ntau dea ri Bagia Genesaret
53 Sangga naratapa ira ri sambote rano nanaꞌumo Yesus ante anaguru-anaguruna ri Bagia Genesaret.
54 Iwetu ira nanaꞌu nggari sakaya ninjani ntau mamimo Yesus.
55 Jadi nangowamo ira nompari-mpari nalau mpaka ri ngata-ngata namosu setu. Pade nompamula ira nombakowa tau-tau najuꞌa ante ompa paturu ira mpaka ri jaꞌi Yesus nantuki lele to niepe ira.
56 Ri umba-umba nikalau Yesus, nabeloka ri ngata-ngata, nabeloka ri kota-kota, nabeloka ri boya-boya, naria tau nanggeni tojuꞌa mpaka ri potomu, pade niperapi ira ka Yesus ante mpuꞌu-mpuꞌu ala ane mamala tau najuꞌa etu nau aga manggabe tampa nu bajuna. Pade isema-sema to nanggabe tampa nu bajuna nabelo pura nggari juꞌa ira.