Yesus nipesoba Magau nu Seta
4
Naopu Yesus nidiu Iꞌa naponu ante Nosa Nagasa nu Alatala. Iꞌa nompalasi Binangga Yordan, pade Iꞌa nikeni Nosa Nagasa etu mpaka ri karawa baina.
2 Ri setu Iꞌa nipesoba Magau nu Seta patampulu mbengi kasaena. Riara patampulu mbengi Iꞌa ri setu daꞌa ria nuapa-nuapa nikonina sampe naoro mpuꞌu taꞌina.
3 Pade nangulimo Magau nu Seta ka Iꞌa, “Ane Iko Ana nu Alatala balimo watu eꞌi mewali roti!”
4 Nesonomo Yesus ka iꞌa, “Riara Buku Nagasa naria nitulisi iweꞌi: ‘Daꞌa aga nggari roti manusia mamala matuwu.’” a
5 Naopu etu Yesus nikeni Magau nu Seta woꞌumo mpaka ri saongu bulu to nalangana. Pade riara tempo sampida mata nipopokitana ka Yesus pura-pura poparenta to naria riara dunia eꞌi.
6 Pade niulina ka Yesus, “Pura-pura kuasa pade kakalumana eꞌi kuwai ka Iko, sabana pura-pura etu niwai ka aku, pade namala kuwai ka isema-sema kupodota.
7 Pura-pura etu majadi bagiamu ane Iko mombasomba aku.”
8 Tapi nesonomo Yesus, “Riara Buku Nagasa naria nitulisi iweꞌi: ‘Iko kana mombasomba Pue Alatalamu. Aga Iꞌamo to masipato mupepue.’” b
9 Naopu etu Yesus nikeni Magau nu Seta etu woꞌumo mpaka ri ngata Yerusalem pade nituꞌuna ri wumbu nu Sapo Mpepue, pade niulina, “Ane Iko Ana nu Alatala, potingganawumo Iko nggari seꞌi mpaka ri tana.
10 Iko daꞌa ria mokuya sabana riara Buku Nagasa naria nitulisi iweꞌi: ‘Pue Alatala kana mompakau malaeka-malaekana mombajagai iko.
11 Ira kana mombatande iko riara mpale ira ala kadamu neꞌe mawela watu.’” c
12 Tapi nesonomo Yesus, “Naria woꞌu Tesa nu Alatala to nanguli iweꞌi: ‘Neꞌe iko mombasoba Pue Alatalamu.’” d
13 Naopu Magau nu Seta etu nompesoba Yesus ante nompengaya akala, nipalasina Yesus, pade nitongorakana loga to nabelona.
14 Naopu etu natinggulimo Yesus mpaka ri Bagia Galilea. Kuasa Nosa Nagasa nu Alatala naria ri jaꞌina. Pade natolelemo karebana ri pura-pura ngata ri setu.
15 Iꞌa nopaguru ri sapo-sapo mpodade nto Yahudi pade pura-pura tau nantoiya Iꞌa.
Yesus daꞌa nitarima ri ngata Nazaret
16 Pade nalaumo Yesus mpaka ri ngata Nazaret. Ri ngata etumo Iꞌa nipakabete. Pade nantuki kabiasana tempo Eo Mpenonto Iꞌa nesua ri Sapo Mpodade. Ri setu Iꞌa nekanggore ala mombabasa sabagia nggari Buku Nagasa.
17 Buku nabi Yesaya niwai ka Iꞌa. Nitimpana niratana saongu bagia pade nibasana bagia etu to nanguli iweꞌi:
18 “Nosa Nagasa i Pue naria ri jaꞌiku,
sabana Iꞌamo to nombalanti Aku
mompatolele Kareba Belo ka tau-tau napakasi.
Iꞌa nompakau Aku manguli ka tau-tau to nitawani, ira kana makabasaka,
pade ka tau-tau naburo, ira mamala mekita bali,
pade ka tau-tau natitanamaka, ira kana rasoreaka.
19 Iꞌa woꞌu nompakau Aku mompasimbayu
karata i Pue mompakasalama todeana.” (Yes. 61:1-2)
20 Naopu Yesus nombabasa buku etu, nitutuna mpanjili pade nipopatinggulina ka tau to nipakakuasa ri setu. Naopu etu nekatokomo Iꞌa. Pura-pura tau riara Sapo Mpodade etu nanggita Iꞌa.
21 Pade nompamulamo Iꞌa nompatuduki ira. Niulina, “Tesa nggari Buku Nagasa to nibasaku paneꞌa lako nipakadupa ri ngayo komi.”
22 Nangepe Iꞌa pura-pura tau ri setu nantakono tesana etu, pade nogumaa ira sabana nabelo mpuꞌu tesa-tesa to niulina. Nekutanamo ira sambaꞌa bo sambaꞌa, “Iwenu sampe Iꞌa namala notesa iwetu? Iꞌa aga ana Yusuf!”
23 Pade nangulimo Yesus ka ira, “Natantu komi kana manguli ka Aku porapa eꞌi: ‘Sando, pakabelo koromu mboto!’ Pade komi kana manguli woꞌu ka Aku, ‘Powia woꞌu kabaraka ri ngatamu mboto eꞌi ewa nuapa niepe kami nikawiamu ri ngata Kapernaum.’”
24 Pade niulina woꞌu, “Toramo! Daꞌa ria sambaꞌa nabi nibila ntau ri ngatana mboto!
25 Tapi toramo nuapa to najadi ri tempo nabi Elia. Tolumpae santongo kasaena eo napane, daꞌa ria narata uja, pade najadimo kamateoro neliu ganta ri pura-pura ngata. Tempo etu nadea besi nabalu ri tana Israel.
26 Naupa iwetu nabi Elia etu daꞌa nipakau Alatala malau mantulungi ira besi tobalu to Yahudi etu. Tapi iꞌa nipakau malau mpaka ri ngata Sarfat ri Bagia Sidon mantulungi sambaꞌa besi tobalu daꞌa to Yahudi.
27 Iwetu woꞌu to najadi ri tempo nabi Elisa. Tempo etu nadea tau to Israel najuꞌa bete. Tapi daꞌa ria ira to Yahudi to nipakabelo nabi Elisa. Aga i Naaman, sambaꞌa tau daꞌa to Yahudi nggari Siria to nipakabelona nggari juꞌa betena!”
28 Naopu nangepe tesa Yesus etu narau mpuꞌumo rara pura-pura tau riara Sapo Mpodade etu.
29 Jadi nekanggoremo ira nompopalai Yesus nggari ngata ira, pade nikeni ira Iꞌa mpaka ri wiwi bingge to nipetoꞌo ngata ira etu. Patuju ira mombajuanaka Iꞌa nggari bingge to nalangana etu.
30 Tapi Yesus noliu ri tatongo ira pade nalai.
Tau to nipesua seta nipakabelo Yesus
31 Naopu etu nalaumo Yesus mpaka ri ngata Kapernaum ri Bagia Galilea. Ri setu Iꞌa nopaguru ri sapo mpodade tempo Eo Mpenonto.
32 Nasumara mpuꞌu tau-tau ri setu nangepe pepatudukina, sabana nakuasa mpuꞌu tesana.
33 Riara sapo mpodade nto Yahudi etu naria sambaꞌa tau to nipesua seta. Nongaremo iꞌa ante suara namangga,
34 “E, Yesus to Nazaret! Nuapa madota mupowia ka kami? Komi narata mompakaropu kami? Ninjaniku isema Komi! Komimo to Nagasana nggari jaꞌi Alatala!”
35 Tapi Yesus nanggarau seta etu, “Pekalino! Palaimo nggari jaꞌi ntau etu!” Pade seta etu nombadungganaka tau etu ri tatongo ntau dea pade nalaimo iꞌa nggari jaꞌi ntau etu ante daꞌa nompakajuꞌa iꞌa.
36 Nanggita etu nasumara puramo tau ri setu pade ira notesa sambaꞌa bo sambaꞌa, “Hai! Iwenu sanga tau eꞌi? Ante kuasana Iꞌa nompakau seta-seta nalai nggari jaꞌi ntau, pade seta etu nalai mpuꞌu!”
37 Naopu etu natolelemo kareba Yesus ri umba-umba bagia etu.
Yesus nompakabelo juꞌa ntau dea
38 Naopu etu Yesus nompalasi sapo mpodade etu nalau mpaka ri sapo sambaꞌa tau to nosanga ka i Simon. Matuꞌa besi i Simon naraya mbongo pade tau-tau ri setu nerapi ala Yesus mantulungi iꞌa.
39 Jadi nalaumo Yesus nekanggore ri sinjori matuꞌa besi i Simon etu, pade nitesana ante kuasa nompopalai juꞌa raya etu nggari jaꞌi nu besi etu. Nabelomo iꞌa pade kaliu-liu iꞌa nembangu nalau nangala panggoni nikenina ka ira.
40 Sangga nangguwiamo pura-pura tau nanggeni roa ira to najuꞌa nompengele juꞌa mpaka ri jaꞌi Yesus. Iꞌa nombadika palena ri koro ira sambaꞌa bo sambaꞌa nompakabelo juꞌa ira pura-pura.
41 To nipesua seta nipakabelona woꞌu. Seta-seta etu nesuwu nalai nggari jaꞌi tau-tau etu ante nongare-ngare, “Komimo Ana nu Alatala!” Tapi Yesus nombatagi seta-seta etu, “Pekalino!” Daꞌa nipalogana ira notesa sabana ninjani ira Iꞌamo Magau to Mompakasalama to nijanji Alatala.
42 Ri kampadondona etu nanggaliwomo Yesus nggari ngata etu pade nalau mpaka ri saongu petoꞌo to nakalinoana. Tapi tau dea nangelo Iꞌa. Tempo ira nombarata Yesus ira nompasimbuku nombataꞌamaka Iꞌa ante nanguli, “Neꞌe mompalasi kami! Kana metoꞌo ri seꞌi Komi!”
43 Tapi nangulimo Yesus ka ira, “Aku kana malau mompatolele Kareba Belo ewa Poparenta nu Alatala ri ngata-ngata ntanina woꞌu, sabana etumo to nipakau Alatala ka Aku.”
44 Jadi nalaumo Iꞌa nompatolele Kareba Belo ri sapo-sapo mpodade ri ngata-ngata nto Yahudi.