Tesa Yohanes Topediu
3
Riara kasampulu limampaena Kaisar Tiberius noparenta ewa Magau Roma, i Pontius Pilatus najadi Gubernur ri Bagia Yudea, pade i Herodes Antipas noparenta ri Bagia Galilea. Filipus, totuaka i Herodes noparenta ri Bagia Iturea bo Trakhonitis, pade i Lisanias noparenta ri Bagia Abilene.
2 Tempo etu i Hanas ante i Kayafas najadi Balengga Topanggeni Agama nto Yahudi. Riara mpae etumo naratamo Alatala notesa ka Yohanes, ana i Zakharia etu ri karawa baina.
3 Naopu Alatala notesa ka iꞌa nalaumo Yohanes ri ngata-ngata ri bagia lemba Yordan nompatolele kareba nggari jaꞌi Alatala ka pura-pura tau ri setu. Niulina, “Komi pura-pura kana majea nggari silaka-silakamu pade komi kana radiu ala komi raampungi nu Alatala.”
4 Pepatuduki Yohanes etu nompakadupa nuapa to nitulisi riara buku nabi Yesaya nggaolu, iweꞌi:
“Naria sambaꞌa tau nongare-ngare ri karawa baina,
‘Pakasadiamo jala ka i Pue.
Pakanoamo jala to ratukina.
5 Lobu-lobuna kana raiwu
pade to nabuntina kana rapakarano.
Jala to noleko-lekona kana rapakanoa
bo lowu-lowuna raiwu rapakasirano.
6 Pade pura-pura tau ri dunia kana manggita Alatala marata mompakasalama manusia.’” (Yes. 40:3-5)
7 Nadea tau narata ri jaꞌi Yohanes ala radiuna. Jadi notesamo iꞌa ka ira, “Komi topebagiu nasimbayu ante ule! Isema nanguli komi mamala malai ala neꞌe mawela pesuku Alatala to marata? Etu daꞌa nakono!
8 Ane mpuꞌu-mpuꞌu komi najea, etu kana rapopokita komi ante pokainggumu to nabelo. Neꞌe komi mompekiri, ‘Kami eꞌi muli Abraham. Pesuku Alatala etu daꞌa rapawela ka kami!’ Etu daꞌa woꞌu nakono! Sabana kuuli ka komi, ane Alatala madota watu-watu eꞌi mamala rapajadina muli Abraham!
9 Weꞌi-weꞌi nasadiamo baliu rapotowo kayu sampe ri kale-kalena. Ane daꞌa ntoto ria wuana to nabelo, kayu etu kana ratowo pade ratajiaka riara apu.” a
10 Pade nekutanamo tau dea ka iꞌa, “Ane iwetu nuapa to masipato rapowia kami?”
11 Nesonomo Yohanes, “Tau maria morontonga bajuna, kana rawaina santonga ka tau daꞌa ntoto ria bajuna. Pade tau maria panggonina kana rawaina woꞌu ka roana to daꞌa ria panggonina.”
12 Naria woꞌu topomperapi balasitee narata ri jaꞌi Yohanes merapi radiu. Ira nekutana, “Guru, nuapa to masipato rapowia kami?”
13 Nesonomo Yohanes, “Neꞌe komi merapi melabi nggari kadea nu balasitee to nipakatantu topoparenta ka komi.”
14 Pade naria woꞌu tantara-tantara narata nekutana ka Yohanes, “Iwenu ante kami? Nuapa to masipato rapowia kami?”
Nesonomo Yohanes ka ira, “Neꞌe mana komi momparangga bara mompakaeka tau ala mangala doina. Neꞌe komi mangelo neliu nggari gaji komi. Naganamo etu.”
15 Tempona etu pura-pura tau nekutana riara ntaꞌi ira, “Bara Yohanes eꞌimo Magau to Mompakasalama to nijanji Alatala.”
16 Ninjani Yohanes pompekiri ira. Jadi nitesana ka ira pura-pura, “Aku mombadiu komi ante ue ewa tandaina najeamo komi nggari silaka komi. Tapi kana marata sambaꞌa tau to neliu nggakuasa nggari aku. Aku neliu nggaede nggari Iꞌa sampe daꞌa masipato aku mombawole lui sapatuna. Iꞌa kana mombadiu komi ante Nosa Nagasa nu Alatala bo apu.
17 Iꞌa nasimbayu ante tau nombawaro pae. Nariamo tapi ri palena. Iꞌa kana mombawaro pura-pura paena sampe magasa, pade pae to namonona kana rabolina riara logona. Tapi warana kana rapalabuna riara apu to daꞌa ria kapaya-payana.”
18 Iwetumo Yohanes nompatuduki tau-tau ante mpengaya-ngaya akala tempona iꞌa nompatolele Kareba Belo.
19 Naria sanggani Yohanes nangontiaka Magau Herodes to noparenta ri Bagia Galilea. Niontiakana ewa porongona ante i Herodias, rongo ntuakana mboto bo nengele-ngele anu najaꞌa ntanina to nikawiana.
20 Tapi Magau Herodes aga nantambai kajaꞌana ante nombasuaraka Yohanes riara tarunggu.
Yesus nidiu
21 Daꞌapa Yohanes nisuaraka riara tarunggu tempo pura-pura tau dea naopumo nidiuna, Yesus woꞌu nidiu Yohanes. Tempo Yesus nosambaya natebeamo langi
22 pade Nosa Nagasa nu Alatala nanaꞌu ri jaꞌina nolenje mpotonji banggebodo. Pade naria suara nggari suruga nanguli, “Ikomo Anaku to nipotoweku. Ikomo to nikonoa raraku.”
Tuntu posisunju sanga ntotuꞌa Yesus
23-38 Tempo Yesus nompamula panggawiana to niwai Alatala ka Iꞌa, umuruna kira-kira tolumpulu mpaemo. Nantuki pombarata ntau Iꞌa ana Yusuf,
Yusuf ana Eli; Eli ana i Matat;
Matat ana i Lewi; Lewi ana i Malkhi;
Malkhi ana Yanai; Yanai ana Yusuf;
Yusuf ana i Matica; Matica ana Amos;
Amos ana i Nahum; Nahum ana i Hesli;
Hesli ana i Nagai; Nagai ana i Maat;
Maat ana i Matica; Matica ana i Simei;
Simei ana Yosekh; Yosekh ana Yoda;
Yoda ana Yohanan; Yohanan ana i Resa;
Resa ana i Zerubabel; Zerubabel ana i Sealtiel;
Sealtiel ana i Neri; Neri ana i Malkhi;
Malkhi ana Adi; Adi ana i Kosam;
Kosam ana Elmadam; Elmadam ana Er;
Er ana Yesua; Yesua ana Eliezer;
Eliezer ana Yorim; Yorim ana i Matat;
Matat ana i Lewi; Lewi ana i Simeon;
Simeon ana Yehuda; Yehuda ana Yusuf;
Yusuf ana Yonam; Yonam ana Elyakim;
Elyakim ana i Melea; Melea ana i Mina;
Mina ana i Matata; Matata ana i Natan;
Natan ana i Daud; Daud ana Isai;
Isai ana Obed; Obed ana i Boas;
Boas ana i Salmon; Salmon ana i Nahason;
Nahason ana Aminadab; Aminadab ana Admin;
Admin ana Arni; Arni ana i Hezron;
Hezron ana i Peres; Peres ana Yehuda;
Yehuda ana Yakub; Yakub ana Ishak;
Ishak ana Abraham; Abraham ana i Terah;
Terah ana i Nahor; Nahor ana i Serug;
Serug ana i Rehu; Rehu ana i Peleg;
Peleg ana Eber; Eber ana i Salmon;
Salmon ana i Kenan; Kenan ana Arpakhsad;
Arpakhsad ana i Sem; Sem ana i Nuh;
Nuh ana i Lamekh; Lamekh ana i Metusalah;
Metusalah ana i Henokh; Henokh ana Yared;
Yared ana i Mahalaleel; Mahalaleel ana i Kenan;
Kenan ana Enos; Enos ana i Set;
Set ana Adam; Adam ana Alatala.