Tesa pesuwu Yesus
2
Tempona etu Kaisar Agustus noparenta ala sanga pura-pura tau riara Poparenta nto Roma ratulisi riara buku senju ri ngata totuꞌa ira mboto.
2 Popabila pamula-mulana eꞌi nikawia tempona i Kirenius najadi Gubernur ri Bagia Siria.
3 Pura-pura tau nalau mpaka ri ngata totuꞌa ira mboto ala sanga ira ratulisi riara buku senju.
4 Iwetu woꞌu Yusuf. Iꞌa nanggaliwo nggari ngata Nazaret ri Bagia Galilea mpaka ri ngata Betlehem ri Bagia Yudea, ngata pesuwu Magau Daud, sabana Yusuf muli i Daud.
5 Yusuf nalau mpasanggani-nggani ante tingeana i Maria to natiana etu ala sanga ira ratulisi ri setu.
6 Tempo ira ri ngata Betlehem naratamo ntoana i Maria moana.
7 Iꞌa nangote sambaꞌa ngana langgai, anana ulumbua. Ngana etu nibunguna ante buya, pade nipopaturuna riara petoꞌo panggoni binata ri gimpu binata, sabana ira daꞌa nombarata petoꞌo riara njapo ntau.
8 Wengi pesuwu Yesus etu naria topoewu-topoewu nombajagai bimba-bimba ira ranggarawana namosu ngata etu.
9 Sampegoli naratamo sambaꞌa malaeka i Pue ri jaꞌi ira pade reme i Pue nombawanta ira. Nanggita etu naeka mpuꞌumo ira.
10 Tapi nangulimo malaeka ka ira, “Neꞌe komi maeka sabana karataku eꞌi nanggeni kareba to nabelo ka komi pura-pura, pade to mompakadamba pura-pura tau.
11 Wengina eꞌi ri ngata pesuwu Magau Daud niotemo sambaꞌa Magau to Mompakasalama komi, etumo i Pue Yesus Kristus.
12 Iweꞌimo tandaina to mompakatantu ka komi nakono tesaku: Ngana etu nibungu ante buya pade nipopaturu ri petoꞌo panggoni binata.”
13 Sampegoli nadeamo roa malaeka etu pade ira nombatoiya Alatala iweꞌi:
14 “Ratoiyata Alatala to naria ri suruga!
Pade ri dunia mosinggabelo pura-pura tau to nikonoa Alatala.”
15 Sangga malaeka-malaeka etu nompalasi ira nanjili mpaka ri suruga, nosimpakenimo topoewu etu sambaꞌa bo sambaꞌa, “Kamaimo kita mpaka ri ngata Betlehem manggita nuapa to najadina etu to nitesa i Pue ka kita.”
16 Ira nompari-mpari nalau, pade nirata ira i Maria ante Yusuf pade ngana etu danaturu riara petoꞌo panggoni binata.
17 Sangga nikita ntopoewupa ngana etu, nitesa ira puramo nuapa to nitesa malaeka ka ira ewa ngana etu.
18 Pura-pura tau to nangepe tesa ntopoewu etu nasumara mpuꞌu.
19 Tapi i Maria nomboli riara ntaꞌina pura-pura nuapa to niepena ewa anana etu pade tunggai nitondoakana.
20 Naopu etu nanjilimo topoewu-topoewu etu mpaka ri bimba ira ante nombatoiya pade nombabila Alatala, sabana pura-pura to niepe ira pade to nikita ira etu nakono mpuꞌu nantuki nuapa to niuli malaeka ka ira.
Yesus nipoposanga
21 Sangga naganapa umuru ngana etu walumbengi, nikawiamo ada mposuna, pade Iꞌa nipoposanga Yesus nantuki tesa malaeka ka i Maria tempona Iꞌa daꞌapa nikatiana nu indona.
Yesus nikeni niposambaya ri ngayo Alatala
22 Naratamo ntoana Yusuf pade i Maria malau mpaka ri Sapo Mpepue ri ngata Yerusalem manggawia ada mompegasa koro to niwai i Musa ka to Yahudi. Ngana etu nikeni woꞌu mpaka ri ngata Yerusalem ala rakeni raposambaya ri ngayo Pue Alatala.
23 Etu nantuki atura to naria riara Atura i Pue to nipapola i Musa iweꞌi: “Pura-pura ngana langgai ulumbuana kana rakeni raposambaya ri ngayo i Pue.” a
24 Yusuf ante i Maria woꞌu nopatuju manggeni pesomba ira, etumo rombaꞌa tonji togou atau rombaꞌa ana ntonji banggebodo, ewa to nipakatantu riara Atura-atura i Pue.
25 Tempona etu ri ngata Yerusalem naria sambaꞌa tau nosanga ka i Simeon. Iꞌa sambaꞌa tau nanoa rara to naeka ri jaꞌi Alatala bo nompopea karata Magau to Mompakasalama to nijanji Alatala. Nosa Nagasa nu Alatala naria ri jaꞌina,
26 pade Nosa Nagasa etu naopumo nanguli ka iꞌa, “Daꞌapa iko mamate ane daꞌapa mukita Magau to Mompakasalama to nijanji Alatala etu.”
27 Simeon nikeni Nosa Nagasa nu Alatala nesua riara Sapo Mpepue. Tempona etu Yusuf ante i Maria nanggeni mpesua ana ira Yesus ala manggawia ada to nipakatantu riara Atura-atura agama.
28 Sangga nanggita ngana etu nalaumo i Simeon nanjalunggu Iꞌa pade nombatoiya Alatala iweꞌi:
29 “Iweꞌipa, Pue, nadupamo pojanjimu.
Pakambamo batuamu eꞌi mamate ante mabelo,
30 sabana mataku mbotomo nanggita Magau to Mompakasalama to nijanjimu
31 to niwaimu ka pura-pura manusia ri dunia.
32 Iꞌa ewa reme to nombawanta jala ka pura-pura tau daꞌa to Yahudi ala ira marata ri jaꞌimu.
Pade Iꞌamo reme to nompakaria pebila ka todeamu to Israel.”
33 Nangepe tesa i Simeon ewa ana ira etu, nogumaamo indo uma nu ngana etu.
34 Pade Simeon nombagane ira bo nanguli ka i Maria indo ngana etu, “Ngana eꞌi nipelisi Alatala mombalalamaka nadea to Israel tapi mombasoreaka nadea to Israel ntanina. Iꞌa majadi saongu tandai nggari jaꞌi Alatala to raewa ntau dea,
35 ala ante iwetu meumba puramo isi rara ntaꞌi ira. Pade kasusa bo kapari ewa guma kana mantosu rara ntaꞌimu.”
36 Naria woꞌu sambaꞌa nabi nu Alatala, sambaꞌa besi to natuꞌa mpuꞌumo. Sangana i Hana, ana i Fanuel sambaꞌa tau muli Asyer. Sangga naganapa pitumpae norongo,
37 nabalumo i Hana. Naopu iꞌa nabalu daꞌa ria sanggani iꞌa nompalasi Sapo Mpepue. Eo wengi iꞌa ri setu nepue ka Alatala ante nosambaya bo napuasa. Tempona Yesus nikeni ri Sapo Mpepue i Hana noumuru walumpulu bo patampae.
38 Ewa nisuka tempona etu woꞌu iꞌa narata, pade nikitana Yesus etu. Tempona iꞌa nanggita Yesus iꞌa nombatoiya Alatala. Pade nitesana ewa ngana etu ka pura-pura tau to nompopea tempona Alatala mombakabasaka to Yahudi nggari bali ira.
Yusuf bo Maria nanggeni Yesus manjili mpaka ri Nazaret
39 Sangga naopu pura nuapa to niparenta Alatala riara Aturana nipowia Yusuf ante Maria, nanjilimo ira mpaka ri ngata nipetoꞌo ira, etumo ngata Nazaret ri Bagia Galilea.
40 Pade Yesus nantambai kasaena nantambai kabete korona pade nantambai karosona. Iꞌa sambaꞌa ngana to nanotona pade Iꞌa nigane Alatala.
Yesus ri Sapo Mpepue
41 Mpae-mpae indo uma Yesus nalau mpaka ri ngata Yerusalem nantuki posusa eo bete nto Yahudi to niuli Posusa Paska.
42 Sangga naganapa umuru Yesus sampulu rompae nalaumo ira saongu njapo mpaka ri ngata Yerusalem mantuki eo bete etu ewa kabiasa ira.
43 Sangga naopupa posusa etu, natinggulimo totuꞌa Yesus. Tapi ante daꞌa ntoto ninjani indo umana Yesus netiboli ri ngata Yerusalem.
44 Nipekiri indo umana Iꞌa nolumako mpasanggani-nggani ante tau dea. Polumako ira etu saeo ntuamo pade nielo ira Yesus ri tatongo sampesuwu bo wega ira etu. Tapi daꞌa ria nirata ira Yesus.
45 Sabana etu natingguli bali ira mpaka ri ngata Yerusalem nopaelo Iꞌa.
46 Nagana katolumbengina pade Iꞌa nirata ira riara Sapo Mpepue. Iꞌa nekatoko nangepe tesa guru-guru agama pade Iꞌa woꞌu nekutana-tana ri jaꞌi ira.
47 Nogumaa puramo tau to nangepe Iꞌa sabana nataꞌu mpuꞌu Iꞌa nombasono-sono guru-guru agama.
48 Nanggita Iꞌa ri setu nasumara woꞌu indo umana. Pade notesamo indona ka Iꞌa, “Yesus, nokuya Iko nompowia kami iweꞌi? Nasusa mpuꞌu aku ante umamu nopaelo Iko!”
49 Nesonomo Iꞌa, “Nokuya komi nangelo Aku? Daꞌa ninjani komi Aku kana maria ri sapo nu Umaku?”
50 Tapi daꞌa ninjani indo umana nuapa batuana tesa to niulina ka ira etu.
51 Naopu etu natinggulimo Yesus mpasanggani-nggani ante indo umana mpaka ri ngata Nazaret, pade ri setu Iꞌa natundu ri jaꞌi ira. Pura-pura nuapa to najadi etu niboli nu indona riara ntaꞌina pade nitondoakana.
52 Pade Yesus nantambai eona nantambai kabetena bo nantambai kataꞌuna, pade nantambai nipotowe Alatala ante manusia.