KAREBA BELO TO NITULISI
LUKAS
Patuju nu buku eꞌi
1
Teofilus to nibilaku. Nadeamo tau nompasimbuku nantulisi saongu kareba ewa nuapa to najadi ante Yesus ri tatongota.
2 Isi kareba etu nantuki tesa to nipatolele ka kita nggari tau-tau to nanggita kajadia-kajadia etu ante matana mboto nggari pamulana.
3 Jadi naopu aku nomparesa pura-pura kajadia etu mpakabelo-belo nompamula nggari pamula-mulana, nipekiriku nabelopa ane aku woꞌu mantulisi saongu kareba to mosisunju-sunju etu ka komi.
4 Nitulisiku kareba eꞌi ala komi mamala mangginjani bo momparasaya pura-pura nuapa to nipatuduki ka komi mpuꞌu-mpuꞌu nakono.
Pesuwu Yohanes Topediu nipopanjani
5 Tempo Magau Herodes noparenta ri Bagia Yudea, naria sambaꞌa topanggeni agama Yahudi to nosanga ka i Zakharia. Iꞌa sambaꞌa tau nggari lunu topanggeni agama to nosanga ka lunu muli Abia. Rongona nosanga ka Elisabet. Iꞌa woꞌu muli nu topanggeni agama.
6 Katuwu ira njamboko etu nompakadamba rara nu Alatala, sabana ira natundu riara pura-pura parenta bo atura i Pue.
7 Ira daꞌa noana sabana Elisabet nagampa, bo ira njamboko woꞌu natuꞌamo.
8 Naria sanggani, tempo lunu Abia nombarata lelena, i Zakharia nobago ewa topanggeni agama ri ngayo Alatala ri Sapo Mpepue.
9 Pade ira nowia nomoro nantuki kabiasa ira mompakatantu isema motunju wongi ri ngayo Alatala. Nomoro etu nawela i Zakharia, jadi iꞌamo to nesua riara Sapo Mpepue motunju wongi.
10 Tempo iꞌa notunju wongi riara Sapo Mpepue todea nosambaya ri sawalikuna.
11 Tempo etu naratamo sambaꞌa malaeka i Pue nompopokita korona ka i Zakharia. Malaeka etu nekanggore ri sabingga nggana nu meja mpotunju wongi etu.
12 Sangga nanggita malaeka etu natikajamo i Zakharia pade naeka mpuꞌu rarana.
13 Tapi nangulimo malaeka etu ka iꞌa, “Neꞌe maeka, Zakharia. Nitarima Alatalamo posambayamu. Rongomu Elisabet kana moana sambaꞌa ngana langgai pade iꞌa kana mupoposanga Yohanes.
14 Iko kana madamba mpuꞌu raramu pade madea tau madamba rarana tempo ngana etu mesuwu.
15 Iꞌa majadi sambaꞌa tau to moangga riara mpanggita i Pue. Iꞌa daꞌa manginu pura-pura panginu to nepakalangu. Iꞌa kana maponu ante Nosa Nagasa nu Alatala nompamula nggariara nu indona.
16 Pade ante pepatudukina nadea to Israel kana rakenina bali momparasaya Pue Alatala.
17 Iꞌa kana majadi suro i Pue Alatala to nakuasa ewa nabi Elia nggaolu. Iꞌa mompoposinggabelo uma ante anana, pade tau daꞌa natundu ri jaꞌi Alatala rakenina mpanjili ri jala to nakonona. Pura-pura etu rakawiana ala mompakasadia todea to madota mantarima i Pue.”
18 Nangepe tesa malaeka etu nekutanamo i Zakharia, “Nuapa tandaina mompakatantu etu majadi? Aku natuꞌamo, bo rongoku woꞌu natuꞌamo.”
19 Nesonomo malaeka etu, “Aku eꞌi i Gabriel to nekanggore ri ngayo Alatala! Akumo to nipakauna mompasimbayu kareba belo eꞌi ka komi.
20 Nuapa to niuliku kana majadi ri tempo to nipakatantu Alatala! Tapi sabana daꞌa niparasayamu tesaku, iko mana masowa mojarita. Iko kana mabobo sampe madupa nuapa to nitesaku etu!”
21 Tempo etu tau dea nompopea i Zakharia ri sawalikuna. Naingumo ira sabana nasae gaga iꞌa daꞌa nesuwu nggariara Sapo Mpepue.
22 Tempo iꞌa nesuwu iꞌa mana nasowa nojarita ka ira. Niwiatakana palena notesa ka ira pura-pura sabana iꞌa nabobomo. Nanggita etu ninjani ntaumo naria panggita to nikitana riara Sapo Mpepue etu.
23 Sangga naopupa bagona ri Sapo Mpepue etu, natinggulimo i Zakharia nggari ngata Yerusalem mpaka ri sapona.
24 Daꞌa sakuya kasaena nggari setu natianamo rongona Elisabet, pade limambula kasaena iꞌa netabuni daꞌa nesuwu-suwu nggariara njapona.
25 Nangulimo Elisabet, “Iweꞌimo tanu powia i Pue ri jaꞌiku. Iꞌa nantulungi aku nompakalipo eya nu mataku nggari kagampaku.”
Tesa pesuwu Yesus niuli ka Maria
26 Tempona onombulamo taꞌi Elisabet, Alatala nompakau malaekana i Gabriel malau mpaka ri saongu ngata ri Bagia Galilea to nosanga ka Nazaret.
27 Malaeka etu nipakau mpaka ri jaꞌi sambaꞌa randoo, sangana i Maria. Randoo etu notingea ante sambaꞌa langgai to nosanga ka Yusuf, sambaꞌa muli Magau Daud.
28 Malaeka etu narata ri jaꞌi Maria pade nanguli, “Umba, iko Maria. Ikomo tau to nigane i Pue. Pue nosanggani ante iko.”
29 Natikaja i Maria nangepe tesa malaeka etu, pade nipekutanana riara ntaꞌina, “Nuapa patujuna tesa ewa etu?”
30 Pade nangulimo malaeka etu ka i Maria, “Neꞌe maeka, Maria, sabana iko nikonoa rara nu Alatala.
31 Iko kana matiana pade mangote sambaꞌa ngana langgai pade Iꞌa kana mupoposanga Yesus.
32 Iꞌa kana majadi sambaꞌa tau to nalanga katuwuna pade Iꞌa kana rauli Ana nu Alatala. Pue Alatala kana mompajadi Iꞌa Magau ewa totuꞌana nggaolu Magau Daud.
33 Pade Iꞌa kana moparenta to Yahudi ewa sambaꞌa magau sampe ri kasae-saena. Poparentana etu daꞌa ria kaopu-opuna.”
34 Nangulimo i Maria ka malaeka etu, “Iwenu etu majadi ri koroku? Aku eꞌi danarandoo.”
35 Nesono malaeka etu ka i Maria, “Nosa Nagasa nu Alatala kana marata ri jaꞌimu pade kuasa nu Alatala etu kana maria ri jaꞌimu. Etumo sabana ngana to mesuwu nggari jaꞌimu etu kana rauli Nagasa, Ana nu Alatala.
36 Pade kana mutora Elisabet sampesuwumu etu natianamo, eꞌimo kaonombulana naupa iꞌa etu natuꞌamo pade to niuli ntau iꞌa nagampa.
37 Pura-pura to niuliku ka iko kana majadi sabana pura-pura to nipodota nu Alatala kana majadi. Daꞌa ria anu daꞌa majadi ane Iꞌa madota.”
38 Pade nangulimo i Maria, “Aku eꞌimo batua i Pue. Majadimo ri jaꞌiku ewa nuapa to niulimu etu.” Naopu etu nalaimo malaeka etu nompalasi i Maria.
Maria nalau nanggita Elisabet
39 Naopu etu nalaumo i Maria nasalisa mpaka ri saongu ngata ri buluna ri Bagia Yudea.
40 Narata ri setu iꞌa nalau mpaka ri sapo i Zakharia. Tempona nesua iꞌa nombatabe Elisabet.
41 Iwetu Elisabet nangepe petabe i Maria, nonggayamo ngana riara ntaꞌina. Pade Elisabet nipesua Nosa Nagasa nu Alatala,
42 pade notesa ante suara namangga, “Ikomo to nigane Pue Alatala neliu nggari pura-pura besi ntanina, pade rasi Alatala naria ri jaꞌi anamu.
43 Mpuꞌu-mpuꞌu aku nibila Alatala ante nikarata indo nu Pueku ri jaꞌiku mboto.
44 Iwetu aku nangepe petabemu, nonggayamo ngana riaraku ante kadambana.
45 Iko mpuꞌu-mpuꞌu rawai ka rasi bo belo sabana niparasayamu nuapa to niuli i Pue ka iko, etu kana majadi.”
Dade posukuru Maria
46 Naopu etu nangulimo i Maria,
“Ante raraku mpuꞌu aku mantoiya mompakabete i Pue,
47 pade nadamba mpuꞌu raraku,
sabana Alatala Magau to nompakasalama aku.
48 Iꞌa nantora aku, batuana to napakasi.
Mompamula nggari eo eꞌi pura-pura manusia kana manguli
akumo to niwai Alatala ka rasi.
49 Sabana Alatala to Neliu Nggakuasa nompowia kabaraka ka aku.
Nagasa mpuꞌu sangana.
50 Towe Alatala kana manaꞌu ri jaꞌi ntau to naeka ri jaꞌina
sampe muli nu mulina.
51 Ante palena to nakuasa
Iꞌa nompoposimpotatare tau-tau nasombo
pade nombagado nia pekiri ira.
52 Magau-magau to nalangana nitaꞌurakana ri kaedena,
pade tau-tau to naedena nipakalangana.
53 Tau-tau naoro nipakabosuna sampe nabasa ante mpengaya anu to nabelona.
Pade to nasugi nipopalaina ante pale ntoya.
54 Kita to Israel todeana nitulungina
sabana nitorana pojanjina to niulina ka totuꞌata.
55 Etumo, pojanji mompotowe Abraham ante pura-pura mulina sampe ri kasae-saena.”
56 Naopu etu kira-kira tolumbula kasaena i Maria netoꞌo mpasanggani ante Elisabet, pade naopu etu nanjilimo iꞌa mpaka ri ngatana mboto.
Pesuwu Yohanes Topediu
57 Naratamo ntoana Elisabet moana pade iꞌa nangote sambaꞌa ngana langgai.
58 Tempo roa-roana to nosinggamosu ante iꞌa pade sampesuwu-sampesuwuna nangepe iwenu i Pue naasi matana nanggita Elisabet, nadamba sangganimo ira ante iꞌa.
59 Pade tempo nagana walumbengi umuru nu ngana nggedi etu naratamo ira mombasuna bo mompoposanga ngana etu. Ira nadota mompoposanga iꞌa Zakharia nantuki sanga nu umana.
60 Tapi nanguli indona, “Neꞌe! Iꞌa kana rapoposanga Yohanes.”
61 Nangulimo ira, “Daꞌa ria sampesuwumu nosanga ewa etu!”
62 Jadi nekutanamo ira ka i Zakharia ante nombawiataka pale, “Isema kakono-konona rapoposanga ka ngana eꞌi?”
63 Zakharia nerapi saongu watu rapotulisina pade nitulisina, “Sangana Yohanes.” Nanggita etu natekajamo ira pura-pura.
64 Naopu i Zakharia nantulisi etu kaliu-liu namalamo iꞌa notesa, pade nompamulamo iꞌa mombabila bo mantoiya Alatala.
65 Nanggita etu naeka puramo ira to nosinggamosu ri setu. Pade natolelemo kareba etu ntiku-ntiku ngata ri bagia buluna Yudea etu.
66 Pura-pura tau to nangepe nuapa to najadina etu nompekiri riara ntaꞌi ira, “Majadi nuapa ngana eꞌi banepia?” Niuli ira iwetu sabana nikita ira naria kuasa i Pue ri jaꞌi ngana etu.
Zakharia nompasimbayu kareba nggari jaꞌi Alatala
67 Ri tempo etu i Zakharia, uma nu ngana etu, nipesua Nosa Nagasa nu Alatala sampe iꞌa namala nompasimbayu tesa i Pue ka ira.
68 Niulina,
“Kamaimo kita to Israel mantoiya i Pue, Alatala nto Israel.
Sabana naratamo Iꞌa mantulungi todeana,
pade mombakabasaka kita nggari balita.
69 Iꞌa nombawai ka kita sambaꞌa Magau to Mompakasalama to neliu kakuasana,
etumo Muli Magau Daud, batua nu Alatala.
70 Nggari nabi-nabi to nipelisina nggaolu Iꞌa nojanji
71 mompakasalama kita nggari balita
pade nggari kuasa tau-tau to nanggarau kita.
72 Iꞌa woꞌu nojanji mompotowe totuꞌata nggaolu
pade mompakadupa pojanjina to nabelona ka ira,
73-74 etumo pojanjina to niulina ka totuꞌata Abraham.
Iꞌa nojanji mombakabasaka kita nggari balita
ala kita mamala mepue ri jaꞌina ante daꞌa ria ekata.
75 Nijanjina etu ala kita mamala mepue ri jaꞌina
ante rara to magasa bo manoa tempo kita danatuwu ri dunia.”
76 Pade niuli i Zakharia ka anana, “Iko, anaku, kana rauli nabi nu Alatala to Neliu Nggalanga, sabana iko mokolu ka i Pue ala mompakasadia todea nu Alatala ala ira masadia mantarima i Pue.
77 Iko kana motesa ka ira iwenu ira mamala rapakasalama, etumo silaka-silaka ira mamala raampungi Alatala.
78 Alatala mpuꞌu-mpuꞌu nompotowe kita. Karatana nggari suruga mompakasalama kita etu nasimbayu ewa eo neonga mpadondona.
79 Nasimbayu ewa eo neonga nombawanta karumauna, iwetu woꞌu karatana. Iꞌa marata mompakabelo tau-tau to nasilaka to natuwu nompopea jala nggamate ira. Iꞌa marata mompakasalama kita pade mombanini kita mpaka ri jala kabelona.”
80 Ana i Zakharia etu nantambai eona nantambai kabete korona pade nantambai iꞌa nompotowe Alatala. Sangga nabete nalaumo iꞌa netoꞌo ri karawa baina nantongoraka tempona iꞌa mompamula mompatolele tesa Alatala ka tau-tau to Israel.