Yesus nombawai kuasa ka anaguru-anaguruna
10
Yesus nompokio sampulu rombaꞌa anaguruna mpaka ri jaꞌina pade niwaina ka ira kuasa mompopalai seta-seta bo kuasa mompakabelo mpengele-ngele juꞌa bo kalente nu koro ntau.
2 Iweꞌimo sanga sampulu rombaꞌa anaguru etu: Pamulana i Simon to nidae i Petrus, pade naria woꞌu Andreas tuaꞌi i Petrus, Yakobus ana i Zebedeus bo Yohanes tuaꞌi Yakobus,
3 i Filipus bo i Bartolomeus, i Tomas bo i Matius topomperapi balasitee, Yakobus ana Alfeus, i Tadeus,
4 i Simon to Zelote, pade Yudas Iskariot to mompobalu Yesus ka balina banepia.
Yesus nompatuduki bo nompakau anaguruna manggeni Kareba Belo
5 Ira sampulu rombaꞌa nipakau Yesus ante tewai-tewai iweꞌi: “Neꞌe malau mpaka ri ngata-ngata tau-tau daꞌa to Yahudi bara mpaka ri ngata-ngata nto Samaria.
6 Kalaumo ruru mpaka ri jaꞌi ntau to Yahudi, muli Israel to nasimbayu ewa bimba-bimba to natontona.
7 Kalaumo bo patolele ka ira iweꞌi: ‘Namosumo ntoana Alatala moparenta manusia ri dunia eꞌi ewa magau.’
8 Pakabelo tau-tau to najuꞌa, pakatuwu bali tau-tau to namatena, pakabelo tau-tau to najuꞌa bete, popalai seta-seta to nesua ri jaꞌi ntau. Kuasa etu niwai bayangi ka komi. Jadi wai woꞌu bayangi ka tau ntanina nuapa to niwai ka komi etu.
9 Neꞌe rakeni komi bulawa bara salaka bara doi tambaga riara karepemu.
10 Neꞌe rakeni komi batutu rapomboli baku. Neꞌe rakeni baju rontonga, bara sapatu atau lembau, sabana topokarajaa masipato rapatuwu tau-tau to nitulungina.
11 Ane komi mesua riara kota bara ngata elomo sambaꞌa tau to nabelo rarana mantarima komi rara njapona. Pade petoꞌomo komi ri jaꞌina sampe komi malai mompalasi ngata etu.
12 Tempo komi mesua rara njapo ntau, ulimo ka pue njapo iweꞌi: ‘Perapi Pue mombagane komi.’
13 Ane nabelo rara pue njapo etu pade ira mantarima komi, nuapa to niperapi komi nggari jaꞌi Alatala etu kana maroo ri jaꞌi ira. Tapi ane ira daꞌa madota mantarima komi, asele mpeganemu etu daꞌa mawela ira.
14 Ane maria pue njapo bara pue ngata daꞌa madota mantarima komi atau daꞌa madota mangepe tesa komi, palaimo komi nggari sapo bara ngata ira pade sapunaimo sowu nggari kada komi ewa tandaina ira kana rasuku Alatala banepia.
15 Aku mpuꞌu-mpuꞌu notesa ka komi, ri kaopu nu dunia banepia meliu nggatomo pesuku Alatala ka ira pade pesuku to rapawela ka pue ngata Sodom bo Gomora to najaꞌa mpuꞌu pokainggu ira!”
Kita kana maroo momparasaya tempo rapandasa
16 “Kitamo! Aku nompakau komi malau ri tatongo tau-tau najaꞌa nasimbayu ewa bimba-bimba ri tatongo asulako. Jadi komi kana mataꞌu ewa ule bo monondo ewa tonji banggebodo.
17 Komi kana mainga ri jaꞌi pura-pura tau sabana komi kana rakeni ratangara ri ngayo ntopotangara. Pade komi kana raboba riara sapo-sapo mpodade.
18 Komi kana rakeni ri ngayo ntopoparenta-topoparenta bo magau-magau sabana komi nomparasaya Aku. Etumo loga nabelo ka komi mompakanoto ka ira bo ka tau-tau daꞌa to Yahudi isema Aku.
19 Tempo komi rakeni ri ngayo ira neꞌe maeka mompekiri nuapa ratesa komi ka ira bara iwenu komi mombasono ira. Sabana ri tempo etu woꞌumo kana rawai ka komi tesa-tesa to masipato ratesa komi.
20 Tesa-tesa to rauli komi etu daꞌa tesa nggari pekiri komi mboto, tapi tesa nggari jaꞌi Nosa Nagasa nu Umamu Pue Alatala. Iꞌamo to mokarajaa riara ntaꞌi komi mompakanoto tesa nuapa to masipato ratesa komi.
21 Kana marata tempona tau mombawai sampesuwuna mboto rapatesi pade uma mombawai anana mboto rapatesi. Pade ngana-ngana kana mangewa indo uma ira mboto bo mompatesi ira.
22 Komi kana raporau rara ntau pura-pura sabana komi nomparasaya Aku. Tapi isema-sema maroo momparasaya sampe ri kaopuna kana rapakasalama.
23 Ane komi rapandasa ntau ri saongu ngata palaimo mpaka ri ngata ntanina. Aku mpuꞌu-mpuꞌu notesa ka komi, daꞌapa komi malau mompebutu ngata ri tana Israel Aku, Ana nu Manusia kana marata.
24 Sambaꞌa anaguru daꞌa neliu nggari guruna. Sambaꞌa batua daꞌa neliu nggari madikana.
25 Naganamo ane sambaꞌa anaguru mombarasai ewa to nirasai guruna pade sambaꞌa batua mombarasai ewa to nirasai madikana. Ane Aku niuli ntau Beelzebul, Magau nu Seta, neliu-liupa komi to najadi topantuki Aku. Komi woꞌu kana rauli sinjaꞌi ira.”
Kita kana maeka ri jaꞌi Alatala daꞌa ri jaꞌi manusia
26 “Jadi neꞌe komi maeka ri jaꞌi ntau to mangewa komi. Sabana pura-pura pokainggu ira to nitampunisi kana rabonggaraka. Pura-pura to nitabuniaka natantumo rapakanoto.
27 Pura-pura to nitesaku ka komi tempo nggawengina kana ratesa komi tempo eona, pade nuapa to niposiwawayo ka komi kana raposilelei komi ka todea nggari bunggu nu ata.
28 Neꞌe komi maeka ri jaꞌi ntau to madota mompatesi komi. Daꞌa ria kuasa ira mombasuku komi riara naraka. Tapi komi kana maeka ri jaꞌi Alatala to nakuasa mompatesi komi pade mombasuku komi riara naraka sampe ri kasae-saena.
29 Natantu ninjani komi tonji rone ane nipobalu olina rombaꞌa saongu rupia. Tapi naupa daꞌa nadea olina ka manusia daꞌa ria sambaꞌa tonji rone mamate ane daꞌa rapodota nu Umamu Pue Alatala.
30 Tapi komi neliu nggadeapa olina riara mpanggitana. Nau wulu woꞌo komi mboto naopu puramo nibilana.
31 Jadi neꞌe komi maeka, sabana neliu nggasulipa oli komi pade oli tonji rone nadea.
32 Isema-sema mompangaku Aku ri ngayo manusia, Aku woꞌu mompangaku iꞌa ri ngayo Umaku Pue Alatala ri suruga.
33 Tapi isema-sema mombasapu Aku ri ngayo manusia, Aku woꞌu mombasapu iꞌa ri ngayo Umaku ri suruga.”
Karata Yesus ri dunia nompoposinggarau tau
34 “Neꞌe rapekiri komi karataku eꞌi manggeni posinggabelo ri dunia. Daꞌa nakono! Tapi karataku eꞌi mompoposinggarau tau.
35 Nggari karataku ngana langgai kana mangewa umana mboto, pade ngana besi mangewa indona, pade mania besi mangewa matuꞌana besi.
36 Pade to najadi bali etumo ira saongu njapo mboto.
37 Tau to nompotowe uma bo indona neliupa nggari pompotowena ka Aku daꞌa masipato rauli topantuki Aku. Pade tau to nompotowe anana neliupa nggari pompotowena ka Aku daꞌa woꞌu masipato rauli topantuki Aku.
38 Tau daꞌa nasadia mantuki Aku ante mpuꞌu-mpuꞌu rarana nau sampe mamate rapaku ri kayu parika, iꞌa daꞌa masipato rauli topantuki Aku.
39 Isema-sema daꞌa nasadia mamate sabana nantuki Aku, iꞌa daꞌa mombarata katuwua mabelo sampe ri kasae-saena. Tapi isema-sema nasadia mamate sabana mantuki Aku, iꞌamo to mombarata katuwua mabelo sampe ri kasae-saena.
40 Isema-sema mantarima komi, iꞌa woꞌu mantarima Aku. Pade isema-sema mantarima Aku, iꞌa woꞌu mantarima Pue Alatala to nompakau Aku.
41 Isema-sema mantarima sambaꞌa nabi nu Alatala sabana iꞌa mpuꞌu-mpuꞌu nabi nu Alatala, tau-tau etu kana mombarata tambo nasimbayu ewa to rawai ka nabi nu Alatala etu. Pade isema-sema mantarima sambaꞌa tau nanoa rarana sabana iꞌa mpuꞌu-mpuꞌu tau nanoa, tau-tau etu kana mombarata tambo nasimbayu ewa to rawai ka tau nanoa rarana etu.
42 Pade isema-sema mantulungi topantuki Aku, nau aga mombawai saongu sanggiri ue rainu sabana iꞌa mpuꞌu-mpuꞌu topantuki Aku, natantumo tau-tau etu kana mombarata tambona banepia!”