Yesus nipakareme Alatala ri bunggu nu bulu
17
Onombengi kaliuna Yesus nanggeni i Petrus, Yakobus ante sampesuwuna Yohanes nalau nantende mpaka ri saongu bulu to nalangana. Aga Yesus ante ira tolumbaꞌa to naria ri setu.
2 Tempo ira ri setu sampegoli nabalimo lenje Yesus ri ngayo ira. Lenjena nareme mpuꞌu ewa kareme nu mata eo, pade pakeana nabula damo nenggila.
3 Sampegoli anaguru Yesus nanggita rombaꞌa nabi nggaolu nenggore ri setu notesa-tesa ante Yesus. Ira etumo nabi i Musa bo nabi Elia.
4 Sangga nanggitapa etu nangulimo i Petrus ka Yesus, “Pue, nasana mpuꞌu kami ri seꞌi. Ane Pue madota aku mowia toluongu pakumpa ri seꞌi, saongu ka Komi, saongu ka i Musa pade saongu ka Elia.”
5 Tempo Petrus danotesa ante Yesus, naratamo kulimu to nareme nombabungu ira, pade nggariara kulimu etu naria suara nanguli, “Eꞌimo Anaku to nipotoweku. Iꞌamo to nikonoa raraku. Epe komimo tesana!”
6 Tempo anaguru Yesus nangepe suara etu naeka mpuꞌumo rara ira sampe notatungga ira narapa ri tana.
7 Tapi Yesus nompakamosu ira pade nanggabe ira ante nanguli, “Pembangumo. Neꞌe mana maeka!”
8 Tempo ira nantingara to nikita ira aga Yesus njambaꞌana. Daꞌa mana naria tau ntanina nikita ira.
9 Tempo ira notua nggari buluna etu Yesus nombatagi ira, “Neꞌe ratesa ka isema-sema nuapa to nikita komi paneꞌa ane Aku, Ana nu Manusia daꞌapa rapakatuwu bali nggari kamateku.”
10 Pade nekutanamo anaguruna ka Iꞌa, “Nuapa sabana guru-guru agama nanguli nabi Elia kana mokolu marata pade Magau to Mompakasalama?”
11 Nesonomo Yesus, “Nakonomo tesa etu. Nabi Elia kana mokolu marata sabana iꞌamo to mompakasiayu mpengele-ngele.
12 Tapi kuuli ka komi, kakonona naratamo nabi Elia, aga iꞌa daꞌa ninjani ntau. Tau-tau etu aga nompowia ri jaꞌina dota ira to najaꞌa. Pade iwetu woꞌu Aku, Ana nu Manusia kana rapandasa ira.”
13 Nangepe tesa etu nanotomo ka anaguruna Yohanes Topediu to nipatuju Yesus ante tesana to nantesa nabi Elia.
Yesus nompakabelo sambaꞌa kabilasa to nipesua seta
14 Tempo Yesus ante tolumbaꞌa anaguruna nosirata ka tau dea naratamo sambaꞌa tau nekadede ri ngayo Yesus ante nanguli,
15 “Pue, potowemo anaku! Iꞌa najuꞌa nadola, nandasa mpuꞌu iꞌa. Iꞌa naoso nadungga ri apu pade naoso woꞌu nadungga ri ue.
16 Iꞌa nikeniku ri jaꞌi anaguru Komi tapi ira daꞌa namala mompakabelo juꞌana etu.”
17 Pade nesonomo Yesus, “Iwenu tanu komi? Komimo tanu tau mpuꞌu-mpuꞌu daꞌa nomparasaya pade topesapuaka! Sakuyapa kasaena Aku kana mosanggani ante komi! Sakuyapa kasaena Aku kana mosabara ri jaꞌi komi! Kenimo wemaimo ngana etu!”
18 Sangga naratapa ngana etu ri ngayona Yesus nompopalai seta to nompakajuꞌa iꞌa. Pade nalai mpuꞌumo seta etu nggari jaꞌina. Pade tempo etu woꞌu nabelomo juꞌa ngana etu.
19 Naliu etu naratamo anaguru-anaguru Yesus ri jaꞌina tempo ira mana ri tatongo ntau dea, pade nipekutana ira ka Iꞌa, “Iwenu sampe kami daꞌa namala nompopalai seta etu paneꞌa?”
20 Nesonomo Yesus, “Sabana nakura pomparasaya komi. Aku mpuꞌu-mpuꞌu notesa ka komi, ane pomparasaya komi aga sakedi lau ewa wua kayu to neliu nggakedi, daꞌa ria to daꞌa mamala rapowia komi. Komi mamala manguli ka bulu etu, ‘Polinja gu saꞌamo,’ pade bulu etu kana molinja gu saꞌa. [
21 Tapi seta ewa etu paneꞌa aga namala rapopalai ante mosambaya bo mapuasa.”]
BAGO YESUS KAOPUNA RI BAGIA GALILEA (17:22-18:35)
Yesus nombaboto karongganina ewa kamatena banepia
Mrk. 9:30-32; Luk. 9:43b-45
22 Tempo Yesus ante anaguruna nasiromu mpasanggani-nggani ri Bagia Galilea, nangulimo Iꞌa ka ira, “Aku, Ana nu Manusia daꞌa mana masaeka kana rawai ka baliku,
23 pade Aku kana rapatesi ira. Tapi ri eo katolueona Aku kana rapakatuwu bali.” Sangga nangepe tesa etu nasusa mpuꞌumo rara anaguruna pura-pura.
Yesus nombabayari balasitee Sapo Mpepue
24 Sangga naratapa Yesus bo anaguruna ri ngata Kapernaum naratamo sambaꞌa topomperapi balasitee Sapo Mpepue nompekutana i Petrus, “Gurumu nabiasa nombabayari balasitee Sapo Mpepue atau daꞌa?”
25 Nesonomo i Petrus, “Iyo, nibayarina.”
Naopu etu nanjilimo i Petrus mpaka ri sapo to nipetoꞌo ira. Narata ri setu daꞌapa iꞌa notesa nuapa-nuapa nekutanamo Yesus ka iꞌa, “Simon, iwenu pombaratamu? Isema kakonona masipato mombabayari balasitee bara kasowia ka magau-magau ri dunia eꞌi? Todeana mboto atau pue ngata to nikuasaina etu?”
26 Nesonomo i Petrus, “Natantu pue ngata to nikuasaina to masipato mombabayari.”
Nangulimo Yesus, “Ane iwetu, todeana mboto daꞌa masipato mombabayari balasitee etu.
27 Tapi naupa iwetu, neꞌe kita mompakakedi rara ntau etu. Agina komi malau momeꞌi ri rano. Alamo bau pamulana to murata. Riara ngangana kana murata saongu doi to nagana mombabayari balasitee kita rombaꞌa. Kenimo doi etu pade bayarimo balasiteeta ka tau topomperapi balasitee etu.”