Yesus nompakabelo tau najuꞌa ri kola Betesda
5
Naopu etu nanjili balimo Yesus mpaka ri ngata Yerusalem ala mantuki eo bete nto Yahudi ri setu.
2 Ri ngata Yerusalem namosu bobaa ngata to nosanga ka Bobaa Bimba naria saongu kola to niuli riara Basa Ibrani Kola Betesda. Nantalili kola etu naria limaongu tambale.
3 Ri tambale etu nadea mpuꞌu tau najuꞌa naturu. Naria tau naburo, naria tau nakejo, naria tau napunggu. [Ira pura-pura nompopea ue mojajompe.
4 Apa sanggani-sanggani malaeka i Pue nanaꞌu riara ue kola etu nombajajompe ue. Pade isema-sema mokolu nesua riara ue tempona ue etu nojajompe, iꞌa kaliu-liu nabelo nggari juꞌana.]
5 Ri setu naria sambaꞌa langgai to najuꞌa tolumpulu bo walumpaemo kasaena.
6 Tempo Yesus nanggita tau etu naturu ri setu pade ninjanina sakuya kasaena juꞌana etu, nekutanamo Iꞌa ka tau etu, “Madota iko mabelo?”
7 Nesonomo tau najuꞌa etu, “Uma, daꞌa ria tau manggeni aku mpaka riara kola tempo ue kola etu nojajompe. Bate-batena tempo aku dalaku mompasimbuku malau mesua nariamo tau ntanina nokolu nesua riara ue etu.”
8 Pade nangulimo Yesus ka iꞌa, “Pembangumo! Lulumo ompa paturumu pade polumakomo!”
9 Kaliu-liu nabelomo juꞌa ntau etu. Nilulunamo ompana pade nolumakomo iꞌa.
Tempo kajadia etu nawela Eo Mpenonto.
10 Sabana etu nangulimo topanggeniaka-topanggeniaka nto Yahudi ka tau lako nabelo nggari juꞌana etu, “Eo eꞌi Eo Mpenonto. Daꞌa mamala iko mompasinaka ompamu iwetu!”
11 Tapi nangulimo tau etu, “Tau to nompakabelo juꞌaku paniꞌa nanguli ka aku, ‘Lulumo ompamu bo polumakomo!’”
12 Nekutanamo tau-tau to Yahudi etu, “Isema tanu nompakau iko mombalulu ompamu pade molumako?”
13 Tapi daꞌa ninjani ntau lako nabelo nggari juꞌana etu bara isema to nompakabelo juꞌana, sabana Yesus notinggalipo nggari tatongo ntau dea etu.
14 Naopu etu Yesus nomposintomu tau etu riara Sapo Mpepue, pade niulina ka iꞌa, “Kitamo! Nabelomo juꞌamu. Jadi neꞌe mana iko mompowia silaka ala neꞌe iko mawela to neliu nggajaꞌa nggari juꞌamu etu.”
15 Naopu etu nalaumo tau etu mpaka ri jaꞌi topanggeniaka nto Yahudi pade niulina ka ira Yesusmo to nompakabelo juꞌana.
16 Jadi nompamulamo ira mangelo jala mompandasa Yesus, sabana Iꞌa nompakabelo tau najuꞌa etu ri Eo Mpenonto.
17 Tapi nangulimo Yesus ka ira, “Umaku bate-batena nokarajaa sampe ri eo eꞌi, pade Aku woꞌu kana mokarajaa.”
18 Nangepe tesa Yesus etu topanggeniaka-topanggeniaka nto Yahudi nantambai nangelo jala mompatesi Iꞌa. Sabana Iꞌa daꞌa aga nombaliunaka ada-ada Eo Mpenonto tapi Iꞌa woꞌu nanguli Alatala Umana mboto. Ante nanguli iwetu Iꞌa nompakasimbayu korona ante Alatala.
Tesa Yesus ewa kuasana
19 Pade nesonomo Yesus ka topanggeniaka-topanggeniaka nto Yahudi etu, “Aku mpuꞌu-mpuꞌu notesa ka komi, Aku daꞌa mamala mompowia nuapa-nuapa nantuki dotaku mboto, tapi nuapa to nikitaku nggari jaꞌi Umaku etumo to nipowiaku. Nuapa-nuapa to nipowia Umaku, etu woꞌu to kupowia.
20 Sabana Umaku nompotowe Aku Anana pade nipopokitana ka Aku pura-pura nuapa to nipowiana. Pade daꞌa aga etu, Iꞌa kana mompopokita tandai-tandai to meliu nggabete nggari powia-powia etu paniꞌa ala rapogumaa komi.
21 Nasimbayu ewa Umaku nompakatuwu bali tau namate pade nombawai ka ira katuwua nabou, iwetu woꞌu Aku Anana nombawai katuwua nabou ka isema-sema to nipodotaku.
22 Umaku mboto daꞌa mombatangara isema-sema sabana kuasa mombatangara manusia niwainamo ka Aku Anana
23 ala pura-pura tau mombabila Anana nasimbayu ewa ira nombabila Iꞌa. Isema-sema daꞌa nombabila Aku eꞌi batuana ira daꞌa woꞌu nombabila Umaku to nompakau Aku.
24 Aku mpuꞌu-mpuꞌu notesa ka komi, isema-sema mangepe pantesaku pade momparasaya Pue Alatala to nompakau Aku, ira kana mombarata katuwua mabelo sampe ri kasae-saena. Ira daꞌa mawela pesuku, tapi ira nikabasakamo nggari kamatea pade nombarata katuwua nabou.
25 Aku mpuꞌu-mpuꞌu notesa ka komi, kana marata tempona banepia, pade kakonona naratamo tempona etu, tau-tau namate kana mangepe suara Ana nu Alatala, pade ira to mangepe suara etu kana matuwu bali.
26 Sabana nasimbayu ewa Umaku Alatala nakuasa mombawai katuwua ka manusia, iwetu woꞌu Aku Anana niwaina ka kuasa mombawai katuwua ka manusia.
27 Pade niwaina woꞌu ka Aku kuasa mombatangara manusia sabana Akumo to niuli Ana nu Manusia.
28 Neꞌe komi mogumaa mangepe tesaku etu, sabana kana marata tempona pura-pura tau namate riara dayo kana mangepe suaraku.
29 Pade ira kana membangu nggariara dayo. Ira to nabelo pokaingguna kana membangu mombarata katuwua mabelo. Pade ira to najaꞌa pokaingguna kana membangu ala rasuku.”
Patangele to nompakanoto isema Yesus
30 “Aku daꞌa mamala mompowia nuapa-nuapa nantuki dotaku mboto. Aku nombatangara nantuki nuapa to niepeku nggari jaꞌi Umaku, pade potangaraku nanoa sabana Aku daꞌa nantuki dotaku mboto tapi aga dota nu Umaku to nompakau Aku.
31 Ane aga Aku njambaꞌaku motesa mompakanoto isema Aku eꞌi natantu daꞌa masipato raparasaya pantesaku etu.
32 Tapi naria sambaꞌa tau ntanina to nompakanoto isema Aku, pade ninjaniku tesana etu nakono.
33 Komi nombasuro tau nalau mpaka ri jaꞌi Yohanes Topediu pade iꞌa nompakanoto isema Aku eꞌi.
34 Kakonona daꞌa paraluu manusia mompakanoto isema Aku. Tapi niuliku iwetu ala komi mamala rapakasalama.
35 Yohanes Topediu etu nasimbayu ewa saongu poindo najela to newanta, pade komi nadamba-damba nantarima remena etu. Tapi kadamba nu rara komi etu aga sampalai.
36 Tapi naria sangelepa to neliu nggabete nggari tesa Yohanes Topediu to nompakanoto isema Aku. Etumo panggawiaku to niparasaya Umaku ka Aku ala kupakaopu. Pade panggawia etumo nompakanoto Aku eꞌi nipakau Umaku.
37 Pade Umaku to nompakau Aku woꞌu nompakanoto isema Aku. Daꞌapa sanggani komi nangepe suarana pade daꞌapa woꞌu sanggani komi nanggita lenjena.
38 Pade tesa-tesana daꞌa niboli komi riara ntaꞌi. Nanotomo etu sabana Aku to nipakauna daꞌa niparasaya komi.
39 Komi naraji neguru isi Buku Nagasa sabana niuli komi nggariara buku etu komi mombarata katuwua mabelo sampe ri kasae-saena. Tapi isi Buku Nagasa etumo to nompakanoto isema Aku.
40 Tapi naupa iwetu komi daꞌa madota marata ri jaꞌiku ala mombarata katuwua mabelo sampe ri kasae-saena.
41 Aku eꞌi daꞌa miki rabila manusia.
42 Tapi ninjaniku daꞌa ntoto naria towe ri jaꞌi Alatala riara ntaꞌi komi.
43 Aku eꞌi narata ri jaꞌi komi niposumba Umaku, tapi komi daꞌa madota mantarima Aku. Tapi ane tau ntanina marata ri jaꞌi komi nantuki dotana mboto, tau etumo to ratarima komi.
44 Natantumo daꞌa mamala komi momparasaya Aku sabana komi damadota ratoiya ntau. Komi daꞌa ntoto nompasimbuku ala ratoiya Alatala to sambaꞌa lau!
45 Tapi naupa iwetu neꞌe rapekiri komi bara Aku to mompangadu komi ri ngayo Umaku banepia. Naria to mompangadu komi, etumo nabi i Musa mboto to nisarumaka komi.
46 Sabana ane komi mpuꞌu-mpuꞌu nomparasaya tesa nabi i Musa, natantumo komi woꞌu kana momparasaya Aku, sabana koroku eꞌimo to nitesa nabi i Musa riara buku-bukuna.
47 Tapi ane daꞌa niparasaya komi nuapa to nitulisi nabi i Musa iwenumo komi mamala momparasaya pantesaku?”