Yesus ante sambaꞌa besi to Samaria
4
Tau-tau to Parisi nangepe lele to nanguli nadeamo tau to nalau ri jaꞌi Yesus ala radiu majadi topantuki Iꞌa sampe topantuki Yesus neliu nggadea nggari topantuki Yohanes Topediu.
2 Kakonona daꞌa Yesus mboto to nombadiu tau aga anaguru-anaguruna.
3 Jadi tempo Yesus nangginjani tau-tau to Parisi nangepe lele etu nalaumo Iꞌa nompalasi Bagia Yudea nanjili bali mpaka ri Bagia Galilea.
4 Riara mpolumakona etu Yesus kana moliu ri Bagia Samaria.
5 Jadi naratamo Yesus ri saongu ngata ri Bagia Samaria nosanga ka ngata Sikhar. Ngata etu namosu tana to niwai Yakub ka anana Yusuf nggaolu.
6 Ri setu naria saongu buwu to niuli Buwu Yakub. Jadi nenontomo Yesus pade nekatoko ri sinjori buwu etu, sabana nalengemo Iꞌa nolumako. Tempo etu natongomo eo.
7-8 Anaguru-anaguru Yesus napola mpaka riara ngata etu mangoli panggoni.
Tempo Yesus nekatoko ri buwu etu naratamo sambaꞌa besi to Samaria nantombu ue. Nangulimo Yesus ka iꞌa, “Indo, wai ka Aku sanu ue komi kuinu.”
9 Nangulimo besi to Samaria etu ka Iꞌa, “Komi etu tau to Yahudi, aku eꞌi tau to Samaria. Iwenu sampe Komi merapi ue inu nggari jaꞌiku?” Niulina iwetu sabana nabiasa tau-tau to Yahudi daꞌa madota mosanggani-nggani ante tau-tau to Samaria.
10 Nesonomo Yesus, “Ane munjani pewai bayangi nu Alatala pade isema Aku to nomperapi ue inu nggari jaꞌimu, natantumo komi mboto kana momperapi ue inu nggari jaꞌiku. Pade Aku kana mombawai ka komi ue to mombawai katuwua mabelo.”
11 Naopu etu nanguli woꞌumo besi etu, “Uma, daꞌa ria posanggu Komi rapombasanggu ue eꞌi, pade buwu eꞌi nandala mpuꞌu. Nggari umba rapangala Komi ue to mombawai katuwua mabelo to nitesa Komi etu?
12 Iwenumo? Komi neliu nggakuasa nggari totuꞌa kami nggaolu Yakub to nombawai buwu eꞌi ka kami majadi sosora? Iꞌa mboto nanginu ue nggari buwu eꞌi pade waꞌa woꞌu ana-anana bo pompatuwuna.”
13 Nanguli woꞌumo Yesus ka besi etu, “Isema-sema manginu ue nggari buwu eꞌi kana mabaipa tambolona.
14 Tapi isema-sema manginu ue to kuwai ka iꞌa, mana mabai tambolona sampe ri kasae-saena. Sabana ue to kuwai ka iꞌa etu majadi ewa ue mpemata moili nggariara nggatuwuna sampe iꞌa mombarata katuwua mabelo sampe ri kasae-saena.”
15 Nangepe etu nanguli woꞌumo besi etu, “Ane iwetu, Uma, wai ka akumo ue etu ala mana mabai tamboloku pade neꞌe mana aku malenge momai mantombu ue eꞌi.”
16 Nangulimo Yesus ka iꞌa, “Kalau pokiomo ruru rongomu pade panjili bali ri seꞌi ante iꞌa.”
17 Nesonomo besi etu, “Aku daꞌa norongo.”
Nanguli Yesus ka iꞌa, “Nakono mpuꞌu tesamu to nanguli komi daꞌa norongo.
18 Sabana naria limambaꞌa langgai to nomporongo komi pade langgai to naria ri jaꞌimu weꞌi-weꞌi daꞌa rongomu. Nakonomo tesa to niulimu paniꞌa.”
19 Pade nangulimo besi etu, “Uma, nanotomo ka aku Komi etu sambaꞌa nabi.
20 Totuꞌa kami nggaolu nombasomba Alatala ri bunggu bulu eꞌi, tapi komi tau to Yahudi nanguli aga ri ngata Yerusalem masipato tau mombasomba Alatala.”
21 Nesonomo Yesus ka iꞌa, “Indo, parasayamo tesaku eꞌi. Kana marata tempona tau daꞌa mana mombasomba Umata Alatala ri bulu eꞌi pade daꞌa woꞌu ri ngata Yerusalem.
22 Komi to Samaria nombasomba anu daꞌa ninjani komi. Tapi kami tau to Yahudi nombasomba to ninjani kami mamimo, sabana Magau to Mompakasalama meumba nggari tatongo ntau to Yahudi.
23 Tapi kana marata tempona banepia, pade kakonona naratamo tempona etu, tau-tau to mpuꞌu-mpuꞌu mombasomba Umata Alatala kana mombasomba Iꞌa ante kuasa nggari jaꞌi Nosa Nagasa nu Alatala a nantuki pepatuduki to nakonona. Sabana topesomba-topesomba iwetumo to nielo Umata Alatala.
24 Alatala ewa nosa to daꞌa namala nikita. Jadi tau-tau to madota mombasomba Iꞌa kana mombasomba Iꞌa ante kuasa nggari jaꞌi Nosa Nagasa nu Alatala nantuki pepatuduki to nakonona.”
25 Nesono woꞌumo besi etu, “To ninjaniku kana marata sambaꞌa Magau to Mompakasalama to niuli Kristus. Ane Iꞌa etu marata Iꞌa kana motarangga mpakanoto mpengele-ngele ka kita.”
26 Nangulimo Yesus ka besi etu, “Aku to notesa ka komi weꞌi-weꞌi, Akumo tau to niulimu etu.”
27 Tempo ira danotesa-tesa naratamo anaguru-anaguru Yesus nggariara ngata. Natekaja ira nanggita Yesus notesa-tesa ante sambaꞌa besi. Tapi daꞌa ria kamba sambaꞌa nabia nompekutana besi etu, “Nuapa paraluumu?” Ira daꞌa woꞌu nabia nompekutana Yesus, “Nuapa sabana Guru notesa-tesa ante besi etu?”
28 Naopu etu besi etu nombaboli gumbana ri setu pade nanjilimo iꞌa mpaka riara ngata. Narata ri setu niulina ka tau-tau riara ngata etu,
29 “Kamaimo kita lau manggita sambaꞌa tau guria to nombatesa ka aku pura-pura nuapa to nipowiaku. Bara suka Iꞌamo Magau to Mompakasalama to nijanji Alatala?”
30 Nangepe tesa besi etu nalaumo ira nggariara ngata etu mpaka ri jaꞌi Yesus.
31 Tempo besi etu nalau mpaka riara ngata nangulimo anaguru-anaguru Yesus ka Iꞌa, “Maimo Guru, manggonimo kita.”
32 Tapi nesonomo Yesus, “Nariamo panggoniku anu daꞌa ninjani komi.”
33 Nangepe etu nosipekutanamo ira sambaꞌa bo sambaꞌa, “Naria tau nanggeni panggoni ka Iꞌa?”
34 Jadi nangulimo Yesus ka ira, “Panggoniku etumo mantuki dota Alatala to nompakau Aku pade mompakaopu bago to niparasayana ka Aku.
35 Naria pantesa komi iweꞌi: ‘Patambulapa pade marata tempo mokato.’ Tapi kuuli ka komi, ‘Antoakamo ante mata komi mboto, pae-pae ri tinalu etu nakunimo, namalamo rakato.
36 Tau-tau topokato nantarima tambona. Nompamulamo ira nompasiromu asele mpobago ira, etumo manusia to matuwu sampe ri kasae-saena. Pade topotuja bo topokato mamala madamba-damba mpasanggani-nggani.’
37 Nakono mpuꞌu tesa to nanguli, ‘To sambaꞌana notuja to santanina nokato.’
38 Aku nompakau komi malau mombakato anu daꞌa nituja komi. Tau ntanina notuja pade komimo to nantarima asele mpanggawia ira.”
39 Riara ngata to Samaria etu nadeamo tau to nomparasaya Yesus sabana niepe iramo tesa besi etu to nanguli, “Iꞌa nantesa ka aku pura-pura nuapa to nipowiaku.”
40 Jadi nalaumo ira mpaka ri jaꞌi Yesus. Narata ri setu nerapimo ira ante mpuꞌu-mpuꞌu ala Yesus mesai ri ngata ira bara sakuya kasaena. Jadi nesai mpuꞌumo Yesus ri setu rombengi kasaena.
41 Pade nantambaimo kadea ntau to nomparasaya Yesus sabana niepe ira mbotomo tesana.
42 Naopu etu nangulimo ira ka besi etu, “Weꞌi-weꞌi niparasaya kami mpuꞌumo, daꞌa aga nggari tesamu tapi niepe kami mbotomo tesana. Pade ninjani kamimo Iꞌa mpuꞌu-mpuꞌu Magau to Mompakasalama manusia ri dunia.”
Yesus nompakabelo sambaꞌa ana madika to najuꞌa
43 Naopu netoꞌo ri setu rombengi kasaena nanggaliwomo Yesus napola mpaka ri Bagia Galilea.
44 Nariamo sanggani bopia Yesus mboto nanguli, “Sambaꞌa nabi daꞌa nibila ntau ane riara ngatana mboto.”
45 Jadi tempo Iꞌa narata ri Bagia Galilea Iꞌa nitarima tau-tau to Galilea ante nadamba rara. Sabana ira woꞌu nantuki Posusa Eo Bete Paska ri ngata Yerusalem bopia pade nikita ira mbotomo pura-pura nuapa to nipowia Yesus ri setu.
46 Pade nalau woꞌumo Iꞌa mpaka ri ngata Kana ri Bagia Galilea, ngata nipompajadina ue newali anggur bopia. Ri ngata Kapernaum naria sambaꞌa madika to nokarajaa riara sapo magau, anana najuꞌa ntomo.
47 Sangga nangepe lele to nanguli naratamo Yesus ri Bagia Galilea nggari Bagia Yudea, nalaumo madika etu mpaka ri jaꞌina pade nerapi ante mpuꞌu-mpuꞌu, “Tulungi malau mpaka ri ngata Kapernaum mompakabelo anaku, sabana ntora namatemo iꞌa!”
48 Nangepe etu nangulimo Yesus ka iꞌa, “Ane komi pura-pura daꞌa nanggita tandai-tandai to nipogumaa bo kabaraka-kabaraka komi daꞌa ntoto nomparasaya.”
49 Nangulimo madika etu ka Yesus, “Pue, kuperapi ka Komi masalisa kita malau sampe anaku danaria nosana.”
50 Nanguli Yesus ka iꞌa, “Panjilimo komi! Nabelomo anamu!” Nangepe etu niparasaya madikamo tesa to niuli Yesus ka iꞌa etu. Jadi nanjilimo iꞌa.
51 Tempo iꞌa da ri tatongo jala iꞌa nitomunaka bara sakuya mbaꞌa batuana nggari Kapernaum. Ira nanguli ka iꞌa, “Nabelomo ana komi!”
52 Pade iꞌa nompekutana ira, “Ipiamo anaku nompamula nabelo juꞌana?”
Nesonomo ira, “Yowi ntongo eo kira-kira tinti saongu nanaꞌumo panena.”
53 Pade natitoramo madika tinti saongu yowi Yesus nanguli ka iꞌa, “Nabelomo anamu!” Pade madika saongu njapo nomparasaya Yesus.
54 Etumo tandai to nipogumaa karongganina to nipowia Yesus tempo Iꞌa narata bali nggari Bagia Yudea mpaka ri Bagia Galilea.