Yesus ante Nikodemus
3
Naria sambaꞌa to Parisi nosanga ka i Nikodemus. Iꞌa sambaꞌa topanggeniaka agama nto Yahudi.
2 Iꞌa narata ri jaꞌi Yesus tempo nggawengi pade nanguli ka Iꞌa, “Guru, nanotomo ka kami Komi sambaꞌa guru to nisuro Alatala, sabana daꞌa ria sambaꞌa tau mamala manggawia kabaraka ewa to nikawia Komi ane Alatala daꞌa nosanggani-nggani ante iꞌa.”
3 Nesonomo Yesus, “Aku mpuꞌu-mpuꞌu notesa ka komi, daꞌa ria sambaꞌa tau mamala majadi todea riara Poparenta nu Alatala ane iꞌa daꞌa raote mpanjili.”
4 Nekutanamo i Nikodemus ka Iꞌa, “Iwenu sampe tau to natuꞌamo raote mpanjili? Natantumo iꞌa daꞌa mamala mesua bali riara ntaꞌi indona pade raote mpanjili!”
5 Nesonomo Yesus, “Aku mpuꞌu-mpuꞌu notesa ka komi, ane tau daꞌa raote ante ue pade ante kuasa Nosa Nagasa nu Alatala tau etu daꞌa mamala majadi todea riara Poparenta nu Alatala.
6 Koro batata eꞌi najadi nggari manusia, tapi to najadi nggari kuasa Nosa Nagasa nu Alatala etumo katuwua nabou.
7 Jadi neꞌe komi matekaja mangepe tesaku etu to nanguli komi kana raote mpanjili.
8 Poiri nakantawui mpaka ri umba nipodotana. Kita nangepe serena tapi daꞌa ninjanita nggari umba karatana pade mpaka ri umba rakalauna. Iwetu woꞌu ante tau to niote mpanjili ante kuasa Nosa Nagasa nu Alatala.”
9 Pade nekutana woꞌumo i Nikodemus ka Yesus, “Iwenu sampe etu mamala majadi?”
10 Nesonomo Yesus, “Komi eꞌi Guru nto Israel to nibila. Iwenu sampe daꞌa ninjanimu batua nu tesaku eꞌi?
11 Aku mpuꞌu-mpuꞌu notesa ka komi, Kami eꞌi notesa ka komi nuapa to ninjani Kami, pade Kami nanguli ka komi nuapa to nikita Kami mboto, tapi komi daꞌa madota mantarima tesa Kami etu.
12 Komi daꞌa nomparasaya ane Aku notesa ka komi ewa nuapa to najadi ri dunia eꞌi. Iwenu komi mamala momparasaya ane Aku mombatesa ka komi nuapa to najadi riara suruga?
13 Daꞌapa ria sambaꞌa tau neore mpaka ri suruga nanggita to najadi ri setu. Aga Aku, Ana nu Manusia to nanaꞌu nggari suruga mpaka riara dunia to nanggita etu.
14 Nabi i Musa nggaolu nompowia sanggayu ule nggari tambaga ri karawa baina pade nionggotakana mpakalanga-langa ala isema-sema mantingoa ule etu kana matuwu. Nasimbayu ewa ule etu nionggotaka mpakalanga-langa, iwetu woꞌu Aku, Ana nu Manusia kana raonggotaka mpakalanga-langa, a
15 ala isema-sema momparasaya Aku mombarata katuwua mabelo sampe ri kasae-saena.
16 Sabana nabete mpuꞌumo towe nu Alatala ka manusia ri dunia sampe niwaina Anana to sambaꞌa lau, ala isema-sema momparasaya Iꞌa daꞌa maropu tapi mombarata katuwua mabelo sampe ri kasae-saena.
17 Sabana patuju Alatala nompakau Anana mboto marata ri dunia eꞌi daꞌa ala mompakasala manusia tapi ala ira mamala rapakasalamana.
18 Tau to nomparasaya Ana nu Alatala etu daꞌa rapakasala. Tapi tau to daꞌa nomparasaya Iꞌa nipakatantumo salana sabana ira daꞌa nomparasaya Ana nu Alatala to sambaꞌa lau etu.
19 Nipakatantumo sala manusia sabana Ana nu Alatala narata ri dunia ewa reme nombawanta karumauna, tapi manusia aga nompokono karumauna sabana pokainggu ira najaꞌa.
20 Isema-sema nanggawia kajaꞌana daꞌa ntoto nompokono reme. Pade ira daꞌa ntoto madota mompakamosu reme etu ala pura-pura pokainggu ira to najaꞌa etu neꞌe matikita.
21 Tapi isema-sema to nanoa pokaingguna madota mompakamosu reme etu ala manoto rakita pokainggu ira nantuki dota Alatala.”
Tesa Yohanes Topediu ewa Yesus
22 Naopu etu nalaimo Yesus ante anaguruna mpaka ri Bagia Yudea. Ri setu Iꞌa netoꞌo bara sakuya kasaena ante ira pade nombadiu tau ewa tandaina ira najadi topomparasaya Iꞌa.
23-24 Tempo etu Yohanes Topediu daꞌapa nisuaraka riara tarunggu. Iꞌa nombadiu tau ri ngata Ainon nosinggamosu ante ngata Salim, sabana ri setu nadea ue. Tau-tau bate-batena narata ri jaꞌina pade nidiuna.
25 Ri setu anaguru-anaguru Yohanes nosinggarau ante sambaꞌa tau to Yahudi ewa ada-ada mompegasa koro.
26 Jadi nalaumo anaguruna ri jaꞌi Yohanes ante nanguli, “Guru, danitora komi tau to nosanggani ante komi ri sambote Binangga Yordan to nipopokita komi ka kami bopia? Iꞌa woꞌu nombadiu tau, pade pura-pura tau nalau mpaka ri jaꞌina.”
27 Nesonomo Yohanes, “Daꞌa ria sambaꞌa mamala mombarata nuapa-nuapa ane daꞌa rawai Alatala ka iꞌa.
28 Niepe komi mbotomo tesaku bopia nanguli, ‘Aku eꞌi daꞌa Magau to Mompakasalama to nijanji Alatala. Aku eꞌi aga tau to nisuro mokolu ka Iꞌa.’
29 Ane ri posusa mponika boti langgaimo to mosanggani ka boti besi. Tapi wega nu boti langgai aga nekanggore namosu ante iꞌa, pade nadamba mpuꞌumo rarana mangepe suara boti langgai etu. Iwetu woꞌu ante aku. Weꞌi-weꞌi aku nadamba mpuꞌumo raraku.
30 Iꞌa kana mantambai rabila tapi aku eꞌi kana mantambai rapakakedi.”
Yesus nopuꞌu nggari suruga tapi Yohanes Topediu nopuꞌu nggari dunia
31 “To nanaꞌu nggari suruga etu neliu nggalanga nggari pura-pura manusia. Tapi to nopuꞌu nggari dunia eꞌi bate-batena manusia biasa, iꞌa aga nombatesa nuapa-nuapa to najadi ri dunia eꞌi. Tapi to nanaꞌu nggari suruga etu neliu nggalanga nggari pura-pura manusia.
32 Iꞌa nombatesa nuapa to nikitana pade to niepena, tapi daꞌa ria sambaꞌa tau to nantarima pantesana etu.
33 Tapi tau-tau to nantarima tesana etu nompakanoto ante powia ira etu ira mpuꞌu-mpuꞌu nompangaku Alatala nakono.
34 Tau to nisuro Alatala etu Iꞌamo to niposumba Alatala, sabana Iꞌa mpuꞌu-mpuꞌu nipakakuasa Nosa Nagasa nu Alatala.
35 Umana Alatala nompotowe Iꞌa, pade niwaina ka Iꞌa mpengele-ngele kuasa.
36 Isema-sema to nomparasaya Anana etu, kana mombarata katuwua mabelo sampe ri kasae-saena. Tapi isema-sema to daꞌa natundu ri jaꞌi Anana daꞌa mombarata katuwua mabelo etu. Ira aga rapawela ka rau rara nu Alatala sampe ri kasae-saena.”