Yesus natuwu bali
16
Sangga naliupa Eo Mpenonto nalaumo i Maria Magdalena, i Maria indo Yakobus, ante i Salome nangoli rampa-rampa to nawongina rakeni raboli ri watabaku Yesus.
2 Pade dakampadondo njiina ri eo pamulana minggu etu tempo eo dako neonga, nalaumo besi-besi etu mpaka ri dayo Yesus.
3 Ri tatongo jala nosimpekutana ira sambaꞌa bo sambaꞌa, “Isema mamala mombaluliaka watu to nipompiku dayo etu ka kita?”
4 Tapi sangga namosupa ira ri dayo etu nikita ira nakalulimo watu to nabetena mpuꞌu etu.
5 Pade nesuamo ira riara dayo. Ri setu nikita ira sambaꞌa kabilasa nobaju bula nekatoko ri sabingga nggana dayo etu. Nanggita etu naeka mpuꞌumo rara ira.
6 Tapi nangulimo kabilasa etu ka ira, “Neꞌe maeka! Ninjaniku komi mangelo Yesus to Nazaret to namate nipaku ri kayu parika. Natuwu balimo Iꞌa, mana ria ri seꞌi. Kitamo! Eꞌimo petoꞌo pombaboli watabakuna.
7 Tapi kalaumo komi uli ka anaguruna pade ka i Petrus, ‘Iꞌa mokolu ka komi mpaka ri Bagia Galilea. Ri setumo komi kana manggita Iꞌa ewa to niulina ka komi bopia.’”
8 Jadi nesuwumo ira nggari dayo pade nangowa nalai nggari setu sabana natekaja bo naeka mpuꞌumo rara ira. Daꞌa ria ira notesa nuapa-nuapa ka isema-sema sabana naeka rara ira.
Yesus nompopokita korona ka Maria Magdalena bo anaguruna
[
9 Sangga Yesus natuwu bali nggari kamatena ri mpadondo eo Aka, pamula-mulana Iꞌa nompopokita korona ka i Maria Magdalena, etumo besi to nikabasaka Yesus nggari kuasa pitumbaꞌa seta bopia.
10 Naopu etu nalaumo i Maria nombatesa kajadia etu ka roa-roa Yesus to danasusa-susa rara bo nageo-geo.
11 Tapi tempo ira nangepe tesa to nanguli Yesus natuwu bali pade Iꞌa nikita i Maria, daꞌa ntoto niparasaya ira tesa etu.
12 Naopu etu Yesus nompopokita korona woꞌumo ka rombaꞌa topantuki Iꞌa ante lenjena ntanina tempo ira nolumako ri sawaliku ngata.
13 Nanggita etu nanjilimo ira rombaꞌa nantesa kajadia etu ka anaguru-anaguruna ntanina. Tapi roa-roa ira etu daꞌa woꞌu nomparasaya tesa etu.
14 Kaopuna Yesus nompopokita korona ka sampulu sambaꞌa anaguruna tempo ira nekatoko nanggoni mpasanggani. Iꞌa nangontiaka ira sabana ira nakoꞌo rara nomparasaya roa ira to nanggita Iꞌa tempo natuwu bali nggari kamatena.
15 Pade niulina ka ira, “Kalaumo komi mpaka ri njumaongu dunia pade patolelemo Kareba Belo ka pura-pura manusia.
16 Isema-sema to momparasaya pade radiu ewa tandaina ira topomparasaya Aku kana rapakasalama. Tapi isema-sema daꞌa momparasaya kana rasuku.
17 Tau-tau to momparasaya kana rawai ka kuasa mompowia tandai-tandai to nipogumaa iweꞌi: Ira kana mompopalai seta-seta ante kuasa nggari sangaku. Ira kana motesa ante basa-basa to nopuꞌu nggari jaꞌi Nosa Nagasa nu Alatala.
18 Ane ira manjoko ule bara manginu panginu to mepakamate, ira daꞌa mokuya-kuya. Pade ira kana mombadika pale ira ri koro tau-tau najuꞌa pade tau etu kana mabelo bali.”
Yesus neore mpaka ri suruga
Luk. 24:50-53; Suro 1:9-11
19 Sangga naopupa Yesus notesa iwetu ka ira, neoremo Iꞌa mpaka ri suruga pade nekatoko ri petoꞌo to nibila ri panggana nu Alatala.
20 Naopu etu nalaumo anaguru-anaguruna nompatolele Kareba Belo ka tau-tau ri umba-umba, pade Pue mboto nokarajaa mpasanggani ante ira. Iꞌa nombawai ka ira kuasa mowia tandai-tandai to nipogumaa ala mompakaroso tesa to nipatolele ira etu.]
KAOPU NU BUKU MARKUS NTANINA NANTUKI TESA-TESA TO NASAE [
9 Nalaumo besi-besi etu mpaka ri jaꞌi Petrus ante roana, pade nitesa ira pura-pura to niuli kabilasa etu ka ira.
10 Naopu etu Yesus nompakau anaguru-anaguruna mompatolele ka tau nggari kamataeona sampe ri kasolona Kareba to nagasana to daꞌa ri kabalina to nantesa katuwua mabelo sampe ri kasae-saena.]