Yesus natuwu bali
28
Naliu Eo Mpenonto daꞌapa nebulu eo ri eo Aka, nalaumo i Maria Magdalena bo i Maria ntanina manggita dayo Yesus.
2 Sampegoli naria lingu bete sabana malaeka i Pue nanaꞌu nggari suruga nombaluliaka watu nipompiku dayo. Pade naopu etu nekatokomo iꞌa ri bunggu watu etu.
3 Lenjena nenggila ewa kila, pakeana damo naputi njuꞌu.
4 Tantara-tantara to nanggatono ri setu naeka mpuꞌu sampe nolalete-lete koro ira, pade nadunggamo ira najadi ewa tomate.
5 Pade nangulimo malaeka etu ka besi-besi etu, “Neꞌe maeka. Ninjaniku komi mangelo Yesus to namate nipaku ri kayu parika.
6 Tapi Iꞌa mana ria ri seꞌi. Natuwu balimo Iꞌa ewa niulina bopia. Kamaimo manggita petoꞌo pombaboli watabakuna.
7 Pade kalaumo masalisa uli ka anaguru-anaguruna natuwu balimo Iꞌa. Iꞌa mokolu ka komi mpaka ri Bagia Galilea. Ri setumo komi kana manggita Iꞌa. Toramo nuapa to nitesaku ka komi!”
8 Jadi nompari-mparimo besi-besi etu nalai nggari dayo etu. Naekamo ira tapi nadamba woꞌu rara ira. Nangowamo ira ala manguli ka anaguru-anaguru Yesus nuapa to najadi.
9 Sampegoli ri setumo Yesus nosintomu ka ira pade nanguli, “Tabe.” Ira nompakamosu Iꞌa pade nanggalipui kadana mombasomba Iꞌa.
10 Nangulimo Yesus ka ira, “Neꞌe maeka. Kau uli ka anaguru-anaguruku malau mpaka ri Bagia Galilea. Ri setumo ira kana manggita Aku.”
Tesa tantara-tantara to nanggatono dayo Yesus
11 Sangga nalaipa besi-besi, nalaumo bara sakuya mbaꞌa tantara topanggatono dayo etu mpaka ri ngata notesa ka balengga-balengga topanggeni agama nuapa to najadi ri dayo paneꞌa.
12 Nangepe tesa ira balengga-balengga topanggeni agama nasiromu nolibu ante totuꞌa-totuꞌa nto Yahudi. Pade ira nompakatantu mombawai doi madea ka tantara-tantara etu.
13 Niuli ira ka tantara-tantara etu, “Uli komi iweꞌi: ‘Ntongo wengi pangane naratamo topantuki Yesus nompangangga watabakuna tempo kami napisi.’
14 Ane Gubernur mangepe tesa etu, damo kami motesa ka iꞌa ala daꞌa mokuya-kuya komi.”
15 Jadi tantara-tantara nantarima doi etu pade nitesa-tesa ira ewa to nipakau ka ira. Pade tesa tantara-tantara etu batena nipatolele ri tatongo nto Yahudi sampe weꞌi-weꞌi.
Yesus nompakau anaguruna mompatolele Kareba Belo
16 Pade nalaumo sampulu sambaꞌa anaguru Yesus mpaka ri saongu bulu ri Bagia Galilea to nipakatantu Yesus ka ira.
17 Sangga nanggita Iꞌa nekadedemo ira nombasomba Iꞌa. Tapi danaria to norongu rara.
18 Yesus nompakamosu ira pade nanguli ka ira, “Pura-pura kuasa ri langi bo dunia niwai ka Aku.
19 Sabana etu kalaumo komi mpaka ri umba-umba ri dunia, mompatuduki pura-pura tau majadi topomparasaya Aku. Diumo ira riara sanga Umata Pue Alatala bo Aku, Anana bo Nosa Nagasana ewa tandaina ira topomparasaya Aku.
20 Patudukimo ira mantuki pura-pura to niparentaku ka komi. Pade toramo! Aku kana mosanggani ka komi sampe ri kaopu nu dunia.”