Yesus nompatuduki anaguruna mosambaya
11
Naria sanggani Yesus nosambaya ri saongu petoꞌo. Naopu Iꞌa nosambaya naria sambaꞌa nggari anaguru-anaguruna nanguli ka Iꞌa, “Pue, patuduki woꞌu kami mosambaya ewa Yohanes Topediu nompatuduki anaguru-anaguruna.”
2 Pade nangulimo Yesus ka ira, “Ane komi mosambaya uli komi iweꞌi:
‘Uma kami, rabila kami sangamu.
Karatamo Komi moparenta ri dunia eꞌi.
3 Waimo ka kami panggoni butu-butu eona.
4 Pade ampungimo silaka kami
ewa kami woꞌu nombaampungi tau-tau nowia sala ri jaꞌi kami.
Pade neꞌe rapakamba kami rapesoba.’”
5 Pade nanguli woꞌumo Yesus ka anaguru-anaguruna, “Rapana maria sambaꞌa nggari komi malau mpaka ri sapo roamu tempo natongomo wengina pade manguli ka iꞌa, ‘Sampesuwuku, wai ka aku sakedi panggoni komi,
6 apa naria sambaꞌa roaku dako narata nggari polumakona nesai ri sapoku. Tapi ri sapoku daꞌa ria panggoni kuwai ka iꞌa.’
7 Natantumo roana etu daꞌa mesono iweꞌi: ‘Neꞌe mompakasusa aku, apa pewobo nilawa kamimo. Kami ntaliana naturumo. Aku daꞌa mamala membangu mombawai ka iko nuapa to niperapimu.’”
8 Pade nangulimo Yesus, “Aku manguli ka komi, rapana iꞌa daꞌa madota membangu mombawai ka komi panggoni etu sabana komi sambaꞌa roana, tapi natantumo iꞌa kana membangu mombawai ka komi nuapa to niperapimu etu sabana komi daꞌa naeya merapi ri jaꞌina.
9 Sabana etu kuuli ka komi, perapimo, pade komi kana rawai; elomo pade komi kana mombarata; tinggedemo pewobo pade pewobo kana rabea ka komi.
10 Sabana isema-sema merapi iꞌa kana rawai, isema-sema mopaelo iꞌa kana mombarata, pade isema-sema mantinggede pewobo iꞌa kana rabea ka pewobo.
11 Iwenumo? Naria sambaꞌa uma ri tatongo komi ane anana merapi bau rawaina ka ule? Natantumo daꞌa!
12 Bara ane anana merapi tolu manu ri jaꞌina, rawaina ka ndorokaa? Natantumo daꞌa woꞌu!
13 Naupa komi tau to najaꞌa ninjani komi woꞌu mombawai nuapa to nabelona ka ana-ana komi mboto. Neꞌepa rauli Umata to naria ri suruga. Natantumo Iꞌa woꞌu kana mombawai Nosana to Nagasa ka isema-sema to merapi ri jaꞌina.”
Tau nanguli Yesus nompopalai seta ante kuasa Magau nu Seta
14 Naria sanggani Yesus nompakabelo sambaꞌa tau to nipakabobo seta to nesua riarana. Sangga seta etu nipopalai Yesus namalamo tobobo etu notesa-tesa. Nanggita etu nogumaa puramo tau dea to naria ri setu.
15 Tapi naria woꞌu sanu tau nanguli, “Iꞌa namala nompopalai seta-seta ante kuasa nggari jaꞌi Beelzebul, Magau nu Seta.”
16 Naria woꞌu tau to madota mompesoba Yesus. Jadi ira nerapi ala Iꞌa mowia kabaraka mompopokita ka ira Iꞌa nggari jaꞌi Alatala.
17 Tapi ninjani Yesus patuju ira. Jadi niulina ka ira, “Ane maria sambaꞌa magau pade todea riara poparentana natibagi-bagi bo nosipobali, natantumo poparentana etu kana magero. Pade ane tau-tau ri saongu njapo aga natibagi-bagi bo nosipobali, natantumo ira kana magado mosimpotatare.
18 Iwetu woꞌu ante Magau nu Seta. Ane seta-seta aga natibagi-bagi bo nosipobali, natantumo poparentana etu kana magero. Sampe niuliku iwetu sabana niuli komi Aku nompopalai seta ante kuasa nggari jaꞌi Beelzebul, Magau nu Seta. Tapi etu daꞌa nakono.
19 Ane etu nakono uli ka Aku ante kuasa isema roa-roa komi nompopalai seta-seta? Natantumo ante kuasa nggari jaꞌi Alatala! Jadi powia roamu mboto etu nompakanoto pombarata komi etu nasala!
20 Tapi Aku nompopalai seta-seta ante kuasa nggari jaꞌi Alatala mboto! Pade etu nompopokita ka komi Pue Alatala nompamulamo noparenta ri tatongo komi!
21 Ane maria sambaꞌa tau to naroso nagana pura parewa mposibalina nanggatono sapona, natantumo mbara-mbarana daꞌa namala raala ntau.
22 Tapi ane maria sambaꞌa tau to neliu nggaroso marata mebaga pade mombadagi pue njapo etu, iꞌa kana mangala pura-pura parewa mposibali to nisarumaka pue njapo etu. Pade mbara-mbarana ranjapo etu kana rapalele ka roa-roana.” a
23 Pade nanguli woꞌumo Yesus, “Isema-sema daꞌa nosanggani ante Aku iꞌamo baliku. Bo isema-sema daꞌa nantulungi Aku, iꞌa etu nombagero panggawiaku.”
Tesa seta to nalai nanjili bali ri jaꞌi ntau
24 Pade nanguli woꞌumo Yesus, “Tempo seta nesuwu nompalasi sambaꞌa tau iꞌa nalai ranggarawa baina nangelo petoꞌo rapangosarakana, tapi daꞌa niratana. Sabana etu iꞌa nanguli, ‘Aginapa aku matingguli mpaka ri sapo to nipalasiku ria.’
25 Sangga nanjilipa iꞌa niratanamo petoꞌo etu naopu nipegasa bo nipakasiayumo.
26 Pade seta etu nalau nompokio pitumbaꞌa roana to neliu nggajaꞌa nggari iꞌa mboto. Pade naratamo ira nesua ri jaꞌi ntau etu pade naroo ri setu. Kaopuna katuwu ntau etu neliu mpuꞌu kajaꞌana nggari pamulana bopia.”
Kadamba rara to nakonona
27 Naopu Yesus notesa etu nangulimo sambaꞌa besi nggari olo ntau dea ka Iꞌa, “Natantumo nadamba mpuꞌu indomu to noana ka Komi bo nompatomi Komi!”
28 Tapi nesonomo Yesus, “Nakono, tapi neliu nggadambapa tau to nangepe Tesa nu Alatala pade nompangala tesa etu.”
Tau-tau nerapi Yesus mowia tandai to nipogumaa
29 Tempo nadea tau nasiromu nantalili Yesus Iꞌa nompapola tesana. Niulina, “Najaꞌa mpuꞌu tau weꞌi-weꞌi! Komi nerapi Aku mowia saongu tandai to nipogumaa ala mompopokita ka komi Aku eꞌi narata nggari jaꞌi Alatala. Tapi etu daꞌa kupowia ka komi! Tandai to rapopokita ka komi aga tandai ewa to najadi ri jaꞌi nabi Yunus nggaolu.
30 Nasimbayu ewa nabi Yunus najadi tandai to nipogumaa tau-tau ri ngata Niniwe nggaolu, iwetu woꞌu Aku, Ana nu Manusia kana majadi tandai rapogumaa ntau weꞌi-weꞌi.
31 Ri Eo Mpotangara banepia magau besi nggari sabingga puluna kana rapakatuwu bali mpasanggani-nggani ante komi to natuwu weꞌi-weꞌi. Pade iꞌa kana mompakasala komi, sabana iꞌa narata nggari ngata nakawao mpuꞌu ala mangepe pepatuduki Magau Salomo. Tapi weꞌi-weꞌi naria ri tatongo komi sambaꞌa to neliu nggakuasa nggari Magau Salomo, tapi komi daꞌa madota mantarima tesana.
32 Ri Eo Mpotangara banepia pue ngata Niniwe kana rapakatuwu bali mpasanggani-nggani ante komi. Pade ira kana mompakasala komi, sabana ira najeamo tempo ira nangepe tesa nabi Yunus ka ira. Tapi weꞌi-weꞌi naria ri tatongo komi ri seꞌi sambaꞌa to neliu nggakuasa nggari nabi Yunus, tapi komi daꞌa madota mantarima tesana.”
Tesa ewa reme bo rumau
33 “Daꞌa naria poindo nitunju ntau pade nitabuniakana ranggapeo atau niladuna ante tonda. Natantumo poindo etu kana raboli ri kalangana ala pura-pura tau mesua rara njapo mamala manggita remena.
34 Matamu etumo poindo koromu. Ane matamu mabelo, kana mareme sanggani njumaongu koromu. Tapi ane matamu magawu, marumau mpuꞌu katuwumu.
35 Sabana etu pariara mpakabelo-belo. Neꞌe sampe to niuli komi reme to naria riara ntaꞌi komi etu, aga rumau.
36 Ane pura-pura pompekirimu nareme, daꞌa ria to narumauna, pura-pura katuwumu woꞌu kana mareme nasimbayu ewa reme nu poindo nombawanta komi.”
Yesus nangontiaka to Parisi bo guru-guru agama
37 Naopu Yesus notesa naria sambaꞌa to Parisi nompakeni Iꞌa malau manggoni ri sapona. Jadi nalaumo Yesus nanggoni ri sapona etu.
38 Ri setu natekajamo to Parisi etu sabana Yesus daꞌa nantuki ada nto Parisi norama palena ntani ruru pade nanggoni.
39 Etu sampe Yesus nanguli ka iꞌa, “Komi to Parisi nabiasa nombarama tubu bo suraya bagia sawalikuna. Tapi rara ntaꞌi komi danatantoru bo najaꞌa mpuꞌu.
40 Komi tau-tau todoyo! Pue Alatala to nompowia koromu bo rara ntaꞌimu woꞌu!
41 Nuapa to naria ri jaꞌimu kana rawai komi ka tau-tau nakasiasi ante rara to nagasa. Ane komi mowia etu komi kana majadi nagasa pura.
42 Mandasa mpuꞌumo komi to Parisi. Komi nombabayari ka Alatala sabagia nggari sampulu bagia nggari pura-pura pombaratamu, nabeloka rampa-rampa to namura ewa kuni bo kula ante uta-uta ntanina. Tapi daꞌa nanoa rara komi bo komi daꞌa nompotowe Alatala. Kakonona kana manoa rara komi, pade komi kana mompotowe Alatala, tapi neꞌe rakalinga komi atura-atura to napoko ntanina etu.
43 Mandasa mpuꞌumo komi to Parisi, sabana komi madota mekatoko ri pekatoko to nibilana ri sapo mpodade, pade komi madota rabila ntau ri potomu.
44 Mandasa mpuꞌumo komi, sabana komi nasimbayu ewa dayo daꞌa naria niboli tandaina. Tau noliu daꞌa ninjanina riara dayo etu nawau. Waꞌa woꞌu ante komi. Daꞌa ninjani tau ntanina riara ntaꞌi komi etu najaꞌa.”
45 Naopu etu naria sambaꞌa nggari guru agama to naria ri setu nanguli ka Yesus, “Guru, tempo Komi nanguli iwetu natantu Komi nanjalai kami woꞌu!”
46 Nesonomo Yesus ka ira, “Mandasa woꞌu komi guru-guru agama, sabana komi nombawai ka tau atura-atura to natomo gaga ratuki, tapi komi mboto daꞌa madota mantulungi ira mantuki atura-atura etu!
47 Mandasa mpuꞌumo komi, sabana komi nompakabelo dayo nabi-nabi Alatala nggaolu, tapi komi woꞌu muli ntau to nompatesi ira!
48 Totuꞌa komi nggaolu to nompatesi nabi-nabi etu, pade komi to nompakabelo dayo-dayo etu. Naupa komi mowia anu nireke ntau nabelo, riara ntaꞌi komi danajaꞌa nasimbayu ewa totuꞌa komi nggaolu to nompatesi nabi-nabi.
49 Naria tesa nu Alatala to nanguli iweꞌi: ‘Nabi-nabi bo suroku kana kupakau ri jaꞌi ira. Maria santongo rapatesi ira, bo maria woꞌu to rapandasa ira.’ Niuli Alatala iwetu sabana ninjanina komi woꞌu nasimbayu kajaꞌana ante totuꞌa komi nggaolu.
50 Jadi komi to natuwu weꞌi-weꞌi kana rasuku Alatala sabana totuꞌa komi nggaolu nompatesi pura-pura nabi Alatala nggari lamba kajadia nu dunia,
51 nompamula nggari pompatesi i Habel sampe ri pompatesi i Zakharia to najadi ri lalowo Sapo Mpepue ri olo nu Meja Mpesomba bo Sapo Mpepue etu. Parasayamo! Komi to natuwu weꞌi-weꞌi kana rasuku sabana powia-powia etu!
52 Mandasa mpuꞌumo komi guru-guru agama, sabana komi nombalawa tau ala ira daꞌa mamala mangginjani jala mpaka ri jaꞌi Alatala! Komi mboto daꞌa madota mantuki jala etu pade komi nombalawa tau to madota malau mantuki jala etu!”