Pokainggu to masipato ane mombawai doi petulungi
6
“Toramo, neꞌe komi mompowia ada-ada to nipakatantu riara Atura-atura agama ri ngayo ntau dea ala rakita ira. Sabana ane iwetu pokainggu komi, powiamu etu daꞌa ntoto rabalasi Umamu ri suruga.
2 Jadi tempo komi mombawai doi petulungi ka tau nakasiasi, neꞌe rapatolele powiamu etu ewa kabiasa ntau tumoni-moni nabelo rarana. Ira nombawai ka tau nakasiasi ri ngayo ntau dea riara sapo-sapo mpodade pade ri jala-jala rara ngata ala ratoiya ntau. Aku mpuꞌu-mpuꞌu notesa ka komi, nitarima iramo pura-pura balasi nu powia ira.
3-4 Tapi ane komi mombawai doi petulungi ka tau-tau nakasiasi waimo nggalino. Neꞌe rapopanjani ka tau ntanina. Pade Umamu ri suruga to nanggita powiamu nggalino etu kana mombabalasi kabelomu etu.”
Pokainggu to masipato ane mosambaya
5 “Tempo komi mosambaya, neꞌe moinggu ewa tau-tau tumoni-moni nabelo. Ira nompokono nenggore mosambaya riara sapo-sapo mpodade pade ri sidu-sidu nu jala jama ala rakita ntau dea. Aku mpuꞌu-mpuꞌu notesa ka komi, nitarima iramo pura-pura asele nu posambaya ira.
6 Tapi ane komi mosambaya, pesuamo riara ntombimu pade pikumo pewobo. Posambayamo ka Umamu to daꞌa nikita. Pade Umamu to nanggita komi nosambaya nggalino kana mombabalasi komi.
7 Pade tempo komi mosambaya neꞌe mompakandate posambayamu ante mombasili-sili tesa nasimbayu ewa kabiasa ntau daꞌa nosinjani ante Alatala. Ira nompekiri ante mosambaya mandate posambaya ira ratarima Alatala.
8 Jadi neꞌe mompasiala pokainggu ira etu! Sabana ninjani Umamu mamimo nuapa to niparaluumu daꞌapa komi merapi nggari jaꞌina.
9 Jadi posambayamo komi iweꞌi:
‘Uma kami to naria riara suruga,
rabila kami sangamu.
10 Karatamo Komi moparenta ri dunia eꞌi,
kajadimo dotamu ri dunia nasimbayu ewa ri suruga.
11 Waimo ka kami panggoni butu-butu eona.
12 Pade ampungimo silaka kami
ewa kami woꞌu nombaampungi tau-tau nowia sala ri jaꞌi kami.
13 Neꞌe rapakamba kami rapesoba,
tapi kabasakamo kami nggari kuasa Magau nu Seta.
[Sabana Komimo Magau to nabaraka
bo nakuasa sampe ri kasae-saena. Amin!’]
14 Ane komi mombaampungi tau-tau to nompowia sala ri jaꞌimu, Umamu ri suruga woꞌu kana mombaampungi silaka komi.
15 Tapi ane komi daꞌa mombaampungi tau-tau to nompowia sala ri jaꞌimu, Umamu ri suruga daꞌa woꞌu mombaampungi silaka komi.”
Pokainggu to masipato ane mapuasa
16 “Ane komi mapuasa neꞌe mompopokita lenje ewa tau nandasa ewa kabiasa ntau tumoni-moni nabelo. Ira tunggai nombabali lenje ira ala manoto ka tau ntanina ira napuasa. Aku mpuꞌu-mpuꞌu notesa ka komi, nirata iramo pura-pura balasi nggari powia ira etu.
17 Tapi ane komi mapuasa, pendoꞌumo bo salagamo woꞌomu
18 ala neꞌe ranjani tau ntanina komi mapuasa, aga ranjani Umamu ri suruga to daꞌa nikita. Iꞌamo to manggita powiamu nggalino etu pade mombabalasi komi.”
Pokainggu to masipato ante kakalumana
19 “Neꞌe komi mompasiromu kakalumana ka koromu mboto ri dunia eꞌi. Sabana kakalumanamu ri dunia namala rakoni saipa bara tagara, pade petoꞌo pomboli kakalumanamu mamala ragero bo kakalumanamu etu rapangangga ntau.
20 Agina komi mompasiromu kakalumana ka koromu mboto ri suruga. Sabana ri setu kakalumanamu daꞌa namala rakoni saipa bara tagara, pade petoꞌo pomboli kakalumanamu daꞌa namala ragero bo rapangangga ntau.
21 Jadi neꞌe mompasiromu kakalumana ri dunia, sabana ri umba kakalumanamu ri setu woꞌu pekirimu.
22 Matamu nasimbayu ewa poindo nu koromu. Ane matamu mabelo, kana mareme sanggani njumaongu koromu.
23 Tapi ane matamu magawu, marumau sanggani njumaongu koromu. Jadi ane reme to naria riara ntaꞌimu marumau, marumau mpuꞌu pura-pura katuwumu. a
24 Daꞌa ria sambaꞌa tau mamala majadi batua nggari rombaꞌa madika. Sabana iꞌa kana magigi rarana ri jaꞌi madika to sambaꞌana pade mompotowe madika ntanina etu. Bara iꞌa kana mombabila madika to sambaꞌana pade momporau rara madika ntanina etu. Iwetu woꞌu ane komi. Daꞌa mamala komi mepue sanggani ka Alatala bo manjarumaka mbara-mbara ri dunia eꞌi.”
Neꞌe makini-kini rara mompekiri katuwumu ri dunia
25 “Sabana etu kuuli ka komi, neꞌe makini-kini rara mompekiri katuwu komi, bara nuapa rakoni komi atau rainu komi. Neꞌe makini-kini mompekiri koro komi mboto bara pakea nuapa rapake komi. Sabana to napokona riara nggatuwuta daꞌa aga panggoni bo pakea.
26 Kitamo tonji-tonji ri laerawa! Ira daꞌa notuja pae, daꞌa nokato bara nomboli pae riara logo. Tapi naupa iwetu Uma komi ri suruga nombawai ka ira panggoni. Pade riara mpanggita Alatala katuwu komi neliupa nggari tonji-tonji.
27 Daꞌa ria gunana komi makini rara. Daꞌa ria sambaꞌa nggari tatongo komi to nompakule mantambai umuruna nau aga sambengi ante makini-kini rarana.
28 Pade daꞌa woꞌu naria gunana komi makini-kini mompekiri pakeamu. Kitamo bunga-bunga to natuwu ranggawoko. Bunga etu daꞌa nanggawia bara nantanu.
29 Tapi naupa iwetu kuuli ka komi, Magau Salomo to nakalumana mpuꞌu daꞌa ria pakeana to narambana ewa bunga-bunga etu!
30 Ane Alatala mompakaramba bunga-bunga ranggawoko to natuwu sampalai lau pade nipalabu riara apu, natantumo Iꞌa kana mombawai ka komi pakea to niparaluu komi. Komi mpuꞌu-mpuꞌu tau to nakura pomparasaya!
31 Jadi neꞌe komi makini-kini ante manguli, ‘Nuapa rakonita, nuapa rainuta, bara pakea nuapa rapaketa?’
32 Pura-pura etu woꞌu nielo tau-tau to daꞌa nomparasaya Alatala. Tapi pura-pura to niparaluu komi etu ninjani Umamu ri suruga.
33 Jadi pekoumo ruru ri jaꞌi Alatala pade tunggai mowia dotana pade pura-pura etu kana rapakagana ka komi.
34 Sabana etu neꞌe makini-kini mompekiri bara nuapa majadi naile, sabana naile naria mboto kasusana. Kasusana eo eꞌi naganamo rapekirita eo eꞌi.”