Neꞌe komi sakedi-sakedi mompakasala tau
7
“Neꞌe komi sakedi-sakedi mompakasala tau ala neꞌe komi rapakasala Alatala.
2 Sabana iwenu komi mompakasala roamu iwetu woꞌu Alatala mompakasala komi. Komi kana rabalasi nantuki potimba to nipake komi mboto ante tau ntanina.
3 Nokuya komi nanggita mpuli ri mata roamu, tapi baloti ri matamu mboto daꞌa ria nikitamu?
4 Iwenu komi nanguli ka roamu, ‘Kamai kukaliaka mpuli nggari matamu,’ tapi ri matamu mboto naria baloti?
5 Komi aga nagasi nompakasala roamu! Kaliaka ntanimo ruru baloti nggari matamu mboto pade komi mamala manggita ante manoto ala manggaliaka mpuli nggari mata roamu!”
Kita kana manoto tempo mompatolele Kareba Belo
6 “Neꞌe rawai ka asu anu to nagasana ala neꞌe ira megoli manggiki komi. Pade neꞌe rawai ka wawu mutiara to nasuli olina ala neꞌe ira aga mombalonggo-longgo bayangi.”
Merapi nggari jaꞌi Alatala
7 “Perapimo nggari jaꞌi Alatala pade komi kana rawai, elomo pade komi kana mombarata, tinggedemo pewobo pade pewobo kana rabea ka komi.
8 Sabana isema-sema merapi iꞌa kana rawai, isema-sema mopaelo iꞌa kana mombarata, pade isema-sema mantinggede pewobo, iꞌa kana rabea ka pewobo.
9 Natantu daꞌa ria sambaꞌa uma nggari tatongo komi to mombawai watu ka anana ane iꞌa merapi roti!
10 Pade daꞌa woꞌu naria uma to mombawai ule ka anana ane iꞌa merapi bau.
11 Naupa komi tau to najaꞌa ninjani komi mombawai nuapa to nabelona ka ana-ana komi mboto. Neꞌepa rauli Uma komi ri suruga. Natantumo Iꞌa woꞌu kana mombawai anu nabelo ka isema-sema merapi ri jaꞌina.”
Jala to nakonona
12 “Jadi nuapa-nuapa to mupodota rapowia ntau ka komi, iwetu woꞌu komi mowia ri jaꞌi ira. Sabana parenta etumo isi to napokona nggari njumaongu Atura-atura i Musa bo pepatuduki nu nabi-nabi nggaolu.
13 Pesuamo ri pewobo to napii, sabana pewobo bo jala mpaka ri naraka naluo, pade nadea woꞌu tau to nantuki ri setu.
14 Tapi napiimo pewobo bo jala mombarata katuwua mabelo, pade sakedi lau tau to nombaratana.”
Nabi-nabi topodawa nanoto ranjani nggari pokainggu ira
15 “Komi kana mainga ri jaꞌi nabi-nabi topodawa. Ira narata ri jaꞌi komi notimoni-moni nalusu rarana ewa bimba, tapi kakonona riara ntaꞌi ira najaꞌa mpuꞌu ewa asulako to nasoana.
16 Nggari pokainggu ira komi mamala mangginjani isema nabi topodawa. Natantu lemo ntasi daꞌa nowua lonja, pade walaa winti manu daꞌa nowua ntimu.
17 Iwetu woꞌu kayu to nabelona kana mowua mabelo, tapi kayu daꞌa nabelo daꞌa woꞌu mowua mabelo.
18 Daꞌa ria kayu to nabelona to daꞌa nowua nabelo. Pade daꞌa woꞌu naria kayu daꞌa nabelo to nowua nabelo.
19 Butu-butu kayu to daꞌa nowua nabelo kana ratowo pade ratajiaka riara apu.
20 Jadi iwetu woꞌu ante nabi-nabi topodawa. Ira manoto ranjani komi nggari pokainggu ira.
21 Daꞌa pura-pura tau to nekakai ka Aku ‘Pue, Pue,’ mamala majadi todea riara Poparenta nu Alatala, aga tau to nompowia dota nu Umaku ri suruga.
22 Ri kaopu nu dunia banepiana kana madea tau manguli ka Aku, ‘Pue, Pue, kami nompasimbayu tesamu ka tau ntanina riara sangamu, pade riara sangamu woꞌu kami nompopalai seta-seta nggari jaꞌi ntau. Pade nadeamo kabaraka to nipowia kami riara sangamu.’
23 Tapi Aku kana mombasono ira iweꞌi: ‘Daꞌa ninjaniku komi! Palaimo nggari seꞌi, komi to nompowia kajaꞌana!’”
Porapa ewa topowia sou to napande bo topowia sou nadoyo
24 “Jadi isema-sema to nangepe tesaku pade nantuki tesa etu iꞌamo nasimbayu ewa tau to nanoto to nompowia sapona ri bunggu watu to narosona.
25 Sangga naratapa uja, nanggabuntumo ue pade sapo etu niburu mpoiri naramboso. Tapi daꞌa ria mokuya-kuya sapo etu sabana nipowia ri bunggu watu to narosona.
26 Tapi isema-sema to nangepe tesaku pade daꞌa nantuki tesa etu, iꞌamo nasimbayu ewa tau to nadoyona to nompowia sapona ri bunggu bone.
27 Sangga naratapa uja, nanggabuntumo ue pade sapo etu niburu mpoiri naramboso. Pade nadunggamo sapo etu sampe nagero puramo.”