PEPATUDUKI YESUS RI BUNGGU NU BULU (Pasal 5-7)
Nasana mpuꞌu tau-tau to nantuki dota Alatala
5
Tempo Yesus nanggita tau dea etu, nantendemo Iꞌa mpaka ri saongu bulu. Naopu Iꞌa nekatoko ri setu naratamo topantuki-topantuki Iꞌa ri jaꞌina.
2 Pade nompamulamo Iꞌa nompatuduki ira. Niulina,
3 “Nasana mpuꞌumo tau-tau aga netidombo ri jaꞌi Pue Alatala,
sabana iramo to majadi todea riara Poparenta nu Alatala.
4 Nasana mpuꞌumo tau-tau to nasusa rara,
sabana iramo to rapakawoe rarana.
5 Nasana mpuꞌumo tau-tau to naede rara,
sabana iramo to mantarima pura-pura nuapa to nijanji Alatala.
6 Nasana mpuꞌumo tau-tau to mpuꞌu-mpuꞌu madota mowia dota Alatala,
sabana iramo to rawai ka pompakule mowia to nipodota ira etu.
7 Nasana mpuꞌumo tau-tau to naasi matana nanggita roana,
sabana iramo to rapoasi mata nu Alatala.
8 Nasana mpuꞌumo tau-tau to nagasa rarana,
sabana iramo to manggita Alatala.
9 Nasana mpuꞌumo tau-tau to nompoposinggabelo roana,
sabana iramo to rauli ana-ana nu Alatala.
10 Nasana mpuꞌumo tau-tau to rapandasa sabana madota mowia dota Alatala,
sabana iramo to majadi todea riara Poparenta nu Alatala.
11 Nasana mpuꞌumo komi ane komi rasalaraka ntau atau rapandasa bara rauli sinjaꞌi ntau sabana komi topomparasaya Aku.
12 Iwetu woꞌu nipowia ntotuꞌa ira ka nabi-nabi nggaolu. Jadi pakadambamo raramu ane etu majadi ri jaꞌimu sabana nadea mpuꞌu rasi to nipakasadia ka komi ri suruga.”
Topomparasaya Yesus nipakasimbayu ewa gara bo reme
13 “Komimo gara nu dunia. Tapi ane gara majadi nameli natantu daꞌa namala rapakapaga bali. Gara etu mana ria gunana, aga ratajiaka pade ralonggo-longgo ntau.
14 Komimo reme nu dunia. Ngata ri bunggu nu bulu daꞌa namala ratabuniaka.
15 Iwetu woꞌu daꞌa ria poindo nitunju ntau pade niladuna ante tonda. Tapi poindo etu kana rabolina ri kalangana sampe pura-pura tau raranjapo rawanta remena.
16 Iwetu woꞌu reme to naria riara ntaꞌi komi kana rapopokita ka tau ntanina ala ira mamala manggita pokainggumu to nabelona pade mantoiya Umamu ri suruga.”
Pepatuduki Yesus ewa Atura-atura agama Yahudi
17 “Neꞌe rapekiri komi Aku eꞌi narata mompakalipo Atura-atura agama bo pepatuduki nabi-nabi. Karataku eꞌi daꞌa mompakalipo Atura-atura bo pepatuduki etu, tapi aga mompakanoto batuana to nakonona.
18 Aku mpuꞌu-mpuꞌu notesa ka komi, ane damaria langi bo dunia, daꞌa ntoto maria sambela nggari Atura-atura etu malipo, nau aga saongu huruf to neliu nggakedi bara saongu titik. Pura-pura Atura etu kana madupa.
19 Jadi isema-sema to nombaliunaka saongu parenta riara Atura-atura etu nau aga parenta to neliu nggakedina pade nompatuduki tau ntanina mompasiala pokaingguna etu, iꞌa kana majadi tau to neliu nggaede katuwuna riara Poparenta nu Alatala. Tapi isema-sema to natundu riara Atura-atura etu pade nompatuduki tau ntanina woꞌu matundu riarana, tau etumo kana majadi tau to nalanga katuwuna riara Poparenta nu Alatala.
20 Sabana kuuli ka komi, ane pokainggumu daꞌa meliu ngganoa nggari pokainggu guru-guru agama bo tau-tau to Parisi, natantumo komi daꞌa ntoto mamala majadi todea riara Poparenta nu Alatala.”
Pepatuduki Yesus ewa rau rara
21 “Natantu niepe komimo parenta to nitesa ka totuꞌata nggaolu iweꞌi: ‘Neꞌe mepatesi! Isema-sema mepatesi kana rasuku.’ a
22 Tapi kuuli ka komi, isema-sema narau rara ri jaꞌi sampesuwuna kana rasuku. Isema-sema nanguli sinjaꞌi sampesuwuna kana rakeni ri ngayo Ntopolibu Bete Agama Yahudi. Pade isema-sema nanguli sampesuwuna todoyo kana ratajiaka riara apu naraka.
23 Sabana etu ane komi malau manggeni pesombamu ka Alatala ri meja mpesomba pade matitora komi ka sampesuwumu to najuꞌa rarana ri jaꞌimu,
24 palasi ntanimo ruru pesombamu etu ri ngayo meja mpesomba. Pade patinggulimo komi mpaka ri jaꞌina mosinggabelo bali ante iꞌa. Ane maopupa etu kalaumo komi mombawai pesombamu ka Alatala.
25 Ane komi malau ratangara ri jaꞌi ntopotangara, komi kana masasinta mosinggabelo bali ante balimu ri santongo jala. Sabana ane komi daꞌa mosinggabelo ante iꞌa, natantumo balimu etu kana mompakasala komi ri jaꞌi ntopotangara, pade topotangara etu kana mombawai komi riara mpale polisi, pade polisi etu kana mombasuaraka komi riara tarunggu.
26 Aku mpuꞌu-mpuꞌu notesa ka komi, natantumo komi daꞌa ntoto mamala rakabasaka nggariara tarunggu etu ane pura-pura salamu daꞌa mubayari.”
Pepatuduki Yesus ewa nogau sala
27 “Natantu niepe komi parenta nggaolu iweꞌi: ‘Neꞌe mogau sala ante tau daꞌa rongomu mboto.’ b
28 Tapi kuuli ka komi isema-sema mombalele mata sambaꞌa besi ante dota rara mogau sala ante iꞌa, natantumo tau etu nireke nombabualo besi etu riara pekirina.
29 Ane mata ngganamu manggeni komi mowia silaka, suꞌi tajiakamo matamu etu. Nabelopa saongu sipa nu koromu malipo pade njumaongu koromu ratajiaka riara naraka.
30 Pade ane pale ngganamu manggeni komi mowia silaka, tompo tajiakamo palemu etu. Nabelopa saongu sipa nu koromu malipo pade njumaongu koromu mesua riara naraka.”
Pepatuduki Yesus ewa posompo porongo
31 “Naria woꞌu tesa nggaolu nanguli iweꞌi: ‘Isema-sema madota mombasompo rongona besi iꞌa kana mombawai ka rongona sura tala.’ c
32 Tapi kuuli ka komi, isema-sema to mombasompo rongona besi to daꞌa nogau sala ante langgai ntanina iꞌa nompowia rongona besi etu nireke nebualo ane iꞌa raporongo langgai ntanina. Pade tau to nomporongo besi to nisompomo, iꞌa woꞌu nireke nebualo.”
Pepatuduki Yesus ewa netunda
33 “Niepe komi parenta to nitesa ka totuꞌata nggaolu iweꞌi: ‘Neꞌe mompalewa janjimu, tapi paratamo janji to nitesamu ri jaꞌi Alatala ante netunda.’ d
34 Tapi kuuli ka komi, neꞌe ntoto metunda! Neꞌe metunda ante manguli langi, sabana langi pekatoko nu Alatala.
35 Neꞌe metunda ante manguli dunia, sabana dunia eꞌi polampi kada nu Alatala. Neꞌe metunda ante manguli Yerusalem, sabana Yerusalem ngata nu Magau to Nakuasana.
36 Pade neꞌe metunda ante manguli balenggamu mboto, sabana daꞌa nompakule komi mombabali wulu woꞌomu nau aga sambalaa majadi mabula bara mawuri.
37 Tapi ane makono ulimo ‘iyo,’ pade ane daꞌa makono, ulimo ‘daꞌa.’ Tesa to neliu nggari etu nopuꞌu nggari jaꞌi Magau nu Seta.”
Pepatuduki Yesus ewa mombabalasi kajaꞌana
38 “Niepe komi parenta nggaolu iweꞌi: ‘Mata kana rasambei ante mata, ngisi kana rasambei ante ngisi.’ e
39 Tapi kuuli ka komi neꞌe mombabalasi tau to nompowia kajaꞌana ka komi. Tapi ane maria tau mombasapa kalimpi ngganamu, wai ka iꞌa woꞌumo kalimpi njidimu.
40 Pade ane maria tau manggeni komi ri jaꞌi ntopotangara sabana madota mangala bajumu, wai ka iꞌa woꞌumo buyamu.
41 Ane maria tau mompasuꞌu komi manggolo mbara-mbarana saongu kilo kakawaona, kolomo mbara-mbara etu rongu kilo.
42 Waimo ka tau to merapi ri jaꞌimu, pade neꞌe mompoara tau to marata manginda nggari jaꞌimu.”
Potowemo balimu
43 “Niepe komi parenta nggaolu iweꞌi: ‘Potowemo sanggamanusiamu pade porau raramo balimu.’ f
44 Tapi kuuli ka komi, potowemo balimu pade posambayamo ka tau-tau to mompandasa komi.
45 Sabana ante iwetu komi moinggu nasimbayu ewa Umamu ri suruga. Iꞌa nompopebulu eo ka tau-tau najaꞌa bo tau-tau to nabelo. Pade Iꞌa nompakadunggu uja ka tau-tau to nanoa pade ka tau-tau to nadenggona woꞌu.
46 Ane komi aga mompotowe tau to nompotowe komi, natantumo Alatala daꞌa mombabalasi kabelomu etu. Sabana topomperapi balasitee woꞌu noinggu ewa etu.
47 Pade ane komi aga najole ri jaꞌi roamu mboto, natantumo powiamu etu daꞌa neliu nggabelo nggari powia tau ntanina. Nau tau-tau daꞌa nangginjani Alatala woꞌu noinggu iwetu!
48 Jadi komi kana moinggu mabelo pura nasimbayu ewa Umamu to naria riara suruga.”