Neꞌe mompakeni roamu mowia silaka
17
Pade nangulimo Yesus ka topantuki-topantuki Iꞌa, “Natantumo kana maria saba-sabana sampe tau mowia silaka. Tapi mandasa mpuꞌumo tau to mompakeni tau ntanina mowia silaka.
2 Nabelopa iꞌa ratajiaka riara ntasi ante saongu watu bete nisoꞌo ri tambolona pade iꞌa mombabagiu sambaꞌa ngana nggedi sampe iꞌa mowia silaka.
3 Sabana etu komi kana mainga.
Ane maria sampesuwumu mowia silaka ontiakamo iꞌa. Pade ane iꞌa majea pade merapi ampu, ampungimo iꞌa.
4 Ane iꞌa mowia majaꞌa ri jaꞌi komi pitunggani riara saeo pade butu nggani iꞌa marata merapi ampu ri jaꞌimu, komi kana mombaampungi iꞌa.”
Pepatuduki Yesus ewa pomparasaya
5 Pade nangulimo anaguru-anaguruna ka Yesus, “Pue, pakarosomo pomparasaya kami.”
6 Nangepe etu nangulimo Yesus, “Ane pomparasaya komi aga sakedi lau nasimbayu ewa wua kayu to nakedi mpuꞌu, komi mamala manguli ka kayu bete eꞌi, ‘Kawukamo pade kau polinjamo mpaka ri tatongo ntasi.’ Pade natantumo kayu etu kana molinja.”
Pokainggu to masipato ka topantuki Yesus
7 “Rapana sambaꞌa nggari komi maria sambaꞌa batua to nopajeko bara nompoewu bimba ri karawana. Tempo batua etu manjili nggari karawana etu, natantumo komi daꞌa manguli ka iꞌa, ‘Kamaimo masasinta manggoni!’
8 Daꞌa mpuꞌu iwetu! Natantumo komi kana manguli ka iꞌa, ‘Kalau poriapu ruru panggoniku. Pade ane mangongomo pomporiapumu etu pakasadia pade keni ka aku panggoni etu. Ane maopu aku manggoni manginu pade mamala iko malau manggoni.’
9 Natantumo batua etu daꞌa miki ratoiya sabana iꞌa aga nantuki dota madikana.
10 Iwetu woꞌu komi. Ane komi maopu mowia pura-pura to niparenta ka komi, ulimo, ‘Kami eꞌi aga batua biasa. Kami aga nowia nuapa to masipato rapowia kami.’”
Yesus nompakabelo sampulu mbaꞌa tau najuꞌa bete
11 Tempo Yesus nompapola polumakona mpaka ri ngata Yerusalem, Iꞌa nantuki pobingga Bagia Samaria ante Bagia Galilea.
12 Tempona Iꞌa nesua ri saongu ngata naria sampulu mbaꞌa tau to najuꞌa bete nomposirata Iꞌa. Ira nekanggore nakawao
13 bo nongare, “Yesus, Guru, potowemo kami!”
14 Pade Yesus nangantoaka ira ante nanguli, “Kalaumo komi ri jaꞌi topanggeni-topanggeni agama merapi ala koro komi raparesa ira.”
Nangepe etu nalaumo ira nantuki tesa Yesus etu. Tempo ira danalau-lau nabelomo koro ira pura-pura.
15 Tempo sambaꞌa nggari ira nanggita korona nabelomo, natinggulimo iꞌa mpaka ri jaꞌi Yesus ante nombatoiya-toiya Alatala ante suara namangga.
16 Pade notimbakotumo iꞌa ri ngayo Yesus ante nanguli tarima kasi ri jaꞌina. Tau etu iꞌamo sambaꞌa tau nggari Bagia Samaria.
17 Pade nangulimo Yesus, “Naria sampulu mbaꞌa tau paneꞌa to nipakabeloku. Ri umbamo ira to sasiona?
18 Nokuya aga tau daꞌa to Yahudi eꞌi to narata nanguli tarima kasi ka Alatala?”
19 Pade niuli Yesus ka tau etu, “Pekanggoremo bo kalaumo. Nabelomo juꞌamu sabana komi nomparasaya Aku.”
Tempo Alatala marata moparenta ri dunia
20 Naria bara sakuya mbaꞌa to Parisi nompekutana Yesus, “Nepia Alatala marata moparenta ri dunia?”
Nesonomo Yesus, “Daꞌa ria tandai-tandaina to namala rakita to mompakatantu nepia Alatala marata moparenta.
21 Daꞌa ria to mamala manguli, ‘Kitamo, eꞌimo Iꞌa,’ bara manguli, ‘Kitamo, ri setumo Iꞌa.’ Poparenta nu Alatala daꞌa namala rakita ntau sabana Alatala noparenta riara ntaꞌi manusia.”
22 Naopu etu nangulimo Yesus ka anaguru-anaguruna, “Kana marata tempona komi madota manggita Aku, Ana nu Manusia naupa aga sampalai lau, tapi komi daꞌa manggita Aku.
23 Kana maria tau manguli ka komi banepia, ‘Kitamo, ri setumo Iꞌa,’ atau manguli, ‘Ri seꞌimo Iꞌa.’ Tapi neꞌe komi malau mantuki ira,
24 sabana tempo Aku marata bali ri dunia, kana ranjani komi. Nasimbayu ewa kila norea ri laerawa pade nombawanta pura-pura langi, iwetu woꞌumo tempo karataku. Etu kana rakita ntau pura-pura.
25 Tapi daꞌapa marata tempona etu, pamulana Aku mpuꞌu-mpuꞌu rapandasa pade rapoara tau-tau to natuwu tempo eꞌi.
26 Tempo Aku, Ana nu Manusia marata banepia pokainggu manusia kana masimbayu ante pokainggu manusia tempo nabi i Nuh nggaolu.
27 Ira nanggoni nanginu pade norongo nosiporongo ewa biasa sampe nabi i Nuh nesua riara sakaya betena. Naopu etu nanggabuntu puramo ue ri dunia eꞌi sampe pura-pura tau ntanina etu namate.
28 Waꞌa woꞌu pokainggu manusia ri ngata Sodom tempo i Lot netoꞌo ri setu. Ira nanggoni nanginu, naria nobalu-balu naria neoli. Ira notuja-tuja pade nombangu sapo ewa biasa.
29 Tapi tempona i Lot nalai nggari ngata Sodom etu, eo etu woꞌumo nanaꞌumo apu ante watu to najelana nggari langi nompakaropu ira pura-pura ri ngata etu.
30 Masimbayu ka etu woꞌu banepia tempo Aku, Ana nu Manusia marata bali ri dunia. a
31 Tempo karataku etu tau to nompamaya ka poiri ri bunggu nu sapona neꞌe manaꞌu mesua rara njapo mangala mbara-mbara to naria ri setu. Iwetu woꞌu tau-tau to naria ri tinaluna. Neꞌe mana ira manjili mpaka ri ngata. Palaimo masasinta!
32 Toramo nuapa to najadi ri jaꞌi rongo i Lot tempona iꞌa nompeili nanggita ngata Sodom. b
33 Tau aga nantora katuwuna mboto tapi daꞌa nantuki dota Alatala, daꞌa namala matuwu mabelo sampe ri kasae-saena. Tapi tau to nantuki Alatala ante daꞌa nantora katuwuna mboto, etumo tau to namala matuwu mabelo sampe ri kasae-saena.
34 Epemo tesaku! Ane karataku etu tempo nggawengina ane maria rombaꞌa moturu mosaongu ranja, sambaꞌa kana kuala pade sambaꞌa kuboli ri setu.
35 Pade ane karataku tempo eona ane maria besi rombaꞌa mogili mpasanggani-nggani, sambaꞌa kana kuala pade sambaꞌa woꞌu kuboli ri setu. [
36 Pade ane maria langgai rombaꞌa manggawia mpasanggani-nggani ri tinalu, sambaꞌa kana kuala pade sambaꞌa woꞌu kuboli.”]
37 Pade nekutanamo anaguru-anaguru Yesus, “Pue, ri umba etu majadi?”
Nesonomo Yesus, “Ane rakita komi tonji kolaa nasiromu nanggoni, natantumo nanoto ri setu naria binata namate. Iwetu woꞌu ante karataku. Natantu manoto woꞌu ka komi ri umba rakajadina.”