Yesus nompakabelo sambaꞌa topunggu
2
Bara sakuya mbengi kaliuna nesua woꞌumo Yesus ri ngata Kapernaum. Pade natolelemo tesa to nanguli Yesus naria rara njapona.
2 Nangepe etu nadea mpuꞌumo tau narata nasiromu ri sapo etu sampe mana nasuka, nau aga ri ngayo pewobo mana ria petoꞌo. Ri setu Yesus nompatolele Tesa nu Alatala ka ira.
3 Tempona Iꞌa danotesa naratamo patambaꞌa tau nombakowa roa ira to napungguna.
4 Ira daꞌa namala nompakamosu Yesus sabana tau-tau ri setu neliu nggadea. Jadi nalaumo ira nepone ri bunggu ata nu sapo etu, a pade nibongga ira ata ri ntoto Yesus. Sangga natebukapa ata etu niulunjaka iramo topunggu etu ante ompa paturuna.
5 Tempo Yesus nanggita karoso pomparasaya ira etu, nangulimo Iꞌa ka topunggu etu, “Anaku, silaka-silakamu niampungimo.”
6 Nangepe etu nompamulamo bara sakuya mbaꞌa guru agama to nekatoko ri setu nompekiri riara ntaꞌi ira,
7 “Nokuya tau eꞌi notesa iwetu? Iꞌa nompakakedi Alatala! Daꞌa ria sambaꞌa manusia namala mombaampungi silaka, aga Alatala mboto!”
8 Tapi Yesus nangginjani nuapa to nipekiri ira. Etu sampe Iꞌa nanguli ka ira, “Nokuya komi nompekiri iwetu?
9 Umba to neliu nggamuda rauli, ‘Silakamu niampungimo,’ atau manguli, ‘Pekanggore, onggotakamo ompa paturumu pade polumakomo?’ Natantu neliu nggamuda manguli, ‘Silakamu niampungimo.’
10 Tapi Aku mompopokita ka komi Aku, Ana nu Manusia nakuasa mombaampungi silaka manusia ri dunia eꞌi.” Pade nipakauna topunggu etu,
11 “Pekanggore, onggotakamo ompa paturumu pade patinggulimo!”
12 Nangepe etu nekanggoremo topunggu etu. Kaliu-liu iꞌa nangonggotaka ompa paturuna, pade nesuwumo iꞌa nikita mata ira pura-pura. Nanggita etu nogumaa puramo tau ri setu, pade ira nombatoiya Alatala ante nanguli, “Daꞌapa sanggani nikitata kajadia ewa eꞌi!”
Yesus nompokio Lewi mantuki Iꞌa
13 Naopu etu nalau woꞌumo Yesus mpaka ri wiwi rano. Tempo Iꞌa ri setu narata puramo tau dea ri jaꞌina, pade Iꞌa nompatuduki ira.
14 Naopu etu tempo Yesus noliu ri setu, nikitana sambaꞌa topomperapi balasitee to nosanga ka i Lewi, ana Alfeus, nekatoko ri kantoro topomperapi balasitee. Nangulimo Yesus ka iꞌa, “Kamaimo, tukimo Aku.” Nangepe etu nekanggoremo i Lewi nalau nantuki Yesus.
15 Naopu etu nalaumo Yesus ante anaguruna nanggoni ri sapo i Lewi. Ri setu nadea woꞌu topomperapi balasitee bo tau-tau ntanina to nasilaka nanggoni mpasanggani-nggani ante ira, sabana nadeamo ira to nantuki Yesus.
16 Tempo guru-guru agama to nantuki pepatuduki to Parisi nanggita Yesus nanggoni mpasanggani ante topomperapi balasitee bo tau-tau nasilaka iwetu, nangulimo ira ka topantuki-topantuki Iꞌa, “Nokuya gurumu nanggoni mpasanggani-nggani ante topomperapi balasitee bo tau-tau to nasilaka?”
17 Sangga nangepe pompekutana etu, nangulimo Yesus ka ira, “Daꞌa tau to naroso korona paraluu rapakuli dokutoro, aga tau to najuꞌana. Patuju karataku eꞌi daꞌa ala mompokio tau nanoa rarana, tapi ala mompokio tau nasilaka.”
Tau nangontiaka Yesus sabana anaguruna daꞌa mapuasa
18 Naria sanggani anaguru-anaguru Yohanes Topediu bo tau-tau to Parisi napuasa. Tempo etu naria tau narata ri jaꞌi Yesus pade nompekutana Iꞌa, “Nokuya anaguru-anaguru Yohanes bo topantuki-topantuki tau-tau to Parisi napuasa tapi topantuki-topantuki Komi daꞌa napuasa?”
19 Nesonomo Yesus ka ira ante porapa iweꞌi: “Masipato torata mapuasa ri posusa mponika ane boti langgai danosanggani ante ira? Natantumo daꞌa! Ane boti langgai danosanggani ante ira daꞌa masipato ira mapuasa!
20 Tapi kana marata tempona boti langgai raala nggari jaꞌi ira. Tempo etumo ira kana mapuasa.”
Pepatuduki Yesus to nabou bo ada-ada agama Yahudi daꞌa namala ratuki sanggani
21 Nanguli woꞌumo Yesus, “Daꞌa ria tau nombatampala baju to narantana ante kae to nabouna. Sabana ane iwetu tampala kae to nabouna kana mosimpakuru mompakaseri baju to narantana etu. Kaopuna mantambai kajaꞌa seri nu baju etu.
22 Iwetu woꞌu ante ue anggur. Daꞌa ria tau nombaisi ue anggur to nabouna riara pombolina to nasae. Sabana ane iwetu ue anggur to nabouna kana morende mompakaposo pombolina etu, sampe magero puramo, nabeloka ue anggur, nabeloka pombolina. Tapi ue anggur to nabouna kana raisi riara pomboli to nabouna woꞌu.” b
To Parisi nangontiaka Yesus sabana anaguruna nompui gando ri Eo Mpenonto
23 Naria saeo Eo Mpenonto Yesus ante anaguruna noliu ri tatongo ntinalu gando. Tempo ira noliu ri setu nompamulamo anaguru-anaguruna nompui gando sakedi.
24 Nanggita etu nangulimo tau-tau to Parisi ri setu, “Kitamo! Nokuya anaguru-anagurumu nombaliunaka Atura-atura agamata ante nowia anu nitagi ri Eo Mpenonto?”
25 Nesonomo Yesus, “Iwenumo? Daꞌapa nibasa komi tesa riara Buku Nagasa ewa powia i Daud nggaolu tempo iꞌa ante roa-roana naoro taꞌi pade mana ria panggoni?
26 Iꞌa nesua riara Sapo Alatala tempo Abyatar najadi Balengga Topanggeni Agama, pade nikonina roti to nipesomba ka Alatala ri setu. Pade niwaina woꞌu ka roa-roana. Tapi kakonona nantuki Atura-atura agamata roti etu aga mamala rakoni topanggeni-topanggeni agama, daꞌa tau ntanina.”