Tau-tau topande nanggita betuꞌe narata mombasomba Yesus
2
Yesus niote ri ngata Betlehem ri Bagia Yudea tempo Magau Herodes noparenta. Naopu etu naratamo tau-tau topande nanggita betuꞌe nggari sabingga kamataeona mpaka ri ngata Yerusalem,
2 pade nekutanamo ira, “Ri umbamo ngana to niote etu to majadi Magau nto Yahudi? Kami nanggita betuꞌe to nompakanoto pesuwuna nebulu ri pebuluna pade naratamo kami mombasomba Iꞌa.”
3 Sangga nangepe tesa etu natekajamo Magau Herodes, pade waꞌa woꞌu pura-pura pue ngata Yerusalem.
4 Jadi Magau Herodes nompasiromu pura-pura balengga topanggeni agama bo guru-guru agama pade nipekutanana ka ira, “Ri umba ngata pesuwu Magau to Mompakasalama to nijanji Alatala?”
5 Nesonomo ira, “Ri ngata Betlehem ri Bagia Yudea, sabana naria tesa nitulisi nabi nggaolu iweꞌi:
6 ‘Iko ngata Betlehem ri Bagia Yudea,
iko daꞌa ntoto ngata to neliu nggakedi nggari ngata-ngata ri bagia Yudea.
Sabana nggari jaꞌimu kana meumba sambaꞌa topanggeniaka
to manggeniaka todeaku Israel.’” (Mi. 5:1)
7 Naopu etu Herodes nompokio nggalino tau-tau nggari kamataeona etu pade nipekutanana mpakabelo-belo tempo pebulu nu betuꞌe to nikita ira etu.
8 Naopu etu nipakauna ira mpaka ri ngata Betlehem. Niulina ka ira, “Kalaumo komi mangelo ngana etu mpakabelo-belo. Pade ane rarata komi Iꞌa, uli ka aku, ala aku woꞌu mamala malau mombasomba Iꞌa.”
9 Sangga nangepe tesa magau etu nanggaliwomo ira. Pade kitamo! Betuꞌe to nikita ira ri kamataeona nokolu ka ira sampe nenonto ri ntoto sapo to nipetoꞌo Ngana nggedi etu.
10 Tempo ira nanggita betuꞌe etu nadamba mpuꞌumo rara ira.
11 Sangga nesuapa ira rara njapo etu nikita iramo Ngana nggedi etu ante indona i Maria. Pade notimbakotumo ira nombasomba Iꞌa. Naopu etu nibuka iramo peti pomboli mbara-mbara ira, pade nipesomba ira ka Iꞌa pewai-pewai ira, etumo bulawa, bo rongele wongi to nasuli mpuꞌu olina to niuli kemenyan bo mur.
12 Naopu etu Alatala nompopanjani ka ira riara mpangipi ala neꞌe manjili mpaka ri jaꞌi Magau Herodes. Jadi nanjilimo ira nantuki jala ntanina.
Yusuf bo i Maria nanggeni Yesus nalai mpaka ri tana Masir
13 Sangga nanggaliwopa tau-tau topande nanggita betuꞌe etu naratamo sambaꞌa malaeka i Pue nompopokita korona ka Yusuf riara mpangipina pade nanguli, “Pembangumo, kenimo masalisa Ngana etu ante indona mpaka ri tana Masir. Petoꞌomo ri setu sampe aku marata motesa woꞌu ka iko. Sabana Magau Herodes nopatuju mangelo mompatesi Ngana etu.”
14 Jadi nembangumo Yusuf pade wengi etu woꞌu nikenina Ngana etu ante indona nalau mpaka ri tana Masir.
15 Pade netoꞌomo ira ri setu sampe Magau Herodes namate. Ante iwetu nadupamo tesa i Pue to niboto nabi nggaolu iweꞌi: “Aku nompokio Anaku ala Iꞌa momai nggari tana Masir.” a
Pompatesi ngana-ngana ri ngata Betlehem
16 Tempo nanotomo ka Magau Herodes iꞌa niakala tau-tau topande nanggita betuꞌe etu, narau mpuꞌumo rarana. Pade nipakauna tantarana malau mompatesi pura-pura ngana langgai noumuru rompae mpanaꞌu ri ngata Betlehem bo bagia ri ntalilina. Umuru ngana to nipatesi etu nantuki kasaena pebulu betuꞌe to ninjanina nggari jaꞌi tau-tau topande nanggita betuꞌe etu.
17 Ante kajadia etu nadupamo tesa i Pue to niboto nabi Yeremia nggaolu iweꞌi:
18 “Ri ngata Rama natiepe suara notumangi
bo nageo mpajea.
Etumo i Rahel nantangi ana-anana.
Iꞌa daꞌa madota rapakawoe rarana
sabana anana mana ria.” b (Yer. 31:15)
Yusuf bo i Maria nanggeni Yesus nanjili mpaka ri ngata Nazaret
19 Sangga namatepa Magau Herodes, naratamo sambaꞌa malaeka i Pue ri tana Masir nompopokita korona ka Yusuf riara mpangipina.
20 Niulina, “Pembangumo, kenimo Ngana etu ante indona bo panjilimo komi mpaka ri tana Israel, sabana namatemo tau-tau to madota mompatesi Iꞌa.”
21 Jadi nembangumo Yusuf pade nikeninamo Ngana etu ante indona nanjili mpaka ri tana Israel.
22 Tapi tempo iꞌa nangepe lele Arkhelaus, ana Magau Herodes nanjambei umana noparenta ri Bagia Yudea, naekamo rarana mapola ri setu. Naopu iꞌa nangepe popatora nggari jaꞌi Alatala riara mpangipina, nalaumo ira mpaka ri Bagia Galilea.
23 Pade netoꞌomo ira ri ngata to nosanga ka ngata Nazaret. Ante iwetu nadupamo tesa to niboto nabi-nabi nggaolu ewa Magau to Mompakasalama iweꞌi: “Iꞌa kana rauli tau to Nazaret.”