PUE Alatala nompakanoto ka Yunus Iꞌa nompotowe pura-pura manusia
4
Tempo Yunus nanggita i PUE Alatala nombabali nia-Na, nagigi bo narau mpu'umo rarana. 2 Pade nosambayamo iꞌa iweꞌi: "O, PUE Alatala, niuliku mamimo daꞌapa aku nalai nggari ngataku Komi kana mowia iwetu. Etu sampe aku nasalisa nalai mpaka ri ngata Tarsis. Sabana ninjaniku Komi naasi mata, neliu nggatowe, nandate posabara, neliu mpuꞌu towe belo-Mu, pade bate-batena nasadia mombabali nia-Mu mombasuku tau. 3 Jadi weꞌi-weꞌi patesimo aku, PUE Alatala, sabana aginapa aku mamate pade matuwu!”4 Tapi nesonomo i PUE, “Iko daꞌa masipato manggarau iwetu!”
5 Nangepe etu nalaimo Yunus nggari ngata etu mpaka ri sabingga pebuluna. Ri setu iꞌa nompowia saongu pakumpa, pade nekatokomo iꞌa nekaulu nompopea nuapa to majadi ri ngata Niniwe etu. 6 Naopu etu i PUE Alatala nompakatuwu sampuꞌu walaa to namala rapekaulu Yunus ala mompakasana rarana. Nadamba mpuꞌu rara Yunus nanggita walaa etu. 7 Tapi mpadondona njiina etu Alatala nompakarata sambaꞌa kawati nombabolo walaa etu sampe nalele. 8 Tempo eo nebulu Alatala nompopeburu poiri to napanena nggari pebuluna, pade wana eo etu nompandasa Yunus sampe sakedika nalipo rarana ante panjarumaka mamate. Niulina, “Aginapa aku mamate pade matuwu!”
9 Tapi nangulimo Alatala ka iꞌa, “Daꞌa masipato iko manggarau mompekiri walaa etu!”
Nesonomo i Yunus, “Marau mami! Masipato mami aku manggaru mpuꞌu sampe mamate!"
10 Pade notesa woꞌumo PUE Alatala ka iꞌa, “Walaa etu aga natuwu riara sambengi lau pade namate ri eo karoeona. Naupa iko daꞌa notuja bo nompiara walaa etu, nasusa woꞌu iko nanggita walaa etu nalele. 11 Iwenu Aku daꞌa masusa rara-Ku mompekiri ngata Niniwe to neliu nggabetena etu! Sabana ntanina nggari pompatuwu to nadea mpuꞌu, ri setu woꞌu nelabi nggari 120,000 mbaꞌa tau daꞌapa namala mompoposisala nuapa to nabelona bo nuapa to najaꞌana!”