Pue ngata Niniwe najeamo
3
Naopu etu notesa woꞌumo i PUE Alatala karongganina ka i Yunus, iweꞌi: 2 “Kalaumo iko mpaka ri Niniwe, ngata to nabetena etu, pade popatoramo ka ira tewai to Kutesa ka iko.”3 Nangepe etu nalaumo i Yunus mpaka ri ngata Niniwe nantuki to niparenta i PUE Alatala ka iꞌa. Ngata Niniwe etu neliu nggabete mpuꞌu. Paraluu tolueo molumako riarana. 4 Nesuamo i Yunus ri ngata bete etu bo nolumako njaneo ntua. Pade nompamulamo iꞌa nompasimbayu tesa i PUE Alatala ka pue ngata etu iweꞌi: “Patampulupa eona ngata Niniwe eꞌi kana rapakaropu.”
5 Tempo to Niniwe nangepe tewai Alatala etu, ira pura-pura nomparasaya tesa etu. Pade pura-pura todea nompakatantu ala ira kana mapuasa bo mompake baju nikawia nggari karu, nabelo ka totuꞌa nabelo ka ngana, ala mompopokita najeamo ira nggari silaka.
6 Tempo magau ngata Niniwe nangepe tewai to nipasimbayu Yunus, nanaꞌumo iꞌa nggari pekatoko kamagauna. Niwonjuna baju kamagauna bo nipasuana baju nggari karu, pade nekatoko ri sowu, tandaina nanjosomo rarana nantora silaka-silaka. 7 Naopu etu magau ante pangga-pangga betena nompakau wakele-wakelena nompatolele riara ngata etu iweꞌi: “Pura-pura tau riara ngata eꞌi ante japi, bimba bo pompatuwu ntanina, daꞌa mamala manggoni bara manginu. 8 Pura-pura to naria rarangata, nabelo ka manusia, nabelo ka binata woꞌu, ira pura-pura kana mompake kae karu ewa tandaina nanjoso raramo ira nantora silaka-silaka to nipowia ira. Ira pura-pura kana mekakai ka Alatala ante mpuꞌu-mpuꞌu rara. Pade ira woꞌu kana majea nggari pokainggu ira to najaꞌana bo powia ira nompandasa tau ntanina. 9 Sema nangginjani bara Alatala mombabali nia-Na pade mana manggarau kita sampe kita daꞌa rapakaropu-Na.”
10 Tempo Alatala nanggita powia pue ngata Niniwe, iwenu ira nompalasi pokainggu ira to najaꞌana, nabalimo nia-Na sampe daꞌa najadi nombasuku ira.