Yunus nosambaya bo nosukuru ri jaꞌi PUE Alatala
2
Riara ntaꞌi bau bete etu, i Yunus nosambaya ka i PUE Alatala to nisombana, niulina,2 “O PUE Alatala, riara nggasusaku aku nekakai ka Komi,
pade Komi nombasono posambayaku.
Riara nggasusakua aku nekakai merapi tulungi,
pade pomperapiku nipoiyo-Mu.
3 Aku nitajiaka-Mu ri tatongo tasi to nandalana,
pade aku nibungu winulu ue to naroꞌona.
Balumba bete-Mu batena nombatoro-toro aku.
4 Aku notesa riara ntaꞌiku, ‘PUE Alatala nompopalai aku nggari ngayo-Na.
Bara damamalapa aku manggita Sapo Mpepue-Na to nagasana?’ b
5 Aku natala nikeni balumba ntora namate,
pura-pura koroku nibungu ue ntasi.
Balenggaku niwewe kawoko to natuwu riara ntasi.
6 Aku nanawu riara ntasi sampe ri kandalana ntoto.
Nirasaiku ewa nitarunggu riara dunia ntomate sampe ri kasae-saena.
Tapi tempo etumo aku nipakasalama-Mu,
sampe aku daꞌa nesua ri dunia ntomate.
7 Tempo aku nalente ntora namate,
natetoramo aku ri jaꞌi-Mu PUE,
pade posambayaku niepe-Mu
riara sapo-Mu to nagasana.
8 Tau to nepue ka pue-pue ntanina to daꞌa ria gunana,
iramo to nompoara towe belo i PUE to nipakasadia ka ira.
9 Tapi aku kana mosukuru ri jaꞌi-Mu,
bo manggeni pesombaku ka Komi.
Pade nuapa-nuapa to nijanjiku ka Komi
etu kana kupowia,
sabana i PUEmo to nompakasalama.”
10 Naopu etu nantuki parenta i PUE Alatala bau bete etu nombaluaraka i Yunus ri wiwi ntalinti.