Tesa to Niboto
Nabi Yunus
Yunus daꞌa nantuki parenta PUE Alatala
1
Naria saeo notesamo i PUE Alatala ka i Yunus ana Amitai. 2 Niuli-Na, “Kalaumo iko mpaka ri Niniwe,a ngata to nabetena etu, ala mompopatora ka pue ngata ira kana rasuku, sabana ninjani-Kumo pokainggu ira neliu ngga ja'a.”3 Tapi Yunus daꞌa nadota, iꞌa aga nalai mpaka ri ngata Tarsis ala makawao nggari jaꞌi PUE Alatala. Nalaumo iꞌa mpaka ri ngata Yope nombarata sakaya bete malau mpaka ri ngata Tarsis. Naopu nombayari sewana, nesawimo i Yunus mpaka ri sakaya etu. Pade nalaumo iꞌa nosumomba mpasanggani-nggani ante tau-tau to nokarajaa riara sakaya bete etu mpaka ri Tarsis, ala makawao nggari jaꞌi PUE Alatala.
4-5 Nanaꞌumo i Yunus mpaka ri petoꞌo wayona ntoto riara sakaya bete etu pade naturu nalumpi. Tempo etu i PUE Alatala nompopeburu poiri naramboso mpaka ri tasi, pade nabalumba mpuꞌumo tasi nombarumpa sakaya bete etu sampe sakedika nagero. Naeka mpuꞌumo tau-tau to nokarajaa riara sakaya bete etu pade nongaremo ira sambaꞌa bo sambaꞌa nerapi tulungi ka pue-pue to niparasaya ira mboto. Pade nitijaka iramo pangulaya sakaya bete etu mpaka riara ntasi ala mompakangaꞌa sakaya bete etu.
6 Tempo topompajala sakaya bete etu nanaꞌu mpaka ri wayona niratana i Yunus danapisi. Nangulimo iꞌa, “Wenu iko mamala maturu malumpi tempo nasusa iweꞌi? Pembangumo! Posambayamo ka Alatalamu ala merapi tulungi. Bara Iꞌa to maasi mata-Na ri jaꞌita sampe kita daꞌa mamate!”
7 Tempo Yunus bo topompajala sakaya bete etu nepone mpaka ri baꞌana, notesamo tau-tau topokarajaa riara sakaya bete etu sambaꞌa bo sambaꞌa, “Kamaimo kita mompenoa mompowia lamoro ala ranjanita sema to nasalana sampe kita nombarata kasusa eꞌi!” Ira nantendeaka lamoro pade sanga Yunusmo to nawelana.
8 Pade nangulimo ira ka i Yunus, “Nakono komi niposabana kasusa eꞌi? Nuapa pokarajaa komi, bo nggari umba komi? Nggari umba tano ngatamu? Pade nakuya komi naria ri se'i?”
9 Nesonomo Yunus, “Aku tau to Ibranib. Aku nombasomba i PUE, Alatala ri suruga, to nompajadi tasi bo kabatana.” 10 Naopu etu nitesanamo iwenu iꞌa nompasimbuku nalai nggari jaꞌi PUE Alatala.
Nangepe etu nantambaimo wiora rara ira topokarajaa riara sakaya bete etu, pade nangulimo ira ka i Yunus, “Nokuya tano komi nompowia iwetu?” 11 Tempo etu balumba aga nantambai kabetena, jadi nekutanamo tau topokarajaa riara sakaya bete etu ka i Yunus, “Nuapa masipato rakawia kami ka komi ala balumba eꞌi maoto?”
12 Nesonomo Yunus, “Tajiakamo aku mpaka riara tasi pade natantumo balumba eꞌi kana maoto. Sabana ninjaniku akumo najadi sabana sampe poiri naramboso eꞌi nombarumpa komi.”
13 Tapi tau topokarajaa riara sakaya bete etu nompasimbuku nombawose sakaya bete etu mpaka ri kabatana. Tapi balumba aga nantambai kabetena sampe ira aga nalenge bayangi. 14 Pade nongaremo ira ka i PUE Alatala, “O PUE Alatala, neꞌe rapalamba kami maropu sabana nosa tau eꞌi. Neꞌe kami rareke nasala sabana mompatesi tau to daꞌa nowia sala ri jaꞌi kami. Sabana Komi PUE nompowia nuapa to nipodota-Mu.” 15 Naopu etu nitajiaka iramo i Yunus mpaka riara ntasi, pade kaliu-liu naotomo balumba etu. 16 Nanggita etu naeka mpuꞌumo tau-tau topokarajaa riara sakaya bete etu ri jaꞌi PUE Alatala. Sangga naratapa ira ri kabatana niwai iramo pesomba posukuru ka i PUE Alatala bo mpengele-ngele to nijanji ira ka I'a.
17 Tempo etu woꞌu i PUE Alatala nompakarata sambaꞌa bau bete nangome i Yunus. Jadi Yunus naria riara ntaꞌi bau bete etu tolueo bo tolumbengi kasaena.