Tesa Daniel bo Roa-roana
Tesa Nompakanoto Isi Buku
Buku Daniel e'i nitulisi samba'a to nosanga ka i Daniel. I'a samba'a tau to Yahudi muli magau to nisoko pade nikeni mpalai Magau Nebukadnezar mpaka ri tana Babel naopu magau etu nombadagi ngata Yerusalem, kira-kira mpae 605 S.M. Ri tana Babel Daniel nionggotaka najadi pangga bete riara poparenta Babel, pade nokarajaa ka bara sakuya mba'a magau. I'a nantulisi buku e'i kira-kira mpae 530 S.M., naopu poparenta Babel nidagi Magau Koresh ri mpae 539 S.M.
Tewai Daniel to napokona riara bukuna iwe'i: "Pue Alatala to Neliu Nggalanga to nakuasa riara poparenta manusia." (Daniel 5:21) Daniel nantulisi buku e'i ala mompakaroso rara tau to Yahudi, ala ira maroo momparasaya i Pue Alatala, naupa nikeni mpalai ri tana Babel.
Naria toluongu bagia to napokona riara buku e'i: 1) Tesa to nompakanoto iwenu Daniel bo tolumba'a roana to Yahudi nionggotaka najadi pangga bete riara poparenta Babel, pade kasusa to nirasai ira tempo nompasimbuku mantuki Pue Alatala ri tatongo todea bo poparenta to da'a nomparasaya Alatala. 2) Bara sakuya ngele panggita to nantesa poparenta to narosona to meumba ri dunia pade manawu banepia. 3) Panggita bo tesa nggari Alatala to nantesa nuapa majadi ka tau-tau to Yahudi tempo marata, pade to nantesa Anti Kristus to meumba tempo kaopu nu dunia.
Pasal 2:4-7:28 nitulisi riara basa Aram, etumo basa poparenta Babel to najadi basa nipake ri pura-pura bagia to nikuasai poparenta Babel. Pasal 1:1-2:3 bo pasal 8 sampe pasal 12 nitulisi riara basa Ibrani, etumo basa nto Yahudi, sabana sabagia bete pasal-pasal etu nantesa tau-tau to Yahudi.
Isi Buku to napokona iweꞌi:
1. Daniel bo roa-roana nikeni mpaka ri tana Babel (Pasal 1)
2. Nuapa to majadi ante tau-tau da'a to Yahudi (Pasal 2-7)
A. Pangipi Magau Nebukadnezar ewa pinoito bete (Pasal 2)
B. Pinoito bulawa to nipopenggore Magau Nebukadnezar (Pasal 3)
C. Pangipi Magau Nebukadnezar ewa kayu bete (Pasal 4)
D. Pale nantulisi ri leru tempo Magau Belsyazar (Pasal 5)
E. Daniel riara bololia singa (Pasal 6)
F. Pangipi Daniel ewa pataongu binata (Pasal 7)
3. Nuapa to majadi ante tau-tau to Yahudi (Pasal 8-12)
A. Panggita i Daniel ewa bimba bo towau (Pasal 8)
B. Posambaya i Daniel pade tesa nggari Alatala to nantesa 70 nomoro papitu (Pasal 9)
C. Tewai Alatala ka i Daniel ewa nuapa majadi ri jaꞌi todea to Yahudi tempo marata (Pasal 10-11)
D. Kaopu nu dunia (Pasal 12)