Tesa nompakanoto isi buku
Buku Mazmur eꞌi bagia Buku Nagasa Pojanji Nggasae to noiisi dade-dade bo posambaya-posambaya. Buku eꞌi nitulisi bara sakuya mbaꞌa tau riara tempo kira-kira sanjobu mpae. Dade-dade bo posambaya-posambaya eꞌi nipasiromu tau-tau to Israel pade nipake ira tempo nombasomba i PUE, pade kaopuna najadi bagia ri Buku Nagasa.
Isi buku eꞌi mpengele-ngele. Naria dade mantoiya i PUE, bo dade-dade mombasomba Alatala. Naria posambaya merapi tulungi nggari jaꞌi PUE. Naria posambaya merapi rakalendu bo rapakasalama Alatala. Naria posambaya merapi ampu nggari jaꞌi PUE, bo naria dade-dade mosukuru ri jaꞌi PUE sabana rasi-rasi to niwai-Na ka todea-Na. Naria woꞌu pomperapi ala bali-bali rasuku. Naria posambaya-posambaya nosinggawela ante sambaꞌa tau, bo naria ntanina to nosinggawela ante pura-pura todea.
Mazmur nipake i Pue Yesus bo topotulisi-topotulisi Buku Nagasa Pojanji Nabou. Buku Mazmur najadi buku dade to mpuꞌu-mpuꞌu nipokono bo nibila topomparasaya nggari ri pamulana naria kasiromu topomparasaya i Pue Yesus.
Isi buku to napokona iweꞌi:
150 Mazmur nibagi najadi alima bagia atau buku, iweꞌi:
-Buku Pamulana: Mazmur 1-41
-Buku Karonguna: Mazmur 42-72
-Buku Katoluonguna: Mazmur 73-89
-Buku Kaampana: Mazmur 90-106
-Buku Kaalimana: Mazmur 107-150
BUKU PAMULANA
Mazmur 1-41