Tesa Daniel bo Roa-roana
Kabilasa-kabilasa to Yahudi ri sapo Magau Nebukadnezar
1
Sangga nagana tolumpae Magau Yoyakim noparenta ri bagia Yehuda,a naratamo Nebukadnezar magau Babelb nombasuaki bo nantatiku kota Yerusalem. 2 Pue nompaloga iꞌa nombadagi Magau Yoyakim pade nombaꞌago sabagia nggari mbara-mbara to nasuli olina ri Sapo Mpepue. Pade tau-tau to nidagina etu nikeni mpaka ri ngata Babel, bo mbara-mbara to nasuli olina to niagona niboli riara sapo mpesomba ka wiata to nisombana.3 Pade nangulimo magau ka Aspenas balengga topojagai sapo magau, ala mangelo bara sakuya mbaꞌa tau to Israel to nopuꞌu nggari muli magau bo madika. 4 Ira kana kabilasa-kabilasa to nagana sipana bo to nagayana, pade to nosikola nalanga bo napande bo nadea kataꞌuna, to masipato mokarajaa riara sapo magau. Aspenas kana mompatuduki ira mombabasa bo motulisi basa to Babel.c 5 Pade magau nompakatantu panggoni bo panginu ira, nasimbayu ewa panggoni bo panginu to nipakasadia ka magau saongu njapo. Ane magana tolumpae ira rapatuduki, ira kana mantingayo magau ala mokarajaa ri sapo magau.
6 Ri olo kabilasa etu naria bara sakuya mbaꞌa tau to Yehuda to nosanga ka i Daniel, i Hananya, i Misael bo Azarya. 7 Balengga topojagai sapo magau nombasambei sanga-sanga ira. Daniel nipoposanga i Beltsazar,d i Hananya nipoposanga i Sadrak,e i Misael nipoposanga i Mesak,f pade Azarya nipoposanga Abednego.g
8 Daniel nompakatantu ala daꞌa mompakatantoru koronah ante panggoni bo anggur to nipakatantu magau. Sabana etu iꞌa nerapi tulungi ka Aspenas. 9 Ante petulungi Alatala, Daniel nipotowe bo nipoasi mata Aspenas. 10 Tapi nangulimo Aspenas ka i Daniel iweꞌi: “Naeka aku ri jaꞌi magau. Iꞌa mboto nompakatantu panggoni bo panginumu. Ane komi daꞌa manggoni panggoni bo panginu nu magau, iko daꞌa maroso ewa pura-pura kabilasa ntanina. Ane iwetu, natantumo aku rapatesi magau.”
11 Naliu etu notesamo Daniel ka topojagai to nipakatantu Aspenas mombaꞌurusi Daniel bo tolumbaꞌa roana. Niulina, 12 “Pembai ujimo kami sampulu eo kasaena. Wai ka kamimo aga uta bo ue majadi panggoni bo panginu. 13 Ane maganamo sampulu eona poposisalamo koro kami ante koro kabilasa-kabilasa to nanggoni panggoni to nipakatantu magau, pade kawiamo katantuna mantuki nuapa to mukita.” 14 Nasitujumo topojagai etu mombauji ira sampulu eo kasaena.
15 Sangga naopu sampulu eo etu, ira natikita neliu nggaroso nggari pura-pura kabilasa to nombarata panggoni nggari meja magau. 16 Nompamula nggari tempo etu, topojagai etu mana nombawai ka ira panggoni bo panginu anggur, tapi aga uta bayangi.
17 Alatala nombawai noto bo kapande ka ira patambaꞌa kabilasa riara basa bo pangginjani. Pade daꞌa aga etu, Daniel woꞌu niwai-Na ka noto ala mamala mombabatua panggita bo pangipi.
18 Sangga naopu tolumpae tempo posikola to nipakatantu magau etu, pura-pura kabilasa etu nikeni Aspenas mantingayo Magau Nebukadnezar. 19 Naopu magau notesa-tesa ante ira pura-pura, nikitana ri olo ira pura-pura daꞌa naria to nasimbayu ka i Daniel, i Hananya, i Misael bo Azariya. Pade nompamulamo ira nokarajaa ri sapo magau. 20 Butu nggani magau nantesa parakara to paraluu noto bo kataꞌu, nikitana pombarata bo kataꞌu patambaꞌa kabilasa etu, sampulu nggani pelabi kabelona nggari pombarata bo kataꞌu pura-pura topeanto bo sando ri pura-pura poparenta magau.
21 Daniel batena nokarajaa ri sapo magau sampe Magau Koresh nggari Persia nombadagi tana Babel.i