Pangipi Magau Nebukadnezar pamulana
2
Sangga nagana rompae Magau Nebukadnezar noparenta nangipimo iꞌa, pade pangipina etu nompakasusa rarana sampe iꞌa daꞌa namala naturu. 2 Sabana etu iꞌa nompokio pura-pura topeanto, sando, toposibali mata, bo tau-tau to nadea pangginjanina,a ala mombabatua pangipina etu. 3 Tempo ira nantingayo magau nangulimo iꞌa ka ira, “Aku nangipi pade nawulesa mpuꞌu raraku, sabana aku madota mangginjani batuana!”4 Nesonomo ira riara basa Aram,b “Perapi doa mandate umuru komi! Tesa ka kamimo pangipi komi, pade kami mompakanoto batuana.”
5 Nesonomo magau, “Nipakatantukumo komi kana mantesa pangipi etu ka aku ante batuana. Ane komi daꞌa mompakule, komi kana ratamba nggaoya pade sapo komi kana ragero mpakaopu. 6 Tapi ane komi mompakule, komi kana kuwai ka hadia to magaya-gayana bo pebila to nabetena. Jadi tesa ka akumo pangipiku etu ante batuana.”
7 Nesono woꞌumo ira, “Agina ratesa komi ka kami ruru pangipi komi etu, maopu etu pade ratesa kami ka komi batuana.”
8 Nangepe etu nesonomo magau, “Nakono mpuꞌu ewa to nipekiriku. Komi aga nompakasae-sae tempo bayangi, sabana ninjani komi aku nopatuju 9 mombasuku komi pura-pura ante akala nasimbayu ane komi daꞌa mompakule mantesa pangipi etu ka aku. Komi nasintuwu mombabagiu bo mompongei aku ante panjarumaka aku kana mombabali pekiriku. Jadi tesamo pangipi etu, ala kunjani komi mompakule mantesa batuana.”
10 Nesonomo pura-pura tau to nataꞌuna ri setu, “Ri njumaongu dunia daꞌapa ria kamba sambaꞌa tau namala mantesa nuapa to nipodota komi etu. Pade daꞌapa ntoto naria sambaꞌa magau nerapi ewa pomperapi komi etu. Naupa magau neliu kabete kuasana daꞌa nerapi nasimbayu ewa pomperapi komi etu ka pura-pura topeanto, bo tau nataꞌu nowia pangginjani jaꞌa, bo tau to nadea pangginjanina. 11 Komi nerapi sangele to nakajana mpuꞌu. Daꞌa ntoto naria sambaꞌa mamala manggawia etu, aga karampua to mamala mowia etu. Tapi ira daꞌa netoꞌo ri tatongo manusia.”
12 Nangepe etu narau mpuꞌumo rara magau, pade niparentana ala pura-pura tau to nataꞌu etu ri kota Babel rapatesi. 13 Parenta magau etu nipatolele, pade pura-pura tau to nataꞌuna nielo ala rapatesi. Iwetu woꞌu i Daniel ante roa-roana nielo ala rapatesi.
Alatala nompopanjani pangipi magau ante batuana ka Daniel
14 Pade nalaumo i Daniel nantingayo Ariokh, balengga topojagai magau to nasadiamo mompatesi tau-tau etu. 15 Nekutanamo i Daniel ri jaꞌina ante nainga-inga, “Nokuya magau nombasuwuraka parenta to najaꞌa etu?” Pade notesamo Ariokh ka i Daniel ewa nuapa to najadina.
16 Nangepe etu nalaumo i Daniel nasalisa-lisa nantingayo magau, pade niperapina ala i'a rawai ka loga mompakanoto batua pangipi etu. 17 Naopu etu natinggulimo i Daniel mpaka ri sapona, pade nitesana puramo kajadia etu ka i Hananya, i Misael bo Azarya. 18 Nipakauna ira nosambaya ka Alatala ri suruga ala maꞌasi mata-Na manggita ira, pade mompakanoto pangipi to nitabuniaka etu. Ante iwetu ira daꞌa rasuku mamate mosanggani-nggani ante pura-pura tau to nataꞌu ntanina ri kota Babel.
19 Nggawengina etu woꞌu Alatala nompopanjani ka i Daniel pangipi magau to nitabuniaka etu riara saongu panggita. Pade i Daniel nantoiya Alatala ri suruga. 20 Niulina,
“Ratoiyata sanga Alatala sampe ri kasae-saena,
sabana Iꞌamo to nanoto bo nakuasa.
21 Iꞌamo to nompakatantu tempo leni bo pane.
Iꞌamo to nangonggotaka bo nantaꞌuraka magau.
Iꞌamo to nombawai noto bo pangginjani.
22 Iꞌamo to nompakanoto anu to nitabuniaka.
Ninjani-Na puramo to naria riara karumauna.
Pade Iꞌa nibungu nu reme.
23 O Pue to nisomba ntotuꞌaku, Komi kutoiya bo kubila.
Sabana niwai-Mu ka aku noto bo kuasa.
Pomperapiku nipoiyo Komimo
pade nuapa to nompakasusa rara magau nipopanjani Komimo ka kami.”
Daniel nombabatua pangipi magau
24 Naopu etu nalaumo i Daniel mpaka ri jaꞌi Ariokh, tau to nipakatantu mompatesi tau-tau to nataꞌu ri ngata Babel. Nangulimo i Daniel ka iꞌa, “Neꞌe mompatesi tau-tau to nataꞌu etu. Tapi kenimo aku mantingayo magau, pade aku kana mantesa batua pangipi magau etu.”
25 Ante nasalisa-lisa Ariokh nanggeni i Daniel nalau nantingayo Magau Nebukadnezar, pade niulina, “Nirata batuamumo sambaꞌa to mamala mombabatua pangipi komi. Iꞌa nggari olo nto Yahudi to nisoko magau nikeni mpaka wemai.”
26 Nangulimo magau ka i Daniel to nidae i Beltsazar, “Mamala iko mantesa ka aku pangipi bo batuana woꞌu?”
27 Nesonomo i Daniel, “Magau, daꞌa ria sambaꞌa topeanto, sando, tau to nataꞌuna, bara tau to nataꞌu nanggita betuꞌe mamala mantesa etu ka komi. 28 Tapi ri suruga naria Alatala to nompopanjani pura-pura anu to nitabuniaka, pade Iꞌa nompopanjani ka komi nuapa to majadi ri tempo marata. Jadi weꞌi-weꞌi palogamo batuamu motarangga pangipi to nikita komi tempo naturu etu.
29 Tempo komi naturu neumba ri pekiri komi nuapa to majadi tempo marata. Pade Alatala to nakuasa mompakanoto anu nitabuniaka, nompopanjani ka komi nuapa to majadi banepia. 30 Batua nu pangipi etu niwai ka aku daꞌa sabana aku neliu nggataꞌu nggari pura-pura tau, tapi ala komi mamala mangginjani batua pangipi komi etu, pade mangginjani nuapa to neumba ri pekiri komi.
31 Iweꞌimo pangipi to nikita komi. Ri ngayo komi naria saongu pinoito. Pinoito etu nabete mpuꞌu bo nenggila pade lenjena nompakaeka rara. 32 Balenggana etu nikawia nggari bulawa daꞌa ria galona, palena bo bombarana sampe narata ri kopena nikawia nggari salaka, kopena sampe narata ri timpuna nikawia nggari tambaga, 33 loa nggadana nikawia nggari ase, bo tawa nggadana sabagia nggari ase bo sabagia nggari tana lei. 34 Tempo komi nombalelemata pinoito etu, saongu watu nateunggi nggari buluna daꞌa kamba nikajajui ntau, pade nombarumpa kada pinoito nggari ase bo tana lei etu sampe narege. 35 Tempo etu woꞌu ase bo tana lei, tambaga, salaka, bo bulawa narege nggaoya ewa kulimpae ri petoꞌo pomporo. Pade nitawui mpoiri daꞌa nikita waleana. Tapi watu to nombarumpa pinoito etu najadi saongu bulu bete pade nompakaponu njumaongu dunia.
36 Etumo pangipi komi, magau. Weꞌi-weꞌi aku mantesa batuana ka komi. 37 Magau to nibilaku, komimo magau to neliu nggakuasa nggari pura-pura magau. Alatala ri suruga nombawai ka komi poparenta eꞌi, pade niwai-Na ka komi kakuasa, karoso, bo pebila. 38 Komi niwai-Na ka kuasa moparenta pura-pura manusia, binata-binata bo tonji-tonji ri laerawa. Komi etumo balengga bulawa nggari pinoito etu. 39 Tapi ane poparenta komi maopumo, kana meumba poparenta ntanina daꞌa nasimbayu kakuasana ewa poparenta komi.c Pade meumba woꞌumo poparenta katoluonguna to nirapaka ewa tambaga ri pinoito etu, to mombakuasai njumaongu dunia.d 40 Pade kana meumba woꞌumo poparenta kaampana to maroso ewa ase. Pade ewa ase nompakarege bo nompakaoya nuapa-nuapa, wetu woꞌu poparenta kaampana eꞌi mompakarege bo mompakaoya poparenta-poparenta ntanina etu.e 41 Nikita komi kada bo koya-koya nggada nggari pinoito nggari ase bo tana lei. Etu mompakanoto poparenta etu kana matibagi-bagi. Poparenta etu naria woꞌu karosona, sabana nikita komi tana lei etu naria galona ante ase. 42 Koya-koya nggada nggari ase bo nggari tana lei batuana poparenta etu maria to narosona pade maria woꞌu to nalentena. 43 Nikita komi ase bo tana lei etu niposigalo. Etu mompakanoto poparenta etu kana mompasimbuku mompakaroso poparentana ante porongo mosigalo ka tau nggari poparenta ntanina. Tapi powia ira etu daꞌa maria aselena, ewa ase woꞌu daꞌa namala nosaongu ante tana lei.f
44 Tempo magau-magau etu moparenta, Alatala ri suruga kana mompajadi poparenta to maroo sampe ri kasae-saena, to daꞌa namala radagi pura-pura ngata ntanina. Poparenta etu kana mompakarege bo mompakaoya pura-pura poparenta ntanina. Tapi poparenta etu mboto kana maroo sampe ri kasae-saena.g 45 Etumo batuana watu nateunggi nggari bulu daꞌa nikajajui ntau. Ewa nikita komi, watu etu nombarumpa bo nompakarege pinoito nggari ase, tambaga, tana lei, salaka bo bulawa. Alatala to Neliu Nggabete nompakanoto ka komi nuapa to majadi banepia. Pangipi etu nakono, pade batuana namala raparasaya.”
46 Nangepe etu nekadedemo Magau Nebukadnezar ri ngayo i Daniel nombabila iꞌa. Pade niparentana ala i Daniel rawai ka pesomba-pesomba, pade dupa ratunju ka iꞌa ala mombabila iꞌa. 47 Nangulimo magau ka i Daniel, “Mpuꞌu-mpuꞌu Alatalamu etu neliu nggabete nggari pura-pura pue. Iꞌamo to neliu nggakuasa nggari pura-pura magau, pade Iꞌamo to nompakanoto pura-pura to daꞌa ninjani manusia. Ninjaniku etu sabana iko nompakule notarangga ka aku anu to nitabuniaka etu.”
48 Naopu etu niwaina ka i Daniel pekatoko to nalangana, bo niwaina ka hadia to nagaya-gayana, bo nionggotakana najadi gubernur ri Babel. Pade nipajadina topanggeniaka to neliu nggalangana nggari pura-pura tau to nataꞌuna ri Babel. 49 Nantuki pomperapi i Daniel magau nangonggotaka i Sadrak, i Mesak, bo Abednego noparenta ri Propinsi Babel. Tapi i Daniel mboto naroo ri ngata Babel nosanggani-nggani ante magau.